ཞི་ཅིན་ཕིང་གིས་མུ་མཐུད་མཚོ་སྔོན་དུ་བརྟག་དཔྱད་ཞིབ་འཇུག་གནང་བ།
སྤེལ་དུས 2021-06-09
ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས།
རྩོམ་པ་པོ།
སྤྱི་ཚེས་7ཉིན་གྱི་ཕྱི་དྲོ། སྤྱི་ཁྱབ་ཧྲུའུ་ཅི་ཞི་ཅིན་ཕིང་མཚོ་སྔོན་ཧྲེང་ཡོན་ཁ་གདན་ཚོགས་པ་ཚད་ཡོད་ཀུང་སིར་ཕེབས་པ་རེད། སྤྱི་ཁྱབ་ཧྲུའུ་ཅིས་ཐོན་སྐྱེད་འཁོར་ཁང་དང་ཇུས་འགོད་སྡེ་ཁག་ཏུ་ཕེབས་ནས་ཐོན་རྫས་ཐོན་སྐྱེད་དང་ཇུས་འགོད་གནས་ཚུལ་ཐད་གཟིགས་ཞིབ་གནང་བ་རེད། ཁོང་གིས། བོད་རུམ་ནི་ཁྱད་ལྡན་ཐོན་ལས་ཡིན། ཁྱེད་ཚོས་སྲོལ་རྒྱུན་བཟོ་རྩལ་དང་དེང་རབས་བཟོ་རྩལ་ཟུང་སྦྲེལ་གང་ལེགས་བྱས་ཏེ་ཁྱད་ཆོས་ཅན་དང་སྣ་མང་ཅན་གྱི་ཁྲོམ་རའི་དགོས་མཁོ་དང་མཐུན་པར་བྱས་ཡོད། བོད་རུམ་ཐོན་ལས་ནི་མཚོ་སྔོན་གྱི་དོན་དངོས་དང་འཚམས་པའི་ཐོན་ལས་ཡིན་པ་དང་། དབུལ་སྐྱོར་ཕྱུག་འགྱུར་དང་གྲོང་གསེབ་དར་རྒྱས་ལ་སྐུལ་འདེད་གཏོང་བའི་ནུས་པ་ཡོད་ལ། མི་རིགས་མཐུན་སྒྲིལ་ཡར་ཐོན་ལ་སྐུལ་འདེད་གཏོང་བའི་ནུས་པ་ཡང་ཡོད་ཅེས་གསུངས་པ་དང་། ཞི་ཅིན་ཕིང་གིས་མཚོ་སྔོན་གྱིས་ཁྱད་ལྡན་ཐོན་ལས་འདི་རིགས་དེ་བས་མང་ཙམ་གོང་འཕེལ་གཏོང་རྒྱུ་དང་། གསར་གཏོད་ལ་བརྟེན་ནས་དེ་བས་ལེགས་པའི་གོང་འཕེལ་ཡོང་བ་བྱེད་དགོས་པའི་ཐུགས་རེ་གནང་ཡོད་པ་རེད།
དེ་རྗེས། སྤྱི་ཁྱབ་ཧྲུའུ་ཅི་ཞི་ཅིན་ཕིང་ཟི་ལིང་གྲོང་ཁྱེར་ཝུན་ཐིང་སྲང་ལམ་གྱི་སྡེ་ཁུལ་དུ་གཞི་རིམ་ཏང་འཛུགས་སྐྱོང་ལ་ཤུགས་སྣོན་རྒྱག་རྒྱུ་དང་དམངས་ལ་སྟབས་བདེ་བསྐྲུན་པའི་ཞབས་ཞུ་བསྒྲུབ་རྒྱུ་སོགས་ཀྱི་གནས་ཚུལ་ཐད་རྟོག་ཞིབ་གནང་བ་རེད། ཁོང་གིས། སྡེ་ཁུལ་ཞིག་ཡག་པོ་གཉེར་དགོས་ན་ངེས་པར་དུ་ཧ་ཅང་སྟོབས་ཆེ་བའི་ཏང་རྩ་འཛུགས་ཀྱིས་འགོ་ཁྲིད་པའི་གཞི་རིམ་རྩ་འཛུགས་ཤིག་ཡོད་དགོས་པ་དང་། སྡེ་ཁུལ་གྱི་ཕྱོགས་ཁག་གི་ཞབས་ཞུ་འཐུས་ཚང་དུ་བསྒྲུབ་རྒྱུ་དང་མང་ཚོགས་ཀྱི་རང་སྐྱོང་རང་བཞིན་གྱི་བྱ་བ་སྒྲིག་འཛུགས་ཡག་པོ་བྱེད་དགོས་ཞེས་ནན་སྟོན་གནང་བ་རེད།
སྤྱི་ཚེས་8ཉིན་གྱི་ཕྱི་དྲོ། སྤྱི་ཁྱབ་ཧྲུའུ་ཅི་ཞི་ཅིན་ཕིང་མཚོ་སྔོན་ཞིང་ཆེན་མཚོ་བྱང་བོད་རིགས་རང་སྐྱོང་ཁུལ་རྐང་ཚ་རྫོང་དུ་ཕེབས་པ་དང་། མཚོ་སྔོན་པོའི་ཁེ་རམ་ཐང་དུ་རི་བོ་ཁྲི་ལེབ་དང་མཚོ་སྔོན་པོའི་འབྱུང་ཁམས་ཁོར་ཡུག་སྲུང་སྐྱོབ་སོགས་ཀྱི་གནས་ཚུལ་ངོ་སྤྲོད་གསན་འཇོག་གནང་བ་མ་ཟད། ས་ཡུལ་དངོས་སུ་མཚོ་སྔོན་པོའི་ཁོར་ཡུག་ཕྱོགས་བསྡུས་བཅོས་སྐྱོང་དང་སྐྱེ་དངོས་སྣ་མང་རང་བཞིན་སྲུང་སྐྱོབ་ལས་དོན་གྱི་གྲུབ་འབྲས་ཐད་གཟིགས་ཞིབ་གནང་བ་རེད། དེ་རྗེས། ཞི་ཅིན་ཕིང་འོམ་ཆུ་གྲོང་རྡལ་དཀོན་ལོ་ཚང་གོང་མ་གྲོང་ཚོར་ཕེབས་ནས་བོད་རིགས་མང་ཚོགས་ལ་ཁམས་བདེའི་འཚམས་འདྲི་གནང་བ་དང་། བོད་རིགས་མང་ཚོགས་ཀྱི་ཁྱིམ་དུ་ཕེབས་ནས་ཐོན་སྐྱེད་དང་འཚོ་བའི་གནས་ཚུལ་མཁྱེན་རྟོགས་གནང་བ་རེད།
རྩོམ་སྒྲིག་པ། བདེ་སྒྲོལ།