ཟླ་3ཚེས་30ཉིན་པེ་ཅིང་གི་ཐང་ཧྲན་ཆུང་བའི་སྨན་ཁང་གི་དྲག་སྐྱེད་བྱུང་བའི་ནད་པ་ཐོག་མ་ཐིང་ཐིང(མིང་ཚབ)སྨན་ཁང་ནས་དོན་པ་རེད། སྨན་ཁང་ནས་མ་དོན་གོང་སྨན་དོན་མི་སྣས་ཐིང་ཐིང་ལ་ཀེག་དང་མེ་ཏོག་སྤྲད་དེ་ཁོང་བདེ་བླག་ངང་སྨན་ཁང་ནས་དོན་ཐུབ་པར་རྟེན་འབྲེལ་ཞུས་པ་རེད། མངའ་ཁོངས་ཕྱི་ནས་པེ་ཅིང་དུ་ལོག་པའི་ཐིང་ཐིང་གིས་སྨན་དོན་མི་སྣར“རླབས་ཆེན་གྱི་མེས་རྒྱལ་དང་གཅེས་པར་འོས་པའི་སྨན་དོན་མི་སྣར་ཐུགས་རྗེ་ཆེ་ཞུ”ཞེས་ཡང་ཡང་བཤད་པ་རེད།
ལོ་17གོང་གི་དམིགས་བསལ་གློ་ཚད་འགོག་རྒོལ་དམག་འཐབ་རྒྱག་སྐབས་ཐང་ཧྲན་ཆུང་བའི་སྨན་ཁང་གིས་རིམས་ནད་ཚབས་ཆེ་ཤོས་ཀྱི་དུས་སུ་ལས་འགན་དང་ལེན་ཞུས་ནས་ཉིན་7ལ་ནད་ཁྲི་1000བཙུགས་པ་དང་དཔུང་སྡེའི་སྨན་དོན་མི་སྣས་སྐྱོབ་བཅོས་ལས་དོན་གྱི་འགན་ཕྱོགས་ཡོངས་ནས་ཁུར་བས། དམིགས་བསལ་གློ་ཚད་ཕོག་པའི་ནད་པ་དྲག་སྐྱེད་བྱུང་ཚད་མང་ཤོས་དང་། འཆི་ཚད་ཉུང་ཤོས། སྨན་དོན་མི་སྣར་དམིགས་བསལ་གློ་ཚད་གཅིག་ཀྱང་མ་འགོས་པའི“ཐང་ཧྲན་ཆུང་བའི་ངོ་མཚར”བཏོད་པ་དང“དཔའ་ངར་ཞུམ་མེད་དང་། ཚན་རིག་བདེན་འཚོལ། མཐུན་སྒྲིལ་གཞོགས་འདེགས། དཀའ་སྤྱད་སྐྱེས་འབུལ”བཅས་ཀྱི་ཐང་ཧྲན་ཆུང་བའི་སྙིང་སྟོབས་བཏོད་ཡོད། དེ་ནི་ཀྲུང་གོ་བ་ཡོངས་ཀྱིས་ཐུན་མོང་ཐོག་རིམས་ནད་འགོག་རྒོལ་བྱས་པའི་ལོ་རྒྱུས་ཀྱི་དོན་དངོས་དང་། དམག་དམངས་མཐུན་སྒྲིལ་དང་ལག་གདང་སྦྲེལ་ནས་ཐོལ་བྱུང་དོན་རྐྱེན་ལ་ཁ་གཏད་འཇལ་བའི་ཐུན་མོང་གི་དྲན་གསོ། སྨན་དོན་མི་སྣ་དང་ནད་པས་ལག་གདང་སྦྲེལ་ནས་ནད་ཡམས་ལས་རྣམ་པར་རྒྱལ་བའི་གསོན་ཉམས་དོད་པའི་ཕྱོགས་སྡོམ་བཅས་རེད། ལོ་17རྗེས་ཏོག་གསར་གློ་ཚད་རིམས་ནད་ལ་ཁ་གཏད་འཇལ་སྐབས་པེ་ཅིང་གི་ཐང་ཧྲན་ཆུང་བའི་སྨན་ཁང་གིས་འགན་འཁྲི་དང་མངགས་བཅོལ་ཟབ་མོ་ཆུད་ཟོས་སུ་མ་བཏང་བར་སླར་ཡང་རིམས་ནད་སྔོན་འགོག་ཚོད་འཛིན་གྱི་འགོག་རྒོལ་དམག་འཐབ་རྒྱག་འགོ་ཚུགས་ཡོད།
ཟླ་3ཚེས་16ཉིན་ཐང་ཧྲན་ཆུང་བའི་དམིགས་བཙུགས་སྨན་ཁང་དངོས་སུ་སྤྱོད་འགོ་ཚུགས་པ་དང་། གཙོ་བོ་མངའ་ཁོངས་ཕྱི་ནས(ཕྱིར་ལོག)པེ་ཅིང་དུ་སླེབས་པའི་མི་སྣའི་ཁྲོད་ནས་འཐེན་བཤེར་བྱེད་དགོས་པའི་མི་སྣ་དང་། དོགས་ཡོད་མི་སྣ། ནད་གཞི་གཏན་འཁེལ་གྱི་ནད་པ་ཚབས་ཆུང་གྲས་དང་སྤྱིར་བཏང་བཅས་ཀྱི་སྨན་བཅོས་ལ་སྤྱོད་ཀྱི་ཡོད། ཟླ་3ཚེས་29ཉིན་གྱི་ཆུ་ཚོད་24བར་སྨན་ཁང་དེས་མངའ་ཁོངས་ཕྱི་ནས(ཕྱིར་ལོག)པེ་ཅིང་དུ་སླེབས་པའི་མི་སྣའི་ཁྲོད་ནས་མི་2002ལ་འཐེན་བཤེར་བྱས་པ་དང་། མང་ཤོས་སྐབས་ཉིན་གཅིག་ལ་མི་394འཐེན་བཤེར་བྱེད་ཀྱི་ཡོད། གྲངས་གཞི་དེ་དག་ལས་སྨན་དོན་མི་སྣས་དུས་ཚོད་སྐར་ཆ་ཙམ་ལའང་བརྩོན་ལེན་བྱས་ནས་འབད་འབུངས་བྱས་པ་བདེན་དཔང་བྱེད་ཐུབ།
རྩོམ་སྒྲིག་པ། བདེ་སྒྲོལ།