ཧྥ་རན་སེའི་ཙུང་ཐུང་མཱ་ཁེ་ལུང་གིས་དེ་རིང་ནས་བཟུང་རང་རྒྱལ་ལ་རྒྱལ་དོན་འཚམས་འདྲི་བྱེད་པ། ཚོགས་ཆེན་བཅུ་དགུ་པའི་དགོངས་དོན་བགྲོ་གླེང་འཛིན་གྲྭ་སློབ་འགོ་ཚུགས་པ། བོད་སྐྱོད་འབུམ་རམས་པའི་ཞབས་ཞུ་ཚོགས་པས་མུ་མཐུད་རིག་སྟོབས་རོགས་སྐྱོར་བྱས་པ། བོད་ལྗོངས་ཀྱི་གཞོན་ནུ་ལོ་ཆུང་གི་ཚན་རིག་ལས་དོན་ཁང་ཐོག་མ་ལྷ་སར་བཙུགས་པ། བོད་ཀྱིས་རང་སྐྱོང་ལྗོངས་རིམ་པའི་མངོན་མིན་རིག་གནས་ཤུལ་བཞག་རྣམ་གྲངས་བརྒྱ་ལྷག་ཙམ་གསར་དུ་བསྣན་པ། ཞིང་ལས་དངུལ་ཁང་བོད་ལྗོངས་ཡན་ལག་དངུལ་ཁང་གིས“ངོ་རིས་བཤེར་ནས་དངུལ་ལེན་པའི”བྱེད་ནུས་བཏོན་པ། ཀྲུང་དབྱང་གི་ཁོར་ཡུག་སྲུང་སྐྱོབ་སྐོར་ཞིབ་རུ་ཁག་ཨང་དྲུག་པས་བོད་ལྗོངས་ལ་གྱོད་དོན་༡༧བརྒྱུད་སྤྱོད་བྱས། བོད་ལྗོངས་ཀྱི་གྲོང་གསེབ་ཀྱི་མི་སྡོད་ཁོར་ཡུག་བཅོས་སྒྲིག་ལ་གྲུབ་འབྲས་མངོན་གསལ་དོད་པོ་ཐོབ་པ། བོད་ཡིག་དཔེ་མཛོད་ཀྱི་གཞི་གྲངས་ལྟེ་གནས་དབུ་བརྙེས་པའི་མཛད་སྒོ་ཀྲུང་གོའི་བོད་རིག་པ་ཞིབ་འཇུག་ལྟེ་གནས་སུ་སྤེལ།
ཀྲུང་གོའི་བོད་ལྗོངས་དྲ་བ། > རྩོམ་རིག > དཔྱད་རྩོམ།

བར་དོ་འཕྲང་སྒྲོལ་གྱི་གསོལ་འདེབས་འཇིགས་སྒྲོལ་གྱི་དཔའ་བོ་ཞེས་བྱ་བ།

སྤེལ་དུས 2012-01-29 ཡོང་ཁུངས། ཙོང་ཆུའི་དྲ་བ། རྩོམ་པ་པོ། བསྟན་འཛིན།

    ན་མོ་གུ་རུ་མཉྫུ་གྷོ་ཥཱ་ཡ། དུས་གསུམ་བདེ་གཤེགས་ཆོས་དང་ཚོགས་བཅས་ལ་། །བདག་དང་མཁའ་མཉམ་འགྲོ་བ་མ་ལུས་པ། ། བྱང་ཆུབ་སྙིང་པོའི་བར་དུ་སྐྱབས་སུ་མཆི། །འདི་ཕྱི་བར་དོའི་འཇིགས་ལས་བསྒྲལ་དུ་གསོལ། ། རྙེད་དཀའ་འཇིག་པར་སླ་བའི་རྟེན་བཟང་འདིར།། ཁེ་ཉེན་སྐྱིད་སྡུག་འདམ་གའི་སྐབས་ཡིན་པས། ། དོན་མེད་ཚེ་འདིའི་བྱ་བས་མི་གཡེང་བར། །དོན་ཆེན་སྙིང་པོ་ལེན་པར་བྱིན་གྱིས་རློབས། ། འདུས་པ་འབྲལ་ཞིང་བསགས་པ་མ་ལུས་འཛད། །མཐོན་པོའི་མཐའ་རྒུད་སྐྱེས་པའི་ཐ་མའི་ཆ། ། འཆི་བར་མ་ཟད་ནམ་འཆི་ཆ་མེད་པའི། །ལོང་མེད་རྒྱུད་ལ་སྐྱེ་བར་བྱིན་གྱིས་རློབས། །གཟུང་འཛིན་རྣམ་རྟོག་འཁྲུལ་པའི་གྲོང་ཁྱེར་དུ། །མི་གཙང་འབྱུང་བཞི་སྒྱུ་མའི་ཕུང་པོ་དང་། ། རྣམ་ཤེས་འབྲལ་གའི་འཆི་རྐྱེན་སྣ་ཚོགས་པའི།། གནད་གཅོད་སྡུག་བསྔལ་ཞི་བར་བྱིན་གྱིས་རློབས། །གཅེས་པར་བསྐྱངས་པའི་ལུས་ཀྱིས་དགོས་དུས་བསླུས། །འཇིགས་རུང་གཤིན་རྗེའི་དགྲ་བོ་མངོན་དུ་གྱུར། །དུག་གསུམ་མཚོན་གྱིས་རང་སྲོག་གཅོད་པའི་ཚེ། །མི་དགེའི་འཁྲུལ་སྣང་ཞི་བར་བྱིན་གྱིས་རློབས། །སྨན་པས་བོར་ཞིང་རིམ་གྲོས་བཟློག་ཏུ་མེད། ། གཉེན་རྣམས་གསོན་དུ་རེ་བའི་རེ་ཐག་ཆད། །རང་ཉིད་ཅི་བྱ་གཏོལ་མེད་གྱུར་པའི་ཚེ། ། བླ་མའི་གདམས་ངག་དྲན་པར་བྱིན་གྱིས་རློབས། །སེར་སྣས་བསགས་པའི་ཟས་ནོར་ཤུལ་དུ་ལུས། ། བརྩེ་ཞིང་གདུང་བའི་གཉེན་དང་གཏན་བྲལ་བྱས། །ཉམ་ངའི་གནས་སུ་གཅིག་པུར་འགྲོ་བའི་ཚེ། །དགའ་སྤྲོའི་གདེངས་དང་ལྡན་པར་བྱིན་གྱིས་རློབས། ། ས་ཆུ་མེ་རླུང་འབྱུང་བ་རིམ་གྱིས་ཐིམ།། ལུས་ཀྱི་སྟོབས་ཤོར་ཁ་སྣ་བསྐམས་ཤིང་བརྫེས། །དྲོད་བསྡུས་དབུགས་བརྩེགས་ངར་སྒྲ་འབྱིན་པའི་ཚེ། །དགེ་སེམས་སྟོབས་ལྡན་སྐྱེ་བར་བྱིན་གྱིས་རློབས། །འཇིགས་སྐྲག་འཁྲུལ་སྣང་སྣ་ཚོགས་ཁྱད་པར་དུ། ། སྨིག་རྒྱུ་དུ་བ་མཁའ་འདྲའི་སྣང་བ་ཤར། །རང་བཞིན་བརྒྱད་ཅུའི་བཞོན་པ་འགགས་པའི་ཚེ། །འཆི་མེད་གནས་ལུགས་རྟོགས་པར་བྱིན་གྱིས་རློབས། ། རླུང་ཁམས་རྣམ་ཤེས་ཐིམ་པར་རྩོམ་པ་ན། །ཕྱི་དབུགས་རྒྱུན་ཆད་གཉིས་སྣང་རགས་པ་ཐིམ། ། མར་མེ་འབར་འདྲའི་སྣང་བ་ཤར་བའི་ཚེ། །དྲན་ཤེས་ཤུགས་དྲག་སྐྱེ་བར་བྱིན་གྱིས་རློབས། ། སྣང་མཆེད་ཐོབ་གསུམ་སྔ་མ་ཕྱི་མར་ཐིམ། །ཟླ་ཉི་མུན་པས་ཁྱབ་འདྲའི་ཉམས་ཤར་ཚེ། ། འཁོར་འདས་སྟོང་པར་རྟོགས་པའི་རྣལ་འབྱོར་གྱིས། །རང་ངོ་རང་གིས་ཤེས་པར་བྱིན་གྱིས་རློབས། །ཉེར་ཐོབ་ཐམས་ཅད་སྟོང་བཞིའི་དུས་སུ་གློག་གི་རྗེས་འགྲོ་བའི། །ཚངས་པའི་མེ་ཡིས་རི་བོང་ཅན་བཞུས་ཏེ། ། ལྷན་སྐྱེས་བདེ་སྟོང་སྦྱར་བའི་ཡེ་ཤེས་ལ། །རྩེ་གཅིག་མཉམ་པར་འཇོག་པར་བྱིན་གྱིས་རློབས། ། དེ་ལས་ལངས་ཚེ་འཆི་བའི་འོད་གསལ་གྱི། །རླུང་སེམས་ཙམ་ལས་མཚན་དཔེའི་དཔལ་འབར་བ། ། བར་དོ་ལོངས་སྤྱོད་རྫོགས་པའི་སྐུར་བཞེངས་ནས།། སྒྱུ་མའི་ཏིང་འཛིན་རྫོགས་པར་བྱིན་གྱིས་རློབས། ། གལ་ཏེ་ལས་ཀྱིས་བར་དོ་གྲུབ་གྱུར་ན།། འཕྲལ་དུ་བརྟགས་པས་སྐྱེ་འཆི་བར་དོ་ཡི། ། སྡུག་བསྔལ་བདེན་པར་མེད་པའི་ཚུལ་རྟོགས་ནས།། འཁྲུལ་སྣང་དག་པར་འཆར་བར་བྱིན་གྱིས་རློབས། །འབྱུང་བ་ལོག་པའི་དགྲ་བཞི་འཇིགས་སྣང་གསུམ། ། མ་ངེས་རྟགས་རྣམས་སྣ་ཚོགས་ཤར་བའི་ཚེ། །ཕྱི་ནང་གསང་བ་བསྒྱུར་བའི་རྣལ་འབྱོར་གྱིས། ། རྣམ་དག་ཞིང་དུ་སྐྱེ་བར་བྱིན་གྱིས་རློབས།། མཁའ་སྤྱོད་རིག་པ་འཛིན་པའི་རྟེན་མཆོག་གམ། །ཚངས་སྤྱོད་བསླབ་གསུམ་ལྡན་པའི་ལུས་བཟུང་སྟེ། ། རིམ་གཉིས་ལམ་གྱི་རྟོགས་པ་མཐར་ཕྱིན་ནས།། སྐུ་གསུམ་མྱུར་དུ་ཐོབ་པར་བྱིན་གྱིས་རློབས། །ཞེ་ཅེས་བར་དོ་འཕྲང་སྒྲོལ་གྱི་གསོལ་འདེབས་འཇིགས་སྒྲོལ་གྱི་དཔའ་བོ་ཞེས་བྱ་བ་འདི་ཡང་།། དོན་གཉེར་བ་འགའ་ཞིག་གིས་བསྐུལ་བའི་དོན་དུ། །མདོ་རྒྱུད་དམ་པའི་མན་ངག་བཞིན་དུ་ཤཱཀྱའི་བཙུན་པ་བློ་བཟང་ཆོས་ཀྱི་རྒྱལ་མཚན་གྱིས། །ཆོས་གྲྭ་ཆེན་པོ་དཔལ་ལྡན་འབྲས་སྤུངས་ཀྱི་གཟིམས་ཁང་དུ་སྦྱར་བ་འདི་ཉིད་སྣོད་མིན་དང་སྔགས་བླ་མེད་ཀྱི་དབང་མ་ཐོབ་པ་རྣམས་ལ་གསང་བར་བྱ་བ་ཁོ་ན་ཡིན་ཅིང་།རང་ཉིད་ཡི་དམ་གང་ལ་བྱེད་པ་དེའི་གསོལ་འདེབས་ཀྱི་མཇུག་ཏུ་སྦྱར་བས་ཆོག་ཅིང་། །དོན་དྲན་བཞིན་པས་ཉམས་སུ་བླངས་ན་འཆི་གའི་གདམས་པའི་རྒྱལ་པོར་འགྱུར་རོ། །