མཚོ་སྔོན་པོའི་མཛེས་ལྗོངས་ཁུལ་དེ་རིང་ནས་བསྐྱར་དུ་སྒོ་ཕྱེས་པ།
སྤེལ་དུས 2020-02-28
ཡོང་ཁུངས། མི་དམངས་དྲ་བ།
རྩོམ་པ་པོ།
ཟླ་2ཚེས་25ཉིན《མཚོ་སྔོན་ཞིང་ཆེན་གྱི་ཏོག་གསར་གློ་ཚད་རིམས་ནད་ཁུལ་རིམ་དབྱེ་གནད་སྨིན་ཇུས་འདོན་ལས་དོན་ཇུས་གཞི་པར་འགྲེམས་བྱ་རྒྱུའི་སྐོར་གྱི་མཚོ་སྔོན་ཞིང་ཆེན་མི་དམངས་སྲིད་གཞུང་གི་བརྡ་ཐོ》ཡི་དགོངས་དོན་ལ་གཞིགས་ནས། རིམས་ནད་སྔོན་འགོག་ཚོད་འཛིན་དང་དཔལ་འབྱོར་དང་སྤྱི་ཚོགས་འཕེལ་རྒྱས་ལས་དོན་ལེགས་སྒྲུབ་གཅིག་གྱུར་བྱེད་པ་དང་། དོན་དངོས་དང་ཟུང་འབྲེལ་བྱས་ནས་མཚོ་སྔོན་པོའི་མཛེས་ལྗོངས་ཁུལ་སྲུང་སྐྱོང་བེད་སྤྱོད་དོ་དམ་ཅུས་ཀྱིས་མཚོ་སྔོན་པོའི་མཛེས་ལྗོངས་ཁུལ་བསྐྱར་དུ་སྒོ་འབྱེད་པའི་སྐོར་གྱི་སྤྱི་བསྒྲགས་སྤེལ་ཏེ། ཟླ་2ཚེས་26ཉིན་ནས་བཟུང་མཚོ་སྔོན་པོའི་མཛེས་ལྗོངས་ཁུལ་བསྐྱར་དུ་སྒོ་འབྱེད་རྒྱུ་དང་། ཉིན་རེའི་སྒོ་འབྱེད་དུས་ཚོད་8:00ནས་16:00བར་ཡིན་པ་དང་། སླར་གསོ་བྱས་པའི་གཉེར་སྐྱོང་ཁྱབ་ཁོངས་ནི་མཚོ་སྔོན་པོའི་གླང་ཆེན་མཆེ་བ་ལྗོངས་ཁུལ་དང་། མཚོ་སྔོན་པོའི་མགྲོན་ཁང་། མཛེས་ལྗོངས་ཁུལ་གྱི་རླངས་འཁོར་འཇོག་ས་བཅས་ཡིན། མཛེས་ལྗོངས་ཁུལ་གྱི་ཡུལ་སྐོར་བའི་འགྲུལ་བཞུད་ཀྱི་ཚད་ནི་མཛེས་ལྗོངས་ཁུལ་གྱི་ཉིན་རེའི་ཐེག་ཚད་ཀྱི་10%ལས་བརྒལ་མི་རུང་ཞིང་། རིམས་ནད་སྔོན་འགོག་ཚོད་འཛིན་གྱི་གནས་ཚུལ་དངོས་ལ་གཞིགས་ནས་ལེགས་སྒྲིག་བྱ་རྒྱུ་ཡིན།
ངོ་སྤྲོད་བྱས་པར་གཞིགས་ན། མིག་སྔར་ཚོགས་པ་དང་རང་དགར་ཡུལ་སྐོར་བ་ཀུན་ལ་དྲ་ཐོག་ནས་འཛིན་བྱང་སྔོན་མངགས་བྱེད་པའི་ལམ་ལུགས་ལག་བསྟར་བྱས་ཡོད་པ་དང་། འཛིན་བྱང་ཉོ་སྐབས་བླང་བྱ་ལྟར་“རིམས་ནད་སྔོན་འགོག་ཚོད་འཛིན་གྱི་ལམ་ཐིག་འདྲི་རྩད་ལས་རོགས”ཀྱི་རྩ་གཉིས་ཨང་རྟགས་དང“ཡིད་རྟོན་མཚོ་སྔོན”གྱི་བདེ་ཐང་ཨང་རྟགས་བཤར་འབེབས་བྱ་དགོས་པ་དང་། བཤར་འབེབས་བྱས་འབྲས་ཐོན་རྗེས། 《རིམས་ནད་སྔོན་འགོག་ཚོད་འཛིན་གྱི་ཡུལ་སྐོར་བའི་ཆ་འཕྲིན་ཐོ་འགོད་རེའུ་མིག》བྲིས་ཏེ་དངོས་མིང་ལམ་ལུགས་ཀྱི་འཛིན་བྱང་ཉོ་བ་དང་། འབྲེལ་ཐུག་མི་བྱུང་བ་དང་རྗེས་འདེད་ཆོག་པའི་འགྲོ་འོང་ཐོ་འགོད་ཐུབ་པར་བྱ་དགོས། འཛིན་བྱང་སྔོན་མངགས་བྱེད་སའི་ཁ་པར་ཨང་གྲངས་0971-8068826དང་ཡང་ན་18297175893ཡིན།
གླེང་རིན་ཡོད་པ་ཞིག་ལ། སྤྱི་བསྒྲགས་སྤེལ་ཉིན་ནས་2020ལོའི་ཟླ་12ཚེས་31ཉིན་བར། རྒྱལ་ཡོངས་ཀྱི་སྨན་དོན་ལས་དོན་པ་ཡོངས་ཀྱིས་རང་ཉིད་ཀྱི་ཐོབ་ཐང་ལག་ཁྱེར་དང་དེ་བཞིན་སྨན་དོན་དང་འབྲེལ་བའི་ལས་གཉེར་ཐོབ་ཐང་ལག་ཁྱེར་འཁྱེར་ནས་ཐོ་འགོད་བྱས་རྗེས། འཛིན་བྱང་མི་དགོས་པར་མཛེས་ལྗོངས་ཁུལ་དུ་འགྲོ་ཆོག་པ་དང་མཛེས་ལྗོངས་ཁུལ་དུ་འཛུལ་སའི་མྱུར་བགྲོད་འགྲོ་ལམ་ལོངས་སུ་སྤྱོད་ཆོག་པ་དང་། ཞག་སྡོད་བྱེད་མཁན་གྱིས་ཚོགས་པའི་གྲོས་མཐུན་གྱི་རིན་གོང་ལོངས་སུ་སྤྱོད་ཆོག་པ་རེད། ཧུའུ་པེ་ནས་ཡིན་པའི་སྨན་དོན་མི་སྣ་དང་ས་གནས་ཁག་གི་ཝུའུ་ཧན་དུ་རོགས་སྐྱོར་བྱེད་མཁན་སྨན་དོན་མི་སྣར་རང་ཉིད་ཀྱི་ཐོབ་ཐང་ལག་ཁྱེར་དང་། སྨན་དོན་དང་འབྲེལ་ཡོད་ལས་གཉེར་ཐོབ་ཐང་ལག་ཁྱེར། འབྲེལ་ཡོད་དཔང་ཡིག་བཅས་ཡོད་ན། མཉམ་དུ་ཡོང་བའི་བཟའ་ཟླ་དང་། བུ་ཕྲུག ཕ་མ་བཅས་ཀྱིས་ལག་ཁྱེར་ནུས་ལྡན་ལ་བརྟེན་ནས་འཛིན་བྱང་མི་དགོས་པར་མཛེས་ལྗོངས་ཁུལ་དུ་འགྲོ་ཆོག་པ་དང་། མཛེས་ལྗོངས་ཁུལ་དུ་འཛུལ་སའི་མྱུར་བགྲོད་འགྲོ་ལམ་སྤྱོད་ཆོག ལྟ་སྐོར་རླངས་འཁོར་གྱི་འཛིན་བྱང་མི་དགོས་པ་དང་། ཞག་སྡོད་བྱེད་ན་ཚོགས་པའི་གྲོས་མཐུན་གྱི་རིན་གོང་ལོངས་སུ་སྤྱོད་ཆོག་པ་རེད།
རྩོམ་སྒྲིག་པ། སངས་སྐྱབས།