ཕྱི་འབྲེལ་པུས་མཉམ་འབྲེལ་རྒྱལ་ཚོགས་ཀྱི་གནམ་གཤིས་བྱ་སྤྱོད་དབུ་ཚོགས་ཀྱིས《ཕ་རི་སིའི་གྲོས་ཆོད》ཕྱོགས་ཡོངས་དང་ནུས་ལྡན་ངང་དོན་འཁྱོལ་བྱེད་པར་སྒུལ་ཤུགས་གསར་པ་སྣོན་ཐུབ་པའི་རེ་བ་ཡོད་ཅེས་བརྗོད་པ།
སྤེལ་དུས 2019-09-25
ཡོང་ཁུངས། ཤིན་ཧྭ་གསར་འགྱུར་ཁང་།
རྩོམ་པ་པོ།
ཤིན་ཧྭ་གསར་འགྱུར་ཁང་པེ་ཅིང་ནས་ཟླ་9ཚེས་23ཉིན་གློག་འཕྲིན་འབྱོར་གསལ། ཚེས་23ཉིན་ཕྱི་འབྲེལ་པུའི་མགྲིན་ཚབ་པ་ཀེང་ཧྲོང་གིས། མཉམ་འབྲེལ་རྒྱལ་ཚོགས་ཀྱི་གནམ་གཤིས་བྱ་སྤྱོད་དབུ་ཚོགས་ལས་ཕྱོགས་ཁག་གི་ཐུན་མོང་གི་ངོས་འཛིན་སྔར་བས་གཅིག་མཐུན་དང་གནམ་གཤིས་འགྱུར་ལྡོག་ལ་ཁ་གཏད་འཇལ་བའི་རྒྱལ་སྤྱིའི་མཉམ་ལས་ལ་སྐུལ་མ་ཐེབས་ནས། 《ཕ་རི་སིའི་གྲོས་ཆོད》ཕྱོགས་ཡོངས་དང་ནུས་ལྡན་ངང་དོན་འཁྱོལ་བྱེད་པར་སྒུལ་ཤུགས་གསར་པ་སྣོན་ཐུབ་པའི་རེ་བ་ཡོད་ཅེས་བརྗོད་པ་རེད།
གནས་ཚུལ་སྤེལ་གསལ་ལྟར་ན། ཚེས་23ཉིན་མཉམ་འབྲེལ་རྒྱལ་ཚོགས་ཀྱི་གནམ་གཤིས་བྱ་སྤྱོད་དབུ་ཚོགས་ཉིའུ་གཡོད་དུ་འཚོགས་པ་རེད། ཉེ་ཆར་མཉམ་འབྲེལ་རྒྱལ་ཚོགས་ཀྱི་དྲུང་ཆེ་ཀུ་ཐེ་ལེ་སིས། ཀྲུང་གོ་ཕྱོགས་ཀྱིས་ད་ཐེངས་ཀྱི་དབུ་ཚོགས་ལ་བསྐྱར་སྐྱེས་ཆོག་པའི་ནུས་རྒྱུ་དང་དེ་བཞིན་ཕྱོགས་གཞན་དག་ལ་བྱུང་བའི“དོན་སྙིང་ལྷག་པར་ལྡན་པའི་འཕེལ་རིམ”དང་། གནམ་གཤིས་བྱ་སྤྱོད་ཁྲོད་ཀྲུང་གོ་ཕྱོགས་ཀྱི་འགོ་ཁྲིད་ནུས་པ་ཤིན་ཏུ་གལ་འགངས་ཆེན་པོ་ཡིན་ལུགས་དྲིལ་བསྒྲགས་བྱེད་ཀྱི་་ཡིན་ཞེས་བརྗོད་པ་རེད།
ཀེང་ཧྲོང་གིས་དེ་ཉིན་གྱི་གསར་འགོད་པའི་འཆར་ཅན་ཚོགས་འདུའི་ཐོག ཀྲུང་གོ་ཕྱོགས་ཀྱིས་དྲུང་ཆེ་ཀུ་ཐེ་ལེ་སིས་ད་རེས་ཀྱི་མཉམ་འབྲེལ་རྒྱལ་ཚོགས་ཀྱི་གནམ་གཤིས་བྱ་སྤྱོད་དབུ་ཚོགས་འཚོག་རྒྱུའི་གྲོས་འགོ་བཏོན་པར་བསྔགས་བརྗོད་ཞུ་གི་་ཡིན། དེ་གོང་ཀྲུང་གོ་ཕྱོགས་ཀྱིས་རྒྱལ་དོན་ཨུ་ཡོན་ཝང་དབྱིས་ཀྱིས་ཀྲུའུ་ཞི་ཞི་ཅིན་ཕིང་གི་དམིགས་བསལ་སྐུ་ཚབ་ཞུས་ཏེ་ད་རེས་ཀྱི་དབུ་ཚོགས་ལ་ཞུགས་རྒྱུ་ཡིན་པ་ཡོངས་བསྒྲགས་བྱས་ཡོད་ཅེས་བརྗོད་པ་རེད།
ཁོང་གིས་ཉེ་ཆར་ཀྲུང་གོ་ཕྱོགས་ཀྱིས་དབུ་ཚོགས་ཀྱི་བྱ་སྤྱོད་ཆེན་པོ་9ཡི་ཁྱབ་ཁོངས་དང་ཟུང་འབྲེལ་བྱས་ཏེ། 《མཉམ་འབྲེལ་རྒྱལ་ཚོགས་ཀྱི་གནམ་གཤིས་བྱ་སྤྱོད་དབུ་ཚོགས། ཀྲུང་གོ་ཕྱོགས་ཀྱི་ལངས་ཕྱོགས་དང་བྱ་སྤྱོད》ཡོངས་བསྒྲགས་བྱས་པ་རེད། ཡིག་ཆ་དེས་ཀྲུང་གོ་ཕྱོགས་ཀྱིས་གནམ་གཤིས་འགྱུར་ལྡོག་ལ་ཁ་གཏད་འཇལ་བའི་བཞེད་དོན་དང་བྱེད་ཐབས་རྒྱས་བཤད་བྱས་པ་དང་། ཀྲུང་གོ་ཕྱོགས་ཀྱིས་གནམ་གཤིས་འགྱུར་ལྡོག་ལ་ཁ་གཏད་འཇལ་བའི་ཆོད་སེམས་དང་འགན་འཁྲི་མཚོན་པར་བྱས་པ། ཀྲུང་གོ་ཕྱོགས་ཀྱིས་མཉམ་འབྲེལ་རྒྱལ་ཚོགས་ཀྱི་དབུ་ཚོགས་ལ་ཕུལ་བའི་ལེགས་སྐྱེས་དང་རྒྱབ་སྐྱོར་བྱེད་ལུགས་ཀྱང་མཚོན་པར་བྱས་ཡོད། “ང་ཚོས་ད་རེས་ཀྱི་དབུ་ཚོགས་ལས་ཕྱོགས་ཁག་གི་ཐུན་མོང་གི་ངོས་འཛིན་སྔར་བས་གཅིག་མཐུན་དང་གནམ་གཤིས་ཀྱི་འགྱུར་ལྡོག་ལ་ཁ་གཏད་འཇལ་བའི་རྒྱལ་སྤྱིའི་མཉམ་ལས་ལ་སྐུལ་མ་ཐེབས་ནས། 《ཕ་རི་སིའི་གྲོས་ཆོད》ཕྱོགས་ཡོངས་དང་ནུས་ལྡན་ངང་དོན་འཁྱོལ་བྱེད་པར་སྒུལ་ཤུགས་གསར་པ་སྣོན་ཐུབ་པའི་རེ་བ་ཡོད”ཅེས་བརྗོད་པ་རེད།
ཀེང་ཧྲོང་གིས། ཀྲུང་གོ་སྲིད་གཞུང་གིས་ཐོག་མཐའ་བར་གསུམ་དུ་གནམ་གཤིས་འགྱུར་ལྡོག་ལ་ཁ་གཏད་འཇལ་བ་ནི་རང་ངོས་རྒྱུན་མཐུད་འཕེལ་རྒྱས་ཀྱི་ནང་མཁོའི་བླང་བྱ་དང་མི་རིགས་ཀྱི་ལས་དབང་གཅིག་མཐུན་འདུས་གྲུབ་གཏོད་པའི་འགན་འཁྲིར་བརྩིས་ཏེ། སྣོད་བཅུད་ཤེས་དཔལ་འཛུགས་སྐྱོང་ལ་སྐུལ་འདེད་བཏང་ནས་གནམ་གཤིས་འགྱུར་ལྡོག་ལ་ཁ་གཏད་འཇལ་བའི་རྒྱལ་ཁབ་ཀྱི་འཐབ་ཇུས་ལག་བསྟར་ནན་ཏན་བྱས་ཡོད། ཀྲུང་གོས་ཕྱིན་ཆད《མཉམ་འབྲེལ་རྒྱལ་ཚོགས་ཀྱི་གནམ་གཤིས་འགྱུར་ལྡོག་སྒྲོམ་གཞིའི་སྤྱི་ཆིངས》དང《ཕ་རི་སིའི་གྲོས་ཆོད》ཀྱི་འོས་འགན་ལག་བསྟར་མཐར་ཕྱིན་བྱས་ཏེ། ཡུན་རིང་གི་དྲོད་ཁང་རླངས་གཟུགས་ཉུང་བའི་འཕེལ་རྒྱས་ཀྱི་འཐབ་ཇུས་དུས་བཀག་ལྟར་རྩིས་འབུལ་བྱས་ནས་རང་བརྟེན་ལེགས་སྐྱེས་འབུལ་བའི་དམིགས་ཚད་ཚང་མ་ཕྱོགས་ཡོངས་ནས་འགྲུབ་པ་བྱེད་ཀྱི་ཡིན་ཞེས་བརྗོད་པ་རེད།
ཁོང་གིས་ཀྲུང་གོ་ཕྱོགས་ཀྱིས་ད་རེས་ཀྱི་དབུ་ཚོགས་གོ་སྐབས་སུ་བྱས་ཏེ། ཕྱོགས་ཁག་དང་མཉམ་དུ《མཉམ་འབྲེལ་རྒྱལ་ཚོགས་ཀྱི་གནམ་གཤིས་འགྱུར་ལྡོག་སྒྲོམ་གཞིའི་སྤྱི་ཆིངས》ཀྱི་ཐབས་ལམ་གཙོ་བོའི་གནས་བབ་མཐའ་འཁྱོངས་བྱེད་པ་དང་། “འདྲ་བའི་ཆ་ལྡན་ལ་མི་འདྲ་བའི་ཆའང་ལྡན་པའི་འགན་འཁྲི”སོགས་ཀྱི་རྩ་དོན་མཐའ་འཁྱོངས་བྱེད་པ། 《ཕ་རི་སིའི་གྲོས་ཆོད》ཕྱོགས་ཡོངས་དང་ནུས་ལྡན་ངང་དོན་འཁྱོལ་བྱེད་པར་སྐུལ་འདེད་ཧུར་ཐག་གཏོང་བ་བཅས་བྱས་ནས་ཁམས་གཙང་ལ་མཛེས་སྡུག་ལྡན་པའི་འཛམ་གླིང་མཉམ་དུ་སྐྲུན་འདོད་ཡོད་ཅེས་བརྗོད་པ་རེད།
རྩོམ་སྒྲིག་པ། སངས་སྐྱབས།