ཀྲུང་གོ་དང་ཀེ་རེན་ན་ཏ་ཡིས་དངོས་སྒྲུབ་མཉམ་ལས་དང་ཐུན་མོང་འཕེལ་རྒྱས་ལ་སྐུལ་འདེད་གཏོང་བ།
སྤེལ་དུས 2020-01-19
ཡོང་ཁུངས། མི་དམངས་ཉིན་རེའི་ཚགས་པར།
རྩོམ་པ་པོ།
ཚེས་14ཉིན། ཀེ་རེན་ན་ཏར་བཅའ་སྡོད་ཀྲུང་གོའི་གཞུང་ཚབ་ཁང་དང་ཀེ་རེན་ན་ཏའི་ཕྱི་འབྲེལ་པུས་ཀེ་རེན་ན་ཏའི་རྒྱལ་ས་སན་ཐེ་ཅོར་ཅི་རུ་སྣེ་ལེན་ཚོགས་འདུ་འཚོགས་ཏེ། ཀྲུང་ཀེའི་དབར་གྱི་ཕྱི་འབྲེལ་སླར་གསོ་བྱུང་ནས་ལོ་15འཁོར་བར་རྟེན་འབྲེལ་ཞུས་པ་རེད། ཀྲུང་ཀེའི་དཔོན་རིགས་ཀྱིས་རྒྱལ་ཁབ་གཉིས་ཀྱིས“རྒྱུད་གཅིག་ལམ་གཅིག”གི་སྒྲོམ་གཞིའི་འོག དངོས་སྒྲུབ་མཉམ་ལས་ལ་སྐུལ་འདེད་བརྟན་པོ་བཏང་སྟེ། ཐུན་མོང་ཐོག་འཕེལ་རྒྱས་འགྲོ་རྒྱུར་དམིགས་རྒྱུ་ཡིན་ཞེས་བརྗོད་པ་རེད།
ཀེ་རེན་ན་ཏའི་ཕྱི་འབྲེལ་པུའི་པུའུ་ཀྲང་པི་ཏེ·ཏའེ་ཝུའེ་ཡིས་ཚོགས་འདུའི་ཐོག་ཀེ་རེན་ན་ཏ་ཕྱོགས་ཀྱིས་ཀྲུང་གོའི“རྒྱུད་གཅིག་ལམ་གཅིག”གི་གྲོས་འགོར་རྒྱབ་སྐྱོར་ཞུ་རྒྱུ་ཡིན། ཀྲུང་གོ་ཕྱོགས་དང་མཉམ་དུ་ཀེ་རེན་ན་ཏའི་2035ཡི་རྒྱལ་ཁབ་རྒྱུན་མཐུད་འཕེལ་རྒྱས་ཀྱི་འཐབ་ཇུས་ལ་གྲོས་བསྡུར་བྱེད་འདོད་ཡོད་ལ། འབྲེལ་མཐུད་ཀྱང་བྱེད་འདོད་ཡོད་ཅེས་དང་། ཀེ་རེན་ན་ཏ་ཕྱོགས་ཀྱིས་ཀྲུང་གོ་ཕྱོགས་དང་མཉམ་དུ་མཐུན་སྦྱོར་འབྲེལ་མཐུད་ལ་ཤུགས་སྣོན་རྒྱག་པ་དང་ཆབ་སྲིད་ཐད་ཕན་ཚུན་ཡིད་ཆེས་བྱེད་ཤུགས་ཆེ་རུ་བཏང་ནས“རྒྱུད་གཅིག་ལམ་གཅིག”གི་སྒྲོམ་གཞིའི་འོག དངོས་སྒྲུབ་མཉམ་ལས་ལ་སྔར་བས་སྐུལ་འདེད་གཏོང་འདོད་ཡོད་ལ། རིག་གནས་སྤེལ་རེས་བྱེད་ཟབ་ཏུ་གཏོང་བ་དང་། མི་ཆོས་རིག་གནས་ཀྱི་འབྲེལ་ཐག་དམ་དུ་གཏོང་བ། ཚན་རྩལ་དང་། ལུས་རྩལ། ཡུལ་སྐོར་སོགས་ཁྱབ་ཁོངས་ཀྱི་མཉམ་ལས་རྒྱ་ཆེར་གཏོང་བ་བཅས་བྱས་ཏེ། ཕྱོགས་གཉིས་ཀྱི་འབྲེལ་བ་སླར་ཡང་སྐས་རིམ་གསར་པར་སླེབས་རྒྱུར་ཕྱོགས་ཡོངས་ནས་སྐུལ་འདེད་གཏོང་འདོད་ཡོད་ཅེས་བརྗོད་པ་རེད།
ཀེ་རེན་ན་ཏར་བཅའ་སྡོད་ཀྲུང་གོའི་གཞུང་ཚབ་ཆེ་མོ་བ་ཀྲའོ་ཡུང་ཁྲེན་གྱིས་ཀྲུང་ཀེའི་དཔལ་འབྱོར་ཚོང་དོན་མཉམ་ལས་བརྟན་པོའི་ངང་འཕེལ་རྒྱས་ཕྱིན་པ་དང་། མི་ཆོས་རིག་གནས་སྤེལ་རེས་ཡག་པོ་བྱུང་བ། ཀེ་རེན་ན་ཏའི་སློབ་མ་ཀྲུང་གོར་གསོ་སྦྱོང་དང་ཟབ་སྦྱོང་ནང་ཞུགས་པར་གྲུབ་འབྲས་མངོན་གསལ་དོད་པོ་ཐོབ་པ་བཅས་བྱུང་ནས་ཀེ་རེན་ན་ཏའི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སྐུལ་འདེད་གཏོང་ཆེད། དགེ་མཚན་ལྡན་པའི་ལེགས་སྐྱེས་འབུལ་ཐུབ་པ་བྱུང་ལ། ཀེ་རེན་ན་ཏའི་མི་དམངས་ལའང་དངོས་དངོས་རྗེན་རྗེན་གྱི་ཕན་པ་ཐོབ་ཡོད་ཅེས་བརྗོད་པ་རེད།
རྩོམ་སྒྲིག་པ། བདེ་སྒྲོལ།