སྦག་སྦག་འཁོར་ལོ་རྐུན་མས་ཁྱེར། དོ་དམ་མཁན་གྱིས་སྐྱིན་ཚབ་སྤྲད།
སྤེལ་དུས 2017-08-30
ཡོང་ཁུངས། ཀྲུང་གོའི་བོད་ཀྱི་དྲ་བ།
རྩོམ་པ་པོ། ནོར་བུས་བསྒྲིགས།
ཚེ་རིང་ལ་བཅོལ་བའི་སྦག་སྦག་འཁོར་ལོ་དེ་བོར་སོང་། བདག་པོ་འབྲུག་བྷེ་ཡིས་བཅོལ་གླ་སྒོར་༥༠སྤྲད་ཡོད་པས་ཁྲིམས་ཁང་ལ་གཏུག་བཤེར་བྱས་པ་དང་། ཁྲིམས་ཁང་གིས་ཚེ་རིང་གིས་སྐྱིན་ཚབ་སྤྲོད་དགོས་པས་ཐག་བཅད། སྤྱི་ལོ་༢༠༠༢ལོའི་ཟླ་༡༠པའི་ཚེས་༡༧ཉིན་རྫོང་ག་གེ་མོའི་འབྲུག་བྷེ་དང་མགྲོན་ཁང་ག་གེ་མོའི་སྒོ་སྲུང་ཚེ་རིང་གཉིས་ཀྱིས་ངག་ཐོག་གྲོས་ཆད་བྱས་ཏེ། འབྲུག་བྷེ་ཡི་ཡུན་ཀང་༡༢༥རྟགས་ཅན་གྱི་སྦག་སྦག་འཁོར་ལོ་ཚེ་རིང་ལ་བཅོལ་བ་དང་བཅོལ་གླ་ཟླ་རེ་རེ་སྒོར་༣༠སྤྲོད་རྒྱུ་བྱས་པའི་མོད་ལ་སྒོར་༥༠སྤྲད། སྤྱི་ལོ༢༠༠༢ལོའི་ཟླ་༡༢པའི་ཚེས་༢༦ཉིན་སྦག་སྦག་འཁོར་ལོ་རྐུན་ལ་ཤོར། ཚེ་རིང་གིས་སྤྱི་བདེ་ལས་ཁུངས་ལ་གྱོད་དོན་སྙན་ཞུ་ཕུལ་ཡང་ལག་སོན་མ་བྱུང་། སྤྱི་ལོ་༢༠༠༣ལོའི་ཟླ་༢པའི་ཚེས་༡༣ཉིན་ཁོ་གཉིས་ཀྱིས་གྲོས་བྱས་མཐར་ཚེ་རིང་གིས་འབྲུག་བྷེ་ལ་སྐྱིན་ཚབ་སྒོར་༢༣༠༠སྤྲོད་རྒྱུའི་གྲོས་མཐུན་བྱུང་མོད། ཁོར་སྒོར་མོ་༣༠༠མ་གཏོགས་སྤྲོད་རྒྱུ་མེད་པས་ལྷག་མ་ཆད་ཡིག་ཅིག་བྲིས་ནས་བཞག ཚེ་རིང་གི་སེམས་ལ་སྐྱིན་ཚབ་ཧྲིལ་བོ་ཁུར་དགོས་དོན་མེད་ལ། ཆད་ཡིག་དེའང་བཙན་གྱིས་འབྲི་རུ་བཅུག་པ་ཡིན་སྙམ་ནས་མ་སྤྲད། འབྲུག་བྷེ་ཡིས་ཆད་དངུལ་མ་ལོན་པས་ཚེ་རིང་ཁྲིམས་ཁང་ལ་གཏུག་བཤེར་བྱས། སྤྱི་ལོ་༢༠༠༣ལོའི་ཟླ་༧པའི་ཚེས་༡༥ཉིན། རྫོང་དེའི་ཁྲིམས་ཁང་གིས་ཚེ་རིང་གིས་ངེས་པར་དུ་དོ་དམ་གྱི་འགན་ཁུར་དགོས་པ་མ་ཟད་སྐྱིན་ཚབ་སྤྲོད་དགོས་པའི་ཁྲིམས་ཐག་བཅད། ཁྲིམས་ལྟར་ན་ཕྱོགས་གཉིས་ཀྱིས་རང་འཐད་དང་འདྲ་མཉམ་གྱི་རྩ་དོན་འོག་བཞག་པའི་ངག་ཐོག་གི་བདག་གཉེར་གན་རྒྱ་ནི་ཕྱོགས་གཉིས་ཀྱི་དོ་བདག་པའི་བསམ་དོན་ངོ་མ་མཚོན་ཡོད་པ་དང་། ཁྲིམས་དང་མཐུན་ལ་གོ་ཆོད་པ་ཡིན་པས་བཅའ་ཁྲིམས་ཀྱིས་སྲུང་སྐྱོབ་བྱེད་འོས། ཕྱོགས་གཉིས་ཀྱིས་གན་རྒྱ་ལག་བསྟར་བྱེད་སྐབས། འབྲུག་བྷེ་ཡིས་བདག་གཉེར་བྱེད་པའི་གླ་སྤྲད་ཡོད་པས་ཚེ་རིང་གིས་ངེས་པར་དུ་བདག་གཉེར་བཟང་པོ་བྱེད་དགོས། ཡིན་ནའང་རྒྱ་ཡན་དུ་བཏང་བའི་རྐྱེན་གྱིས་དངོས་པོ་རྐུན་ལ་ཤོར་བ་རེད། 《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་གན་རྒྱའི་བཅའ་ཁྲིམས》ཀྱི་དོན་ཚན་༣༧༤པའི་ནང་། དོ་དམ་བྱེད་པའི་དུས་ཡུན་ནང་། དོ་དམ་མཁན་གྱིས་དོ་དམ་བྱས་པ་མི་བཟང་བའི་རྐྱེན་གྱིས་དོ་དམ་དངོས་པོ་ལ་ཆག་སྐྱོན་དང་མེད་བརླག་བྱུང་ན། དོ་དམ་མི་སྣས་ངེས་པར་དུ་དེ་ལ་སྐྱིན་ཚབ་སྤྲོད་པའི་འགན་ཁུར་དགོས་པའི་གཏན་ཁེལ་བྱས་ཡོད་པ་རེད། དེར་བརྟེན། ཚེ་རིང་གིས་སྐྱིན་ཚབ་གྲོས་ཆད་ལྟར་སྐྱིན་ཚབ་སྤྲོད་དགོས་པ་རེད།།
