ཝུན་ཙའེ་དབྱིན་གྱིས་ཅིན་ཀྲེང་ཨེན་དང་ཕོང་དབྱང་དུ་གྲོས་མོལ་བྱས་པ།
སྤེལ་དུས 2018-09-20
ཡོང་ཁུངས། ཀྲུང་གོའི་བོད་ཀྱི་གསར་འགྱུར་དྲ་བ།
རྩོམ་པ་པོ། སངས་སྐྱབས་ཀྱིས་བསྒྲིགས།
འདི་ནི་ཟླ་9ཚེས་18ཉིན་ཁྲའོ་ཞན་གྱི་ཆེས་མཐོའི་འགོ་ཁྲིད་ཅིན་ཀྲེང་ཨེན(གཡས)གྱིས་ཧན་གོའི་ཙུང་ཐུང་ཝུན་ཙའེ་དབྱིན་དང་ཕོང་དབྱང་དུ་མཇལ་འཛོམས་གནང་བ།
ཚེས་18ཉིན་གྱི་ཕྱི་དྲོར། ཁྲའོ་ཞན་གྱི་རྒྱལ་ས་ཕོང་དབྱང་དུ་འཚམས་འདྲི་བྱེད་བཞིན་པའི་ཧན་གོའི་ཙུང་ཐུང་ཝུན་ཙའེ་དབྱིན་གྱིས་ཁྲའོ་ཞན་རྒྱལ་དོན་ཨུ་ཡོན་ལྷན་ཁང་གི་ཨུ་ཡོན་ཀྲང་ཅིན་ཀྲེང་ཨེན་དང་གྲོས་མོལ་བྱས་པ་རེད།
ཧན་གོའི་སྨྱན་སྦྱོར་ཚན་པས་གནས་ཚུལ་སྤེལ་བར་གཞིགས་ན། དེ་ཉིན་ཕྱི་དྲོར་ཁྲའོ་ཞན་ངལ་རྩོལ་ཏང་ཀྲུང་དབྱང་ཨུ་ཡོན་ལྷན་ཁང་སྤྱི་ཁྱབ་པུའི་ཐོག་ཁང་ཆེ་མོར་ཆུ་ཚོད་2ཙམ་གྱི་གྲོས་མོལ་བྱས་པ་རེད། ཅིན་ཀྲེང་ཨེན་གྱིས་འགོ་ཚུགས་གཏམ་བཤད་སྤེལ་སྐབས་ཝུན་ཙའེ་དབྱིན་ལ་ཐུགས་རྗེ་ཆེ་ཞུས་ཤིང་། ཁོང་གིས་མིག་སྔར་ལྷོ་ནུབ་དབར་གྱི་འབྲེལ་བ་དང་། ཁྲའོ་ཞན་དང་ཨ་རིའི་དབར་གྱི་འབྲེལ་བ་ཚང་མ་ལེགས་སུ་ཕྱིན་ཡོད་པས། ཉེ་འཁོར་ས་ཁུལ་གྱི་དུས་བབ་དེ་བས་བརྟན་ལྷིང་དང་འབྲེལ་འཕེལ་རྒྱས་གསར་པ་ཡོང་བ་སྔོན་ནས་མཐོང་ཐུབ་ཅེས་བརྗོད།
ཝུན་ཙའེ་དབྱིན་གྱིས“ང་ཚོས་ཕྲག་ཏུ་འཁུར་བའི་འགན་འཁྲི་ཧ་ཅང་ལྕི་པོ་ཡོད་པ་མྱོང་ཚོར་ཐུབ་བྱུང་། འཛམ་གླིང་ཡོངས་ཀྱིས་ད་ཐེངས་ཀྱི་ཐུག་འཕྲད་ལ་དོ་ཁུར་བྱེད་ཀྱི་ཡོད་པས་འཛམ་གླིང་མི་དམངས་ཡོངས་ཀྱིས་ཞི་བདེ་དར་རྒྱས་ཀྱི་གྲུབ་འབྲས་མཐོང་རྒྱུའི་རེ་བ་ཡོད”ཅེས་བརྗོད།
ཚེས་18ཉིན་གྱི་སྔ་དྲོར་ཝུན་ཙའེ་དབྱིན་ཆེད་གཏོང་གནམ་གྲུར་བསྡད་ནས་ཁྲའོ་ཞན་གྱི་རྒྱལ་ས་ཕོང་དབྱང་དུ་འབྱོར་བ་དང་། ཅིན་ཀྲེང་ཨེན་གྱིས་གནམ་ཐང་དུ་བསུ་བར་བཅར་ཡོད་པ་རེད། འདི་ནི་འགོ་ཁྲིད་པ་གཉིས་ཀྱིས་འདི་ལོ་ཚུན་དུ་ཐུག་འཕྲད་བྱེད་ཐེངས་གསུམ་པ་ཡིན་པ་དང་། ཕྱོགས་གཉིས་པོས་ཕྱོགས་གཉིས་པོའི་འབྲེལ་བ་འཕེལ་རྒྱས་དང་། ཕྱེད་གླིང་དུ་ཉིང་རྡུལ་མཚོན་ཆ་མེད་པར་བཟོ་བའི་འཕེལ་རིམ་ལ་སྐུལ་འདེད་གཏོང་བ་དང་། བྱེད་མཚམས་ཆད་པའི་ཁྲའོ་ཞན་དང་ཨ་རིའི་དབར་གྱི་གླེང་མོལ་སླར་གསོ་བྱེད་པ་སོགས་ཐུན་མོང་ཐོག་དོ་ཁུར་བྱེད་པའི་གནད་དོན་ལ་གཙོ་གནད་གྲོས་བསྡུར་བྱ་རྒྱུ་ཡིན་པ་རེད། ཚེས་19ཉིན། རྒྱལ་ཁབ་གཉིས་པོའི་འགོ་ཁྲིད་པས་མུ་མཐུད་གྲོས་མོལ་བྱ་རྒྱུ་ཡིན་པ་རེད།