མཚོ་སྔོན་འཐུས་ཚབ་ཚོགས་པས་རི་ཆུ་ནགས་གསུམ་དང་ཞིང་ས། མཚེའུ། རྩྭ་ཐང་བཅས་ཀྱི་སྐྱེ་ཁམས་སྲུང་སྐྱོབ་དང་སླར་གསོའི་ཚོད་གནས་ཁྱབ་ཁོངས་སྔར་ལས་ཆེར་བསྐྱེད་གཏོང་རྒྱུའི་གྲོས་གཞི་བཏོན།
སྤེལ་དུས 2018-03-14
ཡོང་ཁུངས། མཚོ་སྔོན་བོད་སྐད་རླུང་འཕྲིན།
རྩོམ་པ་པོ། སྒྲོལ་མས་བསྒྲིགས།
རྒྱལ་ཡོངས་དམངས་ཆེན་སྐབས་བཅུ་གསུམ་པའི་གྲོས་ཚོགས་ཐེངས་དང་པོར་ཞུགས་པའི་མཚོ་སྔོན་འཐུས་ཚབ་ཚོགས་པས། རི་ཆུ་ནགས་གསུམ་དང་ཞིང་ས། མཚེའུ། རྩྭ་ཐང་བཅས་ཀྱི་སྐྱེ་ཁམས་སྲུང་སྐྱོབ་དང་སླར་གསོའི་ཚོད་གནས་ཁྱབ་ཁོངས་སྔར་ལས་ཆེར་བསྐྱེད་གཏོང་རྒྱུའི་གྲོས་གཞི་བཏོན།
གྲོས་གཞིའི་ཁྲོད་བཤད་རྒྱུར། མཚོ་སྔོན་གྱི་རྨ་འབྲི་རྫ་གསུམ་འབྱུང་ཡུལ་དང་མདོ་ལ་རི་བོའི་ས་ཁུལ། ཚྭ་འདམ་གཞོང་ས། མཚོ་སྔོན་པོའི་བཞུར་རྒྱུན། རྨ་ཆུའི་སྟོད་རྒྱུད་ཀྱི་གཞོང་ས་བཅས་སྐྱེ་ཁམས་དུམ་མཚམས་ཆེན་མོ་ལྔས། རང་རྒྱལ་གྱི་རི་རྒྱུད་མིང་གྲགས་ཅན་དང་གཙང་བོ་གཙོ་བོ། རང་བྱུང་ཐོན་ཁུངས་འཛོམས་པོ། མི་ཆོས་ལོ་རྒྱུས་བཅས་གཅིག་བསྡུས་སྒོས་མཚོན་ཡོད་ཅིང་། དེས་མཚོ་སྔོན་ཞིང་ཆེན་གྱི་རྒྱ་ཁྱོན་ཧྲིལ་བོའི་བརྒྱ་ཆའི་དགུ་བཅུའི་ཡན་ཟིན་ཡོད་ལ། དུམ་མཚམས་སོ་སོའི་བར་དུ་ཕན་ཚུན་མཐུན་སྦྱོར་སྒོས་ཤུགས་རྐྱེན་གཏོང་གི་ཡོད་པ་དང་། དེས་མདོ་དབུས་མཐོ་སྒང་གི་ཐུན་མོང་མ་ཡིན་པའི་རི་ཆུའི་བཀོད་པ་ཁྱད་དུ་མཚར་བ་བསྐྲུན་ཡོད། མིག་སྔར། མཚོ་སྔོན་གྱི་མདོ་ལ་རི་བོའི་ས་ཁུལ་འདི་ཉིད་རྒྱལ་ཁབ་ཀྱི་ཆེས་སྔུན་མ་བྱས་ཏེ་རི་ཆུ་ནགས་གསུམ་དང་མཚེའུ། རྩྭ་ས་བཅས་ཀྱི་སྐྱེ་ཁམས་སྲུང་སྐྱོབ་དང་སླར་གསོ་བྱེད་གནས་ལ་རྒྱབ་སྐྱོར་བྱེད་པའི་ལས་གཞིའི་ཁྱབ་ཁོངས་ཁྲོད་ཚུད་ཡོད་པ་དང་། ཚོད་ལྟའི་གནས་གཞི་འདི་ཉིད་ཀྱིས་ས་ཁོངས་ནང་ཁུལ་གྱི་རང་བྱུང་སྐྱེ་ཁམས་མ་ལག་སྔར་ལས་ཇེ་བརྟན་དུ་འགྲོ་བ་དང་། མིས་བཟོས་སྐྱེ་ཁམས་མ་ལག་སྔར་ལས་བདེ་ཐང་ཅན་དུ་འཕེལ་བ། དཔལ་འབྱོར་དང་སྤྱི་ཚོགས་མ་ལག ལྗང་མདོག་འཕེལ་རྒྱས་བཅས་ཀྱི་དམིགས་ཚད་སྔར་ལས་ཇེ་ལེགས་སུ་འགྲོ་བ་བཅས་ཀྱི་ཐད་དོན་སྙིང་ཆེན་པོ་ལྡན་པར་མ་ཟད། མཚོ་སྔོན་གྱི་སྔར་ཡོད་སྐྱེ་ཁམས་སྲུང་སྐྱོབ་དང་འཛུགས་སྐྲུན་དགོས་ངེས་བཅོས་སྐྱོང་ཆིག་རྐྱང་ཅན་ནས་ཆ་ཚང་ཅན་གྱི་སྐྱེ་ཁམས་མ་ལག་སྲུང་སྐྱོབ་དང་སླར་གསོའི་ཕྱོགས་སུ་འཕེལ་བར་སྐུལ་འདེད་གཏོང་ཐུབ་ཟེར།