བོད་ཀྱི་འཐུས་མི་ཚོགས་པས་ཚོགས་ཆེན་ལ་འཐུས་མིའི་གྲོས་འགོ་ཁག་6ཕུལ་བ།
སྤེལ་དུས 2018-03-16
ཡོང་ཁུངས། ཀྲུང་གོའི་བོད་ཀྱི་གསར་འགྱུར་དྲ་བ།
རྩོམ་པ་པོ། ཚེ་རིང་ཆོས་སྒྲོན།
ཚེས་14ཉིན་གསར་འགོད་པས་རྒྱལ་ཡོངས་མི་དམངས་འཐུས་ཚོགས་སྐབས་བཅུ་གསུམ་པའི་ཚོགས་འདུ་ཐེངས་དང་པོར་ཞུགས་མཁན་བོད་ཀྱི་འཐུས་མི་ཚོགས་པའི་གྲོས་གཞི་དང་གྲོས་འགོ་ཚོགས་ཆུང་ནས་ཤེས་རྟོགས་བྱས་པར། བོད་ཀྱི་འཐུས་མི་ཚོགས་པས་ཚོགས་ཆེན་ལ་འཐུས་མིའི་གྲོས་འགོ་ཁག་6ཕུལ་བའི་ནང་འཐུས་མི་ཚོགས་པའི་མིང་ཐོག་ནས་གྲོས་འགོ་ཁག་5བཏོན་པ་དང་འཐུས་མི་མི་སྒེར་གྱིས་གྲོས་འགོ་ཁག་1བཏོན་ཡོད།
འདི་ལོ་ཕུལ་བའི་གྲོས་འགོའི་ནང་རྨང་གཞིའི་སྒྲིག་བཀོད་འཛུགས་སྐྲུན་དང་། དམངས་འཚོ་འགན་ལེན་དང་ལེགས་གཏོང་། སྣོད་བཅུད་ཁོར་ཡུག་སྲུང་སྐྱོང་སོགས་ཚུད་ཡོད་པ་སྟེ། དཔེར་ན། “ཁྲོན་བོད་ཀྱི་འཐབ་ཇུས་བགྲོད་ལམ་ཆེན་པོ་འཛུགས་སྐྲུན་བྱེད་དགོས་པའི་སྐོར་གྱི་གྲོས་འགོ”དང་། “བོད་ཀྱི་སྤྱི་པའི་ཞབས་ཞུ་འཛུགས་སྐྲུན་ལ་རྒྱབ་སྐྱོར་བྱེད་ཤུགས་ཆེ་རུ་གཏོང་དགོས་པའི་གྲོས་འགོ” “བོད་རང་སྐྱོང་ལྗོངས་ཀྱི་བྱང་ཐང་རྒྱལ་ཁབ་རིམ་པའི་རང་བྱུང་སྲུང་སྐྱོང་ཁུལ་གྱི་སྣོད་བཅུད་ཕན་འབྲས་ཁ་གསབ་ཚོད་ལྟའི་ངང་སྤྲོད་དགོས་པའི་སྐོར་གྱི་གྲོས་འགོ”སོགས་རེད། བོད་ཀྱི་འཐུས་མི་ཚོགས་པའི་གྲོས་གཞི་དང་གྲོས་འགོ་ཚོགས་ཆུང་གི་འགན་འཁུར་བས་གྲོས་འགོ་དེ་དག་ནི་བརྟག་དཔྱད་ཞིབ་འཇུག་གཏིང་ཟབ་བྱས་པ་དང་ནང་མོལ་བཟོ་བཅོས་གང་ལེགས་བྱས་པའི་རྨང་གཞིའི་ཐོག་བཏོན་པ་ཞིག་ཡིན་པས་སྤུས་ཚད་མཐོ་བ་དང་། གཙོ་གནད་འབུར་དུ་ཐོན་པ། དམངས་འཚོ་དང་དམ་པོར་དམིགས་པ་བཅས་བྱས་པ་མ་ཟད། ད་དུང་ཏང་གི་ཚོགས་ཆེན་བཅུ་དགུ་པ་དང་ཐེངས་འདིའི་ཚོགས་ཆེན་གྱི་དགོངས་དོན་ལག་བསྟར་བྱས་པ་དང་། “ཕྱོགས་ལྔ་གཞི་གཅིག”གི་སྤྱིའི་བཀོད་ཇུས་དང“ཕྱོགས་ཡོངས་བཞིའི”འཐབ་ཇུས་བཀོད་ཇུས་ཀྱི་བླང་བྱ་མཚོན་པ། བོད་ཀྱི་ལས་ཀའི་དོན་དངོས་དང་ཟུང་འབྲེལ་དམ་ཟབ་བཅས་ཀྱང་བྱས་ཡོད་པས་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་ཞན་ཆ་གསབ་པ་དང་། མི་རིགས་ཁག་གི་མང་ཚོགས་ཀྱི་མཛེས་སྡུག་ལྡན་པའི་འཚོ་བའི་དགོས་མཁོ་དེ་བས་ལེགས་པའི་སྒོ་ནས་སྐོང་བ། དུས་རབས་གསར་པར་བོད་འཕེལ་རྒྱས་མྱུར་པོ་དང་ཡུན་རིང་བདེ་འཁོད་ཡོང་རྒྱུར་སྐུལ་འདེད་གཏོང་བ་བཅས་ལ་ཕན་པ་ཡོད་ཅེས་གསུངས་པ་རེད།