ཨ་རིའི་ཅ་ལི་ཧྥུ་ཉི་ཡ་མངའ་སྡེའི་པའོ་ལིན་སྤོ་ལོ་རྒྱག་ས་ཞིག་ལ་མེ་མདའ་བརྒྱབ་པའི་དོན་རྐྱེན་ཐོན་པ།
སྤེལ་དུས 2019-01-07
ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས།
རྩོམ་པ་པོ། ཚེ་རིང་གིས་བསྒྲིགས།
ཨ་རིའི་ཅ་ལི་ཧྥུ་ཉི་ཡ་མངའ་སྡེའི་ཐོ་ལན་སི་གྲོང་ཁྱེར་གྱི་པའོ་ལིན་སྤོ་ལོ་རྒྱག་ས་ཞིག་གི་ནང་སྤྱི་ཚེས་4ཉིན་གྱི་མཚན་མོ་མེ་མདའ་བརྒྱབ་པའི་དོན་རྐྱེན་ཐོན་ཡོད། ས་གནས་དེ་གའི་གསར་འགྱུར་ཚན་པས་ཉེན་རྟོག་ཕྱོགས་ཀྱི་གནས་ཚུལ་ལུང་དུ་དྲངས་ནས། དོན་རྐྱེན་ཁྲོད་མི་3རྐྱེན་ལམ་དུ་ཤོར་བ་དང་། མི་4ལ་རྨས་སྐྱོན་བཟོས་ཡོད་ཅེས་བསྟན་ཡོད་པ་རེད།
ཅ་ལི་ཧྥུ་ཉི་ཡ་མངའ་སྡེའི་ཐོ་ལན་སི་གྲོང་ཁྱེར་གྱི་ཉེན་རྟོག་ཕྱོགས་ཀྱིས་སྤྱི་ཚོགས་འབྲེལ་བའི་སྨྱན་སྦྱོར་སྟེགས་བུ་ཐེའུ་ཐེ་ཐོག སྙན་ཞུའི་ནང་ས་ཡུལ་དངོས་ནས་མེ་མདའི་སྒྲ་མང་པོ་ཐོས་པ་དང་། མེ་མདའ་བརྒྱབ་པའི་དོན་རྐྱེན་ཁྲོད་གནོད་འཚེ་ཕོག་མཁན་མང་པོ་བྱུང་འདུག་ཅེས་འཁོད་འདུག དེའི་ཐད་ཉེན་རྟོག་ཕྱོགས་ཀྱིས། གྱོད་གཞིར་བརྟག་དཔྱད་བྱེད་བཞིན་ཡོད་ཅེས་དང་། ཉེན་རྟོག་ཕྱོགས་ཀྱིས་མི་རྣམས་འབྲེལ་ཡོད་ས་ཁོངས་ནས་ཁ་བྲལ་དགོས་པའི་རེ་འབོད་བྱས་ཡོད། མིག་སྔར་ཉེན་རྟོག་ཕྱོགས་ཀྱིས་མེ་མདའ་རྒྱག་མཁན་སུ་ཡིན་མིན་བརྟག་དཔྱད་བྱེད་བཞིན་ཡོད་པ་རེད། ཉེ་བའི་ལོའི་ནང་། ཨ་རིར་མེ་མདའ་བརྒྱབ་པའི་དོན་རྐྱེན་ཡང་སེ་ཐོན་ཡོད། སྤྱི་ལོ་2018ལོའི་ཟླ་བ་11པའི་ཚེས་8ཉིན་བར། ཨ་རི་ཡོངས་ལ་མེ་མདའ་བརྒྱབ་པའི་དོན་རྐྱེན་48966ཐོན་ནས། མི་12478རྐྱེན་ལམ་དུ་ཤོར་ཡོད་པ་རེད།