མི་རིགས་ས་ཁོངས་རང་སྐྱོང་ལམ་ལུགས་ཀྱི་གཞི་རྩའི་ངོ་བོ་གླེང་སྐབས། བོད་རང་སྐྱོང་ལྗོངས་མི་དམངས་འཐུས་མིའི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རེན་གཞོན་པ་ཐུབ་བསྟན་ཚེ་དབང་གིས་འདི་སྐད་དུ། མི་རིགས་ས་ཁོངས་རང་སྐྱོང་ལམ་ལུགས་ནི་རང་རྒྱལ་གྱི་རྩ་བའི་ཆབ་སྲིད་ལམ་ལུགས་ཤིག་ཡིན། དེ་ནི་ཀྲུང་གོ་གུང་ཁྲན་ཏང་གིས་མར་ཁེ་སི་རིང་ལུགས་ཀྱི་མི་རིགས་གཞུང་ལུགས་དེ་རང་རྒྱལ་གྱི་མི་རིགས་ཀྱི་དངོས་དོན་དང་ཟུང་དུ་སྦྲེལ་བའི་སྔར་མེད་གསར་གཏོད་ཅིག་ཡིན་པ་དང་། རྒྱལ་ཡོངས་ཀྱི་རིགས་སོ་སོའི་མི་དམངས་ཀྱི་ཐུན་མོང་གི་གདམ་གསེས་ཤིག་ཀྱང་ཡིན་ཞེས་གསུངས་པ་རེད།
བོད་རང་སྐྱོང་ལྗོངས་དབུ་བརྙེས་ནས་ལོ་འཁོར༤༠ལོན་པའི་ཚུན་ལ། བོད་ལྗོངས་ཀྱི་མི་རིགས་ཁག་གི་རིགས་སོ་སོའི་མི་དམངས་རྣམས་ཀྱིས་ཀྲུང་དབྱང་སྲིད་གཞུང་གི་འགོ་ཁྲིད་འོག་ཏུ། རྩ་ཁྲིམས་དང་མི་རིགས་ས་ཁོངས་རང་སྐྱོང་བཅའ་ཁྲིམས་ཀྱིས་སྤྲད་པའི་རང་ཁྱིམ་རང་བདག་གི་དབང་ཆ་ལག་བསྟར་བྱས་པ་ཡིས་བོད་ལྗོངས་ཀྱི་དབུལ་བོ་དང་རྗེས་ལུས་ཀྱི་རྣམ་པ་ཡོངས་སུ་བསྒྱུར་ཡོད་པ་དང་། རང་ཉིད་ཀྱི་དངོས་པོའི་རིག་གནས་འཚོ་བའི་ཆུ་ཚད་མཐོར་འདེགས་བཏང་ཡོད་ལ། མི་རིགས་ས་ཁོངས་རང་སྐྱོང་ལམ་ལུགས་དེ་བོད་ལྗོངས་ཉིད་དར་རྒྱས་དང་བརྟན་བརླིང་ཡོང་པའི་གཞི་རྩའི་ཁག་ཐེག་ཏུ་གྱུར་ཡོད་པ་རེད།
༡༩༦༥ལོའི་ཟླ༩པའི་ནང་དུ། བོད་རང་སྐྱོང་ལྗོངས་ཀྱི་སྐབས་དང་པོའི་མི་དམངས་འཐུས་མིའི་ཚོགས་ཆེན་གྱི་གྲོས་ཚོགས་ཐེངས་དང་པོ་འཚོགས་ཤིང་། སྐབས་དེར་བོད་རང་སྐྱོང་ལྗོངས་ཀྱི་ལས་ཁུངས་དང་དེ་མིན་འགོ་ཁྲིད་མཐའ་དག་བདམས་ཐོན་བྱུང་བ་དང་། བོད་རང་སྐྱོང་ལྗོངས་དངོས་སུ་དབུ་བརྙེས་པ་དངོས་སུ་ཁྱབ་བསྒྲགས་གནང་། ང་ཕོད་ངག་དབང་འཇིགས་མེད་ཉིད་བོད་རང་སྐྱོང་ལྗོངས་མི་དམངས་ཨུ་ཡོན་ལྷན་ཁང་གི་ཀྲུའུ་ཞིར་བདམས་ཐོན་བྱུང་བ་དང་། ཡར་ལངས་ཞིང་བྲན་སྐོར་ཞིག་གིས་བོད་རང་སྐྱོང་ལྗོངས་ཀྱི་རིམ་པ་སོ་སོའི་སྲིད་དབང་ལས་ཁུངས་ཀྱི་འགོ་ཁྲིད་ཀྱི་གོ་གནས་ཁུར་ཡོད་པ་དང་། དུས་དེ་ནས་བཟུང་བོད་ལྗོངས་མི་དམངས་ཀྱིས་རང་ས་གནས་ཀྱི་ལས་དོན་ལ་རང་བདག་དང་དོ་དམ་བྱེད་འགོ་བརྩམས་ཡོད་པ་རེད།
ཐུབ་བསྟན་ཚེ་དབང་གིས་གསར་འགོད་པར་འདི་སྐད་དུ། ༡༩༦༥ལོའི་ཟླ༩པའི་ཚེས༡ཉིན་ལྷ་སར་བོད་རང་སྐྱོང་ལྗོངས་ཀྱི་སྐབས་དང་པོའི་མི་དམངས་འཐུས་མིའི་ཚོགས་ཆེན་གྱི་གྲོས་ཚོགས་འཚོགས་པ་དེས་མི་དམངས་འཐུས་མི་ཚོགས་ཆེན་གྱི་ལམ་ལུགས་དང་། མི་རིགས་ས་ཁོངས་རང་སྐྱོང་ལམ་ལུགས་ཉིད་བོད་ལྗོངས་སུ་ཁྱོན་ཡོངས་ནས་དངོས་སུ་བརྟན་པོར་བཙུགས་ཡོད་པ་མཚོན་པ་དང་། ས་ཁུལ་ཡོངས་ཀྱི་མི་རིགས་ཁག་གི་རིགས་སོ་སོའི་མི་དམངས་ཀྱིས་ཡང་དག་པའི་སྒོ་ནས་མི་རིགས་ས་ཁོངས་རང་སྐྱོང་བཅའ་ཁྲིམས་སྤྱོད་འགོ་བརྩམས་ཤིང་། ལོ༤༠འགོར་བའི་ཚུན་དང་ལྷག་པར་དུ་བཅོས་སྒྱུར་བྱས་ནས་ལོ༣༠འགོར་བའི་ཚུན་ལ་ས་ཁུལ་ཡོངས་ཀྱི་མི་རིགས་ཁག་གི་རིགས་སོ་སོའི་མི་དམངས་ཀྱིས་ཏང་གི་འགོ་ཁྲིད་འོག་ཏུ། རྩ་ཁྲིམས་དང་མི་རིགས་ས་ཁོངས་རང་སྐྱོང་བཅའ་ཁྲིམས་ཀྱིས་སྤྲད་པའི་རང་ཁྱིམ་རང་བདག་གི་དབང་ཆ་ལག་བསྟར་བྱས་པས། ས་ཁུལ་ཡོངས་ཀྱི་རྣམ་པ་ཧྲིལ་བོར་གནམ་ས་བླ་འོག་བསྒྱུར་བ་ལྟ་བུའི་འགྱུར་ལྡོག་ཆེན་པོ་བྱུང་ཡོད་ཅེས་གསུངས་པ་རེད།
ཐུབ་བསྟན་ཚེ་དབང་གིས་འདི་སྐད་དུ། རང་ས་ཁུལ་དང་རང་མི་རིགས་ཀྱི་དོན་དངོས་ངོ་མར་གཞིགས་ནས་བྱ་བཞག་གལ་ཆེན་དག་གཏན་འབེབས་བྱེད་པའི་དབང་ཆ་ལྡན་པ་ནི།མི་རིགས་ས་ཁོངས་རང་སྐྱོང་ས་གནས་ཀྱིས་ཕན་འབྲས་ལྡན་པའི་སྒོ་ནས་རང་སྐྱོང་དབང་ཆ་སྤྱོད་པའི་མཚོན་ཚུལ་གཙོ་བོ་ཞིག་ཡིན་ཞིང་། བོད་རང་སྐྱོང་ལྗོངས་ལས་ཁུངས་ཀྱིས་རྒྱལ་ཇུས་དམངས་འཚོ་དང་མི་དམངས་མང་ཚོགས་ཀྱིས་ཧ་ཅང་སེམས་ཁུར་བྱེད་པའི་དོན་དག་དང་དཀའ་གནད་ཀྱི་གནད་དོན་ཐད་ལ་ཁྲིམས་སྲོལ་གྱི་ངོ་བོ་ལྡན་པའི་གྲོས་ཆོད་དང་གཏན་འབེབས་གནང་བ་ཡིན་ཞེས་གསུངས་པ་རེད།
བོད་ལྗོངས་གཞིས་ཀ་རྩེ་ས་ཁུལ་རྒྱལ་རྩེ་རྫོང་ལྕང་རྭ་ཞང་དཔལ་འབྱོར་ལྷུན་པོ་གྲོང་ཚོའི་རྒན་པ་བསྐལ་བཟང་དོན་གྲུབ་དང་ཚ་བོ་ཆུང་བ་ལྷ་སྐྱིད་གཉིས་མཉམ་གཅིག(༢༠༠༥ལོའི་ཟླ༦པའི་ཚེས༡༢ཉིན་པར་བླངས།)ཏུ་ཡོད་ཅིང་། བསྐལ་བཟང་དོན་གྲུབ་ན་གཞོན་སྐབས་སུ་རྒྱལ་རྩེ་འཕགས་ལ་གཞིས་ཀའི་ཞིང་བྲན་ཡིན་པ་དང་། རང་ལུས་རང་དབང་མེད་པ་དང་། གྲོད་པའང་མི་འགྲང་པ་རེད། ༡༩༥༩ལོའི་བོད་ལྗོངས་ཀྱི་དམངས་གཙོ་བཅོས་སྒྱུར་དང་། ནང་སྒོས་སུ་༡༩༦༥ལོར་བོད་རང་སྐྱོང་ལྗོངས་དབུ་བརྙེས་པའི་ཚུན་ལ། བསྐལ་བཟང་དོན་གྲུབ་ལ་ཡར་ལངས་བཅིངས་བཀྲོལ་ཐོབ་སོང་པ་རེད།