ཕོ་བ་དང་རྒྱུ་མའི་སྨན་གྱི་ཕན་ནུས་དང་བསྟེན་ཚུལ།

      བོད་སྨན་སེ་འབྲུ་ལྔ་བ། སྨན་འདིའི་ནུས་པ་དྲོད་ཆེ་ལ་བཟི་མེད། ཕན་ནུས་ནི་ཁ་ཟས་མི་འཇུ་བར་ཟས་དང་ཆུ་སྐྱུར་སྐྱུགས་པ་དང་། ཡི་ག་ཞན་པ། ཁོག་པ་སྦོས་རྒྱངས་བྱེད་པ། མཁལ་མ་དང་རྐེད་པའི་གནས་སུ་དྲོད་ཆུང་ཞིང་ན་བ་སོགས་ལ་ཕན། སྨན་འདིའི་བསྟེན་ཚུལ་ནི་ཉིན་རེར་ཐེངས་གཅིག་ནས་གཉིས་བར་དང་། ཐེངས་རེར་རིལ་བུ་ལྔ་ནས་བདུན་བར་འཐུང་དགོས།
      དྭགས་སྨན་བཅོ་ལྔ། སྨན་འདིའི་ནུས་པ་རྣོ་ལ་དྲོད་འབྲིང་ཙམ་ཡིན་པ་དང་བཟི་མེད། ཕན་ནུས་ནི་ཁ་ཟས་མི་འཇུ་བ་དང་སྒྲེག་པ་མང་བ། སྦོས་རྒྱངས་བྱེད་པ། བྲང་ཁ་ཚ་བ། ཆུ་སྐྱུར་སྐྱུགས་པ། བེ་སྣབས་སྐྱུགས་པ། ཁ་ཟས་སྐྱུགས་པ། ཁོག་པ་བཤལ་བ། ཕོ་བར་ན་ཟུག་གཏོང་བ་སོགས་ཕོ་བ་དང་རྒྱུ་མའི་ནད་ཕལ་ཆེ་བར་ཕན། སྨན་འདིའི་བསྟེན་ཚུལ་ཉིན་རེར་ཐེངས་གཅིག་དང་ཐེངས་རེར་རིལ་བུ་གཉིས་འཐུང་དགོས།
      བརྒྱད་ལྔ། སྨན་འདིའི་ནུས་པ་ཅུང་དྲོ་ལ་བཟི་མེད། ཕན་ནུས་ནི་ཁ་ཟས་མི་འཇུ་བ་དང་། ཟས་ཀྱི་དང་ག་ཞན་པ། སྒྲེག་པ་འབྱུང་བ། སྦོས་རྒྱངས་བྱེད་པ། སེམས་ཁམས་མི་བདེ་བ་སོགས་ཕོ་རླུང་དང་སྙིང་རླུང་གི་ནད་ལ་ཕན། སྨན་འདིའི་བསྟེན་ཚུལ་ནི་ཉིན་རེར་ཐེངས་གཅིག་ནས་གཉིས་བར་དང་ཐེངས་རེར་རིལ་བུ་ལྔ་ནས་བདུན་བར་འཐུང་དགོས།
      རུ་རྟ་དྲུག་པ། སྨན་འདིའི་ནུས་པ་བསིལ་དྲོད་སྙོམས་ལ་བཟི་མེད། ཕན་ནུས་ནི་ཕོ་བ་ན་བ་དང་ཡར་སྒྲེག་པ། ཁ་ཟས་སྐྱུགས་པ་སོགས་མ་ཞུ་བའི་ནད་དང་ཕོ་བ་སྨུག་པོའི་ནད། ཕོ་བ་དང་རྒྱུ་མར་ན་ཟུག་ཆེན་པོ་ལངས་བ་བཅས་ལ་ཕན། སྨན་འདིའི་བསྟེན་ཚུལ་ནི་ཉིན་རེར་ཐེངས་གཅིག་ནས་གཉིས་བར་དང་ཐེངས་རེར་རིལ་བུ་གསུམ་ནས་བཞི་བར་འཐུང་དགོས།
      ཞི་གསེར། སྨན་འདིའི་ནུས་པ་བསིལ་དྲོད་སྙོམས་ཞིང་བཟི་མེད། ཕན་ནུས་ནི་ཁ་ཟས་མི་འཇུ་བའི་དབང་གིས་སྦོས་རྒྱངས་བྱེད་པ་དང་ཡར་སྒྲེག་པ། དང་ག་མི་བདེ་བ། ཁ་ཟས་སྐྱུགས་པ། བཤལ་བ་སོགས་གྲང་མཁྲིས་ཀྱི་ནད་ལ་ཕན། སྨན་འདིའི་བསྟེན་ཚུལ་ནི་ཉིན་རེར་ཐེངས་གཅིག་ནས་གཉིས་བར་དང་ཐེངས་རེར་རིལ་བུ་གསུམ་ནས་བཞི་བར་འཐུང་དགོས།
      ཞི་བྱེད་དྲུག་པ། སྨན་འདིའི་ནུས་པ་བསིལ་དྲོད་སྙོམས་ལ་བཟི་མེད། ཕན་ནུས་ནི་མ་ཞུ་བའི་རྐྱེན་གྱིས་ཁོག་པ་སྦོས་རྒྱངས་བྱེད་པ་དང་། ཁ་ཟས་སྐྱུགས་པ། ཡར་སྒྲེག་པ། རྒྱུན་དུ་རྩ་འབབ་དཀའ་བ། གློ་བུར་དུ་ཕོ་བ་དང་རྒྱུ་མའི་གནས་སུ་ན་ཟུག་ཆེན་པོ་ལངས་བ་སོགས་ལ་ཕན། སྨན་འདིའི་བསྟེན་ཚུལ་ནི་ཉིན་རེར་ཐེངས་གཅིག་དང་ཐེངས་རེར་རིལ་བུ་དྲུག་འཐུང་དགོས།
      མྱང་འབྲས་ལྔ་བ། སྨན་འདིའི་ནུས་པ་བསིལ་ལ་བཟི་མེད། ཕན་ནུས་ནི་རྒྱུ་མར་ན་ཟུག་གཏོང་བ་དང་ཁོག་པ་བཤལ་བ། ཁྲག་བཤལ་བ་སོགས་བཤལ་ནད་ཐམས་ཅད་ལ་ཕན། སྨན་འདིའི་བསྟེན་ཚུལ་ནི་ཉིན་རེར་ཐེངས་གཅིག་ནས་གཉིས་བར་དང་ཐེངས་རེར་རིལ་བུ་སུམ་ཅུ་ནས་བཞི་བཅུའི་བར་འཐུང་དགོས། བྱིས་པས་རིལ་བུ་ཇེ་ཉུང་དུ་བཏང་ནས་འཐུང་དགོས།
      བྲག་ཞུན་དགུ་བ། སྨན་འདིའི་ནུས་པ་ཅུང་བསིལ་ལ་བཟི་མེད། ཕན་ནུས་ནི་ཕོ་བར་ན་ཟུག་ལངས་བ་དང་ཁྲག་བཤལ་བ་སོགས་ཕོ་བ་དང་རྒྱུ་མའི་གཉན་ཚད་ཀྱི་ནད་ཕལ་ཆེ་བར་ཕན། སྨན་འདིའི་བསྟེན་ཚུལ་ནི་ཉིན་རེར་ཐེངས་གཅིག་ནས་གཉིས་བར་དང་ཐེངས་རེར་རིལ་བུ་གསུམ་ནས་བཞི་བར་འཐུང་དགོས།