ཞི་ཅིན་ཕིང་གིས་འཛམ་གླིང་སྤྱི་པའི་ཚན་རིག་བྱང་ཚད་ཡར་སྐུལ་ཚོགས་ཆེན་ལ་རྟེན་འབྲེལ་ཞུ་བའི་འཕྲིན་ཡིག་བསྐུར།
སྤེལ་དུས 2018-09-18
ཡོང་ཁུངས། མཚོ་སྔོན་བོད་སྐད་རླུང་འཕྲིན།
རྩོམ་པ་པོ། སངས་སྐྱབས་ཀྱིས་བསྒྲིགས།
ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། འཛམ་གླིང་སྤྱི་པའི་ཚན་རིག་བྱང་ཚད་ཡར་སྐུལ་ཚོགས་ཆེན་ཚེས་བཅུ་བདུན་ཉིན་པེ་ཅིན་ནས་ཚོགས། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཚོགས་ཆེན་ལ་རྟེན་འབྲེལ་ཞུ་བའི་འཕྲིན་ཡིག་བསྐུར།
ཞི་ཅིན་ཕིང་གིས་བསྟན་དོན། ཚན་རིག་ལག་རྩལ་ནི་ཐོན་སྐྱེད་ནུས་ཤུགས་དང་པོ་ཡིན་ལ། གསར་གཏོད་ནི་འཕེལ་རྒྱས་ལ་ཁྲིད་སྟོན་བྱེད་པའི་སྒུལ་ཤུགས་དང་པོ་ཡིན། དེང་སྐབས། འཛམ་གླིང་གི་སྐོར་ཐེངས་གསར་པའི་ཚན་རྩལ་གསར་བརྗེ་ཡར་སྐྱེད་དང་དར་རྒྱས་བྱུང་ནས། འཛམ་གླིང་འཕེལ་རྒྱས་ཀྱི་རྣམ་པར་ཤན་ཤུགས་ཟབ་མོ་ཐེབས་བཞིན་པ་དང་། མིའི་རིགས་ཀྱི་ཐོན་སྐྱེད་འཚོ་བའི་རྣམ་པར་འགྱུར་ལྡོག་ཆེན་པོ་འབྱུང་དུ་འཇུག་བཞིན་ཡོད། ཚན་རྩལ་ཐོན་ལས་ལས་རིགས་དང་སྤྱི་ཚོགས་ལས་རིགས་སོ་སོའི་མཐུན་སྦྱོར་གསར་གཏོད་ལ་ཤུགས་བསྣན་ནས། རྒྱལ་ཁབ་སོ་སོའི་སྒོ་འབྱེད་མཉམ་ལས་ལ་ཡར་སྐུལ་བྱེད་པ་ནི། ཚན་རྩལ་འཕེལ་རྒྱས་ཀྱིས་མིའི་རིགས་ཀྱི་སྤྱི་ཚོགས་གོང་འཕེལ་ཐད་ནུས་པ་སྔར་ལས་ཆེན་པོ་འདོན་དུ་འཇུག་པའི་ཐབས་ལམ་གལ་ཆེན་ཡིན་ཟེར།
ཞི་ཅིན་ཕིང་གིས་ནན་གྱིས་བསྟན་དོན། ཀྲུང་གོས་ཚན་རིག་ཁྱབ་གདལ་དུ་བཏང་ནས། རྒྱ་ཆེའི་མི་དམངས་ཀྱི་ཚན་རིག་རིག་གནས་བྱང་ཚད་རྒྱུན་ཆད་མེད་པར་ཇེ་མཐོར་གཏོང་བར་ཧ་ཅང་མཐོང་ཆེན་བྱེད་བཞིན་ཡོད། ཀྲུང་གོས་ཧུར་ཐག་གིས་འཛམ་གླིང་གི་རྒྱལ་ཁབ་སོ་སོའི་བར་དུ་ཚན་རིག་ཁྱབ་གདལ་བརྗེ་རེས་བྱེད་པ་དང་། མི་དམངས་ཀྱི་ཚན་རིག་བྱང་ཚད་ཇེ་མཐོར་སོང་བའི་ཉམས་མྱོང་དང་བྱེད་ཐབས་མཉམ་སྤྱོད་བྱས་ཏེ། འཕེལ་རྒྱས་ཀྱི་གྲུབ་འབྲས་མཉམ་སྤྱོད་བྱེད་པ་དང་དར་རྒྱས་ཀྱི་འཛམ་གླིང་མཉམ་བསྐྲུན་བྱེད་པར་སྐུལ་འདེད་གཏོང་ངེས་ཡིན། སྐུ་མགྲོན་རྣམ་པས་ཐེངས་འདིའི་ཚོགས་ཆེན་གྱི་སྐབས་སུ་ཚན་རིག་ཤེས་བྱ་ཁྱབ་གདལ་དུ་གཏོང་བ་དང་། ཚན་རིག་དགོངས་དོན་དར་སྤེལ་བྱེད་པ། ཚན་རིག་དགོངས་པ་བརྒྱུད་སྤེལ་བྱེད་པ་དང་། ཚན་རིག་བྱེད་ཐབས་དར་སྤེལ་བྱེད་པ་བཅས་ཀྱི་ཐད་ནས་ཕན་ཚུན་བརྗེ་རེས་དང་སློབ་སྦྱོང་བྱས་ཏེ། སྤྱི་པའི་ཚན་རིག་བྱང་ཚད་ཇེ་མཐོར་གཏོང་བ་དང་། ཚན་རིག་ཕན་འབྲས་མཉམ་སྤྱོད་བྱེད་པར་ཡར་སྐུལ་བྱེད་པ། མིའི་རིགས་ཀྱི་ལས་སྐལ་གཅིག་འབྲེལ་ཐུན་མོང་ཚོགས་པ་འཛུགས་པར་སྐུལ་འདེད་གཏོང་བ་བཅས་ཀྱི་ཐད་བྱས་རྗེས་འཇོག་རྒྱུ་ནི་རེ་བ་ཡིན་ཟེར།