ལེགས་བཤད་སྦྲང་རྩིའི་སྙིང་པོ།
﹙ཁག་གཉིས﹚
ཨོ་སྭསྟི་སིདྡྷྱཾ། གུར་ཀུམ་ཚོས་ཀྱི་བཀྲུས་པའི་འཛམ་བུའི་གསེར་གྱི་རི། །
ཉི་མ་སྟོང་གི་འོད་ཟེར་འཐུང་བས་རབ་མྱོས་པ། །
དབང་སྔོན་ཐོར་ཚུགས་ཡོན་པོར་བཅིངས་ཏེ་འགྱིང་བ་བཞིན། །
མངོན་དགའ་སྐྱོད་པའི་དཔལ་དེ་སྙིང་ལ་རོལ་གྱུར་ཅིག །
རིག་པ་ཡོངས་འདུའི་མེ་ཏོག་རྣམ་རྒྱས་པའི། །
ཡོན་ཏན་སྐྱེད་མོས་ཚལ་དུ་སེམས་ཅན་གྱི། །
རྒྱུད་ཀུན་བྱེད་པོ་བླ་མ་ལྷག་པའི་ལྷ། །
དགྱེས་པའི་འཛུམ་ཞལ་སྟོན་ལ་རིངས་པར་གུས། །
སྐྱེས་ཐོབ་ཤེར་རབ་ཨ་མྲའི་མྱུ་གུ་ཞིག །
ལུང་རིགས་འོ་མས་བཅུས་པའི་སྐལ་བཟང་གིས། །
ལེགས་བཤད་འབྲས་བུ་ཞིམ་པོ་ཉམས་མྱོང་བ། །
དགའ་སྟོན་དུས་ལ་བབས་པས་འདོད་དགུར་སྤྱོད། །
སུ་དག་འཁོར་བའི་མཐའ་ལ་ཡིད་སྐྱོ་ནས། །
བྱང་ཆུབ་སྙིང་པོའི་ལྡིང་ཁང་བསྟེན་འདོད་པ། །
དེ་དག་བློ་གྲོས་གཅིག་པའི་འདུན་མ་ལ། །
བསམ་གཏན་རྣམ་པར་ཚུགས་པའི་འདུན་མ་ལ། །
བསམ་གཏན་རྣམ་པར་ཚུགས་པའི་སྤྲོ་བ་སྐྱེད། །
མ་ནོར་ལམ་སྟོན་དམ་པའི་མགོན་དང་བཅས། །
མུ་མཐའ་བྲལ་བའི་གསུང་རབ་འདོད་དགུར་མཇལ། །
མེ་ཏོག་ཟས་ཅན་སྦྲང་རྩི་གཞིབ་པ་ལྟར། །
མི་ཚེ་ཆོས་ཀྱིས་དོན་ཡོད་བྱ་བར་རིགས། །
བདེ་ལེགས་ཀུན་འབྱུང་བག་ཡོད་བདུད་རྩིའི་ཆུས། །
ཉེས་སྤྱོད་དྲི་མ་འཁྲུད་པའི་ཆོ་ག་མཁན། །
ཉི་མས་ཕྱེ་བའི་པདྨ་དཀར་པོ་དང་། །
བཞིན་རས་དྭངས་པའི་འཛུམ་བག་སོ་སོར་སྡེབ། །
བརྗེ་བ་རྣམ་གསུམ་ཚོན་གྱིས་ཁ་བསྒྱུར་ཅིང་། །
བཅས་མཚམས་དྲན་ཤེས་བརྟན་པའི་ཟུངས་བཏབ་པ། །
ཚུལ་ཁྲིམས་གཙང་མའི་གོས་ཅན་དེ་དག་གི།
དྲུང་ན་ཕྱོར་པོ་མང་ཞིག་གཅེར་བུར་སོང་། །
ཟབ་མོ་སྟོང་བའི་མཁའ་ལ་རྙོབ་པ་དང་། །
རྒྱ་ཆེའི་མཚོ་ལ་མཆོངས་པ་ཀུན་དོར་ལ། །
ཐོག་མ་ཁོ་ནར་གྲུ་འདི་ཚགས་བཙུགས་ཏེ། །
ངེས་ལེགས་ནོར་བུའི་གླིང་དུ་ཆ་བར་འོས། །
ནམ་ཞིག་གྲིབ་མ་གཉིས་པའི་གྲོགས་ཀྱིས་ཀྱང་། །
སྨྲ་བ་བཅད་པའི་དཀའ་ཐུབ་ཡུན་རིང་བོར། །
ཏིང་འཛིན་བདེ་ལ་གཡུར་དུ་ཟ་བའི་སྤྱན། །
ཟིམ་བུར་ལྟ་བའི་དྲང་སྲོང་གཅིག་ཏུ་སྨོན། །
བྱིང་རྒོད་རྙོག་པ་དྭངས་པའི་སྐད་ཅིག་ལ། །
ཡོན་ཏན་མ་ལུས་འཆར་བའི་ཆུ་གཙང་ཞིག །
ཀུན་གཞིའི་མཐིལ་དུ་འཁྱིལ་བའི་ངོ་མཚར་ལ། །
རྒྱལ་བ་ཀུན་ཀྱང་དགྱེས་བཞད་མཛད་པ་སྙམ། །
རིགས་པའི་གསང་ཚིག་བྱེ་མ་རེག་ཆོད་དུ། །
བདར་བའི་ཤེས་རབ་མཚོན་ཆ་རྣོན་པོ་ཡིས། །
ཉེས་བརྒྱའི་རྩ་བ་བྲེག་པའི་དཔའ་བོ་དེས། །
སྲིད་གསུམ་མགོ་བོ་ཡུད་ཀྱིས་རྡོག་པས་གནོན། །
ལོག་པར་ལྟ་བའི་གཤིན་རྗེ་འཇིགས་རུང་བ། །
དགེ་བའི་སྲོག་ཆགས་མ་ལུས་ཁྱུར་མིད་དུ། །
ཟ་བྱེད་གཡུལ་ལས་རྣམ་རྒྱལ་འཆི་མེད་ཀྱི། །
རིག་འཛིན་སྒྲུབ་པ་ཡང་དག་ལྟ་བའི་གནད། །
གང་ཤར་རྟོག་པའི་པིར་གྱིས་བྲིས་པ་ལ། །
སྣ་ཚོགས་ལས་ཀྱི་ཚོན་མདངས་བཀྲ་བ་ཞིག །
མ་བཅོས་རང་བབས་ཉིད་དུ་མི་འཛིན་པར། །
བདེ་ཆེན་སེམས་ཀྱི་རི་མོ་གཅིག་པུར་བལྟ། །
རི་བོང་རྭ་ཡིས་ཕུགས་པའི་ཟུག་རྔུ་དང་། །
ནམ་མཁའི་པདྨོར་ཉལ་བའི་བདེ་བ་གཉིས། །
མོ་གཤམ་བུ་ལ་ཁྱད་པར་མ་མཆིས་པའི། །
གུ་ཡངས་འབྱམས་སུ་ཀླས་པས་ཁོང་འཛུམ་འཆོར། །
ཡུལ་དབང་རྣམ་ཤེས་ཚོགས་པའི་སུམ་མདོ་ན། །
སྣང་བ་ཅི་ཡང་འཆར་བའི་བུན་ལོང་པོ། །
བསླུ་བྲིད་སྒྱུ་མའི་ལྟད་མོ་འབའ་ཞིག་པར། །
སྔར་འདྲིས་གྲོགས་པོ་བཞིན་དུ་ངོ་ཡང་ཤེས། །
མི་ཡིས་ཚིག་པ་ཕྱིར་ཞིང་བསྲོས་པ་ཡིས། །
གདུང་བ་སེལ་ལ་མཚར་དུ་རྩི་བྱེད་ན། །
སྣང་བས་སྣང་བ་འཁྲུད་པའི་བྱི་དོར་གྱིས། །
དག་པ་གཉིས་ལྡན་ཀུན་དགའ་སྐྱེད་པའི་ཕུལ། །
བདེ་སོགས་བདག་པོའི་ཕྱོགས་ཀྱི་ཟུར་ཕུད་ལ། །
ལི་ཁྲིའི་འོད་ཀྱི་རྩེ་དགའ་ལྷུར་ལེན་པས། །
འཇིག་རྟེན་མཐའ་དག་ལྟ་བའི་མིག་ཕྱེད་པ། །
ཉི་མའི་གཉེན་གྱི་གོ་འཕང་དེ་ལྟར་སྒྲུབས། །
སྐྱེས་སྦྱངས་སྤོས་དཀར་འཁྲི་ཤིང་བཞད་པ་ཡི། །
ཡལ་འདབ་ལ་ཟོས་ཚད་མ་གཉིས་འཐུང་དབང་། །
རང་ཉམས་སྦྲེགས་པའི་དྲི་ལེན་ལྕགས་ཀྱུ་རུ། །
སོང་བའི་བུང་བ་འགྲན་པའི་རྔ་ཆེན་རྡུང་། །
སོས་ཀ་ནགས་ཀྱི་བུ་མོའི་མགུལ་བ་ལ། །
མངོན་དགས་འཁྱུང་པའི་ཁུ་བྱུག་གཞོན་ནུ་དེ། །
གསུང་སྙན་གྲེ་འགྱུར་རོལ་མོས་ཕྱོགས་ཀུན་གྱིས། །
ལུས་སྐྱེས་སྤུ་ལོ་གཡོ་བའི་འཛུམ་དཀར་སྟོན། །
འདིར་འབད་བསོད་ནམས་རིན་ཆེན་གཏེར་གྱི་བུམ་པ་ནས། །
ཕུན་ཚོགས་སྲིད་ཞིའི་དཔལ་གྱི་འདོད་པ་ཀུན་འཇོ་བས། །
རེ་བ་མ་ལུས་ཅིག་ཆར་རྫོགས་འདི་ཡ་མཚན་ཞེས། །
འགྲོ་ཀུན་སྐྱིད་པའི་རྒྱང་གླུ་ཅི་ཡང་ལེན་པར་རྩོམ། །
རང་གི་དོན་ལ་ནམ་ཡང་མི་ཕངས་པར། །
གཞན་འབའ་ཞིག་ཏུ་སྙིང་ཉེ་གང་གི་ན། །
བསམ་པ་ལྷག་པའི་ཡོན་ཏན་མཐའ་ཡས་པ། །
དེ་རིང་ཉིད་ལ་མངོན་དུ་འགྱུར་བར་ཤོག །
ཅེས་ལེགས་བཤད་སྦྲང་རྩེའི་སྙིང་པོ་ཞེས་བྱ་བ་འདི་ནི། མཉམ་མེད་རི་བོ་དགེ་ལྡན་པའི་རིང་ལུགས་ཀྱི་རྣམ་ཐར་གཙང་མ་ཚུལ་བཞིན་སྐྱོང་བའི་ཆོས་སྡེ་ཆེན་པོ་དགོན་ལུང་ཕྱོགས་ནས། རིགས་པའི་གཞུང་ལ་བློ་འོད་རྣམ་པར་འཕྲོ་བའི་དཔྱོད་ལྡན་སངས་རྒྱས་བསྟན་འཛིན་གྱིས། བཟང་གོས་ཀྱི་གླེགས་བུ་ཁྱད་མཚར་ཟུང་དང་ལྷ་རྫས་བཅས་འཕྲིན་ཡིག་གི་ལམ་ནས་བསྐུལ་བ་དོན་ཡོད་པར་བྱ་བའི་ཕྱིར། འཛམ་གླིང་མཁས་གྲུབ་ཀུན་གྱི་གཙུག་རྒྱན་རྗེ་བཙུན་བླ་མ་༧ཐུའུ་བཀྭན་རྡོ་རྗེ་འཆང་ཆེན་པོའི་བཀའ་དྲིན་ལས་བསྟན་པ་ཡོངས་རྫོགས་ཀྱི་མན་ངག་ཟབ་མོའི་གནད་ལ་བློ་ཁ་ཕྱོགས་པའི་དགེ་སློང་ཆོས་སྨྲ་བ་༧ངག་དབང་མི་ཕམ་ཟླ་བའམ། །མིང་གཞན་དབྱངས་ཅན་དགའ་བའི་བློ་གྲོས་ཞེས་བགྱི་བས། རབ་བྱུང་བཅུ་གསུམ་པའི་ཤིང་བྱི་ཆོ་འཕྲུལ་གྱི་ཟླ་བ་ལ་རོང་བོ་ཐོས་བསམ་གླིང་གི་རང་གནས་གཙུག་ལག་ཁང་ནས་སུག་བྲིས་སུ་བགྱིས་པ་དགེ་ལེགས་སུ་གྱུར་ཅིག །