ལྷ་ས་འབྲིང་རིམ་མི་དམངས་ཁྲིམས་ཁང་ལག་བསྟར་ཅུས་ཀྱིས། འདི་ལོ་95%ཡན་གྱི་གྱོད་གཞིའི་གྱོད་འབྲེལ་དངུལ་ཚང་མ་དོ་བདག་ལ་སྤྲད་ཐུབ་པ།
སྤེལ་དུས 2018-12-19
ཡོང་ཁུངས། བོད་ལྗོངས་ཁྲིམས་ལུགས་ཚགས་པར།
རྩོམ་པ་པོ། ཚེ་རིང་གིས་བསྒྲིགས།
ལྷ་ས་འབྲིང་རིམ་མི་དམངས་ཁྲིམས་ཁང་ལག་བསྟར་ཅུས་ཀྱིས“ཐོགས་མེད་བགྲོད་ལམ”བཏོད་དེ། སྔོན་དུ་གྱོད་དོན་ཐོ་འགོད་དང་། སྔོན་དུ་ལག་བསྟར། སྔོན་དུ་དངུལ་སྤྲོད་བཅས་ཀྱི་རྩ་དོན་མཐའ་འཁྱོངས་བྱས་ནས། འདི་ལོའི་ཟླ་12ཚེས་5ཉིན་བར། ལྷ་ས་འབྲིང་རིམ་མི་དམངས་ཁྲིམས་ཁང་ལག་བསྟར་ཅུས་ཀྱིས་ངལ་རྩོལ་རྩོད་གཞིའི་ལག་བསྟར་གྱོད་གཞི་48བདག་སྤྲོད་བྱས་པ་དང་། དེའི་ཁྲོད་དུ་བཟོ་པའི་གླ་ཆ་དང་འབྲེལ་བའི་གྱོད་གཞི་44དང་ལས་རྨས་གུན་གསབ་ཀྱི་གྱོད་གཞི་4ཡོད་པ་དང་། གྱོད་མཇུག་འགྲིལ་བའི་གྱོད་གཞི་47ཟིན་པ། ཁྱོན་དངུལ་སྒོར་2414408.35སྤྲད་ནས། དངོས་སུ་དོན་འཁྱོལ་ཐུབ་ཚད་95%ཟིན་པ་དང་། གྱོད་གཞི་95%ཡན་གྱི་གྱོད་འབྲེལ་དངུལ་ཚང་མ་སྤྲད་པ་དང་འབྲེལ། གྱོད་གཞི་ཐག་གཅོད་མཇུག་འགྲིལ་ཡོད། དེ་འདྲའི་ནུས་ཆེའི་ལག་བསྟར་ལས་དོན་ལ་ངལ་རྩོལ་པ་དང་ཞིང་པ་ལས་མིའི་རྒྱ་ཁྱབ་ཀྱི་གདེང་འཇོག་ཐོབ་ནས་ལག་བསྟར་འདུན་ཞུ་བྱེད་མཁན(ངལ་རྩོལ་པ)5ཡིས་ལག་བསྟར་ཁྲིམས་དཔོན་ལ་གོས་དར་སྤྲད་པ་དང་། པེ་ཅིང་དུ་ཡོད་པའི་ལག་བསྟར་འདུན་ཞུ་བྱེད་མཁན་གཅིག་གིས་ཆེད་མངགས་ཐུགས་རྗེ་ལེགས་འབུལ་ཞུ་ཡིག་བསྐུར་ནས་ལག་བསྟར་ཁྲིམས་དཔོན་གྱིས་ལས་འགན་གཙང་སྒྲུབ་བྱས་པར་ཐུགས་རྗེ་ཆེ་ཞུས་པ་རེད།
ལྷ་ས་འབྲིང་རིམ་མི་དམངས་ཁྲིམས་ཁང་ལག་བསྟར་ཅུས་ཀྱིས་སྔ་བར་ཕྱི་གསུམ་དུ་ཉམས་ཞན་ཚོགས་སྤྱིའི་ཁེ་ཕན་ལ་དོ་ཁུར་བྱས་ནས་སྲིད་གཞུང་ལ་ལག་བསྟར་རོགས་སྐྱོབ་དངུལ་འདུན་ཞུ་གང་ཐུབ་བྱས་པ་རེད།
ཉམས་ཞན་ཚོགས་སྤྱི་དེ་དག་ལ་ལྷ་ས་འབྲིང་རིམ་མི་དམངས་ཁྲིམས་ཁང་ལག་བསྟར་ཅུས་ཀྱིས་བརྟན་ལྷིང་སྲུང་སྐྱོང་དང་ཁྲིམས་འཛིན་མི་ཆོས་ཀྱི་ཐུགས་ཁུར་སེམས་པ་བཅངས་ནས་གོང་རིམ་གྱི་འབྲེལ་ཡོད་དགོངས་དོན་དང་བྱེད་ཐབས་གཞིར་བཟུང་། ལག་བསྟར་གྱི་རོགས་སྐྱོབ་དངུལ་བརྩོན་ལེན་བྱེད་གང་ཐུབ་བྱས་ཏེ། དམིགས་བསལ་དཀའ་ངལ་ཡོད་པའི་ལག་བསྟར་འདུན་ཞུ་མཁན་ལ་རོགས་སྐྱོབ་བྱེད་པའི་རྣམ་པའི་ཐོག་ནས་གྱོད་གཞི་ལག་ལེན་བསྟར་རྒྱུར་སྐུལ་འདེད་བཏང་བ་རེད། 2018ལོར། ལྷ་ས་འབྲིང་རིམ་མི་དམངས་ཁྲིམས་ཁང་ལག་བསྟར་ཅུས་ཀྱིས་ཆ་རྐྱེན་དང་མཐུན་པའི་དོ་བདག་གཉིས་ལ་ལག་བསྟར་རོགས་སྐྱོབ་དངུལ་སྒོར་ཁྲི་10སྤྲད་དེ་ངལ་རྩོལ་པ་དང་ཞིང་པ་ལས་མིའི་ཁ་ཚ་དགོས་གཏུག་གི་གནད་དོན་ཐག་གཅོད་བྱེད་རོགས་བྱས་པ་རེད།
2018ལོའི་ཟླ་བཅུ་གཉིས་ནས་2019ལོའི་ཟླ་གསུམ་པ་བར། ལྷ་ས་འབྲིང་རིམ་མི་དམངས་ཁྲིམས་ཁང་དུ་ངལ་རྩོལ་རྩོད་གཞིའི་གྱོད་གཞི་དང་ངལ་རྩོལ་གླ་ཆ་འདེད་པའི་རྩོད་གཞིའི་གྱོད་གཞི་ཧ་ཅང་མང་དུ་འགྲོ་རྒྱུ་རེད། ངལ་རྩོལ་རྩོད་གཞི་ལག་བསྟར་གྱི་གྱོད་གཞི་མང་བ་དང་སྤྱི་ཚོགས་བདེ་འཇགས་ལ་གནོད་འཚེ་བཟོ་བར་བསམས་ནས། གོམ་སྟབས་རྗེས་མར། ལྷ་ས་འབྲིང་རིམ་མི་དམངས་ཁྲིམས་ཁང་ལག་བསྟར་ཅུས་ཀྱིས་ལྷ་ས་གྲོང་ཁྱེར་མི་དམངས་ཁྲིམས་ཁང་ལག་བསྟར་ཅུས་ལ་རྐང་འཛིན་པ་མཉམ་རུབ་དང་། ལག་བསྟར་ལས་དོན་གྱི་བྱེད་ཐབས་ལ་སྣང་ཆེན་བྱས་ཏེ་བཙན་ཐབས་དང་ཞི་འཇམ་གྱི་སྒོ་ནས་ལག་ལེན་བསྟར་རྒྱུ་ཟུང་འབྲེལ་བྱས་ཏེ། ཞིང་པ་ལས་མིའི་གླ་ཆ་འགྱངས་ཆད་ལ་བཅོས་སྐྱོང་བྱེད་པའི་ཆེད་དོན་བྱེད་སྒོ་གོ་རིམ་ལྡན་པའི་ངང་སྤེལ་རྒྱུའི་འགན་ལེན་བྱེད་དགོས་པའི་རེ་བ་བཏོན་པ་རེད།