ཀྲུང་གོའི་རིག་གནས་གཟའ་འཁོར་འབར་མར་འགོ་ཚུགས་པ།
སྤེལ་དུས 2019-01-21
ཡོང་ཁུངས། ཤིན་ཧྭ་གསར་འགྱུར་ཁང་།
རྩོམ་པ་པོ། ཚེ་རིང་གིས་བསྒྲིགས།
ཤིན་ཧྭ་གསར་འགྱུར་ཁང་གྲོང་ཁྱེར་རང་ཀོང་ནས་ཟླ་1ཚེས་17ཉིན་གློག་འཕྲིན་འབྱོར་གསལ། ཚེས་16ཉིན། ཀྲུང་གོའི་རིག་གནས་གཟའ་འཁོར་གྱི་རིམ་སྤེལ་བྱེད་སྒོ་འབར་མའི་རང་ཀོང་དང་། ནེ་པི་ཏུའུ། མན་ཏེ་ལེ་བཅས་གྲོང་ཁྱེར་ཆེ་གྲས་གསུམ་དུ་འགོ་ཚུགས་པ་རེད།
“ཀྲུང་འབར་གྱི་བརྩེ་བ·དགའ་སྤྲོ་མཉམ་འཛོམས”ཞེས་པའི་དཔྱིད་གསར་མཚན་ཚོགས་དང་ཀྲུང་གོའི་རིག་གནས་གཟའ་འཁོར་བྱེད་སྒོ་ནི་ཀྲུང་གོའི་རྒྱལ་སྲིད་སྤྱི་ཁྱབ་ཁང་གསར་འགྱུར་གཞུང་དོན་ཁང་དང་། འབར་མར་བཅའ་སྡོད་ཀྲུང་གོའི་གཞུང་ཚབ་ཆེ་མོ་ཁང་། ཡུན་ནན་ཞིང་ཆེན་མི་དམངས་སྲིད་གཞུང་། འབར་མའི་དྲིལ་བསྒྲགས་པུའུ། འབར་མའི་ཆོས་ལུགས་ལས་དོན་དང་རིག་གནས་པུའུ་བཅས་ཀྱིས་གཙོ་གཉེར་བྱས་ཤིང་། ཡུན་ནན་རླུང་འཕྲིན་བརྙན་འཕྲིན་ལས་ཁུངས་དང་། ཡུན་ནན་ཉིན་རེའི་ཚགས་པར་ལས་རིགས་ཚོགས་པ། འབར་མའི་རྒྱལ་ཁབ་བརྙན་འཕྲིན་ལས་ཁུངས་སོགས་ཀྱིས་གཉེར་རོགས་བྱས་པ་དང་། དེའི་དམིགས་ཡུལ་ནི་ཀྲུང་འབར་དབར་གྱི་སྲོལ་རྒྱུན་མཛའ་གྲོགས་དང་རིག་གནས་སྤེལ་རེས་ཟབ་ཏུ་གཏོང་ཆེད་ཡིན་པ་རེད།
ད་ཐེངས་ཀྱི་བྱེད་སྒོ་ཟླ་1ཚེས་16ནས་ཚེས་20ཉིན་བར་གཉེར་རྒྱུ་ཡིན་ཞིང་། “ཀྲུང་འབར་གྱི་བརྩེ་བ·དགའ་སྤྲོ་མཉམ་འཛོམས”ཞེས་པའི་དཔྱིད་གསར་མཉམ་སྤྲོའི་མཚན་ཚོགས་དང་། “མཛེས་སྡུག་ལྡན་པའི་འཚོ་བར་རེ་འདོད་བྱེད”——ཀྲུང་གོའི་དབུལ་སྒྲོལ་གྲུབ་འབྲས་འགྲེམས་སྟོན། ཀྲུང་གོའི་བརྙན་འཕྲིན་ལེ་ཚན་འབར་མར་འགྲེམས་སྟོན་བྱེད་པའི་བྱེད་སྒོ། ཀྲུང་འབར་སྨྱན་སྦྱོར་གྱི་དཔྱིད་གསར་ཇ་སྟོན་ཚོགས་འདུ། “ཀྲུང་འབར་སྤུན་ཟླའི་དབར་བརྩེ་བ་ཟབ”ཅེས་པའི་པར་རིས་དང་ཡིག་གཟུགས་འགྲེམས་སྟོན། ཡུན་ནན་གྱི་མངོན་མིན་རིག་གནས་ཤུལ་བཞག་སྤུས་དག་འགྲེམས་སྟོན། ཀྲུང་གོའི་བརྗོད་དོན་གཙོ་བོའི་དཔེ་དེབ་དཔྱིད་གསར་གྱི་འགྲེམས་ཚོང་གཟའ་འཁོར་སོགས་ཚུད་ཡོད།
ཚེས་16ཉིན། པོ་ཀུའུ་ཞིང་ཆེན་ནས་རང་ཀོང་ཀྲུང་གོའི་རིག་གནས་ལྟེ་གནས་སུ་རིག་གནས་གཟའ་འཁོར་གྱི་རིམ་སྤེལ་བྱེད་སྒོར་ཞུགས་པར་ཡོང་བའི་འབར་མའི་དམངས་ཚོགས་ཝུའུ་སུའོ་ཝུན་གྱིས་ང་ཀྲུང་གོའི་རིག་གནས་གཟའ་འཁོར་གྱི་རིམ་སྤེལ་བྱེད་སྒོར་དགའ་པོ་ཡོད། འབར་ཀྲུང་ནི་ཁྱིམ་མཚེས་རྒྱལ་ཁབ་ཡིན་པས་རིག་གནས་འདྲ་པོ་ཡོད་པས། བར་ཐག་ཉེ་བའི་སྤེལ་རེས་འདི་ལྟ་བུས་རྒྱལ་ཁབ་གཉིས་པོའི་མཛའ་གྲོགས་འབྲེལ་བ་སྔར་བས་ཟབ་ཏུ་འགྲོ་ངེས་ཡིན་པའི་ཡིད་ཆེས་ཡོད། མ་འོངས་པར་སྤེལ་རེས་འདི་འདྲ་བ་སྔར་ལས་མང་བ་སྤེལ་ནས་རྒྱལ་ཁབ་གཉིས་པོའི་མཛའ་གྲོགས་ཟབ་ཏུ་གཏོང་རྒྱུའི་རེ་བ་ཡོད་ཅེས་གསར་འགོད་པར་བཤད་པ་རེད།