མཚོ་སྔོན་གྱི་འཐུས་ཚབ་ཚོགས་པས་མཚོ་སྔོན་གྱི་སྐྱེ་ཁམས་ཁ་གསབ་མ་དངུལ་གཏོང་ཤུགས་དང་སྲིད་ཇུས་ཀྱིས་རྒྱབ་སྐྱོར་བྱེད་ཤུགས་ཆེ་རུ་གཏོང་རྒྱུའི་གྲོས་གཞི་བཏོན།
སྤེལ་དུས 2018-03-20
ཡོང་ཁུངས། མཚོ་སྔོན་བོད་སྐད་རླུང་འཕྲིན།
རྩོམ་པ་པོ། སྒྲོལ་མས་བསྒྲིགས།
རྒྱལ་ཡོངས་དམངས་ཆེན་སྐབས་བཅུ་གསུམ་པའི་གྲོས་ཚོགས་ཐེངས་དང་པོར་ཞུགས་པའི་མཚོ་སྔོན་གྱི་འཐུས་ཚབ་ཚོགས་པས། སྔར་ལས་ལྷག་པའི་སྒོ་ནས་མཚོ་སྔོན་གྱི་སྐྱེ་ཁམས་ཁ་གསབ་མ་དངུལ་གཏོང་ཤུགས་དང་སྲིད་ཇུས་ཀྱིས་རྒྱབ་སྐྱོར་བྱེད་ཤུགས་ཆེ་རུ་གཏོང་རྒྱུའི་གྲོས་གཞི་བཏོན།
གྲོས་གཞིའི་ཁྲོད་བསྟན་དོན། 2010ལོ་ནས་བཟུང་། མཚོ་སྔོན་ཞིང་ཆེན་གྱིས་སྐྱེ་ཁམས་བྱེད་ནུས་ཁུལ་གཙོ་བོའི་སྤོ་སྒྱུར་གཏོང་སྤྲོད་མ་དངུལ་བཀོལ་སྤྱོད་བྱས་ཏེ་རྨ་འབྲི་རྫ་གསུམ་འབྱུང་ཡུལ་གྱི་སྐྱེ་ཁམས་ཁ་གསབ་སྲིད་ཇུས་ལག་བསྟར་བྱེད་མགོ་བརྩམས་པ་དང་། མིག་སྔའི་བར་དུ། རིགས་སོ་སོའི་སྐྱེ་ཁམས་ཁ་གསབ་སྲིད་ཇུས་མ་དངུལ་སྒོར་ཐེར་འབུམ་བཞི་དང་དུང་ཕྱུར་དྲུག་བཀོད་སྒྲིག་བྱས་ཟིན་ལ། སྲིད་ཇུས་འདི་དག་ལག་བསྟར་བྱས་པ་དེས་སྐྱེ་ཁམས་ཁོར་ཡུག་སྲུང་སྐྱོབ་ལ་སྐུལ་འདེད་བྱེད་པའི་དུས་མཉམ་དུ་ནུས་ཡོད་སྒོས་རོང་འབྲོག་མང་ཚོགས་ཀྱི་གཞི་རྩའི་འཚོ་བའི་ཆ་རྐྱེན་ལེགས་སྒྱུར་བྱས་པ་དང་། ས་ཁུལ་སོ་སོའི་སྤྱི་ཐུན་ཞབས་ཞུའི་གཞི་རྩའི་ནུས་པ་མཐོར་འདེགས་བྱས། སྤྱིའི་ཆ་ནས་བལྟས་ན། མཚོ་སྔོན་ཞིང་ཆེན་གྱི་སྐྱེ་ཁམས་སྲུང་སྐྱོབ་ཀྱི་ཁ་གསབ་ཁྱབ་ཁོངས་སྔར་བཞིན་ཆུང་བ་དང་ཚད་གཞི་དམའ་བར་མ་ཟད། སྲུང་སྐྱོབ་པ་དང་ཕན་པ་ཐོབ་མཁན་གྱི་ཕན་ཚུན་སྐུལ་ཁྲིད་བྱེད་པའི་སྒྲིག་སྲོལ་དང་རྐྱེན་སྲོལ་ད་དུང་འཐུས་ཚང་མིན་པ་དེ་སྣ་མང་ཅན་གྱི་ཁ་གསབ་བྱེད་ཐབས་ད་དུང་ཆགས་མེད་པའི་སྟེང་ནས་མངོན་གསལ་འབུར་ཐོན་ཡིན་པ་དང་། ཁ་གསབ་འབྲེལ་བ་དེ་ཀྲུང་དབྱང་ནས་གོང་འོག་ཁ་གསབ་བྱེད་པ་གཙོ་བོ་ཡིན་ལ། མ་དངུལ་ཡོང་ཁུངས་སྣ་གཅིག་ཡིན་པ་དང་། ཁ་གསབ་མ་ལག་ད་དུང་འཐུས་ཚང་མིན་པ། ཁ་གསབ་ཁྱབ་ཁོངས་དང་ཁེབས་ཚད་ཆུང་བ། ཁ་གསབ་ཚད་གཞི་དམའ་བ། རྒྱུན་མཐུད་བརྟན་འཇགས་ཀྱི་གྲོན་དངུལ་ཡོང་ཁུངས་མེད་པ་རེད།
དེ་བས། མཚོ་སྔོན་གྱི་འཐུས་ཚབ་ཚོགས་པས་མུ་མཐུད་དུ་མཚོ་སྔོན་ཞིང་ཆེན་གྱི་སྐྱེ་ཁམས་བྱེད་ནུས་ཁུལ་གཙོ་བོའི་སྤོ་སྒྱུར་གཏོང་སྤྲོད་ཤུགས་ཚད་ཇེ་ཆེར་བཏང་སྟེ། སྐྱེ་ཁམས་སྤྱི་ཕན་དོ་དམ་སྲུང་སྐྱོབ་ལས་གནས་ལ་ཆེད་སྤྱོད་ཁ་གསབ་རོགས་དངུལ་སྟེར་བ་དང་། ཀྲུང་དབྱང་གི་སྐྱེ་ཁམས་ཁ་གསབ་སྲིད་ཇུས་འཐུས་ཚང་དུ་བཏང་སྟེ། འཚོལ་ཞིབ་དང་ཞིབ་འཇུག་བྱས་ནས་ཁ་གསབ་རྐྱེན་སྲོལ་གསར་བ་ཞིག་འཛུགས་སྐྲུན་བྱེད་རྒྱུའི་གྲོས་གཞི་བཏོན།