ཁྲུང་ཆིང་གྲོང་ཁྱེར་ཝན་ཀྲོའུ་ཁུལ་འབྲི་ཆུའི་ཟམ་ཆེན་གཉིས་པའི་སྟེང་བགྲོད་པའི་སྤྱི་སྤྱོད་རླངས་འཁོར་ཞིག་འབྲི་ཆུའི་ནང་དུ་ལྷུང་བ། མཚོ་སྔོན་གོར་མོ་གྲོང་ཁྱེར་འབྲི་ཆུའི་ཆུ་འགོ་གྲོང་ཚོར་ཕར་རོགས་ཚུར་གཅེས་ཀྱིས་བདེ་སྐྱིད་ལྡན་པའི་འཚོ་བ་སྐྱེལ་བ། དཔལ་དགེའི་ཆུ་བསྐྱིལ་མཚེའུའི་འཕྲིན་གསར། འབྲི་ཆུའི་འགག་འཁྱིལ་མཚེའུ་གཞི་རྩའི་ཆ་ནས་རྒྱུན་རྣམ་སླར་གསོ་བྱུང་བ་དང་རོགས་སྐྱོབ་གོ་རིམ་ལྡན་པའི་ངང་བྱེད་བཞིན་ཡོད་པ། གནས་མཆོག་ལྷ་སར་མཐུན་སྒྲིལ་མེ་ཏོག་རབ་ཏུ་བཞད་། ཆོས་དབྱིངས་སྐྱིད་ཀྱིས་ཡང་རྒྱལ་སྤྱིའི་འགྲན་སྡུར་ལས་ཨང་དང་པོ་བླངས། ཀྲུང་གོའི་མི་རིགས་སྐད་ཡིག་ཡིག་སྒྱུར་ཅུས་ཀྱིས་བོད་ཡིག་རིག་ནུས་ཡིག་སྒྱུར་མཉེན་ཆས་ཁྱབ་སྤེལ་ཚོགས་འདུ་སྤོས་ལྡན་གྲོང་དུ་འཚོགས་པ། ཚོགས་ཆེན་བཅུ་དགུ་པའི་དགོངས་དོན་མཛུབ་ཁྲིད་དུ་བྱས་ཏེ། ཆོས་ལུགས་དང་སྤྱི་ཚོགས་རིང་ལུགས་ཀྱི་སྤྱི་ཚོགས་གཉིས་འཚམ་མཐུན་ཡོང་པ་བྱ་དགོས། ནུབ་བྱང་དགེ་འོས་སློབ་ཆེན་གྱིས་དགེ་འོས་སློབ་མ་བགྲང་ལས་འདས་པ་བསྐྱངས་པ། གཞིས་རྩེ་གྲོང་ཁྱེར་གྱི་གཞུང་ལམ་ཐོག་རླངས་འཁོར་ཤར་གཏོང་ཐུབ་ཚད་སྤྱི་ལེ་ཁྲི་1.7ཟིན་པ།
ཀྲུང་གོའི་བོད་ལྗོངས་དྲ་བ། > རྩོམ་རིག > དཔྱད་རྩོམ།

སློབ་དཔོན་རྟ་དབྱངས་ཀྱི་ལོ་རྒྱུས་སྐོར་ཅུང་ཟད་བཤད་པ།

སྤེལ་དུས 2019-01-04 ཡོང་ཁུངས། ཀྲུང་གོའི་བོད་རིག་པ། རྩོམ་པ་པོ། རྒྱ་ཡེ་བཀྲ་བྷོ།
          སློབ་དཔོན་རྟ་དབྱངས་ནི་གནའ་བོའི་རྒྱ་གར་གྱི་ནང་པའི་སློབ་དཔོན་ཆེན་མོ་ཞིག་ཡིན། ཁོང་ནི་ཕྱི་ནང་གི་གྲུབ་མཐའ་དང་སྙན་ངག་སོགས་རིག་གནས་ལ་ཤིན་ཏུ་མཁས་པས། གནའ་བོའི་རྒྱ་གར་ཙམ་དུ་མ་ཟད། ད་ལྟའི་བར་འཛམ་གླིང་ན་སྙན་གྲགས་ཆེ་ཞིང་། ཕྱི་རབས་ཀྱི་སྐྱེ་བོ་ཀུན་ལ་ཤན་ཤུགས་ཆེན་པོ་བཞག་འདུག འོན་ཀྱང་སློབ་དཔོན་འདིའི་ལོ་རྒྱུས་ནི་སྤྲིན་རུམ་གྱི་ཟླ་བ་མོག་པོ་ལྟར་དོགས་པའི་གནས་དུ་མ་དང་བཅས་པ་ཞིག་སྟེ། དེ་ལྟ་བུའི་གནས་ཚུལ་དེ་ནི་སློབ་དཔོན་འདི་ལ་དོན་མཐུན་གྱི་ཞིབ་འཇུག་དང་གདེང་འཇོག་བྱེད་པའི་གེགས་སུ་སོང་འདུག་པས། འདིར་ཁོ་བོས་སློབ་དཔོན་འདི་དང་འབྲེལ་བའི་ཡིག་ཆ་རྣམས་གུང་བསྒྲིགས་ཏེ། སློབ་དཔོན་འདིའི་ལོ་རྒྱུས་ཀྱི་སྐོར་ལ་དཔྱད་ཞིབ་ཀྱི་ས་བོན་ཙམ་སྤྲོ་བར་འདོད་དོ། །
          དེ་ཡང་བོད་དང་རྒྱ་ཡི་སྔོན་གྱི་ཡིག་ཆ་དག་གཞིར་བཟུང་ནས་དཔྱད་ན། སྔར་རྒྱ་གར་འཕགས་པའི་ཡུལ་དུ་མཚན་ལ་རྟ་དབྱངས་ཟེར་བའི་སློབ་དཔོན་བྱོན་པ་ནི་གཅིག་ཙམ་དུ་མ་ཟད་པར་སྣང་། ཇོ་ནང་ཏཱ་ར་ནཱ་ཐས་《རྒྱ་གར་ཆོས་འབྱུང་》 དུ་རྟ་དབྱངས་གསུམ་བྱོན་པར་བཤད་དེ། རྟ་དབྱངས་དང་པོ་ནི་རྒྱལ་པོ་སྙིང་པོ་ཐིག་ལེའི་དུས་སུ་བྱུང་བ་དང་། རྟ་དབྱངས་གཉིས་པའམ་རྟ་དབྱངས་ཆུང་བ་ཞེས་པ་ནི་རྒྱལ་པོ་ཀརྨ་ཙནྡྲའི་དུས་དང་། རྟ་དབྱངས་གསུམ་པ་ནི་རྒྱལ་པོ་མ་ཧི་པཱ་ལའི་དུས་སུ་བྱུང་བར་བཤད།
          རྒྱ་ལའང་སློབ་དཔོན་རྟ་དབྱངས་ཀྱི་ལོ་རྒྱུས་དང་འབྲེལ་བའི་ཡིག་ཆ་རྙིང་པ་ཅི་རིགས་ཤིག་ཡོད་ཅིང་། དེ་དག་ལས་རྒྱའི་བཙུན་པ་ཧྥ་མེན་(法敏)གྱིས་སྡུད་སྒྲིག་བྱས་པར་ཁ་གཡར་ཞིང་། དོན་དུ་ཀོ་རི་ཡ་པ་ཞིག་གིས་བརྩམས་ཟེར་བའི་《 ཐེག་པ་ཆེན་པོའི་རྣམ་པར་བཤད་པ》ཞེས་པར་རྟ་དབྱངས་དྲུག་བྱོན་པར་བཤད་མོད་དེ་ལ་ཡིད་རྟོན་བྱེད་མཁན་ཉུང་། དགེ་འདུན་སྲུངས་(僧祐 ) ཀྱིས་《 ཐམས་ཅད་ཡོད་སྨྲའི་བརྒྱུད་པའི་དཀར་ཆག》 ཅེས་པར་བརྒྱུད་པ་མི་འདྲ་བ་འགའ་བཀོད་པ་ལས་བརྒྱུད་པ་གཅིག་གི་བཅུ་གཅིག་པ་དང་བཅུ་དྲུག་པ་གཉིས་ཀྱི་མཚན་ལ་རྟ་དབྱངས་ཟེར་བས་རྟ་དབྱངས་སྔ་ཕྱི་གཉིས་བྱོན་པར་བཤད། དེ་ལྟར་ན་སྔར་རྟ་དབྱངས་དུ་མ་ཞིག་བྱོན་ཡོད་ངེས་པས་ན། འདིར་བདག་ཅག་གིས་ཤེས་པར་བྱ་འོས་པ་ནི། རྟ་དབྱངས་ཀྱི་མིང་ཐོགས་ཚད་གང་ཟག་གཅིག་ཏུ་འཛིན་པའི་འཁྲུལ་བ་སྤོང་བ་དང་། རྟ་དབྱངས་དུ་མ་ལས་སྐབས་སུ་བབས་པ་དེ་ཉིད་མ་འཁྲུལ་བར་ངོས་འཛིན་དགོས་པ་དེའོ།།
          《རྒྱ་གར་ཆོས་འབྱུང་》 དུ་རྟ་དབྱངས་གཉིས་པའམ་རྟ་དབྱངས་ཆུང་བ་ཞེས་པའི་མཛད་འཕྲིན་སྐོར་ལ་སློབ་དཔོན་འདི་པ་དང་། སློབ་དཔོན་དགའ་བྱེད་སྙན་པ་དང་། སློབ་དཔོན་ཀླུའི་བཤེས་གཉེན་དང་བཅས་པས་ཐེག་པ་ཆེན་པོ་དར་བར་མཛད་དོ་ཞེས་པ་ཙམ་ལས་གཞན་མ་བྱུང་ལ། རྟ་དབྱངས་གསུམ་པའི་སྐོར་ལའང་གོང་སྨྲས་རྒྱལ་པོ་གང་གི་རིང་ལ་བྱུང་པ་ལས་གཞན། དབུ་མ་ཐལ་འགྱུར་བ་ཞིག་ཡིན་པ་དང་། ཀུན་རྫོབ་དང་དོན་དམ་བྱང་སེམས་ཀྱི་སྒོམ་རིམ་བྱ་བའི་བསྟན་བཅོས་མཛད་ཡོད་པར་བཤད་པ་ཙམ་མོ། །རྒྱལ་དབང་ལྔ་པས་《གསན་ཡིག་གངྒཱའི་ཆུ་རྒྱུན》དུ་སློབ་དཔོན་རྟ་དབྱངས་ཀྱིས་མཛད་པའི་《 ཀུན་རྫོབ་བྱང་ཆུབ་སེམས་སྒོམ་གྱི་གཞུང་》དུ། སེམས་ནི་རས་ཡུག་དཀར་པོ་འདྲ། །སོགས་ཚིགས་བཅད་གཅིག་འདུག་པ་བསྟན་བཅོས་རྩོམ་པ་པོ་དང་ལོ་པཎ་གང་གི་གསུང་ཡིན་ཐེ་ཚོམ་དུ་སྣང་ཞེས་གསུངས་པའི་སློབ་དཔོན་རྟ་དབྱངས་དེའང་ཇོ་ནང་ཏཱ་ར་ནཱ་ཐ་ལྟར་ན་རྟ་དབྱངས་གསུམ་པ་འདི་ཡིན་པ་གསལ་ལོ། །
          ཡང་《རྒྱ་གར་ཆོས་འབྱུང་》དུ་སློབ་དཔོན་རྟ་དབྱངས་ཀྱི་ལོ་རྒྱུས་ཡོངས་གྲགས་ཏེ། དང་པོ་རྟོག་གེ་ལ་བྱང་བའི་ཕྱི་རོལ་པའི་སློབ་དཔོན་ཆེན་པོ་ཞིག་ཡིན་ཞིང་ནང་པ་རྣམས་རྩོད་པས་ཕམ་པར་བྱས་པ་དང་། བར་དུ་ན་ལེནྡྲར་སོང་ནས་སློབ་དཔོན་ཨཱརྱ་དེ་ཝ་དང་བརྩད་དེ་ཕམ་པས་ནང་པར་ཞུགས་པ་དང་། ཐ་མར་སྒོ་གསུམ་གྱི་སྡིག་བཤགས་སུ་བསྟན་བཅོས་མང་དུ་བརྩམས་པ་སོགས་བཤད་རྒྱུན་ཇི་སྙེད་ཅིག་ཡོད་པ་དེ་དག་ནི་རྟ་དབྱངས་དང་པོའི་སྟེང་དུ་སྦྱར་འདུག རྟ་དབྱངས་ཀུན་གྱི་གཙོ་བོའམ་ངེད་ཀྱི་སྐབས་འདིའི་བརྗོད་གཞི་སློབ་དཔོན་རྟ་དབྱངས་ཞེས་པའང་རྟ་དབྱངས་དང་པོ་འདི་པ་ཡིན་ནོ། །
          སློབ་དཔོན་འདི་དུས་ནམ་ཚོད་ཅིག་ལ་འཁྲུངས་པའི་སྐོར་ལ། 《རྒྱ་གར་ཆོས་འབྱུང་》གཞིར་བཞག་ན་རྒྱ་གར་གྱི་རྒྱལ་པོ་ཟླ་བ་སྦས་པའམ་ཙནྡྲ་གུཔྟའི་བུ་བིན་དུ་སཱ་ར་ཞེས་བྱ་བའི་དུས་སུ་བྱུང་བར་བཤད། རྒྱལ་པོ་ཟླ་བ་སྦས་པ་སྤྱི་ལོའི་སྔོན་གྱི་ལོ་སུམ་བརྒྱ་ཐམ་པ་ལ་གཤེགས་པས། རྒྱལ་པོ་བིན་དུ་སཱ་རའམ་སྙིང་པོ་ཐིག་ལེ་ནི་ལོ་དེ་ལ་ཁྲིར་བཞུགས་པར་ངེས་ལ། སློབ་དཔོན་འདི་པའང་དུས་དེ་ཤེད་ཅིག་ཏུ་བྱོན་པ་ཡིན་དགོས། ནུབ་གླིང་དང་། ཉི་ཧོང་དང་། རང་རྒྱལ་གྱི་རྒྱའི་ཞིབ་འཇུག་པ་མང་པོ་ཞིག་གིས་སློབ་དཔོན་འདི་པ་སྤྱི་ལོའི་དུས་རབས་དང་པོ་ཙམ་ལ་བྱོན་པར་འདོད་ཅིང་། དེའི་ཁུངས་བཅོལ་ས་ནི་ལོ་ཙཱ་བ་ཀུ་མཱ་ར་ཤྲཱིས་རྒྱ་ཡིག་ཏུ་བསྒྱུར་བའི་《བྱང་ཆུབ་སེམས་དཔའ་རྟ་དབྱངས་ཀྱི་རྣམ་ཐར》ཞེས་པ་སོགས་ཡིན། རྣམ་ཐར་དེ་རུ་སློབ་དཔོན་རྟ་དབྱངས་དུས་ནམ་ཚོད་ཅིག་ལ་འཁྲུངས་པ་གསལ་ཁ་མེད་མོད། རྒྱ་གར་བྱང་ཕྱོགས་ཀྱི་རྒྱལ་པོ་ཞིག་གིས་ཡུལ་དབུས་ལ་དམག་དྲངས་ཏེ་སློབ་དཔོན་འདི་ཡུལ་དབུས་ནས་བྱང་ཕྱོགས་ལ་གདན་དྲངས་པར་བཤད་ཡོད་ཅིང་། རྒྱ་ཡིག་ཏུ་འགྱུར་བའི་ཡིག་ཆ་གཞན་པ་འགར་(དཔེར་ན་《付法藏因缘传》 ) བྱང་ཕྱོགས་ཀྱི་རྒྱལ་པོ་དེ་ནི་རྒྱལ་པོ་ཀ་ནི་ཥྐ་ཡིན་པར་བཤད་ཡོད་པས། དེ་དག་གུང་བསྒྲིགས་ཏེ་དུས་རབས་དང་པོར་ཐག་བཅད་པར་ངེས། རྒྱའི་ཡིག་ཆ་དེ་དག་ཁུངས་སུ་འཛིན་པའི་དབང་དུ་བཏང་ནའང་《 རྒྱ་གར་ཆོས་འབྱུང་》 དུ་སློབ་དཔོན་རྟ་དབྱངས་ཀྱི་སྐུ་ཚེའི་སྨད་ཙམ་ལ་ནུབ་ཕྱོགས་ཊི་ལི་དང་མ་ལ་ཝའི་ཡུལ་དུ་རྒྱལ་པོ་ཀ་ནི་ཀ་བྱ་བ་ཞིག་བྱུང་བ་དང་། དེས་སློབ་དཔོན་སྤྱན་འདྲེན་པའི་ཕོ་ཉ་བརྫངས་པ་ལ་སློབ་དཔོན་སྐུ་ཤིན་ཏུ་བགྲེས་པས་འབྱོན་མ་ཐུབ་པར། འཕྲིན་ཡིག་སྤྲིངས་ནས་རྒྱལ་པོ་དེ་ཆོས་ལ་བཀོད་པར་བཤད་པ་དང་། རྒྱལ་པོ་དེ་ནི་ཀ་ནི་ཥྐ་དང་མི་གཅིག་པར་གོ་དགོས་ཞེས་གསལ་པོར་གསུངས་འདུག་པས། 《བྱང་ཆུབ་སེམས་དཔའ་རྟ་དབྱངས་ཀྱི་རྣམ་ཐར》 ལས་བྱུང་བའི་བྱང་ཕྱོགས་ཀྱི་རྒྱལ་པོ་དེ་ནི་རྒྱལ་པོ་ཀ་ནི་ཀྵ་ཡིན་ནམ་རྒྱལ་པོ་ཀ་ནི་ཀ་ཡིན་པའང་དོགས་གཞི་ཅན་དུ་སྣང་ན་ད་དུང་དཔྱད་པར་བྱ་དགོས་སོ། །
          སློབ་དཔོན་འདི་ཡུལ་གང་དུ་འཁྲུངས་པ་ནི། ཞང་སྟོན་ཞིག་པོས་ནུབ་ཕྱོགས་ཁ་ཆེའི་གྲོང་ཁྱེར་དུ་འཁྲུངས་པར་བཤད། བུ་སྟོན་རིན་པོ་ཆེ་དང་ཀུན་མཁྱེན་ཇོ་ཁང་པ་ཆེན་པོས་རྒྱ་གར་ཤར་ཕྱོགས་སུ་འཁྲུངས་པར་བཞེད། འབྲུག་པ་པད་དཀར་གྱིས་ལྷོ་ཕྱོགས་སུ་བཞེད། རྒྱའི་འབྲེལ་ཡོད་ཡིག་ཆ་དག་ཏུའང་རྒྱ་གར་ཡུལ་དབུས་ཡིན་པར་བཤད་པ་སོགས་འདོད་ལུགས་གཅིག་ཏུ་མ་ངེས་མོད། 《སངས་རྒྱས་ཀྱི་སྤྱོད་པ》ཞེས་བྱ་བའི་སྙན་ངག་ཆེན་པོའི་མཇུག་བྱང་དུ་ཡུལ་ཤཱ་ཀེ་ཏ་ཀའི་གསེར་མིག་མའི་བུ་ཞེས་བྱུང་ཞིང་། ཡུལ་ཤཱ་ཀེ་ཏ་ཀ་ནི་མཉན་ཡོད་དུ་ཡོད་པས་འདི་པའི་འཁྲུངས་ཡུལ་རྒྱ་གར་ཡུལ་དབུས་ཡིན་པར་བཤད་པ་ཁུངས་བཙུན་པ་འདྲ། 《གཅུང་མཛེས་དགའ་བོའི་རྟོགས་བརྗོད་》ཀྱི་མཇུག་བྱང་དུའང་དེ་བཞིན་བྱུང་ལ། རྒྱལ་པོ་རཱ་མ་ཎའི་འཁྲུངས་ཡུལ་ཡང་ཡུལ་དེ་ག་ཡིན་ཟེར།
          སློབ་དཔོན་འདིའི་ཕ་མ་དང་རིགས་རུས་སོགས་ནི། ཞང་སྟོན་ཞིག་པོས་《 བྲམ་ཟེ་ཚེའི་རིག་བྱེད་ཡན་ལག་བརྒྱད》 ནང་བྱང་ཆུབ་པ་སྨན་པ་ཆེན་པོ་སིངྒྷ་གུ་ཧྱ་ཞེས་པ་འདི་པའི་ཡབ་ཡིན་གསུངས་ལ། ཇོ་ནང་ཏཱ་ར་ནཱ་ཐས་འདི་པའི་ཡབ་ནི་བྲམ་ཟེ་ལོངས་སྤྱོད་ཆེན་པོ་དང་ལྡན་པ་ སིངྒྷ་གུ་ཧྱ་ཞེས་པ་ཡིན་གསུངས། གང་ལྟར་ཀྱང་འདི་པའི་ཡབ་ཀྱི་མཚན་ནི་ སིངྒྷ་གུ་ཧྱ་ཡིན་པ་མཐུན་ལ། དེའི་རིགས་བྲམ་ཟེ་ཡིན་པར་ཡང་གཅིག་ཏུ་མཐུན། ཚེའི་རིག་བྱེད་ལ་མཁས་པ་དང་ལོངས་སྤྱོད་ལྡན་པའང་མི་འགལ་ཏེ། འབྱོར་བ་ཆེན་པོ་དང་ལྡན་པའི་སྨན་པ་ཆེན་པོ་ཞིག་ཡིན་པར་ངེས། སིངྒྷ་གུ་ཧྱ་ཞེས་པ་བོད་སྐད་དུ་སེང་གེ་གསང་བར་འགྱུར་ལ། སེང་གེ་སྦས་པ་དང་། དགེ་འདུན་གསང་བར་བསྒྱུར་བའང་སྣང་། ཡུམ་གྱི་མཚན་ལ་རཏྣ་སིངྡྷི་སྟེ་རིན་ཆེན་དངོས་གྲུབ་ཞུ་ཞིང་། བདེ་ལྡན་མར་བསྒྱུར་བའང་སྣང་། འདི་པའི་ཡུམ་རིན་ཆེན་དངོས་གྲུབ་ཞུ་བ་འདི་ནི་གྲོང་ཁྱེར་ཁོར་ཏ་ན་ཚོང་དཔོན་ཞིག་ལ་བུ་མོ་བཅུ་ཡོད་པའི་ཐ་ཆུང་ཡིན་པར་བཤད་པས་རྗེའུ་རིགས་ཡིན་ནམ་སྙམ། གང་ལྟར་ཀྱང་ཕ་ཁྱིམ་ན་གནས་པའི་དུས་ནས་སྐྱབས་སུ་འགྲོ་བ། བསླབ་པའི་གནས་ལྔ་ལ་གནས་པ། དཀོན་མཆོག་ལ་མཆོད་པ་སྟེ། སངས་རྒྱས་ཀྱི་བསྟན་པ་ལ་གུས་པ་ཞིག་ཡིན་ནོ། །ཕྱིས་ཡུམ་གྱིས་སློབ་དཔོན་རྟ་དབྱངས་ཀྱིས་ནང་པ་རྣམས་དམའ་དབབ་པར་བྱས་པ་མ་བཟོད་པ་དང་། སློབ་དཔོན་འདི་ཉིད་ནང་པ་ལ་གཞུག་པའི་སླད་དུ་ཡུལ་གཞན་གྱི་སངས་རྒྱས་པ་རྣམས་ནི་རྟའི་རྣ་བའི་སྤུ་ཙམ་དང་། མ་ག་དྷཱའི་སངས་རྒྱས་པ་རྣམས་ནི་རྟའི་ལུས་ཀྱི་སྤུ་དང་མཚུངས་སོགས་སྨྲས་ཏེ་སློབ་དཔོན་འདི་དཔལ་ནཱ་ལེནྡྲར་རྩོད་པ་བྱེད་དུ་འགྲོ་བར་བསྐུལ་བ་ལས་ཀྱང་ཡུམ་ཆོས་ལུགས་གང་ལ་དད་པ་རྟོགས་ནུས། དེས་ན་སློབ་དཔོན་རྟ་དབྱངས་ནི་རིགས་ཀྱི་ཆོས་སམ་ཡབ་ཀྱི་ཤན་ལས་དང་ཐོག་ཕྱི་རོལ་པའི་སློབ་དཔོན་ཆེན་པོར་གྱུར་པ་དང་། ཕྱིས་སུ་ཡུམ་གྱི་ཤན་ཞུགས་ཏེ་ནང་པ་ལ་ཞུགས་པར་བསམས། དེ་ལྟར་སློབ་དཔོན་འདི་ནི་ཡབ་ཡུམ་གཉིས་ལས་གཅིག་བྲམ་ཟེ་དང་གཅིག་རྗེའུ་རིགས་ཡིན་པས་རིགས་མི་མཐུན་ལ། གཅིག་ཕྱི་རོལ་པ་དང་གཅིག་ནང་པ་ཡིན་པས་ཆོས་ཀྱང་མི་གཅིག་པའི་ཁྱིམ་ཞིག་ཏུ་འཁྲུངས་པར་མངོན། གཞན་ཡང་《ཚིག་དོན་སྒྲ་སྦྱོར་ངེས་པ》ལྟར་ན། སློབ་དཔོན་རྟ་དབྱངས་ལ་སྲས་ཆགས་ལ་མངོན་དགའ་ཞེས་པ་ཞིག་མངའ་ཞིང་། དེའི་སྲས་ནི་ཟླ་བ་མངོན་དགའ་སྟེ། ཁ་ཆེ་ཟླ་བ་མངོན་དགའ་ཞེས་གསོ་རིག་ལ་མཁས་པའི་མཁས་པ་ཆེན་པོ་དེ་ཡིན་ཞིང་། སློབ་དཔོན་འདི་ཉིད་ཀྱི་ཚ་བོའོ། །
          སློབ་དཔོན་འདིའི་མཚན་གྱི་སྐོར་ལ་《 རྒྱ་གར་ཆོས་འབྱུང་》དུ། དེ་ལ་སློབ་དཔོན་མ་ཁོལ་ནི་གོང་དུ་ཅུང་ཟད་བརྗོད་པའི་བྲམ་ཟེ་ཐུབ་དཀའ་ནག་པོ་དེ་ཉིད་ཡིན་ཏེ། དཔའ་བོ་དང་། རྟ་དབྱངས་དང་། མ་ཁོལ་དང་། ཐུབ་དཀའ་དང་། ཆོས་ལྡན་རབ་འབྱོར་དང་། མ་ཏི་ཙི་ཏྲ་རྣམས་མཚན་གྱི་རྣམ་གྲངས་སུ་གྲགས་པ་ཡིན་ནོ་ཞེས་མཚན་མི་འདྲ་བ་བརྒྱད་འདྲེན་པར་མཛད་ཅིང་། ཞང་སྟོན་ཞིག་པོའི་《རྒྱལ་མཚན་རྩེར་འབད》ཅེས་པར་སློབ་དཔོན་འདི་ནང་པར་མ་ཞུགས་གོང་དུ་མཚན་ལ་བདུད་རྩི་བུམ་པ། ཕ་ཁོལ་མ་ཁོལ། དཔལ་ཆེན་དགེ་བ། རྟ་དབྱངས། དགའ་བྱེད། མ་ཏི་ཙི་ཏྲ། ཨ་ཤཱ་ཀ  ཐུབ་རྒྱལ་ནག་པོ་ཞེས་པར་གྲགས་ཤིང་། ནང་པར་ཞུགས་ནས་དཀོན་ཅོག་འབངས། རབ་འབྱོར་བསྐྱངས། བྷ་ཝི་ལྷ། མར་མེ་མཛད། ངོ་བོ་གཉིས་མེད་པ། བཀོང་མ་འཛིན། བཙུན་པ་དཔའ་བོ། དགྲ་ལས་རྣམ་རྒྱལ། རྡོ་རྗེའི་མཚོན་ཆ། ལྷ་གསུམ་པ། བྷ་པ་དྷ། གཞན་ལ་ཕན་པའི་དབྱངས། ཨཱརྱ་ཤུ་ར་སོགས་དུ་མ་ཞིག་མཆིས་ཤིང་།  གྲགས་ཆེ་བ་ནི་ཉི་ཤུ་རྩ་གཅིག་པོ་འདི་ཉིད་ཡིན་པར་བཤད། དེས་ན་མཚན་གྱི་རྣམ་གྲངས་དེ་དག་གིས་བརྡ་ཅི་སྦྲོན་པ་ལས་བརྩམས་ཏེ་སློབ་དཔོན་འདིའི་མཐའ་ལ་ཅུང་ཟད་བརྟགས་ན། ནག་པོ་ཞེས་པ་ནི་དང་པོ་འཁྲུངས་མ་ཐག་པའི་མཚན་དང་། ཕ་ཁོལ་མ་ཁོལ་ཞེས་པ་ལས་ཕ་མ་གཉིས་ལ་བཀུར་བསྟི་ཆེ་བ་དང་། མ་ཏི་ཙི་ཏྲ་ཞེས་པ་ལས་བློ་གྲོས་བཀྲ་བ། རྟ་དབྱངས་ཞེས་པ་ལས་སྐད་སྙན་པ། བདུད་རྩི་བུམ་པ་ཞེས་པ་ལས་གསོ་རིག་ལ་མཁས་པ། ཐུབ་དཀའ་ནག་པོ་ཞེས་པ་ལས་རྩོད་པ་ལ་འགྲན་ཟླ་དང་བྲལ་ཞིང་ནང་པ་རྣམས་ཕམ་པར་བྱས་པ། དཀོན་མཆོག་འབངས་ཞེས་པ་ལས་ནང་པར་ཞུགས་པ། བཙུན་པ་དཔལ་པོའམ་དཔའ་བོ་ཞེས་པ་ལས་རབ་ཏུ་བྱུང་བ་སོགས་བསམས་པར་ནུས་ལ། དེ་དག་ཏུ་སློབ་དཔོན་འདིའི་ལོ་རྒྱུས་ཀྱི་འགངས་ཕལ་ཆེ་བ་འདུ་བར་བསམས། འོན་ཀྱང་འདིར་བརྗོད་པར་འོས་པ་འགའ་ཞིག་སྣང་བ་ནི། བོད་ཀྱི་མཁས་པ་རྣམས་གོང་དུ་སོང་བ་བཞིན་དཔའ་བོ་ཞེས་པའང་སློབ་དཔོན་འདིའི་མཚན་གྱི་རྣམ་གྲངས་ཤིག་ཏུ་འདོད་པས་སྐྱེས་རབས་སོ་བཞི་པའི་མཛད་པ་པོའང་སངས་རྒྱས་ཀྱི་སྤྱོད་པ་ཞེས་བྱ་བའི་མཛད་པ་པོ་སྟེ་སློབ་དཔོན་རྟ་དབྱངས་འདི་པ་ཡིན་པར་འདོད་མོད། རྒྱལ་ཁབ་ཕྱི་ཁང་གི་ཞིབ་འཇུག་པ་(དཔེར་ན་མཁས་པ་ཅིན་ཁི་མུ་སོགས)དུ་མ་ཞིག་གིས་རྟ་དབྱངས་དང་དཔའ་བོ་གཉིས་གང་ཟག་སོ་སོ་བ་ཡིན་པར་འདོད། ཡང་རྒྱའི་བཀའ་བསྟན་ཆེན་མོའི་ཁྲོད་བཞུགས་ཤིང་ལོ་ཙཱ་བ་ཀུ་མཱ་ར་ཤྲཱིས་རྒྱ་ཡིག་ཏུ་བསྒྱུར་བའི་《བྱང་ཆུབ་སེམས་དཔའ་རྟ་དབྱངས་ཀྱི་རྣམ་ཐར》ཞེས་པར། སློབ་དཔོན་འདིས་ཆོས་གསུང་སྐབས་ཤིག་ལ། ཉིན་དྲུག་གི་བར་གཟན་བཀག་པའི་རྟ་བདུན་གྱིས་མདུན་དུ་བོར་བའི་རྩྭ་བཟང་པོའང་ཟ་རྒྱུ་མི་དྲན་པར་མཆི་མ་ཁྲུལ་ལེ་སློབ་དཔོན་གྱི་གསུང་ལ་ཉན་པར་བཤད་ཅིང་། རྟས་ཀྱང་སློབ་དཔོན་གྱི་གསུང་དབྱངས་གོ་བས་མཚན་ལ་རྟ་དབྱངས་ཐོགས་ཟེར།  དེ་ལྟར་ན་རྟ་དབྱངས་ཞེས་པ་སློབ་དཔོན་འདི་ནང་པར་ཞུགས་པའི་རྗེས་སུ་བཏགས་པ་ལྟར་སྣང་མོད། དོན་དུ་བོད་ཀྱི་ཡིག་ཆར་གསལ་བ་ལྟར་རྟ་དབྱངས་ཞེས་པ་ནི་སློབ་དཔོན་འདི་ནང་པར་མ་ཞུགས་གོང་གི་མཚན་ཡིན་ངེས་ལ། བཤད་རྒྱུན་ལ་མུ་སྟེགས་རྟ་དབྱངས་ཞེས་མུ་སྟེགས་དང་རྟ་དབྱངས་གཉིས་ལྷན་དུ་སྦྱོར་བའི་སྐབས་ཤིན་ཏུ་མང་བ་ལས་ཀྱང་དེ་ལྟར་ཡིན་པ་དཔོག་ནུས་སྙམ། བཙུན་པ་དཔའ་བོ་ཞེས་པ་ལས་སློབ་དཔོན་འདི་ཕྱིས་སུ་ནང་པར་ཞུགས་པ་ཙམ་དུ་མ་ཟད་ཁྱིམ་སྤངས་ནས་རབ་ཏུ་བྱུང་བའང་རྟོགས་ནུས། དེས་ན་བོད་ཀྱི་ཡིག་ཆར་སློབ་དཔོན་འདི་ལ་ཆགས་ལ་མངོན་དགའ་ཞེས་པའི་སྲས་ཤིག་ཡོད་པར་བཤད་པ་ནི་སྔོན་སློབ་དཔོན་འདི་ཉིད་ནང་པར་མ་ཞུགས་གོང་ཁྱིམ་ན་གནས་པའི་ཚེ་བསྐྲུན་པ་ཡིན་པར་གོ་དགོས། མ་ཏི་ཙི་ཏྲ་ཞེས་པ་ནི་ལེགས་སྦྱར་གྱི་སྐད་དེ་བོད་སྐད་དུ་བསྒྱུར་ན་བོད་ཀྱི་ཡིག་ཆར་གསལ་བ་ལྟར་བློ་གྲོས་བཀྲ་བའི་དོན་དུ་འགྱུར་མོད། ལུའི་ཁྲིན་(吕澂) སོགས་རྒྱའི་མཁས་པ་ཁ་ཅིག་གིས་དེ་མ་ཁོལ་གྱི་དོན་ཡིན་པར་བཤད་པ་དང་། ཉི་ཧོང་གི་མཁས་པ་ཚུ་རྫིས་ན་ཨོ་ཞིས་ལཱོ་ཞེས་པའི་《 སཾསྐྲྀཏའི་རྩོམ་རིག་ལོ་རྒྱུས》 སུ་དེ་དུ་རྒའི་ཁོལ་བོ་ཞེས་པའི་དོན་ཡིན་པར་བཤད་པ་སོགས་ལ་རྒྱུ་མཚན་ཅི་ཡོད་ཧ་མ་གོ་སྟེ། དརྒ་ནི་དབང་ཕྱུག་གི་ཆུང་མ་ཨུ་མའི་རྣམ་པ་གཞན་ཞིག་གི་མིང་ངོ་། །ཉི་ཧོང་གི་མཁས་པ་འདི་དང་《རྒྱ་གར་ཆོས་འབྱུང་》རྩོམ་མཁན་དབྱིན་ཇིའི་མཁས་པ་བོ་ཏིར་སོགས་ཀྱིས་རྟ་དབྱངས་དང་མ་ཏི་ཙི་ཏྲ་གང་ཟག་སོ་སོ་བར་ཕྱེ་ཡོད་ཀྱང་རྒྱུ་མཚན་འཐད་ལྡན་ཞིག་མ་མཐོང་། ཇོ་ནང་ཏཱ་ར་ནཱ་ཐས་དྷརྨཱ་ཙནྡྲའི་ཞང་པོའི་བུ་ཝཱ་རཱ་ཎའི་སཱིའི་རྒྱལ་པོ་སངས་རྒྱས་ཕྱོགས་ཀྱི་དུས་སུ་མ་ཏི་ཙི་ཏྲ་ཕྱི་མ་ཞིག་ཀྱང་བྱོན་ཟེར། མ་ཁོལ་ཞེས་པའང་ཉུང་མཐར་གཉིས་ཡོད་དེ། རྒྱལ་པོ་གོ་བི་ཙནྡྲའི་དུས་སུ་ཁ་ཆེའི་ཡུལ་དུ་འདུལ་འཛིན་མ་ཁོལ་ཞེས་པ་ཞིག་བྱུང་ཞེས་ཇོ་ནང་པ་ཆེན་པོའི་《 རྒྱ་གར་ཆོས་འབྱུང་》དུ་བཤད།
          སློབ་དཔོན་རྟ་དབྱངས་ཀྱི་སློབ་དཔོན་དང་གྲུབ་མཐའ་ནི། སྐུ་ཚེ་སྟོད་ཙམ་ལ་ཕྱི་རོལ་པའི་སློབ་དཔོན་ཆེན་པོ་ཡིན་གཤིས་ཕྱི་རོལ་པའི་སློབ་དཔོན་མང་པོ་བསྟེན་ཡོད་པ་ཐག་གིས་ཆོད་ལ། ཡབ་ལས་གསོ་བ་རིག་པ་བསླབས་པས་ཚེགས་མེད་དུ་མཁྱེན་ཟེར་བས་ཡབ་སེང་གེ་གསང་བ་ཞེས་ཚེའི་རིག་བྱེད་ལ་བྱང་ཆུབ་པ་དེའང་འདི་པའི་སློབ་དཔོན་གྱི་གཙོ་བོ་ཞིག་ཡིན་པ་རྟོགས་ནུས། ཞང་སྟོན་ཞིག་པོ་དང་། ཇོ་ནང་ཏཱ་ར་ནཱ་ཐ། པཎ་ཆེན་བསྟན་པའི་ཉི་མ། ཀུན་མཁྱེན་འཇིགས་མེད་དབང་པོ་སོགས་ཀྱིས་སློབ་དཔོན་ཨཱརྱ་དེ་ཝའམ་འཕགས་པ་ལྷས་སློབ་དཔོན་རྟ་དབྱངས་འདི་ཉིད་རྩོད་པས་ཚར་བཅད་དེ་ནང་པར་བཅུག་གསུངས་པས། བོད་ཀྱི་བཤད་ལུགས་ལ་འདི་པ་ནང་པར་ཞུགས་རྗེས་སློབ་དཔོན་གྱི་གཙོ་བོ་ནི་སློབ་དཔོན་ཨཱརྱ་དེ་ཝ་ཡིན་པར་ཡོངས་སུ་གྲགས། འོན་ཀྱང་རྒྱ་ཡིག་ཏུ་འགྱུར་བའི་《བྱང་ཆུབ་སེམས་དཔའ་རྟ་དབྱངས་ཀྱི་རྣམ་ཐར》ཞེས་པར་སློབ་དཔོན་རྟ་དབྱངས་རྩོད་པས་ཚར་གཅོད་མཁན་ནམ་ནང་པར་འཛུད་མཁན་ནི་འཕགས་པ་རྩིབས་ལོགས་ཡིན་པར་བཤད་ལ། ཡང་རྒྱའི་ཡིག་ཆ་གཞན་ཞིག་ཏུ་འདི་པ་ནང་པར་འཛུད་མཁན་ནི་འཕགས་པ་རྩིབས་ལོགས་ཀྱི་སློབ་མ་ཞིག་ཡིན་པར་ཡང་བཤད། རྒྱའི་བཀའ་བསྟན་ཆེན་མོའི་ཁྲོད་ན་ལོ་ཙཱ་བ་ཆེན་པོ་ཀུ་མཱ་ར་ཤྲཱིས་བསྒྱུར་བའི་《 བྱང་ཆུབ་སེམས་དཔའ་འཕགས་པ་ལྷའི་རྣམ་ཐར》ཞེས་པ་ཞིག་ཡོད་པ་དེ་དང་། 《ཐང་སན་ཙང་གི་ལམ་ཡིག》 ཏུ་སློབ་དཔོན་ཨཱརྱ་དེ་ཝས་མུ་སྟེགས་མང་པོ་རྩོད་པས་ཚར་བཅད་པའི་ལོ་རྒྱུས་ཡོད་མོད། རང་གར་མུ་སྟེགས་པ་ཞེས་སྤྱི་བམ་པ་ཙམ་ཞིག་ལས་རྟ་དབྱངས་ཀྱི་མིང་ནི་མ་བྱུང་ངོ་། །
          སློབ་དཔོན་འདི་གྲུབ་མཐའ་གང་ལ་གཏོགས་པ་ནི་སྔར་ཡང་བཤད་པ་ལྟར་སྐུ་ཚེའི་སྟོད་ལ་ཕྱི་རོལ་མུ་སྟེགས་རྟག་སྨྲ་བའི་སློབ་དཔོན་ཆེན་པོ་ཞིག་ཡིན་པར་མ་ཟད། དབང་ཕྱུག་ཆེན་པོའི་རྟེན་ལིངྒི་ཤྭ་ར་རབ་ཏུ་གྲུབ་པ་ཞེས་པའི་དྲུང་དུ་དམ་བཅའ་བརྟན་པོ་བཅས་ཏེ་ལྷ་ཆེན་དབང་ཕྱུག་བསྒྲུབས་པས་མཐར་གྲུབ་སྟེ་ཞལ་དངོས་སུ་བསྟན་ལ། སྲིང་མོ་པཎྜི་དང་། ནེ་ཙོ་པཎྜི་དང་། ཐོད་ལེ་ཀོར་པཎྜི་སོགས་མངལ་སྐྱེས་གང་གིས་ཀྱང་མི་ཐུབ་པའི་དངོས་གྲུབ་ཀྱང་བསྩལ་པར་གྲགས། འོན་ཀྱང་། སློབ་དཔོན་འདི་ཕྱིས་སུ་ནང་པར་ཞུགས་ཤིང་། སྡེ་པ་ནི་ཐམས་ཅད་ཡོད་པར་སྨྲ་བ་ཡིན་པར་འདོད། ཉེ་དུས་ཀྱི་ཞིབ་འཇུག་པ་ཁ་ཅིག་གིས་ཐམས་ཅད་ཡོད་པར་སྨྲ་བའི་སྡེ་བ་ཡིན་པས་འདི་པ་ཐེག་པ་ཆུང་ངུའི་སློབ་དཔོན་ཞིག་ཡིན་སོགས་ཟེར་བ་ནི་ཐེག་ཆེན་སེམས་བསྐྱེད་ཀྱིས་འཇོག་པའི་གནད་མ་ཤེས་པ་ཡིན་ལ། དེ་ནི་ཕྱི་ཡི་སྤྱོད་ཚུལ་དང་ནང་གི་རྣམ་འབྱོར་གཉིས་འགལ་བར་འཛིན་པའི་འཁྲུལ་བ་སྟེ། དེ་ལྟར་ན་ཆོས་འདུལ་བ་ལས་རབ་ཏུ་བྱུང་བའི་ཐེག་ཆེན་པ་མེད་པར་ཁས་ལེན་དགོས། འདི་པ་ཐེག་པ་ཆེན་པོའི་སློབ་དཔོན་ཞིག་ཡིན་པ་ནི་བོད་དང་རྒྱའི་ཡིག་ཚང་སྔ་མ་དག་ཏུ་གསལ་བར་མ་ཟད། འདི་པས་མཛད་པའི་ཐེག་ཆེན་གྱི་གཞུང་ཇི་སྙེད་ཅིག་ཡོད་པ་ལས་ཀྱང་ཤེས་ནུས་ལ། སྨོན་ལམ་བདུན་ཅུ་པ་གཅིག་པུ་ལ་བལྟས་པས་ཀྱང་ཁོ་ཐག་ཆོད་པར་འགྱུར། འོན་ཀྱང་སློབ་དཔོན་རྟ་དབྱངས་འདི་པས་ཐེག་པ་ཆེ་ཆུང་གི་དགེ་སློང་ཀུན་ལ་ཤིན་ཏུ་སྙོམས་པར་ཕན་ཐོགས་ཤིང་ཐེག་ཆེན་ཁོ་ནའི་ཁ་འཛིན་ཡང་མི་མཛད་པས་ཉན་ཐོས་རྣམས་ཀྱང་ལྷག་པར་དད་ཅིང་། ནང་པའི་སྤྱི་མི་ལྟ་བུར་གྱུར་ཏེ་ཤིན་ཏུ་གྲགས་ཆེ་བར་བཤད་པ་ནི་ངེས་པར་བདེན་སྙམ།
          དེ་ལྟར་གོང་དུ་བརྗོད་པ་འདི་དག་ནི་སློབ་དཔོན་རྟ་དབྱངས་ཀྱི་ལོ་རྒྱུས་ཀྱི་གནད་འགའ་ཞིག་ལས་བརྩམས་ཏེ། ཡིག་ཆ་དུ་མ་གུང་བསྒྲིགས་ནས་ཅུང་ཟད་སྤྲོས་པ་ཡིན་ལ། སློབ་དཔོན་འདི་པའི་མཛད་པ་ལས་གསུང་གི་མཛད་པའི་སྐོར་དང་། དེ་དང་འབྲེལ་བའི་ལོ་རྒྱུས་རྣམས་ནི་དཔྱད་རྩོམ་གཞན་ཞིག་ཏུ་བཤད་པར་བྱའོ། །