དཔྱིད་ཀའི་དུས་ཚོད་ཆུད་ཟོས་སུ་མི་གཏོང་བར་ལས་འགོ་བསྐྱར་འཛུགས་དང་རིམས་འགོག་གཉིས་ཀ་དམ་འཛིན་བྱེད་དགོས།
སྤེལ་དུས 2020-04-02
ཡོང་ཁུངས། ཀྲུང་གོའི་བོད་ལྗོངས་དྲ་བ།
རྩོམ་པ་པོ། འབྲུག་རྒྱལ་མཁར་གྱིས་བསྒྱུར།
མགྱོགས་མྱུར་ངང་དཔལ་འབྱོར་སླར་གསོ་ཡོང་རྒྱུར་སྐུལ་འདེད་གཏོང་བར་རིམས་ནད་སྔོན་འགོག་ཚོད་འཛིན་དང་ལས་ཀ་དང་ཐོན་སྐྱེད་སླར་གསོ་བྱེད་པ་གཉིས་ཀ་དམ་འཛིན་བྱ་རྒྱུ་ནི་ཧ་ཅང་གལ་ཆེན་པོ་རེད། ཟླ་3ཚེས་29ཉིན། སྤྱི་ཁྱབ་ཧྲུའུ་ཅི་ཞི་ཅིན་ཕིང་ཀྲེ་ཅང་དུ་རྟོག་ཞིབ་གནང་བར་ཕེབས་པ་དང་། ས་ཚིགས་དང་པོ་ནི་ཉིང་པོ་ཀྲོའུ་ཧྲན་གྲུ་ཁའི་རི་བརྒྱུད་གྲུ་ཁ་ཡིན་ཞིང་། ཐོན་སྐྱེད་སླར་གསོ་དང་ལས་འགོ་བསྐྱར་ཚུགས་བྱ་རྒྱུ་གླེང་ཚེ། གྲུ་ཁ་ནི་དཔལ་འབྱོར་འཕེལ་རྒྱས་ཁྲོད་དེའི་ཚད་འཇལ་བྱེད་གལ་ཆེན་ཞིག་ཡིན་ཞིང་། རིམས་ནད་སྔོན་འགོག་ཚོད་འཛིན་ལ་ལྷོད་གཡེང་མི་གཏོང་བ་འགན་ལེན་བྱེད་པའི་གནས་ཚུལ་འོག གོམ་པ་བརྟན་པོའི་ངང་ཐོན་སྐྱེད་སླར་གསོ་དང་ལས་འགོ་བསྐྱར་འཛུགས་ལ་སྐུལ་འདེད་བཏང་ཚེ་གཞི་ནས་ཕྱོགས་གཉིས་ཀར་གྲུབ་འབྲས་ཐོན་ཐུབ།
རིམས་ནད་སྔོན་འགོག་ཚོད་འཛིན་བྱ་རྒྱུ་དེ་མང་ཚོགས་ཀྱི་ཚེ་སྲོག་བདེ་འཇགས་དང་འབྲེལ་བ་ཡོད་པ་ཞིག་རེད། ཀྲུང་གོ་རྒྱལ་ཁབ་ཀྱིས་ཉིན་མང་པོའི་རིང་ལ་བསྟུད་མར་རིམས་འགོག་ལ་འབད་འཐབ་བྱས་པ་བརྒྱུད། དཀའ་ངལ་མང་པོ་ཁྱད་དུ་བསད་དེ་མིག་སྔར་དུས་མཚམས་རང་བཞིན་གྱི་རྒྱལ་ཁ་ཐོབ་ཡོད་མོད། འོན་ཀྱང་ཕྱི་རྒྱལ་ནས་ཡོང་བའི་ནད་པར་སྔར་བཞིན་སྣང་ཆུང་བྱེད་མི་རུང་། སྐབས་འདིར་ལྷག་པར་དུ་ཨམ་གཙིགས་བསྡམས་ནས་རིམས་ནད་སྔོན་འགོག་ཚོད་འཛིན་བྱེད་པ་རྒྱུན་འཁྱོངས་ཡག་པོ་བྱས་ཏེ། རིམས་ནད་སླར་ཡང་སླེབས་སྲིད་པའི་རྒྱུ་རྐྱེན་ཚང་མ་གཏན་འགོག་དང་མེད་པར་གཏོང་དགོས།
ལས་ཀ་སླར་གསོ་དང་ཐོན་སྐྱེད་སླར་གསོ་བྱ་རྒྱུ་དེ་དཔལ་འབྱོར་འཕེལ་རྒྱས་དང་འབྲེལ་བ་ཡོད་པ་དང་། དཔལ་འབྱོར་འཕེལ་རྒྱས་གཏོང་རྒྱུ་དེ་དམངས་འཚོའི་གནས་བབ་དང་འབྲེལ་བ་ཡོད་པས། ལས་འགོ་བསྐྱར་འཛུགས་དང་ཐོན་སྐྱེད་སླར་གསོ་མགྱོགས་སུ་གཏོང་རྒྱུ་དེ་ཡང་ཁ་ཚ་དགོས་གཏུག་གི་ལས་ཀ་ཞིག་རེད། ལས་འགོ་བསྐྱར་འཛུགས་དང་ཐོན་སྐྱེད་སླར་གསོ་བྱེད་སྐབས་གོམ་པ་བརྟན་བརྟན་པོའི་ངང་རིམ་བཞིན་གོང་འཕེལ་གཏོང་དགོས་པ་ལས་བྲེལ་བ་ཆེ་དྲགས་མི་རུང་། ས་ཁུལ་གྱི་དབྱེ་བ་དང་གནས་ཚུལ་མི་འདྲ་བར་དམིགས་ནས་ལྟ་དགོས་པ་ལས། གཅིག་དཔེ་བརྒྱ་འགེབས་ཀྱི་བྱེད་སྟངས་གཏན་ནས་སྤྱོད་མི་རུང་བ་དང་། ནུས་ཤུགས་ཡོད་རྒུས་ལས་འགོ་བསྐྱར་འཛུགས་དང་ཐོན་སྐྱེད་སླར་གསོ་ཡོང་ཐབས་བྱེད་དགོས།
རིམས་ནད་སྔོན་འགོག་ཚོད་འཛིན་དང་ལས་འགོ་བསྐྱར་འཛུགས་དང་ཐོན་སྐྱེད་སླར་གསོ་བྱ་རྒྱུ་དེ་རྒྱ་མའི་སྣེ་གཉིས་དང་འདྲ་བར་དོ་སྙོམས་ཡོང་བར་བློ་གྲོས་དང་ཐབས་ལ་མཁས་དགོས། དེའི་གནད་འགག་གཙོ་བོ་ནི་གཅིག་གྱུར་འཆར་འགོད་དང་ཕྱོགས་ཡོངས་ལ་ལྟ་བ། ཐབས་མང་མཉམ་དུ་སྤྱོད་པ། རིམ་པ་བཞིན་དོན་འཁྱོལ་བྱེད་དགོས་པ་བཅས་ཡིན་ལ། དེའང་རིམས་ནད་སྔོན་འགོག་ཚོད་འཛིན་དང་ད་ལོའི་དཔལ་འབྱོར་དང་སྤྱི་ཚོགས་འཕེལ་རྒྱས་དམིགས་ཚད་ཀྱི་“རྒྱལ་ཁ་གཉིས”ཀྱི་འགན་ལེན་གལ་ཆེན་ཞིག་རེད། རིམས་ནད་སྔོན་འགོག་ཚོད་འཛིན་དང་ལས་འགོ་བསྐྱར་འཛུགས་དང་ཐོན་སྐྱེད་སླར་གསོ་བྱེད་པའི་ཚོད་བགམ་ཉིས་བརྩེགས་ཀྱི་མདུན་དུ། རྒྱལ་ཡོངས་གོང་འོག་ཚང་མས་གཅིག་སེམས་གཅིག་སྒྲིལ་དང་དཔུང་པ་མཉམ་བཤིབ་བྱས་ན། མི་དམངས་མང་ཚོགས་ཀྱི་ཚེ་སྲོག་དང་རྒྱུ་ནོར་བདེ་འཇགས་སྲུང་སྐྱོབ་དེ་བཞིན་ཕྱོགས་ཡོངས་ནས་འབྱོར་འབྲིང་སྤྱི་ཚོགས་འཛུགས་སྐྲུན་ཐུབ་པར་བྱེད་པ་དང་། དབུལ་སྒྲོལ་འགག་སྒྲོལ་གྱི་དམིགས་ཚད་མངོན་འགྱུར་ཡོང་ཐུབ་པ་བཅས་ཕྱོགས་གཉིས་ཀྱི་རྒྱལ་ཁ་ཐོབ་ཐུབ།