ཨ་རིའི་དམག་ཕྱིར་འཐེན་པས་སི་རི་ཡའི་ཁུར་ཏེའི་མི་རྣམས་ཨུ་རུ་སུའི་ཕྱོགས་སུ་འཁོར་བ།
སྤེལ་དུས 2019-01-08
ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས།
རྩོམ་པ་པོ། ཚེ་རིང་གིས་བསྒྲིགས།
སྤྱི་ཚེས་༥ཉིན། སི་རི་ཡའི་ཁུར་ཏེའི་དཔོན་རིགས་ཀྱིས་ཕྱིར་བསྒྲགས་བྱས་ཏེ། ཁུར་ཏེ་བས་ཨུ་རུ་སུ་དང་དེས་རྒྱབ་སྐྱོར་བྱེད་པའི་སི་རི་ཡའི་སྲིད་གཞུང་ལ་གླེང་མོལ་བྱས་ཏེ། ཨ་རིའི་དམག་ཕྱིར་འཐེན་བྱས་ནས་བཞག་པའི་སྟོང་ཆ་དེ་ཅི་ལྟར་སྐོང་དགོས་ཚུལ་ཐད་གྲོས་བསྡུར་བྱེད་བཞིན་ཡོད་པ་དང་། རང་སྐྱོང་གི་རེ་བ་སྐོང་བར་བརྩོན་ལེན་བྱེད་བཞིན་ཡོད་ཅེས་གསུངས་པ་རེད།
རུས་མིང་ཁྱབ་བསྒྲགས་བྱེད་འདོད་མེད་པའི་ཁུར་ཏེའི་དཔོན་རིགས་ཤིག་གིས་ཨ་རིའི་མཉམ་འབྲེལ་གསར་འགྱུར་ཁང་གི་གསར་འགོད་པར། ཁུར་ཏེ་བས་ཨུ་རུ་སུའི་ཕྱོགས་དང་དེས་རྒྱབ་སྐྱོར་བྱེད་པའི་སི་རི་ཡའི་སྲིད་གཞུང་ལ་གྲོས་མོལ་བྱེད་བཞིན་ཡོད་ཅིང་། ཨུ་རུ་སུའི་ཕྱོགས་ནས་ཕན་ནུས་ཆེན་པོ་བཏོན་ཡོད་པ་རེད། ཕྱོགས་གཉིས་ཀས་སི་རི་ཡ་དང་ལྷག་པར་དུ་སི་རི་ཡའི་བྱང་ཕྱོགས་ཧམ་བཟུང་བྱེད་པར་འདོད་པའི་དྲག་ཆས་སྟོབས་ཤུགས་ལ་མཉམ་དུ་འགོག་རྒོལ་བྱེད་རྒྱུར་མོས་མཐུན་བྱུང་ཡོད་པ་རེད་ཅེས་གསུངས་ཡོད།
སྤྱི་ཚེས་༥ཉིན་སོ་ཏི་ཨ་རབ་ཀྱི་《དཀྱིལ་དབུས་ཚགས་པར》ནང་སྤེལ་བའི་གནས་ཚུལ་ལྟར་ན། སི་རི་ཡའི་ཁུར་ཏེའི་དྲག་ཆས་དཔུང་ཁག“མི་དམངས་སྲུང་སྐྱོབ་རུ་ཁག”ཅེས་པའི་བཀོད་འདོམས་དཔོན་མཐོ་ཤོས་ཞི་ཕན་གྱིས་མོ་སི་ཁོ་དང་ཏ་མ་སི་ཁུར་གསང་སྟབས་ཀྱིས་འཚམས་འདྲི་གནང་སྟེ། ཨུ་རུ་སུའི་ཕྱོགས་དང་སི་རི་ཡའི་ཕྱོགས་ལ་གསང་བའི་གྲོས་ཆོད་ཅིག་འཇོག་རྒྱུའི་གྲོས་གཞི་བཏོན་ཡོད་པ་རེད། གྲོས་ཆོད་ལྟར་ན། ཁུར་ཏེའི་དྲག་ཆས་དཔུང་ཁག་གིས་ཁོ་ཚོས་ཚོད་འཛིན་བྱས་པའི་མཐའ་མཚམས་ཀྱི་ས་ཁོངས་ཕྱིར་སྲིད་གཞུང་དམག་ལ་སྤྲད་དེ། དེའི་ཚབ་ཏུ་སྲིད་གཞུང་གིས་ཁུར་ཏེ་བས་རང་སྐྱོང་བྱ་རྒྱུར་རྒྱབ་སྐྱོར་བྱ་དགོས་པའི་རེ་བ་བཏོན་ཡོད།