རྒྱལ་སྲིད་སྤྱི་ཁྱབ་ཁང་གཞུང་ལས་ཐིང་གིས་ཚེས་27ཉིན་2020ལོའི་དཔྱིད་གསར་དུས་ཆེན་གྱི་གུང་གསེང་རིང་དུ་གཏོང་རྒྱུ་དང་སློབ་གྲྭ་འཚོག་པའི་དུས་ཚོད་ཕྱི་སྣུར་བྱ་རྒྱུའི་སྐོར་གྱི་བརྡ་ཐོ་སྤེལ་ཡོད།
རྒྱལ་སྲིད་སྤྱི་ཁྱབ་ཁང་ནས་ཏོག་དབྱིབས་ནད་དུག་གསར་པའི་གློ་ཚད་ནད་ཡམས་འགོག་སྲུང་གི་ལས་ཀར་ཤུགས་རྒྱག་པ་དང་། མི་ཚོགས་ཀྱི་འདུ་འཛོམས་ཉུང་དུ་གང་ལེགས་གཏོང་བ། རིམས་ནད་འགོ་ལམ་བཀག་འགོག་བྱེད་པ་བཅས་བྱས་ནས་མི་དམངས་མང་ཚོགས་ཀྱི་ཚེ་སྲོག་དང་གཟུགས་གཞིའི་བདེ་ཐང་འགན་ལེན་གང་ལེགས་བྱ་ཆེད། 2020ལོའི་དཔྱིད་གསར་དུས་ཆེན་གྱི་གུང་གསེང་རིང་དུ་གཏོང་རྒྱུ་དང་སློབ་གྲྭ་འཚོག་པའི་དུས་ཚོད་ཕྱི་སྣུར་བྱ་རྒྱུའི་བརྡ་ཐོ་སྤེལ་ཡོད་ལ། བརྡ་ཐོ་ཞིབ་ཕྲ་གཤམ་གསལ་ལྟར།
གཅིག 2020ལོའི་དཔྱིད་གསར་གུང་གསེང་ཟླ་2ཚེས་2ཉིན་(ལུགས་རྙིང་གི་ཟླ་དང་པོའི་ཚེས་དགུ། གཟའ་ཉི་མ་)བར་རིང་དུ་གཏོང་རྒྱུ་དང་། ཟླ་2ཚེས་3ཉིན་(གཟའ་ཟླ་བ་)ནས་བཟུང་དུས་རྒྱུན་ལྟར་ལས་ཞུགས་བྱ་རྒྱུ།
གཉིས། ས་གནས་ཁག་གི་བུ་བཅོལ་ཁང་དང་སློབ་གྲྭ་ཆུང་འབྲིང་། ཆེད་ལས་སློབ་གྲྭ་དང་སློབ་ཆེན་བཅས་ཀྱི་སློབ་མགོ་འཛུགས་པའི་དུས་ཚོད་ཕྱི་སྣུར་བྱ་རྒྱུ་དང་། སློབ་འགོ་འཛུགས་པའི་དུས་ཚོད་ཞིབ་ཕྲ་སློབ་གསོའི་སྡེ་ཚན་གྱིས་བརྡ་ཐོ་ལོགས་སུ་གཏོང་རྒྱུ།
གསུམ། རིམས་ནད་འགོག་སྲུང་གི་དགོས་དབང་གིས་ལས་བཟོ་བས་གུང་གསེང་གཏོང་མི་ཐུབ་པའི་རིགས་ལ་《ངལ་རྩོལ་སྐོར་གྱི་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཁྲིམས་》ལྟར་ངལ་གསོའི་ཁ་གསབ་བཀོད་སྒྲིག་བྱེད་པ་དང་། གུང་གསེང་སྐབས་ལས་ཞུགས་བྱས་མཁན་གྱི་གླ་ཕོགས་འབྲེལ་ཡོད་སྲིད་ཇུས་ལྟར་དོན་དུ་འཁྱོལ་བ་འགན་ལེན་བྱ་རྒྱུ།
དཔྱིད་གསར་དུས་ཆེན་རྗེས་ཀྱི་འགྲིལ་འགྲུལ་རླབས་ཆེན་སླེབས་ལ་ཉེ་བའི་དུས་འདིར། གློ་ཚད་གསར་པའི་འགོག་སྲུང་བྱ་བ་ཇི་ལྟར་བསྒྲུབ་དགོས་སམ་ཞེ་ན། ཁ་སང་། (ཚེས་26ཉིན། ) ཀྲུང་དབྱང་གི་ཏོག་དབྱིབས་ནད་དུག་གསར་པའི་གློ་ཚད་རིམས་ནད་ལ་ཁ་གཏད་གཅོག་པའི་ལས་དོན་འགོ་ཁྲིད་ཚོགས་ཆུང་གིས་ཚོགས་འདུ་འཚོགས་ནས་རིམས་ནད་སྔོན་འགོག་དང་ཚོད་འཛིན་གྱི་ལས་དོན་ལ་བཀོད་སྒྲིག་སྔར་ལས་ལྷག་པ་བྱས་ཡོད།
དྲ་ཐོག་ན་དཔྱིད་གསར་གུང་གསེང་རིང་དུ་གཏོང་མིན་ལ་བགྲོ་གླེང་འཁྲུག་པོ་བྱེད་བཞིན་པར་དམིགས་ནས། ཚོགས་ཐོག་ཏུ་སྔ་ཙམ་ནས་དཔྱིད་གསར་དུས་ཆེན་གྱི་གུང་གསེང་རྗེས་ཀྱི་རིམས་ནད་སྔོན་འགོག་དང་ཚོད་འཛིན་ལས་དོན་བཀོད་སྒྲིག་ཡག་པོ་བྱེད་པ་དང་། དཔྱིད་གསར་གུང་གསེང་འོས་འཚམ་ངང་རིང་དུ་གཏོང་བ། སློབ་འགོ་འཛུགས་པའི་དུས་ཚོད་ཕྱི་སྣུར་བྱེད་དགོས་པ་གསལ་བསྟན་གནང་།
ཆེད་མཁས་པ་ཚོས་གཟའ་འཁོར་གཅིག་རིང་གི་དཔྱིད་གསར་གུང་གསེང་ལ་“ཟུར་བཀར་ཆེན་པོ་དང་དུག་སེལ་ཆེན་པོའི”ནུས་པ་ཆེན་པོ་ལྡན་ཞིང་། ཝུའུ་ཧན་ཕུད་པའི་ས་ཁུལ་དག་གིས་རིམས་ནད་བཀག་འགོག་བྱེད་པའི་འགག་རྩའི་དུས་སྐབས་ཤིག་ཀྱང་ཡིན་པའི་ངོས་འཛིན་བྱེད་བཞིན་ཡོད།
རྩོམ་སྒྲིག་པ། སངས་སྐྱབས།
