ཀྲུང་གོའི་བོད་ལྗོངས་དྲ་བ། > རྩོམ་རིག > ལྷུག་རྩོམ།

བོད་རང་སྐད་ཀྱི་རྒྱུན་མཁོའི་ཕལ་ཚིག་དང་ཞེ་ཚིག།

སྤེལ་དུས 2013-11-12 ཡོང་ཁུངས། མཚོ་ནུབ་ཁུལ་མི་རིགས་སྐད་ཡིག་གཞུང་སྒྲུབ་ཁང་། རྩོམ་པ་པོ། ཁོན་ཐར་འཚོ།

བོད་རང་སྐད་ཀྱི་རྒྱུན་མཁོའི་ཕལ་ཚིག་དང་ཞེ་ཚིག་བསྡུར་བསྒྲིགས་གཅེས་བཏུས་མ་བཞུགས་སོ།

      ཞེ་ཚིག་ཅེས་པ་ནི་གཞན་ལ་མོས་གུས་དང་ལྡན་པའི་སྒོ་ནས་བཀོལ་བའི་མིང་དང་ཚིག་དང་ཡིག་ཚོགས་ལ་གོ་དགོས་པ་ཡིན། ཕ་ལ་ཡབ་དང་མ་ལ་ཡུམ། །མིང་ལ་མཚན་དང་ལུས་ལ་སྐུ། །གཟུགས་བརྙན་ལ་ནི་སྐུ་བརྙན་དང་།།མགོ་ལ་དབུ་དང་ངོ་ལ་ཞལ།།མིག་ལ་སྤྱན་དང་རྣ་ལ་སྙན། །སྣ་ལ་ཤངས་དང་ཁ་ལ་ཞལ། །སོ་ལ་ཚེམས་དང་ལྕེ་ལ་ལྗགས།། སྐེ་ལ་མགུལ་དང་ལག་ལ་ཕྱག།རྐང་ལ་ཞབས་དང་ལྷམ་ཞབས་ཕྱགས།།རྐང་པར་ཞབས་པད་ཅེས་ཀྱང་བརྗོད།།མཛུ་གུ་ལ་ནི་ཕྱག་སོར་དང་།།ལག་པའི་སེན་མོར་ཕྱག་སེན་བྱ།།རྐང་མཛུབ་ལ་ནི་ཞབས་སོར་དང་།།རྐང་པའི་སེན་སོར་ཞབས་སེན་བརྗོད།།སེམས་ལ་ཐུགས་དང་སྐད་ལ་གསུང་།།གླུ་ལ་མགུར་དང་ལེན་པར་བཞེངས།།མདུན་ལ་དྲུང་དང་འཁྱག་ལ་བསིལ།།བསམ་ལ་དགོངས་དང་ཤེས་ལ་མཁྱེན།།ལྟ་ལ་གཟིགས་དང་ཉན་ལ་གསན།།རྣ་བས་ཚོར་བར་སྙན་གྱིས་གསན།།ཁྱོད་ལ་ཁྱེད་དང་ཁོ་ལ་ཁོང་།།འགྲོ་ལ་བྱོན་དང་དང་འདུག་ལ་བཞུགས།།ལས་ཀར་ཕྱག་ལས་སྙིང་ལ་ཐུགས།།ལངས་ལ་བཞེངས་དང་ཉལ་ལ་གཟིམས།།ཟ་ལ་གསོལ་དང་འཐུང་ལ་བཞེས།།།ཇ་ལ་གསོལ་ཇ་ཆང་གསོལ་ཆང་།།བཏུང་བར་སྐྱེམས་དང་གཉིད་ལ་མནལ།།ཤ་ལ་ཀྲུམ་དང་ཁྲག་ལ་མཚལ།།སྦྱིན་ལ་འབུལ་དང་བཟུང་ལ་སྣོམ།།གྱོན་ལ་ནབ་དང་སླེབས་ལ་ཕེབས།།དགའ་ལ་དགྱེས་དང་སྐྱོ་ལ་སུན།།སྐྱེ་ལ་འཁྲུངས་དང་ཤི་ལ་འདས།།ཤི་ལ་གྲོངས་གཤེགས་ཟེར་བའང་ཡོད།།ངུ་ལ་བཤུམ་དང་བགད་ལ་བཞད།།འདྲི་ལ་ཞུ་དང་བཤད་ལ་གསུངས།།སྟེར་ལ་གནང་དང་བྱེད་ལ་མཛད།།སྟེར་བར་བསྩལ་བ་ཞེས་ཀྱང་བྱ།།ནད་ལ་སྙུན་དང་ན་ལ་སྙུང་།།ནད་གཞི་ལ་ནི་སྙུང་གཞི་ཟེར།།བསད་པ་ལ་ནི་བཀྲོངས་པ་དང་།།ལས་དོན་ལ་ནི་མཛད་འཕྲིན་ཟེར།།བུ་དང་བུ་མོར་སྲས་སྲས་མོ།།མགོ་ཡི་ཞྭ་ལ་དབུ་ཞྭ་དང་།།ལུས་ཀྱི་གོས་ལ་ན་བཟའ་ཞེས།།སྐེ་རགས་མིང་དུ་སྐུ་ཆིངས་དང་།།རྐུབ་བཀྱག་ལ་ནི་ཞབས་བཀྱག་ཟེར།།རྐང་ཐང་ལ་ནི་ཞབས་ཐང་བརྗོད།།མགོ་ཡི་སྐྲ་ལ་དབུ་སྐྲ་དང་།།ཁ་སྤུ་ལ་ནི་ཞལ་ཚོམ་མོ།།གྲོད་པ་ལ་ནི་གསོལ་གྲོད་དང་།།སྡོད་ཁང་ལ་ནི་གཟིམ་ཆུང་ཟེར།།ཉལ་སའི་ཁྲི་ལ་གཟིམས་ཁྲི་དང་།།རྨི་ལམ་ལ་ནི་གཟིམས་ལམ་དང་།།ཉལ་ཆས་དག་ལ་གཟིམས་ཆས་ཟེར།།པར་རྒྱག་པ་ལ་སྐུ་པར་སྐྱོན།།ལན་རྒྱག་པ་ལ་ལན་སྐྱོན་བྱ།།ལྟ་ཚུལ་ལ་ནི་གཟིམས་ཚུལ་དང་།།ལྟ་སྐོར་བྱེད་པར་གཟིགས་སྐོར་ཟེར།།ཁྲོ་བའི་མིང་ལ་དགོངས་པ་འཚོམས།།གཤེ་གཤེ་བཏང་བར་བཀའ་བཀྱོན་གནང་།།བཟོད་སྒོམ་ཞུ་བར་དགོངས་དག་ཞུ།།མི་ཚེ་ལ་ནི་སྐུ་ཚེ་དང་།།ཤེས་རབ་མིང་དུ་མཁྱེན་རབ་ཟེར།།ཤེལ་མིག་ལ་ནི་སྤྱན་ཤེལ་དང་།།མིག་ཆུ་ལ་ནི་སྤྱན་ཆབ་ཅེས།།ཆུ་ཡི་མིང་ལ་ཆབ་དང་ནི།།ཆུ་ཡི་མཆོད་པར་ཡོན་ཆབ་ཟེར།།གཅིན་པའི་མིང་དུ་གསང་ཆབ་དང་།།ཕུང་པོ་རོ་ལ་སྐུ་གདུང་སྨྲ།།རྒྱུ་བདག་མིང་ལ་ཕྱག་མཛོད་དང་།།བཟའ་གྲོགས་མོ་ལ་ལྷ་ལྕམ་དང་།།བཟའ་ཟླ་གཉིས་ལ་ཡབ་ཡུམ་བརྗོད།།སློབ་དཔོན་ཆེན་པོར་ཡོངས་འཛིན་ཞུ།།བཞོན་པའི་རྟ་ལ་ཆིབས་རྟ་དང་།།རྟ་ལྕག་ལ་ནི་ཆིབས་ལྕག་ཟེར།།རྟ་བཞོན་པ་ལ་རྟ་ཆིབས་པ།།རྟ་སྒ་ལ་ནི་ཆིབས་སྒ་དང་།།འགྲོ་ལ་ཆིབས་བསྒྱུར་ཅེས་ཀྱང་བརྗོད།།སྐྲ་བྲེག་པ་ལ་དབུ་སྐྲ་བསིལ།།བྲིས་པའི་ཡི་གེར་ཕྱག་བྲིས་བརྗོད།།ངོ་ཐུག་པ་ལ་མཇལ་འཕྲད་དང་།།ཁྲུས་བྱེད་པ་ལ་ཁྲུས་གསོལ་ཟེར།།འགོ་ཁྲིད་ལ་ནི་དབུ་ཁྲིད་དང་།།འགོ་གཙོ་ལ་ནི་དབུ་གཙོ་བརྗོད།།ལག་མགོར་བཞག་པར་ཕྱག་དབང་གནང་།།འགོ་འཛུགས་པ་ལ་དབུ་འཛུགས་དང་།།དབུ་བརྙེས་ཞེས་ཀྱང་ཟེར་སྲོལ་ཡོད།།མགོ་ཡི་རྒྱན་དང་དབུ་རྒྱན་དང་།།སྐེ་རྒྱན་མིང་དུ་མགུལ་རྒྱན་ཟེར།།གཅོད་བྱེད་གྲི་ལ་ཕྱག་ཤན་བྱ།།དཀའ་ཚེགས་ལ་ནི་འོ་བརྒྱལ་དང་།།སྐུ་ཚེགས་སྐུ་མཉེལ་སོགས་ཀྱང་བརྗོད།།སྐྲུན་པ་ལ་ནི་བཞེངས་པ་དང་།།ཁས་བླངས་པ་ལ་ཞལ་བཞེས་དང་།།ཡ་ཡ་ཟེར་བར་ལེགས་སོ་ཞུ།།དོ་ཁུར་ཞེས་པར་ཐུགས་ཁུར་དང་།།སེམས་ལ་ངེས་པར་ཐུགས་ལ་མངའ།།བསམ་འཆར་ལ་ནི་དགོངས་འཆར་དང་།།སྤུན་ཟླའི་མིང་ལ་སྐུ་མཆེད་འབོད།།མགྲོན་འབོད་པ་ལ་གདན་འདྲེན་ཞུ།།བྱ་དགའ་སྟེར་ལ་གསོལ་རས་གནང་།།ཁ་ཆེམས་ལ་ནི་ཞལ་ཆེམས་དང་།།ཐང་ག་ལ་ནི་ཞལ་ཐང་ཟེར།།ལུས་ཁམས་མིང་ལ་སྐུ་ཁམས་དང་།།མིང་བཏགས་པ་ལ་མཚན་གསོལ་བརྗོད།།འགྲོ་རོགས་ལ་ནི་ཕེབས་གྲོགས་དང་།།རྒད་པོ་རྒན་མོར་བགྲེས་སོང་ཟེར།།ཁ་དྲོར་ཞལ་དྲོ་སྐུ་མཁྱེན་་དང་།།ཁ་བཏགས་ལ་ནི་མཇལ་དར་ཞུ།།མི་རབས་ལ་ནི་སྐུ་ཕྲེང་དང་།།ག་ལེར་སོང་ལ་ག་ལེར་ཕེབས།།ཚུར་ཤོག་ཅེས་པར་ཚུར་སྤྱོན་དང་།།ལུས་ཤ་རྒྱགས་པར་སྐུ་ཤ་འབྱོར།།སྡོད་སའི་གྲལ་ལ་བཞུགས་གྲལ་འབོད།།ཁ་ཏ་ལ་ནི་ཞལ་ཏ་དང་།།ཁ་འདོན་ལ་ནི་ཞལ་འདོན་གསུང་།།སྡོད་རོགས་ཞེས་པར་བཞུགས་གདན་འཇགས།།སྐྱེས་སྐར་ལ་ནི་འཁྲུངས་སྐར་དང་།།སྐྱེས་པ་ལ་ནི་སྐུ་བལྟམས་པ།།ཚིག་པ་ཟ་བར་དགོངས་འགལ་དང་།།ཁོང་ཁྲོ་མ་ལང་ཞེས་པ་ལ།།དགོངས་པ་མ་ཚོམས་ཞེས་ཀྱང་བརྗོད།།ཁོག་རྒྱ་ལ་ནི་ཐུགས་རྒྱ་དང་།།སེམས་ཁྲལ་ལ་ནི་ཐུགས་ཁྲལ་བྱ།།སྲུང་མདུད་ལ་ནི་ཕྱག་མདུད་དང་།བསླབ་བྱ་ལ་ནི་བཀའ་སློབ་དང་།།སེམས་དགའ་དགའ་ལ་ཐུགས་དགྱེས་དགྱེས།།སྙིང་རྗེ་ལ་ནི་ཐུགས་རྗེ་དང་།གཏམ་བཤད་ལ་ནི་གསུང་བཤད་ཟེར།།དཀར་ཡོལ་ལ་ནི་ཞལ་དཀར་དང་།།སྡེར་མ་ལ་ནི་གསོལ་སྡེར་ཞེས།།སྡོད་གུར་མིང་ལ་བཞུགས་གུར་དང་།།ཉལ་ཁང་ལ་ནི་གཟིམས་ཤག་ཟེར།།ཕོ་བྲང་དང་ནི་ཁྱིམ་སོགས་ལ།།ཁབ་ཅེས་འབོད་སྲོལ་ཡོད་པ་དཡིན།།སྡོད་པའི་དུས་ལ་བཞུགས་རིང་དང་།།དཔུང་རོགས་ལ་ནི་ཕྱག་རོགས་བྱ།།གླེང་མོ་བྱེད་པར་བཀའ་མོལ་དང་།།དོགས་ཟོན་ལ་ནི་ཐུགས་ཟོན་ཞེས།།བྱས་རྗེས་ལ་ནི་མཛད་རྗེས་དང་།།བྱ་གཞལ་ལ་ནི་མཛད་འཕྲིན་བྱ།།བློ་འདྲི་བ་ལ་བཀའ་འདྲི་དང་།།བློ་ལ་བབ་པར་ཐུགས་ལ་བབ།།མིང་གྲགས་ལ་ནི་མཚན་སྙན་དང་།།མིང་རྟགས་བཀོད་པར་མཚན་རྟགས་བཀོད།།མིང་འཛིན་ལ་ནི་མཚན་འཛིན་དང་།།མིང་ཤོག་ལ་ནི་མཚན་ཤོག་བྱ།།རྩོམ་ཡིག་མིང་ལ་གསུང་རྩོམ་དང་།།ཚ་ཞང་ལ་ནི་དབོན་ཞང་ཞེས།།ཟས་རིན་ལ་ནི་གསོལ་ཡོན་དང་།།ཟས་ལྷག་མིང་ལ་གསོལ་ལྷག་ཟེར།།ལོ་གྲངས་ལ་ནི་དགོངས་ལོ་དང་།།གོས་རྒྱན་སྤྲས་པར་སྒྲོན་ཞེས་བརྗོད།།ཡོང་བའི་མིང་ལ་ཞབས་བཅགས་དང་།།ཡོངས་ཤེས་ལ་ནི་ཀུན་མཁྱེན་ནམ།།ཐམས་ཅད་མཁྱེན་པ་ཞེས་ཀྱང་བྱ།།གཤིས་རྒྱུད་ལ་ནི་ཐུགས་རྒྱུད་དང་།།བཤད་ཁྲིད་བྱེད་པར་ལྗགས་ཁྲིད་ཅེས།།བསམ་གཞིགས་ལ་ནི་དགོངས་བཞེས་དང་།།བསམ་ཚུལ་ལ་ནི་དགོངས་ཚུལ་བརྗོད།།ལག་པའི་རྗེས་ལ་ཕྱག་རྗེས་དང་།།ལག་བསྟར་མ་ལ་ཕྱག་བསྟར་མ།།ལག་དངུལ་ལ་ནི་ཕྱག་དངུལ་དང་།།ལོ་གསར་གནམ་ལོ་གསར་ཚེས་ཟེར།།ཤེས་རྒྱ་ལ་ནི་མཁྱེན་རྒྱ་དང་།།ཤེས་གསལ་ལ་ནི་མཁྱེན་གསལ་བྱ།།མཉམ་འཛོམས་ལ་ནི་ལྷན་འཛོམས་དང་།།སེེམས་ལྷོད་ལྷོད་ལ་ཐུགས་ལྷོད་ལྷོད།།ཨ་ཁུར་ཨ་ཁུ་ལགས་ཞེས་དང་།།ཨ་ནེར་ཨ་ནེ་ལགས་ཞེས་བོས།།ཁ་པར་ལ་ནི་ཞལ་པར་དང་།།ལག་འཕྲིན་ལ་ནི་ཕྱག་འཕྲིན་བརྗོད།།དེ་ལྟར་བྲིས་པའི་དགོས་པ་ཡང་།།གཞན་ལ་གུས་པ་མཛོན་བྱའི་ཕྱིར།།གུས་པའི་ཞེ་སའི་ཕྲེང་བ་འདི།།ལྷན་རྒྱས་ཡིད་ལ་ངེས་པར་སྨོན།།