པཎ་ཆེན་རིན་པོ་ཆེས་དཀར་མཛེས་ཁུལ་ལ་སྒོར་ས་ཡ་1གི་དངོས་རྫས་གནང་བ།
སྤེལ་དུས 2020-02-27
ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས།
རྩོམ་པ་པོ།
རྒྱལ་ཡོངས་སྲིད་གྲོས་ཀྱི་རྒྱུན་ཨུ། ཀྲུང་གོའི་ནང་བསྟན་མཐུན་ཚོགས་ཀྱི་ཚོགས་གཙོ་གཞོན་པ་པཎ་ཆེན་ཨེར་ཏེ་ནི་ཆོས་ཀྱི་རྒྱལ་པོ་མཆོག་ནས་དཀར་མཛེས་ཁུལ་ནང་བསྟན་མཐུན་ཚོགས་དང་ཆོས་ལུགས་ལས་རིགས་ལ་མི་དམངས་ཤོག་སྒོར་ས་ཡ་1གི་ཏོག་གསར་གློ་ཚད་འགོག་བཅོས་ལ་མཁོ་བའི་རིམས་འགོག་དངོས་རྫས་ཞལ་འདེབས་གནང་ཡོད་ཅིང་། སྤྱི་ཟླ་2ཚེས་25ཉིན་ཁག་དང་པོའི་འགོག་བཅོས་ལ་མཁོ་བའི་ཁ་རས་འབུམ་1བདེ་བླག་ངང་དར་རྩེ་མདོ་གྲོང་ཁྱེར་དུ་འབྱོར་ནས་རྩིས་སྤྲོད་རྩིས་ལེན་གྱི་འགྲོ་ལུགས་གཉེར་རྗེས། རིམས་འགོག་དངོས་རྫས་དེ་དག་དཀར་མཛེས་ཁུལ་ཆོས་ལུགས་ཁྱབ་ཁོངས་ཀྱི་རིམས་ནད་སྔོན་འགོག་ཚོད་འཛིན་གྱི་འཐབ་ས་དང་པོར་གཅིག་རྗེས་གཉིས་མཐུད་ངང་སྐྱེལ་བཞིན་ཡོད།
ཤེས་རྟོགས་བྱུང་བར་གཞིགས་ན། ཏོག་གསར་གློ་ཚད་ཀྱི་རིམས་ནད་ཐོན་རྗེས་པཎ་ཆེན་སྐུ་ཕྲེང་བཅུ་གཅིག་པས་རིམས་ནད་མཉམ་འགོག་མཉམ་བཅོས་ལས་དོན་ལ་ཐུགས་ཁུར་ཟབ་བཞེས་གནང་ནས་ཧུའུ་པེ་ཝུའུ་ཧན་དང་བོད་རང་སྐྱོང་ལྗོངས་སྨན་བཅོས་སྡེ་ཚན་ཁག་ལ་རིམས་འགོག་དངོས་རྫས་ཞལ་འདེབས་གནང་བ་དང་། ད་ཐེངས་ཡང་སྨན་སྤྱོད་ཁ་རས་འབུམ་2ཉོས་ནས་དཀར་མཛེས་ཁུལ་གྱི་ཆོས་ལུགས་ལས་རིགས་ཁག་ལ་ཞལ་འདེབས་གནང་བ་རེད། ཁག་དང་པོར་ལག་འབྱོར་བྱུང་བའི་སྨན་སྤྱོད་ཁ་རས་འབུམ་1ཕུད་པའི་སྨན་བཅོས་ཁ་རས་གཞན་འབུམ་1དེ་ཉིན་ཤས་རྗེས་ནས་དཀར་མཛེས་ཁུལ་དུ་དབོར་རྒྱུ་ཡིན་པ་རེད།
སི་ཁྲོན་ཞིང་ཨུད་འཐབ་ཕྱོགས་གཅིག་གྱུར་པུའི་པུའུ་ཀྲང་གཞོན་པ། ཞིང་ཨུད་བོད་རིགས་ས་ཁུལ་གཞུང་ལས་ཁང་གི་ཀྲུའུ་རེན་ཧྲེན་དབྱང་ཞལ་འདེབས་གནང་བའི་མཛད་སྒོར་ཞུགས་ནས་དཀར་མཛེས་ཁུལ་གྱི་ཆོས་ལུགས་ལས་རིགས་ཁག་གི་འཐུས་མི་ཚོར་པཎ་ཆེན་སྐུ་ཕྲེང་བཅུ་གཅིག་པའི་འཚམས་འདྲི་བརྒྱུད་ཞུ་བྱས་པ་མ་ཟད། དཀར་མཛེས་ཁུལ་ཆོས་ལུགས་ལས་རིགས་ཁག་གི་རིམས་ནད་སྔོན་འགོག་ཚོད་འཛིན་ལས་ཀར་ཁས་ལེན་གནང་བ་དང་། དཀར་མཛེས་ཁུལ་གྱི་ཆོས་ལུགས་ལས་རིགས་ཁག་གིས“རྒྱལ་གཅེས་ཆོས་གཅེས་དང་རྒྱལ་སྐྱོང་འགྲོ་ཕན”གྱི་སྲོལ་རྒྱུན་དར་སྤེལ་བཏང་ནས་གློ་ཚད་རིམས་ནད་འགོག་བཅོས་བྱ་བའི་ཁྲོད་བྱས་རྗེས་འཇོག་རྒྱུའི་རེ་བ་ཡོད་ཅེས་གསུངས་ཡོད།
དཀར་མཛེས་ཁུལ་མི་དམངས་སྲིད་གཞུང་གི་ཁུལ་དཔོན་གཞོན་པ་ཏུའུ་ཏེ་ཆིང་གིས་པཎ་ཆེན་སྐུ་ཕྲེང་བཅུ་གཅིག་པས་འཁྱག་དུས་གོས་དང་ལྟོགས་དུས་ཟས་གནང་བར་ཐུགས་རྗེ་ཆེ་ཞུས་པ་དང་། སི་ཁྲོན་ཞིང་ཆེན་ནང་བསྟན་མཐུན་ཚོགས་ཀྱི་ཚོགས་གཙོ་གཞོན་པ། སི་ཁྲོན་བོད་བརྒྱུད་ནང་བསྟན་སློབ་གླིང་གི་གླིང་གཙོ། དཀར་མཛེས་ཁུལ་ནང་བསྟན་མཐུན་ཚོགས་ཀྱི་ཚོགས་གཙོ་རྒྱལ་བསྟན་བློ་བཟང་བྱམས་པས་པཎ་ཆེན་རིན་པོ་ཆེས་སི་ཁྲོན་བོད་བརྒྱུད་ནང་བསྟན་ལས་རིགས་ཁག་ལ་བྱམས་སེམས་དང་གཅེས་སྐྱོང་གནང་བར་ཐུགས་རྗེ་ཆེ་ཞུས་ཤིང་། ཁུལ་ནང་བསྟན་མཐུན་ཚོགས་ཀྱིས་ཁུལ་ཨུ་དང་ཁུལ་སྲིད་གཞུང་གི་འགྱུར་མེད་སྟོབས་ལྡན་གྱི་འགོ་ཁྲིད་འོག་རྒྱ་ཆེའི་ཆོས་ལུགས་ལས་དོན་མི་སྣར་སློབ་གསོ་དང་ཁྲིད་སྟོན་ཧུར་ཐག་བྱས་ཏེ་རིམས་ནད་སྔོན་འགོག་ལས་ཀའི་ཁྲོད་དགོས་ངེས་ཀྱི་ལེགས་སྐྱེས་འབུལ་རྒྱུ་ཡིན་ཞེས་གསུངས་འདུག
རྩོམ་སྒྲིག་པ། སངས་སྐྱབས།