སྟོབས་ཤུགས་གཅིག་སྒྲིལ་གྱིས་བོད་རིགས་ས་ཁུལ་གྱི་གནད་སྨིན་དབུལ་སྐྱོར་ལ་རམ་འདེགས་གསར་བ་བསྣན།
སྤེལ་དུས 2018-07-13
ཡོང་ཁུངས། ཀྲུང་གོའི་བོད་ལྗོངས་དྲ་བ།
རྩོམ་པ་པོ། བྱམས་པས་བསྒྱུར།
ཀྲུང་གོའི་བོད་ལྗོངས་དྲ་བའི་འཕྲིན། ཟླ་7ཚེས་12ཉིན། “སེམས་མཐུན། ཀྲུང་གོའི་སེམས་པ་མཉམ་གཏོད་”སྤྱི་ཕན་སྨན་བཅོས་བྱེད་སྒོའི་ཆེ་གྲས་སྤེལ་ནས་ལོ་བཅུ་འཁོར་བའི་སྐབས་སུ། ཀྲུང་ཧྭ་གསོ་རིག་སློབ་ཚོགས་ཀྱིས་གྲོས་འགོ་བཏོན་པ་དང་། པུའུ་ཁྲང་སྨན་རྫས་བཟོ་གྲྭས་ཞལ་འདེབས་ཕུལ་ནས་བཙུགས་པའི་“ཀན་ལྷོ་ཀླུ་ཆུ་ནད་ཀྱིས་རྐྱེན་པས་ཡང་བསྐྱར་དབུལ་བོ་གྱུར་པར་རོགས་སྐྱོབ་ཀྱི་ཐེབས་རྩའི་”སྒོ་བྱང་བཀལ་བ་དང་ཞལ་འདེབས་བསྡུ་བའི་བྱེད་སྒོ་དེ། ཀན་སུའུ་ཞིང་ཆེན་ཀན་ལྷོ་བོད་རིགས་རང་སྐྱོང་ཁུལ་ཀླུ་ཆུ་རྫོང་མི་དམངས་ཚོགས་ཁང་དུ་འཚོགས།
པུའུ་ཁྲང་སྨན་རྫས་བཟོ་གྲྭས་རོགས་སྐྱོབ་ཐེབས་རྩར་ཞལ་འདེབས་སྒོར་ཁྲི་30ཕུལ།
པུའུ་ཁྲང་སྨན་རྫས་བཟོ་གྲྭའི་མཐོ་རིམ་སྤྱི་དཔོན། “སེམས་མཐུན། ཀྲུང་གོའི་སེམས་པ་མཉམ་གཏོད་”སྒྲིག་འཛུགས་ཨུ་ལྷན་གྱི་ལག་བསྟར་དྲུང་ཆེ་ཀྲེན་ཧུང་པིང་གིས་བརྗོད་རྒྱུར། ཀླུ་ཆུ་རྫོང་ནི་ཀན་ལྷོ་བོད་རིགས་རང་སྐྱོང་ཁུལ་གྱི་ཆེས་ཆུང་བ་དང་། ནད་ཀྱིས་རྐྱེན་པས་ཡང་བསྐྱར་དབུལ་བོ་གྱུར་བའི་བསྡུར་ཚད་མཐོ་ཤོས་ཀྱི་རྫོང་ཞིག་ཡིན། དེར་བརྟེན་མིག་སྔར་རོགས་སྐྱོབ་ཐེབས་རྩས་ཀླུ་ཆུ་རྫོང་ཚོད་ལྟ་བྱ་ཡུལ་དུ་བརྩིས་ནས། རྒྱུན་མཐུད་ཀྱི་མ་དངུལ་གྱིས་ཁ་སྣོན་བྱ་འཆར་ཡོད། “མ་དངུལ་འདིས་ནད་གཞི་རྐྱེན་པས་སླར་ཡང་དབུལ་བོ་ཆགས་པའི་ཁྱིམ་ཚང་གི་ཐོལ་བྱུང་གནས་ཚུལ་ཏེ། ཁྱིམ་ཚང་གི་ཁོངས་མི་གློ་བུར་དུ་ནད་བྱུང་བ་དང་དེ་བཞིན་རང་བྱུང་གནོད་འཚེ་བྱུང་བ་ལ་གཞོགས་འདེགས་ཀྱི་ཁ་གཏད་གཅོག་ཐུབ་པའི་རེ་བ་བྱེད།”ཀྲེན་ཧུང་པིང་གིས་བརྗོད་རྒྱུར། “སྤྱི་ཚོགས་ཀྱི་ལས་རིགས་ཁག་གིས་ཀླུ་ཆུ་རྫོང་གི་དབུལ་སྒྲོལ་འགག་སྒྲོལ་དང་བདེ་ཐང་དབུལ་སྐྱོར་ལ་སེམས་ཁུར་རོགས་འདེགས་བྱེད་བཞིན་ཡོད། ཁྱིམ་གཅིག་ལ་ནད་བྱུང་ཚེ་རྫོང་ཡོངས་ཀྱི་རོགས་སྐྱོར་དང་། སྤྱི་ཚོགས་ཡོངས་ཀྱི་རོགས་རམ་ཐོབ་ཐུབ་པ་ཞིག་ང་ཚོས་སྒྲུབ་དགོས། ནད་ཀྱི་རྐྱེན་པས་ཡང་བསྐྱར་དབུལ་པོ་གྱུར་པའི་གནད་དོན་ནི་གནད་དོན་ཞིག་མ་ཡིན་པ་མངོན་འགྱུར་དགོས།”
ཀྲུང་ཧྭ་གསོ་རིག་སློབ་ཚོགས་ཀྱི་ཚོགས་གཙོ་གཞོན་པ། པེ་ཅིང་གསོ་རིག་སློབ་ཚོགས་ཀྱི་ཚོགས་གཙོ། “སེམས་མཐུན། ཀྲུང་གོའི་སེམས་པ་མཉམ་གཏོད་”སྒྲིག་འཛུགས་ཨུ་ཡོན་ལྷན་ཁང་གི་ལག་བསྟར་ཀྲུའུ་ཞི་ཅིན་ཏཱ་ཕིང་གིས་བརྗོད་རྒྱུར། ཐེབས་རྩ་འདིའི་དམིགས་ཡུལ་ནི་“སེམས་མཐུན། ཀྲུང་གོའི་སེམས་པ་མཉམ་གཏོད་”ཀྱི་སྤྱི་ཕན་སྙིང་སྟོབས་སྔར་བས་དོན་འཁྱོལ་བྱས་ཏེ། ཀན་ལྷོ་ཀླུ་ཆུའི་དབུལ་སྒྲོལ་འགག་སྒྲོལ་དང་བདེ་ཐང་དབུལ་སྐྱོར་གྱི་ལས་དོན་ལ་སྐུལ་འདེད་གཏོང་དགོས།
བྱེད་སྒོ་སྤེལ་བའི་ཉིན་དེར། “སེམས་མཐུན། ཀྲུང་གོའི་སེམས་པ་མཉམ་གཏོད་”ཀན་ལྷོར་བསྐྱོད་པའི་སྨན་བཅོས་ཆེདམཁས་དང་བླངས་པ། གཅེས་སེམས་མི་སྣ། སྨྱན་སྦྱོར་དང་བླངས་པ་བཅས་མི་སྣ་ཁག་གཅིག་དང་། ས་གནས་དེ་གའི་ལས་བྱེད་ལས་བཟོ་བ། སློབ་གྲྭ་འབྲིང་ཆུང་གི་སློབ་མ་སོགས་མི་1200ལྷག་ཙམ་གྱིས་ཧུར་ཐག་གིས་ཞལ་འདེབས་གནང་། ཡུལ་དངོས་སུ་ཞལ་འདེབས་གནང་བའི་མ་དངུལ་སྒོར་ཁྲི་6ལྷག་ཙམ་ཟིན།