ཀྲུང་ཧྭའི་ཆུ་མཛོད་ཀྱི་སྣོད་བཅུད་སྲུང་སྐྱོང་ཐད་ད་ལོར་མ་དངུལ་དུང་ཕྱུར༧གཏོང་འཆར་ཡོད་པ།
སྤེལ་དུས 2018-01-16
ཡོང་ཁུངས། མཚོ་སྔོན་ཞིང་ཆེན་སྲིད་གཞུང་དྲ་བ།
རྩོམ་པ་པོ། སྒྲོལ་མས་བསྒྲིགས།
གཙང་གསུམ་ཆུ་འགོ། གཙང་གསུམ་འགོ་ཁུངས།
གསར་འགོད་པས་མཚོ་སྔོན་ཞིང་ཆེན་སྣོད་བཅུད་གཞུང་སྒྲུབ་ཁང་ནས་ཤེས་རྟོགས་བྱུང་བ་ལྟར་ན། ༢༠༡༧ལོར་གཙང་གསུམ་ཆུ་འགོའི་སྣོད་བཅུད་སྲུང་སྐྱོབ་དང་འཛུགས་སྐྱོང་གི་དུས་སྐབས་གཉིས་པའི་ལས་གཞིས་མ་དངུལ་དུང་ཕྱུར༩ཡི་འཛུགས་སྐྲུན་དམིགས་འབེན་ཡོངས་འགྲུབ་བྱས། ད་ལོར་སྲུང་སྐྱོབ་དང་འཛུགས་སྐྱོང་གི་དུས་སྐབས་གཉིས་པའི་ལས་གཞིར་མ་དངུལ་དུང་ཕྱུར༧བཏང་ནས་སྣོད་བཅུད་སྲུང་སྐྱོབ་དང་འཛུགས་སྐྱོང་ལས་གཞི་སྐོར་ཞིག་ཕྱོགས་བསྡུས་ཐོག་ལག་བསྟར་བྱས་ཏེ། གཙང་གསུམ་ཆུ་འགོའི་རྩྭ་ཆུ་མོད་པོ་ཡོང་བ་དང་། རོང་འབྲོག་པའི་ཡོང་འབབ་འཕར་སྣོན། ཀྲུང་ཧྭའི་ཆུ་མཛོད་ཀྱི་སྣོད་བཅུད་བདེ་འཇགས་སྲུང་སྐྱོང་བཅས་བྱེད་པ་ལ་རྨང་གཞི་བརྟན་པོ་འདིང་བའི་འཆར་གཞི་བཟོས་འདུག
མ་དངུལ་དུང་ཕྱུར་བདུན་པོ་དེ་གཙོ་བོ་ས་ནག་ཞན་འགྱུར་བཅོས་སྐྱོང་དང་། མི་བཟོས་ནགས་འདེབས། རི་བསྡམས་ནགས་སྐྱོང་། རྩྭ་ས་དང་ནགས་ལས་ལ་གནོད་པའི་སྐྱེ་དངོས་ཚོད་འཛིན་དང་བཀག་འགོག བྱེ་འགྱུར་འགོག་བཅོས། དེ་མིན་མིས་ཕབ་ཆར་བ། སྣོད་བཅུད་ལྟ་སྐུལ་ཚད་འཇལ། ཚན་ཞིབ་ཁྱབ་གདལ། ཚན་རྩལ་ཟབ་སྦྱོང་ལ་སོགས་ཀྱི་རྣམ་གྲངས་ཐད་བཀོལ་རྒྱུ་རེད། ད་ལོ་ནི་གཙང་གསུམ་ཆུ་འགོའི་སྣོད་བཅུད་སྲུང་སྐྱོབ་དང་འཛུགས་སྐྱོང་གི་འོས་འགན་ཆེས་ལྕི་བའི་ལོ་ཞིག་ཡིན་ལ། དུས་སྐབས་གཉིས་པའི་འཆར་འགོད་ལེགས་འགྲུབ་ཀྱི་ལོ་མཐའ་མ་ཡིན་པས། ས་གནས་ཁག་དང་སྡེ་ཚན་ཁག་གིས་དམིགས་འབེན་འོས་འགན་དང་དམིགས་འབེན་ཞིབ་དཔྱད་ལ་གཙིགས་སུ་བཟུང་ནས་ལས་གཞིའི་ཉམས་ཞན་པའི་གནད་འགག་གི་ཆ་ལ་དམ་འཛིན་དང་། དུས་མཚམས་སོ་སོར་འཐུས་ཤོར་མི་ཡོང་བར་ཐབས་རྒྱ་ཇུས་སྟོང་གིས་ལས་ཀ་སོ་སོ་མྱུར་བ་མྱུར་དུ་འགྲུབ་ཐུབ་དགོས་པ་དང་། གཙང་གསུམ་ཆུ་འགོའི་སྣོད་བཅུད་སྲུང་སྐྱོབ་དང་འཛུགས་སྐྱོང་གི་འོས་འགན་འཁུར་དུ་འཁྱེར་ཞིང་དམ་འཛིན་ནན་འཛིན་བྱེད་པ་མཐའ་འཁྱོངས་ལྷོད་མེད་བྱས་ཏེ། གཙང་གསུམ་ཆུ་འགོའི་སྣོད་བཅུད་སྲུང་སྐྱོབ་དང་འཛུགས་སྐྱོང་ལས་གཞིར་ཕན་འབྲས་གསར་བ་དང་གྲུབ་འབྲས་གསར་བ་ལོན་པར་སྐུལ་སྤེལ་བྱེད་དགོས།
གཙང་གསུམ་ཆུ་འགོ་ས་ཁུལ་གྱི་སྣོད་བཅུད་ལ་ཡུན་རིང་སྲུང་སྐྱོབ་དང་། ལས་གཞི་འཛུགས་སྐྱོང་གེགས་མེད་བདེ་བླག་ངང་འགྲུབ་པར་སྐུལ་སྤེལ་བྱེད་དགོས་ན་ཚན་རྩལ་གྱི་རམ་འདེགས་སྟོབས་དང་ལྡན་པ་དགོས། ད་ལོར་ཚན་རྩལ་གྱི་ཕྱོགས་ལ་ཤུགས་ཆེན་པོ་འདོན་རྒྱུ་སྟེ། གཙང་གསུམ་ཆུ་འགོའི་ལས་གཞི་གལ་ཆེན་གྱི་ཁྱབ་ཁོངས་ལས་གནད་འགག་གི་ཆ་སོ་སོར་དམིགས་ནས་ཚན་རིག་ཞིབ་འཇུག་བྱ་གཞི་དང་ལག་ལེན་གྱི་ཐད་ལ་ཤུགས་རྒྱབ་ནས་ཚན་ཞིབ་ཀྱི་གྲུབ་འབྲས་བརྗེ་སྒྱུར་དང་། གྲུབ་འབྲས་བེད་སྤྱོད་ཁྱབ་གདལ་བཏང་ནས་ཕན་འབྲས་འབྱུང་ཐུབ་པ་བྱ་རྒྱུ། རྒྱལ་ཁབ་ཕྱི་ནང་གི་ཚན་ཞིབ་ལས་ཁུངས་དང་། མཐོ་རིམ་སློབ་གྲྭ། རྒྱལ་སྤྱིའི་སྣོད་བཅུད་སྲུང་སྐྱོང་ཚོགས་པ་བཅས་བར་གྱི་མཉམ་ལས་ལ་ཤུགས་བསྣན་ཏེ། ཆེད་མཁས་པའི་ཕན་ནུས་འདོན་སྤེལ་གང་ལེགས་བགྱིས་ནས་གཙང་གསུམ་ཆུ་འགོར་བརྟག་དཔྱད་དང་། ཇུས་ཐབས་བཟང་བོ་བཏོན་ནས་དཀའ་གནད་སེལ་གྲོལ་བྱེད་དུ་བཅུག་ནས་སྣོད་བཅུད་སྲུང་སྐྱོབ་དང་བཅོས་སྐྱོང་གི་སྔོན་ཐོན་བསམ་བློ་དང་གསར་གཏོད་གྲུབ་འབྲས་སྣ་ཚོགས་འདི་གར་གཞི་ཚུགས་སུ་འཇུག་རྒྱུ་བཅས་གཙང་གསུམ་ཆུ་འགོའི་སྣོད་བཅུད་སྲུང་སྐྱོབ་དང་འཛུགས་སྐྱོང་ལ་ལག་རྩལ་གྱི་རམ་འདེགས་སྟོབས་དང་ལྡན་པ་ཞིག་མཁོ་འདོན་བྱེད་རྒྱུ་རེད།