རྒྱལ་ཁབ་མང་པོས་ཐུར་ཁེས་དམག་དོན་བྱ་སྤྱོད་ཁྲོད་མི་སེར་ཤི་རྨས་བཟོས་པའི་དོན་དེར་ཁ་རྡུང་དྲག་པོ་བཏང་བ།
སྤེལ་དུས 2019-10-11
ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས།
རྩོམ་པ་པོ།
ཀྲུང་དབྱང་རླུང་འཕྲིན་ལས་ཁུངས་ནས་སྤེལ་བའི་གནས་ཚུལ། ཐུར་ཁེས་ས་གནས་དེ་གའི་དུས་ཚོད་སྤྱི་ཚེས་༩ཉིན་སི་རི་ཡའི་བྱང་རྒྱུད་ཀྱི་ཁུར་ཏེའི་དྲག་ཆས་ཀྱིས་ཚབ་མིང་དུ་ཞི་བདེའི་ཆུ་མིག་ཅེས་པའི་དམག་དོན་བྱ་སྤྱོད་སྤེལ་ཡོད། སི་རི་ཡའི་སྨྱན་སྦྱོར་ལས་ཁུངས་ཀྱིས་གནས་ཚུལ་སྤེལ་བར་གཞིགས་ན། ཉུང་མཐར་ཡང་སི་རི་ཡའི་མི་སེར་༨འཇབ་རྒོལ་ཁྲོད་རྐྱེན་ལམ་དུ་ཤོར་ཡོད་པ་རེད། སི་རི་ཡའི་སྲིད་གཞུང་གིས་དོན་དེར་ཁ་རྡུང་དྲག་པོ་བཏང་ཡོད་པ་དང་། ཨེ་ཅེབ་དང་། སོ་ཏི་ཨ་རབ་སོགས་ཨ་རབ་རྒྱལ་ཁབ་ཀྱིས་ཐུར་ཁེས་བསླངས་པའི་དམག་དོན་བྱ་སྤྱོད་ལ་ཁ་རྡུང་དྲག་པོ་བཏང་ཡོད། ཀྲུང་གོའི་ཕྱི་འབྲེལ་པུའི་མགྲིན་ཚབ་པས། སི་རི་ཡའི་བདག་དབང་དང་། རང་བཙན། རྒྱལ་ཁོངས་ས་ཆ་ཆ་ཚང་བཅས་ལ་ངེས་པར་དུ་བརྩི་འཇོག་དང་སྲུང་སྐྱོང་བྱ་དགོས་ཞེས་བསྟན་ཡོད། ཨུ་རུ་སུའི་ཙུང་ཐུང་ཕུ་ཅིང་གིས་ཉིན་དེར་ཐུར་ཁེའི་ཙུང་ཐུང་ཨེར་ཏོ་ཨན་ལ་ཁ་པར་བཏང་ནས། ཐུར་ཁེའི་ཕྱོགས་ནས་ནན་ཏན་སྒོ་ནས་བསམ་གཞིགས་ཡག་པོ་བྱ་རྒྱུ་དང་། སི་རི་ཡའི་བདག་དབང་ལ་བརྩི་འཇོག་བྱ་རྒྱུ། དམག་དོན་བྱ་སྤྱོད་ཀྱིས་སི་རི་ཡའི་ཉམས་ཉེན་ཐག་གཅོད་བྱེད་པའི་ཐད་ཀྱི་ཐུན་མོང་འབད་བརྩོན་ལ་གནོད་འཚེ་མི་གཏོང་པའི་རེ་འབོད་བྱས་ཡོད། དབྱི་རན་ཕྱི་འབྲེལ་པུས་སྤྱི་ཚེས་༡༠ཉིན་གསལ་བསྒྲགས་སྤེལ་ནས། ཐུར་ཁེས་སི་རི་ཡའི་ནང་ཁོངས་སུ་དམག་དོན་བྱ་སྤྱོད་སྤེལ་བར་སེམས་ཁྲལ་བྱེད་ཀྱི་ཡོད་པ་དང་། ཐུར་ཁེས་འཕྲལ་མར་དམག་དོན་བྱ་སྤྱོད་མཚམས་འཇོག་བྱ་རྒྱུའི་བླང་བྱ་སྟོན་ཡོད་པ་རེད།
རྩོམ་སྒྲིག་པ། སངས་སྐྱབས།