བུ་ལོན་འདེད་སྐབས་ཀྱི་མཉམ་འཇོག་བྱེད་དགོས་ས་འགའ།
སྤེལ་དུས 2018-03-05
ཡོང་ཁུངས། མཚོ་སྔོན་བོད་ཡིག་གསར་འགྱུར།
རྩོམ་པ་པོ། སྒྲོལ་མས་བསྒྲིགས།
དུས་རྒྱུན་གྱི་འཚོ་བའི་ཁྲོད་དུ་བུ་ལོན་ཐད་ཀྱི་རྩོད་གཞི་མང་པོ་འབྱུང་བཞིན་ཡོད། དཔེར་ན། དངུལ་ཁང་ནས་དངུལ་བུན་བླངས་རྗེས་སྐྱིན་ཚབ་མི་འཇལ་བ་དང་ཡང་ན་མི་གཞན་གྱི་ལག་ནས་སྒོར་མོ་བསྐྱིས་རྗེས་སྐྱིན་ཚབ་མི་འཇལ་བ་སོགས་ཀྱི་གནས་ཚུལ་མང་པོ་ཡོད།དེ་ན་བུ་ལོན་འདེད་སྐབས་ཁྲིམས་དང་མཐུན་ལ་ནུས་པ་ལྡན་པ་ཞིག་ཇི་ལྟར་བྱེད་དགོས་ཤེ་ན།
ཁྲིམས་མཐུན་སྒོས་བུ་ལོན་འདེད་པར་ཐོག་མར་ཆ་རྐྱེན་འདི་དག་ཚང་དགོས་པ་སྟེ། （གཅིག）ཕྱོགས་གཉིས་ཀའི་བར་ན་བུ་ལོན་ཡོད་པའི་དཔང་རྟགས་ཡོད་དགོས།དཔེར་ན་བསྐྱིས་ཡིག་དང་ཉོ་ཚོང་གན་རྒྱ།ཚོང་ཟོང་བསྐྱལ་བའི་འཛིན་ཡིག དངུལ་ཁང་གི་ཟིན་ཐོ།བལྟ་བྱ་དང་མཉན་བྱའི་དཔྱད་གཞི་སོགས་ཀྱི་དཔང་རྟགས་གང་རུང་ཞིག་གིས་ཕྱོགས་གཉིས་ཀའི་བར་ན་བུ་ལོན་ཡོད་པ་བདེན་དཔང་བྱེད་དགོས། （གཉིས།）བུ་ལོན་འཇལ་མཁན་དེའི་གཞི་རྩའི་གནས་ཚུལ་ཤེས་དགོས།དེང་སྐབས་ཀུང་སི་ཁ་ཁར་གཏོང་བ་དང་ཟླ་སྒྲིལ་བྱེད་པ་སོགས་ཀྱི་གནས་ཚུལ་ཧ་ཅང་རྒྱུན་མཐོང་ཡིན་པས།ཀུང་སི་མི་ཉུང་བ་ཞིག་གིས་ཁ་ཁར་གཏོང་བ་དང་ཟླ་སྒྲིལ་བྱེད་པའི་ཞོར་དུ་ཀུང་སིའི་མིང་དང་ས་གནས་བསྒྱུར་ཏེ།བུན་བདག་གིས་ཁོ་ཚོ་བཙལ་ན་མི་རྙེད་པའི་བྱེད་ཐབས་ཀྱིས་བུ་ལོན་ལ་གཡོལ་གྱིན་ཡོད།སྤྱི་དམངས་ཁ་ཤས་ཀྱིས་ཀྱང་སྡོད་གནས་དང་དུད་ཐོ་བསྒྱུར་ཏེ།བུ་ལོན་ལ་གཡོལ་བ་སོགས་ཀྱི་གནས་ཚུལ་མང་པོ་འབྱུང་བཞིན་ཡོད་པ་རེད།དེ་བས་བུན་བདག་གིས་ངེས་པར་དུ་བུ་ལོན་འཇལ་མཁན་གྱི་མི་དེའི་གནས་ཚུལ་དང་ཆ་འཕྲིན་ངེས་ཅན་ཞིག་ཤེས་དགོས།（གསུམ།）བུ་ལོན་འཇལ་མཁན་གྱི་རྒྱུ་ནོར་དང་ཡོང་འབབ་གནས་ཚུལ་ལ་རྒྱུས་ལོན་བྱེད་དགོས།བུ་ལོན་འཇལ་མཁན་མང་ཤས་ཀྱིས་རྒྱུན་དུ་བུན་འཇལ་ནུས་པ་མེད་པར་ཁ་གཡར་ཏེ་བུ་ལོན་མི་འཇལ་བ་རེད་མོད།འོན་ཀྱང་དོན་དངོས་སུ་རྒྱུ་ནོར་སྦས་སྐུང་བྱེད་པའི་གནས་ཚུལ་ཧ་ཅང་མང་པོ་ཡོད།བུ་ལོན་ཆད་པའི་ཀུང་སི་དེའི་ནོར་དོན་གནས་ཚུལ་རྒྱུས་ལོན་བྱེད་དཀའ་ན།དེའི་བདག་གཉེར་གནས་ཚུལ་དང་དེའི་ལས་བཟོ་པའི་ཡོང་འབབ་གནས་ཚུལ་ལ་རྒྱུས་ལོན་བྱེད་ཆོག་པ་དང་།བུ་ལོན་ཆད་པའི་རང་བྱུང་མིའི་དཔལ་འབྱོར་གནས་ཚུལ་རྒྱུས་ལོན་བྱེད་དཀའ་ན།དེའི་ལས་གྲོགས་རྣམས་ཀྱི་ཡོང་འབབ་གནས་ཚུལ་དང་དེའི་ཁྱིམ་ཚང་གི་འཛད་སྤྱོད་གནས་ཚུལ་ལ་རྒྱུས་ལོན་བྱེད་ཆོག （བཞི།）ཞུ་གཏུག་གོ་ཆོད་དུས་ཡུན་ལ་མཉམ་འཇོག་བྱེད་དགོས།ཞུ་གཏུག་དུས་ཡུན་མཚམས་བཅད་པའི་དཔང་རྟགས་ཉར་ཚགས་བྱེད་དགོས།《དམངས་ཁྲིམས་སྤྱིའི་རྩ་དོན》ནང་དུ“མི་དམངས་ཁྲིམས་ཁང་ལ་དམངས་དོན་ཁེ་དབང་སྲུང་སྐྱོབ་བྱེད་རྒྱུའི་རེ་འདུན་ཞུ་བའི་ཞུ་གཏུག་དུས་ཡུན་ནི་ལོ་གཉིས་ཡིན་པ་དང་།བཅའ་ཁྲིམས་ཀྱི་སྟེང་དུ་གཏན་འཁེལ་གཞན་པ་ཡོད་པ་ཕུད་དགོས”ཞེས་གཏན་འཁེལ་བྱས་ཡོད།དུས་ཡུན་དེ་ནི་རང་ཉིད་ཀྱི་ཁེ་དབང་ལ་གནོད་འཚེ་ཐེབས་པ་ཤེས་པའམ་ཡང་ན་ཤེས་འོས་པའི་དུས་དེ་ནས་བཟུང་བརྩི་དགོས།བུ་ལོན་གྱི་གནད་དོན་ཐད་ནས་བཤད་ན།བུ་ལོན་གྱི་དུས་ཡུན་ལོངས་ནའང་ཅིག་ཤོས་དེས་སྐྱིན་ཚབ་མི་འཇལ་བའི་དུས་དེ་ནས་བཟུང་བརྩི་དགོས།
འོ་ན་ཇི་ལྟར་ནུས་ལྡན་སྒོས་བུ་ལོན་འདེད་དགོས་ཞེ་ན། གཤམ་གྱི་བྱེད་སྟངས་གཉིས་ཡོད་དེ། དང་པོ། ཕྱོགས་གཉིས་ཀས་སྐྱིན་ཚབ་སྤྲོད་རྒྱུའི་གྲོས་འཆམ་བཞག་ཆོག གལ་ཏེ་ཅིག་ཤོས་དེས་བུ་ལོན་ཡོད་པ་ཁས་བླངས་རྗེས་ཁ་གཡར་ས་མང་པོ་བཙལ་ཏེ་འགོར་འགྱངས་བྱས་ན།དེ་དང་སྐྱིན་ཚབ་འཇལ་བའི་ཐད་ཀྱི་གྲོས་འཆམ་བཞག་ཆོག་པ་དང་གྲོས་འཆམ་གྱི་སྟེང་དུ་སྐྱིན་ཚབ་འཇལ་སྟངས་དང་འཇལ་བའི་དུས་ཡུན་སོགས་གསལ་པོར་འགོད་དགོས།གལ་ཏེ་ཆ་རྐྱེན་ལྡན་ན་ད་རུང་དུས་ཡུན་ལོངས་རུང་སྐྱིན་ཚབ་མ་འཇལ་ན་ཁྲིམས་ཁང་ལ་གཏུགས་ནས་བཙན་ཤེད་ཀྱིས་ལག་བསྟར་བྱེད་དུ་འཇུག་རྒྱུའི་ཁ་ཆད་བཞག་ཆོག དུས་ཡུན་ལོངས་རྗེས་དངོས་གནས་མི་འཇལ་བ་ཡིན་ན།བུན་བདག་གིས་ཁ་ཆད་ཡི་གེ་དེ་བཟུང་ནས་ཁྲིམས་ཁང་ལ་བཙན་ཤེད་ཀྱིས་ལག་བསྟར་བྱེད་དགོས་པའི་རེ་འདུན་བཏོན་ཆོག དེ་ལྟར་བྱས་ན་ཞུ་གཏུག་གི་གོ་རིམ་སྟབས་བདེ་རུ་བཏང་བར་མ་ཟད་དུས་ཚོད་དང་སྒོར་མོ་ཡང་གྲོན་ཆུང་བྱེད་ཐུབ། གཉིས་པ། ཞུ་གཏུག་མ་བྱས་སྔོན་གྱི་ཉིན་བཅོ་ལྔ་དང་ཡང་ན་ཞུ་གཏུག་བྱེད་པ་དང་མཉམ་དུ་རྒྱུ་ནོར་གེགས་སྲུང་བྱེད་དགོས།རྒྱུ་ནོར་གེགས་སྲུང་ཞེས་པ་ནི་ཞུ་གཏུག་གི་སྔོན་དང་ཡང་ན་དུས་མཉམ་དུ་ཁྲིམས་ཁང་ལ་ཅིག་ཤོས་དེའི་རྒྱུ་ནོར་བཀག་ཉར་དང་བཀག་སྐྱིལ།བཀག་སྡོམ་བཅས་བྱེད་དགོས་པའི་རེ་འདུན་ཞུས་ཏེ།རེ་འདུན་ཞུ་མཁན་དེ་ཞུ་གཏུག་ལས་རྒྱལ་རྗེས་ཐག་གཅོད་ལག་བསྟར་བྱེད་པར་ཁག་ཐེག་བྱེད་ཆོག
དངོས་ཡོད་འཚོ་བའི་ཁྲོད་དུ།བུ་ལོན་ཁ་ཤས་ཤིག་རྒྱུ་རྐྱེན་རྙོག་འཛིང་ཡིན་པའི་དབང་གིས། ཁྲིམས་མཐུན་སྒོས་འདེད་པའི་ཆ་རྐྱེན་མི་ལྡན་པ་རེད། བུ་ལོན་དེའི་རིགས་ལ་བུན་བདག་གིས་འདེད་པའི་གོ་རིམ་ཁྲོད་ཐབས་ཤེས་ནུས་ལྡན་སྤྱོད་པར་དེ་བས་ཀྱང་མཉམ་འཇོག་བྱེད་དགོས། ངེས་པར་རང་ཉིད་ཀྱི་བྱ་སྤྱོད་ལ་ཚོད་འཛིན་བྱེད་དགོས།གལ་ཏེ་མི་གཞན་གླས་ཏེ་བུ་ལོན་འདེད་དུ་འཇུག་ན་གནས་བབ་ལ་ཚོད་འཛིན་གང་ལེགས་བྱེད་དགོས།དེའི་རྐྱེན་གྱིས་བྱ་བ་མ་བསྒྲུབས་པའི་སྔོན་ལ་ངེས་པར་བཅའ་ཁྲིམས་ཐད་ཀྱི་ཆེད་ལས་མི་སྣར་བློ་འདྲི་བྱས་ཏེ།མཇུག་འབྲས་ངན་པ་འབྱུང་བར་གཡོལ་དགོས་སོ། །
