བོད་ཀྱི་གནའ་ཁྲིམས་སྐོར།
སྤེལ་དུས 2017-08-30
ཡོང་ཁུངས། དུང་དཀར་ཚིག་མཛོད་ཆེན་མོ།
རྩོམ་པ་པོ། ནོར་བུས་བསྒྲིགས།
ཁྲིམས་ཆེན་དྲུག ༡ མི་སྲོག་མི་གཅོད་པ། ༢ གཞན་ནོར་མི་རྐུ་པ། ༣ རྫུན་མི་ཤོད་པ། ༤ ལོག་གཡེམ་མི་སྤྱོད་པ། ༥ ཆང་མི་འཐུང་བ་སྟེ་གཏན་ཁྲིམས་ལྔ་དང་། ༦ ཁེང་མི་ལྡོག་པ་བཅས་སྔར་བོད་རྗེ་སྲོང་བཙན་སྒམ་པོས་བཅས་པའི་ཁྲིམས་ཆེན་དྲུག་ཅེས་གྲགས།ཁྲིམས་ཆེན་བདུན། ༡ མི་སྲོག་མི་གཅོད་པ། ༢ གཞན་ནོར་མི་རྐུ་པ། ༣ རྫུན་མི་ཤོད་པ། ༤ ག་གཡེམ་མི་སྤྱོད་པ། ༥ ཆང་མི་འཐུང་བ་སྟེ་གཏན་ཁྲིམས་ལྔ་དང་། ༦ ཁེང་མི་ལྡོག་པ། ༧བང་སོ་མི་དྲུག་བ་གཉིས་བཅས་སྔར་བོད་རྗེ་སྲོང་བཙན་སྒམ་པོས་བཅས་པའི་ཁྲིམས་བདུན་ཞེས་གྲགས། ཁྲིམས་ན་ལྔ། ༡ ཁྲི་རྩེ་འབུམ་བཞེར་གྱི་ཁྲིམས།༢སྟོང་འཇམ་ཆུན་ལག་གི་ཁྲིམས། ༣ བཀའ་ལུང་རྒྱལ་ཁྲིམས། ༤ དབང་ཆེན་བཅད་ཀྱི་ཁྲིམས། ༥ འབྲོ་བཟའ་བྱང་ཆུབ་ཀྱི་ཁྲིམས་བུ་ཆུང་བཅས་ཡིན། དེ་རྣམས་ཀྱི་གོ་དོན་མིང་ཚིག་སོ་སོའི་ཐད་དུ་བཀོད་ཡོད། ཁྲིམས་ཡིག་དྲུག ༡ ཁྲི་རྩེ་འབུམ་བཞེར་གྱི་ཁྲིམས།༢ འབུམ་གསེར་ཐོག་ཤ་བ་ཅན་གྱི་ཁྲིམས། ༣ རྒྱལ་ཁམས་དཔེར་བླངས་ཀྱི་ཁྲིམས། ༤ མདོ་ལོན་ཞུ་བཅད་ཀྱི་ཁྲིམས། ༥ དབང་ཆེན་བཅད་ཀྱི་སྤྱི་ཁྲིམས། ༦ ཁབ་སོ་ནང་བའི་ཁྲིམས་སོ།།