ཀྲུང་གོ་དང་མར་ཏི་ཝེའི་མིག་ནད་ཚན་ཁག་ལྟེ་གནས་ཀྱི་སྒོ་བྱང་འགེལ་བའི་མཛད་སྒོ་འཚོགས་པ།
སྤེལ་དུས 2020-01-16
ཡོང་ཁུངས། མི་དམངས་ཉིན་རེའི་ཚགས་པར།
རྩོམ་པ་པོ།
ཚེས་13ཉིན་གྱི་ཕྱི་དྲོ། ཀྲུང་གོ་སྲིད་གཞུང་གིས་རོགས་སྐྱོར་བྱས་པའི་ཀྲུང་གོ་དང་མར་ཏི་ཝེའི་མིག་ནད་ཚན་ཁག་ལྟེ་གནས་ཀྱི་སྒོ་བྱང་འགེལ་བའི་མཛད་སྒོ་མར་ཏི་ཝེའི་ཧུའུ་ལུའུ་མ་ལེ་སྨན་ཁང་དུ་འཚོགས་ཤིང་། མར་ཏི་ཝེའི་ཙུང་ཐུང་ས་ལི་ཧེས་སྲིད་གཞུང་གི་དཔོན་རིགས་མང་པོའི་སྣེ་ཁྲིད་དེ་མཛད་སྒོར་ཞུགས་པ་རེད།
ས་ལི་ཧེ་དང་མར་ཏི་ཝེར་བཅའ་སྡོད་ཀྲུང་གོའི་གཞུང་ཚབ་ཆེ་མོ་བ་ཀྲང་ལི་ཀྲུང་གིས་མིག་ནད་ཚན་ཁག་ལྟེ་གནས་ཀྱི་དར་ཚོན་བྲེགས་པ་དང་། ས་ལི་ཧེས་མིག་ནད་ཚན་ཁག་ལྟེ་གནས་ལ་ལྟ་སྐོར་གནང་རྗེས་ཀྲུང་གོའི་སྨན་དོན་མི་སྣར། ཀྲུང་གོའི་སྨན་བཅོས་རུ་ཁག་གིས་མར་ཏི་ཝེར་རྩ་ཆེ་ལ་སྤུས་ཚད་མཐོ་བའི་ཆེད་ལས་ཀྱི་ཞབས་ཞུ་མཁོ་འདོན་གནང་བར་ཐུགས་རྗེ་ཆེ་ཞུ་རྒྱུ་ཡིན་ཞེས་བརྗོད་པ་རེད།
ཀྲང་ལི་ཀྲུང་གིས་མཛད་སྒོའི་ཐོག ཀྲུང་མར་མིག་ནད་ཚན་ཁག་ལྟེ་གནས་ནི་ཀྲུང་གོས་ཕྱི་རྒྱལ་དུ་རོགས་སྐྱོར་བྱས་ནས་བསྐྲུན་པའི་དེང་རབས་ཅན་དང་ཚད་ལྡན་ཅན་གྱི་མིག་ནད་ཚན་ཁག་ལྟེ་གནས་དང་པོ་དེ་ཡིན་ལ་ཀྲུང་མར་གཉིས་དབར་གྱི་འཕྲོད་བསྟེན་ཁྱབ་ཁོངས་སུ་སྤེལ་བའི་མཉམ་ལས་རྣམ་གྲངས་ཐོག་མ་དེ་ཡང་ཡིན་ཞེས་བརྗོད་པ་རེད།
མར་ཏི་ཝེའི་འཕྲོད་བསྟེན་པུའུ་ཀྲང་ཨ་མིང་གིས། མིག་ནད་ཚན་ཁག་ལྟེ་གནས་ལས་མར་ཏི་ཝེའི་མང་ཚོགས་དེ་བས་མང་བར་སྤུས་ལེགས་ཀྱི་སྨན་བཅོས་ཞབས་ཞུ་ཐོབ་པ་དང་ས་གནས་དེ་གའི་སྨན་དོན་མི་སྣར་ཡང་ཀྲུང་གོའི་རིགས་གཅིག་མཁས་ཅན་དང་མཉམ་ལས་བྱེད་པའི་གོ་སྐབས་དེ་བས་མང་བ་ཐོབ་རྒྱུའི་རེ་བ་ཡོད་ཅེས་བརྗོད་པ་རེད།
ངོ་སྤྲོད་བྱས་པར་གཞིགས་ན། 2016ལོ་དང་2017ལོར་ཀྲུང་གོའི་སྨན་བཅོས་རུ་ཁག་གིས་མར་ཏི་ཝེར“འོད་སྣང་བྱ་སྤྱོད”བྱེད་སྒོ་སྤེལ་ནས་མར་ཏི་ཝེ་རུ་སྨན་རིན་མི་དགོས་པར་སྐྱ་གྲིབ་ཀྱི་གཤགས་བཅོས་205བྱས་ཡོད། ཧུའུ་ལུའུ་མ་ལེ་སྨན་ཁང་དུ་ཀྲུང་མར་མིག་ནད་ཚན་ཁག་ལྟེ་གནས་བསྐྲུན་པ་དེ་ནི་ཀྲུང་མར་རྒྱལ་ཁབ་གཉིས་པོའི་སྲིད་གཞུང་གིས་རྟོག་ཞིབ་དང་ཞིབ་འཇུག་ནན་ཏན་བྱས་རྗེས་ཐག་བཅད་པ་ཞིག་ཡིན་པ་དང་འཆར་གཞི་བྱས་ན་ས་གནས་དེ་གའི་དམངས་ཚོགས་ལ་རྒྱུན་རྣམ་ཅན་གྱི་སྨན་བཅོས་ཞབས་ཞུ་བྱ་རྩིས་ཡོད་པ་རེད།
རྩོམ་སྒྲིག་པ། བདེ་སྒྲོལ།