ཀྲུང་གོའི་བོད་ལྗོངས་དྲ་བ། > གསོ་རིག > ལུས་ཁམས་བདེ་སྲུང་།

གཉིད་སྐྱིད་པོ་ཞིག་ཁུག་བསམས་ན་སྔས་མགོའི་སྐོར་གྱི་ཤེས་བྱར་གཟིགས་དང་།

སྤེལ་དུས 2018-04-03 ཡོང་ཁུངས། ཀྲུང་གོའི་བོད་ཀྱི་གསར་འགྱུར་དྲ་བ། རྩོམ་པ་པོ། སྒྲོལ་མས་བསྒྲིགས།

མི་ཞིག་གི་མི་ཚེའི་གསུམ་ཆ་གཅིག་རྨི་ལམ་གྱི་ཞིང་ཁམས་སུ་འདའ་བཞིན་ཡོད་པས། སྔས་མགོ་ནི་ང་ཚོ་དང་འགྲོགས་ཡུན་རིང་ཤོས་ཀྱི་གྲོགས་པོ་ཞིག་རེད་ཅེས་བརྗོད་ཆོག སྔས་མགོ་ལེགས་པོ་ཞིག་མེད་ན། གཉིད་ལས་སད་རྗེས་ལུས་པོ་ཡོངས་ལ་དཀའ་ལས་ཁ་བ་མ་ཟད། ད་དུང་མགོ་ན་བ་དང་། སྐེ་འཆུས་པ། མགོ་ཡུ་འཁོར་བ། རྣ་འུར་བ། རྐང་ལག་སྦྲིད་པ། གཉིད་ཡེར་བ་སོགས་ཡོང་གི་ཡོད། ད་འོ་ན་སྔས་མགོ་གང་འདྲ་ཞིག་ཉོ་དགོས་སམ་ཞེ་ན།

གཅིག སྔས་མགོ་འདི་རིགས་ཉོ་མི་རུང་།

1.སྐེ་ཚིགས་ལེགས་པོ་སྐྱོར་མི་ཐུབ་པའི་སྔས་མགོ།

2.སྐེ་དང་དཔུང་པ་ངལ་གསོ་མི་ཐུབ་པའི་སྔས་མགོ།

3.མཐོ་དྲགས་པའམ་དམའ་དྲགས་པའི་སྔས་མགོ།

གཉིས། སྔས་མགོ་ལེགས་པོ་ཞིག་ཉོ་དགོས་ན། གཤམ་གསལ་གྱི་དོན་གནད་གསུམ་ལ་ལྟ་དགོས།

1.སྔས་མགོའི་བཟོ་ལྟར་ལྟ་དགོས། སྔས་མགོ་དམའ་དྲགས་ན། ཨ་སློག་ཡང་སེ་རྒྱག་དགོས་ཡོང་བ་དང་། སྔས་མགོ་མཐོ་དྲགས་ན། སྔུར་བ་རྒྱག་གི་ཡོད།

2.སྔས་མགོའི་རྒྱུ་ཆར་ལྟ་དགོས། མིག་སྔར་ཁྲོམ་དུ་བྲིན་ཁ་རྒྱུག་པའི་སྔས་མགོ་ནི་བྲ་བོའི་ལྤགས་པ་དང་། བྱ་སྤུ། སྲིང་བལ་སོབ་སོབ། “བཟོ་ལྟ་དལ་གྱིས་འགྱུར་བའི་བར་སྣང་དྲན་ཤེས་སྲིང་བལ”བཅས་ཀྱི་སྔས་མགོ་ཡིན་ཞིང་། དེ་དག་སོ་སོར་རང་རང་གི་ལེགས་ཆ་ཡོད་ལ་སྐྱོན་ཆའང་ཡོད། བལྟོས་བཅས་ཀྱིས་བཤད་ན།“བཟོ་ལྟ་དལ་གྱིས་འགྱུར་བའི་བར་སྣང་དྲན་ཤེས་སྲིང་བལ”（慢回弹太空记忆棉）སྔས་མགོ་འདི་ཕྱོགས་ག་ནས་བལྟས་ཀྱང་ལེགས་པོ་ཡོད།

3.སྔས་མགོའི་མཐོ་དམན་ལ་ལྟ་དགོས། དར་མའི་སྔས་མགོའི་མཐོ་ཚད་ལི་སྨི་8ནས་15བར་དང་། གཞོན་པའི་སྔས་མགོའི་མཐོ་ཚད་ལི་སྨི་8ནས་10བར་འཚམ་ཤོས་རེད།

གསུམ། བྱིས་པར་སྔས་མགོ་ཐབས་ཆག་བརྒྱབ་ན་མི་འགྲིག

དེ་ཡང་བྱིས་པར་མི་རྒན་གྱི་སྔས་མགོ་བརྒྱབ་ན། དུས་ཡུན་རིང་ཙམ་ཕྱིན་རྗེས་བྱིས་པའི་སྒལ་རུས་ཀྱི་བཟོ་ལྟ་འགྱུར་ནས་དཔུང་པ་མཐོ་དམན་མི་མཉམ་པ་དང་སྟོད་སྒུར་ཆགས་ཉེན་ཡོད་ལ། བྱིས་པ་གཉིད་མི་ཁུག་པ་ཡང་ཡོང་གི་ཡོད། དེས་ན་བྱིས་པར་སྔས་མགོ་ཐབས་ཆག་ཅིག་བརྒྱབ་ནས་བཞག་ན་མི་འགྲིག་གོ