བྱང་ཁོ་རེ་ཡའི་སྨྱན་སྦྱོར་ཚན་པས་ལྷོ་ཁོ་རེ་ཡ་དང་ཨ་རིས་མཚོ་དམག་སྐམ་འཐབ་རུ་ཁག་གི་མཉམ་འབྲེལ་སྦྱོང་བརྡར་བསྐྱར་དུ་སྤེལ་བར་སྐྱོན་བརྗོད་བྱས་པ།
སྤེལ་དུས 2018-11-13
ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས།
རྩོམ་པ་པོ། ཚེ་རིང་གིས་བསྒྲིགས།
སྤྱི་ཚེས་༡༢ཉིན། བྱང་ཁོ་རེ་ཡའི་ངལ་རྩོལ་ཏང་གི་ ལས་ཁུངས་ཚགས་པར་ 《ངལ་རྩོལ་གསར་འགྱུར་ 》ཐོག་ མིང་བཀོད་རྩོམ་ཡིག་སྤེལ་བ་དང་། ཟླ་དྲུག་སོང་རྗེས་ལྷོ་ཁོ་རེ་ཡ་དང་ཨ་རིས་མཚོ་དམག་སྐམ་འཐབ་རུ་ཁག་གི་མཉམ་འབྲེལ་སྦྱོང་བརྡར་བསྐྱར་དུ་སྤེལ་བར་སྐྱོན་བརྗོད་བྱས་ནས། བྱེད་སྟངས་དེ་ནི་བྱང་ཁོ་རེ་ཡར་དམིགས་ཡོད་པ་དང་། ཁོ་རེ་ཡ་ལྷོ་བྱང་གིས་སྤྱི་ཟླ་དགུ་པར་མིང་རྟགས་བཀོད་པའི་དམག་དོན་གྲོས་མཐུན་གྱི་དགོངས་དོན་དང་ཁོ་རེ་ཡ་ཕྱེད་གླིང་ཕྲན་གྱི་ཞི་བའི་སྐད་ཆ་ཤོད་རེས་ཀྱི་གནས་བབ་དང་རྦད་དེ་རྒྱབ་འགལ་སོང་ཡོད་ཅེས་བསྟན་པ་རེད།
རྩོམ་ཡིག་ནང་དུ། མིག་སྔའི་ལྷོ་བྱང་ཕྱོགས་གཉིས་ཀྱིས་སྔར་གྱི་དུས་སྐབས་གང་རུང་ལས་ཀྱང་ཡིད་ཆེས་སྲུང་སྐྱོང་དང་ཕྱེད་གླིང་ཕྲན་གྱི་ཡུན་རིང་ཞི་བདེ་མངོན་འགྱུར་ཆེད་དུ་འབད་པ་དེ་བས་མང་བ་བྱེད་དགོས། ལྷོ་ཁོ་རེ་ཡ་དང་ཨ་རི་ཡིས་མཚོ་དམག་སྐམ་འཐབ་རུ་ཁག་གི་མཉམ་འབྲེལ་སྦྱོང་བརྡར་བསྐྱར་དུ་སྤེལ་བ་ནི་གོང་གསལ་གྱི་བླང་བྱ་དང་མིག་སྔའི་གནས་བབ་དང་མི་མཐུན་པ་རེད་ཅེས་བཤད་ཡོད།
རྩོམ་ཡིག་གི་མཇུག་ཏུ། ཁོ་ར་ཡ་ཕྱེད་གླིང་ཕྲན་གྱི་མིག་སྔའི་དུས་བབ་མུ་མཐུད་ནས་གླེང་མོལ་དང་ཞི་བདེའི་ཕྱོགས་སུ་འཕེལ་རྒྱས་འགྲོ་རྒྱུར་སྐུལ་འདེད་གཏོང་ཆེད། ཕར་ཕྱོགས་ལ་དམག་དོན་བྱ་སྤྱོད་སྤེལ་མི་རུང་བ་དང་། ཛ་དྲག་གནས་བབ་ཞི་ལྷོད་དུ་འགྲོ་རྒྱུར་ཕན་པ་ཡོད་པའི་བྱ་སྤྱོད་མང་ཙམ་བཟུང་དགོས་ཞེས་བཤད་ཡོད་པ་རེད།