ཨ་མེ་རི་ཁའི་རྒྱལ་སྲིད་བློན་ཆེན་གྱིས་དབྱི་ལིང་ལ་བཀག་སྡོམ་བྱེད་ཐབས་ཆེས་ནན་མོ་ལག་བསྟར་བྱེད་རྒྱུའི་འཇིགས་སྐུལ།
སྤེལ་དུས 2018-05-23
ཡོང་ཁུངས། མཚོ་སྔོན་བོད་སྐད་རླུང་འཕྲིན།
རྩོམ་པ་པོ། སངས་སྐྱབས་ཀྱིས་བསྒྲིགས།
ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཨ་མེ་རི་ཁའི་རྒྱལ་སྲིད་བློན་ཆེན་ཕིན་ཕའེ་ཨོ་ཡིས་ཚེས་ཉེར་གཅིག་ཉིན་བསྟན་དོན། གལ་ཏེ་དབྱི་ལིང་གིས་མིག་སྔའི་ལམ་ཐིག་མ་བསྒྱུར་ན། ཨ་མེ་རི་ཁའི་བཀག་སྡོམ་བྱེད་ཐབས་ཆེས་ནན་མོ་ཐེབས་ངེས་ཡིན་ཟེར།
ཕིན་ཕའེ་ཨོ་ཡིས་ཉིན་དེར་ཨ་མེ་རི་ཁི་རིག་མཛོད་སྲོལ་རྒྱུན་ཐེབས་རྩ་ཚོགས་པ་ནས་གཏམ་བཤད་སྤེལ་ཏེ། ཨ་མེ་རི་ཁ་དབྱི་ལིང་གི་ཉིང་རྡུལ་ནུས་པའི་གྲོས་མཐུན་ལས་ཕྱིར་བུད་རྗེས་ཀྱི་དབྱི་ལིང་ལ་སྤྱོད་སྲིད་པའི་སྲིད་ཇུས་རྒྱས་བཤད་རྱབ། ཁོས་བསྟན་དོན། དབྱི་ལིང་སྲིད་གཞུང་མིག་སྔར་བགྲོད་བཞིན་པའི་ལམ་ནི་དང་ལེན་བྱེད་ཐབས་མེད་པ་དང་ཕན་ཐོགས་མེད་པ་ཞིག་རེད། ཨ་མེ་རི་ཁས་དབྱི་ལིང་གིས་མིག་སྔའི་ལམ་ཐིག་བསྒྱུར་རག་བར་དུ་སྔ་ན་མེད་པའི་དངུལ་ལོར་གནོན་ཤུགས་སྟེར་རྒྱུ་ཡིན་ཟེར།
ཕིན་ཕའེ་ཨོ་ཡིས་དབྱི་ལིང་ལ་རེ་བ་བཅུ་གཉིས་བཏོན་ཏེ་བཀག་སྡོམ་མཚམས་འཇོག་པའི་ཆ་རྐྱེན་དུ་བྱས་ཡོད། ཁོས་བཤད་རྒྱུར། ཨ་མེ་རི་ཁའི་དབྱི་ལིང་གི་བཀག་སྡོམ་དེ་མགོ་བརྩམས་མ་ཐག་ཡིན། གལ་ཏེ་དབྱི་ལིང་གིས་མིག་སྔའི་ལམ་ཐིག་མ་བསྒྱུར་ན། ཨ་མེ་རི་ཁས་བཀག་སྡོམ་བྱེད་ཐབས་རབ་དང་རིམ་པ་བསྟུན་མར་འདོན་རྒྱུ་ཡིན། བཀག་སྡོམ་བྱེད་ཐབས་ཕྱོགས་ཡོངས་ནས་ལག་བསྟར་བྱས་ན། དེ་ནི་ལོ་རྒྱུས་སྟེང་ཆེས་ནན་མོ་ཡིན་པའི་བཀག་སྡོམ་བྱེད་ཐབས་ཤིག་ཡིན་ཟེར།
ཕིན་ཕའེ་ཨོ་ཡིས་ད་རུང་བསྟན་དོན། ཨ་མེ་རི་ཁས་དབྱི་ལིང་གི་བཀག་སྡོམ་སླར་གསོ་བྱས་ན་ཨ་མེ་རི་ཁའི་མནའ་མཐུན་གྲོགས་པོ་སྐོར་ཞིག་ལ་དངུལ་ལོར་དང་དཔལ་འབྱོར་གྱི་དཀའ་ཁག་བཟོ་སྲིད་པ་ཤེས་ཡོད་ཀྱང་། ཨ་མེ་རི་ཁས་ངེས་པར་དུ་སྒྲིག་ལམ་དང་འགལ་ནས་དབྱི་ལིང་བར་ཉོ་ཚོང་བྱེད་པའི་མི་སྒེར་དང་ཚོགས་པའི་འགན་འཁྲི་རྩད་གཅོད་བྱེད་ངེས་ཡིན་ཟེར།