ཝུ་ར་ཀུའེ་ཡི་གཞུང་ཚབ་ཆེན་མོས། རྒྱུད་གཅིག་ལམ་གཅིག་གིས་ཀྲུང་གོས་འཐུས་ཚང་ཅན་གྱི་རྒྱལ་ཁབ་ཀྱི་གཟུགས་བརྙན་གཏོད་པར་རོགས་རམ་བྱས་ཡོད་ཅེས་གསུངས་པ།
སྤེལ་དུས 2018-11-13
ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས།
རྩོམ་པ་པོ། ཚེ་རིང་གིས་བསྒྲིགས།
ཀྲུང་གོར་བཅའ་སྡོད་ཝུ་ར་ཀུའེ་ཡི་གཞུང་ཚབ་ཆེན་མོ་ཧྥེ་ཨར་ནན་ཏོ་ལུའུ་ཀེ་ལི་སི་ཡིས། གནའ་བོའི་དར་གོས་ལམ་བུ་ནས་ཉིང་བཅུད་བླངས་པའི་རྒྱུད་གཅིག་ལམ་གཅིག་གི་གྲོས་འགོས་ཀྲུང་གོ་རྒྱལ་ཁབ་ཀྱི་གཟུགས་བརྙན་དེ་ས་མཚམས་ལས་བརྒལ་ནས་འཛུགས་སྐྱོང་བྱ་རྒྱུར་ཤུགས་རྐྱེན་གལ་ཆེན་ཐེབས་ཡོད་པར་ངོས་འཛིན་གནང་བཞིན་ཡོད།
ལུའུ་ཀེ་ལི་སི་སྤྱི་ལོ་༢༠༡༨ལོའི་ཆིང་ཧྭ་རྒྱལ་ཁབ་གཟུགས་བརྙན་གླེང་སྟེགས་སུ་ཞུགས་སྐབས་གོང་གསལ་གྱི་སྐད་ཆ་དེ་གསུངས་པ་རེད། ལུའུ་ཀེ་ལི་སི་ཡིས་གསུང་བཤད་ནང་། སྔོན་ཆད་ང་ཚོས་ཡོ་རོབ་གླིང་བརྒྱུད་ནས་ཀྲུང་གོའི་ལོ་རྒྱུས་དང་རིག་གནས་ལ་རྒྱུས་ལོན་བྱས་པ་ཡིན། ད་ལྟ་རྒྱུད་གཅིག་ལམ་གཅིག་གི་གྲོས་འགོ་ཡིས་ང་ཚོ་ལ་ཀྲུང་གོ་ངོས་འཛིན་བྱེད་པའི་བྱ་ཐབས་གསར་བ་ཞིག་འདོན་སྤྲོད་བྱས་ཡོད་ཅེས་བསྟན་གནང་ཡོད་པ་རེད།
ཁོང་གིས། རྒྱུད་གཅིག་ལམ་གཅིག་གི་གྲོས་འགོ་ཡིས་ཀྲུང་གོ་རྒྱལ་ཁབ་ཀྱི་གཟུགས་བརྙན་བརྒྱུད་སྒྲོག་བྱེད་པར་སྐུལ་འདེད་ནུས་ལྡན་བཏང་ཡོད་པ་དང་། དེ་ཉིད་ཀྲུང་གོའི་སྲོལ་རྒྱུན་གྱི་ཁྲོད་དུ་ཟབ་ཞུགས་བྱས་ཡོད་དེ། གནའ་བཟང་དེང་སྤྱོད་དང་། གསར་སྤེལ་གསར་གཏོད་བྱས་པས། ཤེས་རིག་ལྡན་པའི་གནའ་བོའི་རྒྱལ་ཁབ་ཀྱི་གཟི་དཔལ་འབར་བའི་རིག་གནས་མངོན་ཡོད་པ་མ་ཟད། ད་དུང་དེང་དུས་ཀྱི་ཕྱོགས་མང་རིང་ལུགས་དང་རང་མོས་ཉོ་ཚོང་སྲ་བརྟན་དུ་བཏང་ཡོད་པས། འཛམ་གླིང་གིས་ཀྲུང་གོ་རྒྱལ་ཁབ་ཀྱི་གཟུགས་བརྙན་ལ་ཁྱོན་ཡོངས་ནས་རྒྱུས་ལོན་བྱ་རྒྱུར་ཤུགས་རྐྱེན་གལ་ཆེན་ཐེབས་རྒྱུ་ཡིན་ཞེས་བསྟན་གནང་ཡོད་པ་རེད།