ཉིང་ཁྲི་གྲོང་ཁྱེར་གྱིས་ཁ་ལོ་བའི་ཡིག་རྒྱུགས་ནང་ལམ་ངོས་འགྲིམ་འགྲུལ་བདེ་འཇགས་ཀྱི་ཉམས་ལེན་ནང་དོན་གསར་དུ་བསྣན་པ།
སྤེལ་དུས 2018-04-25
ཡོང་ཁུངས། བོད་ལྗོངས་ཁྲིམས་ལུགས་ཚགས་པར།
རྩོམ་པ་པོ། བསྟན་འཛིན་བློ་གྲོས་ཀྱིས་བསྒྱུར།
འདི་ག་ཚགས་པར་ཁང་དུ་བྲག་ཡིབ་ནས་གློག་འཕྲིན་འབྱོར་གསལ། ཉེ་ཆར། ཉིང་ཁྲི་གྲོང་ཁྱེར་གྱིས“མ་འོངས་པའི་ཁ་ལོ་བའི”ཡ་རབས་འགྲིམ་འགྲུལ་ཉམས་ལེན་གྱི་བྱེད་སྒོ་སྤེལ་ཞིང་། ད་ཐེངས་ཀྱི་བྱེད་སྒོ་ཟླ་3ཚེས་12ཉིན་ནས་སྤེལ་འགོ་ཚུགས་ཏེ་ཉིང་ཁྲི་གྲོང་ཁུལ་གྱི་ཁ་ལོ་བའི་སློབ་གྲྭ་ཡོངས་སུ་ཡ་རབས་འགྲིམ་འགྲུལ་ཉམས་ལེན་གྱི་སློབ་ཚན་འཁྲིད་པ་དང་། ཁ་ལོ་བ་གསོ་སྦྱོང་བྱེད་རིང་། ལག་ཁྱེར་མ་སྤྲད་གོང་སློབ་མར་དམིགས་གཏན་འཁེལ་བའི་ལམ་མདོར་ཡ་རབས་འགྲིམ་འགྲུལ་ཉམས་ལེན་ཉིན་གཅིག་བྱེད་དགོས་ཀྱི་ཡོད་པ་རེད།
ཉེ་ཆར། ཉིང་ཁྲི་གྲོང་ཁྱེར་སྤྱི་བདེ་ཅུས་འགྲིམ་འགྲུལ་ཉེན་རྟོག་ཉིང་ལག་རུ་ཁག་གྲོང་ཁྱེར་རུ་ཆེན་དང་ཁ་ལོ་བའི་ཡིག་རྒྱུགས་ལྟེ་གནས་ཀྱི་ལས་སྒྲུབ་མི་དམངས་ཉེན་རྟོག་པའི་སྣེ་ཁྲིད་འོག ཁ་ལོ་བའི་སློབ་གྲྭའི་སློབ་མས་གྲོང་ཁུལ་གྱི་ལམ་མདོ་ཁག་ཏུ་འགྲོ་མི་དང་འཕྲུལ་སྒུལ་འཁོར་རིགས་མིན་པའི་ཁ་ལོ་བར་ཁྲིད་སྟོན་བྱས་པ་རེད།
ད་རེས་ཀྱི་བྱེད་སྒོ་སྤེལ་བ་བརྒྱུད། ཁ་ལོ་བའི་སློབ་གྲྭའི་སློབ་མས་འགྲིམ་འགྲུལ་ཁྲིམས་འགལ་བྱེད་སྤྱོད་ཁག་གི་ཉེན་ཁ་ཤེས་རྟོགས་དང་། ལྷག་པར་དུ་ “མ་འོངས་པའི་ཁ་ལོ་བ”ཚོར་བདེ་འཇགས་ཀྱི་སྔོན་འགོག་ཁབ་བརྒྱབ་པ་དེས་ཁོང་ཚོའི་འགྲིམ་འགྲུལ་བདེ་འཇགས་ཀྱི་འདུ་ཤེས་ཟབ་ཏུ་དང་གོམས་གཤིས་ཡག་པོ་འཇགས་རྒྱུར་ཕན་ཐོགས་བྱུང་ཡོད། ཉམས་ལེན་ནང་ཞུགས་མཁན་སློབ་མས་ལས་སྒྲུབ་ལ་ཐེངས་གཅིག་བསྐྱོད་རྗེས་འགྲིམ་འགྲུལ་ཉེན་རྟོག་པའི་ལས་དོན་དཀའ་ཚེགས་ཆེ་ལུགས་དང་ལྷག་པར་དུ་ཁོང་ཚོས་དགུན་གྲང་ངར་དང་དབྱར་ཚ་གདུག་བཟོད་བསྲན་ཐུབ་ལུགས་ཤེས་བྱུང་། ཕྱིས་འབྱུང་ང་ཚོར་ཁ་ལོ་བའི་ལག་ཁྱེར་རག་རྗེས། རང་ཉིད་ནས་འགོ་བཙུགས་ཏེ་འགྲིམ་འགྲུལ་གྱི་བཅའ་ཁྲིམས་ཁྲིམས་སྲོལ་ལ་རང་རྟོགས་ངང་བརྩི་སྲུང་དང་འགྲུལ་བཞུད་ཀྱི་སྒྲིག་ལམ་ལ་སྲུང་སྐྱོང་ཡག་པོ་བྱ་རྒྱུ་ཡིན་ཞེས་གཅིག་མཇུག་གཉིས་མཐུད་ངང་བཤད།