ཞིང་ལས་དང་གྲོང་གསེབ་པུས་བྱ་ཐབས་ཆེན་པོ་དྲུག་ལག་བསྟར་བྱས་ནས་འབྲི་ཆུའི་ཆུ་ནང་སྐྱེ་དངོས་ལ་སྲུང་སྐྱོབ་བྱས་པ།
སྤེལ་དུས 2018-10-19
ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལུས་ཁུངས།
རྩོམ་པ་པོ། ཚེ་རིང་གིས་བསྒྲིགས།
རྒྱལ་སྲིད་སྤྱི་ཁྱབ་ཁང་གཞུང་ལས་ཐིང་གིས་ཉིན་ཤས་གོང་འབྲི་ཆུའི་ཆུ་ནང་སྐྱེ་དངོས་སྲུང་སྐྱོབ་ལས་དོན་ལ་ཤུགས་སྣོན་སྔར་ལས་ལྷག་པ་རྒྱག་རྒྱུའི་སྐོར་གྱི་བསམ་འཆར་པར་འགྲེམས་བྱས་ཡོད། རྒྱལ་སྲིད་སྤྱི་ཁྱབ་ཁང་གསར་འགྱུར་གཞུང་ལས་ཁང་གིས་སྤྱི་ཚེས་༡༧ཉིན་ཁྱབ་བསྒྲགས་ཚོགས་འདུ་འཚོགས་ཏེ་བསམ་འཆར་གྱི་ནང་དོན་ལ་འགྲེལ་བཤད་བྱས་ཡོད།
བསམ་འཆར་ནང་། སྤྱི་ལོ་༢༠༢༠ལོར་སླེབས་དུས་འབྲི་ཆུ་རྒྱུག་ཁུལ་གྱི་ཆུ་ཁོངས་གཙོ་བོར་ཉ་འཛིན་མི་ཆོག་པའི་བཀའ་བཏང་ཡོད། གསར་འགོད་པས་བཏོན་པའི་ཉ་པའི་ཁེ་ཕན་འགན་ལེན་གང་འདྲ་བྱེད་དགོས་པའི་དྲི་བར་ཞིང་ལས་དང་གྲོང་གསེབ་པུའི་པུའུ་ཀྲང་གཞོན་པ་ཡུས་ཁང་ཀྲེན་གྱིས། ཕྱོགས་གཅིག་ནས་འབྲི་ཆུ་རྒྱུག་ཁུལ་གྱི་གཙོ་གནད་ཆུ་ཁོངས་སུ་ཉ་འཛིན་མི་ཆོག་པར་ཁ་གསབ་ལམ་ལུགས་འཛུགས་རྒྱུ་དང་། ཕྱོགས་གཞན་ཞིག་ནས་ཆུ་ནང་ཐོན་རྫས་ཀྱི་བདེ་ཐང་གསོ་ཚགས་ལ་སྐུལ་འདེད་བཏང་ནས་རྒྱལ་ཡོངས་མི་དམངས་ཀྱི་ཆུ་ནང་ཐོན་རྫས་ཀྱི་འཛད་སྤྱོད་དགོས་མཁོ་སྐོང་རྒྱུ་རེད་ཅེས་བསྟན་ཡོད།
བསམ་འཆར་ནང་། སྐྱེ་འཕེལ་གློད་གཏོང་བྱེད་སྒོའི་ཐད་གཏན་འབེབས་ཞིབ་ཕྲ་བཟོས་ཡོད། གྲོང་གསེབ་དང་ཞིང་ལས་པུའི་འབྲི་ཆུ་རྒྱུག་ཁུལ་ཉ་ལས་སྲིད་འཛིན་ལྟ་སྐུལ་དོ་དམ་གཞུང་ལས་ཁང་གི་ཀྲུའུ་རེན་མ་དབྱིས་ནས་ངོ་སྤྲོད་གནང་བར། གློད་གཏོང་ནི་ཆེད་ལས་རང་བཞིན་དང་ལག་རྩལ་རང་བཞིན་ཆེ་བའི་ལས་དོན་ཞིག་ཡིན་པས་ཚན་རིག་དང་མཐུན་པའི་གློད་གཏོང་བྱེད་དགོས། སྤྱི་ལོ་༢༠༡༥ལོ་ནས་༢༠༡༧ལོ་བར། འབྲི་ཆུ་རྒྱུག་ཁུལ་དུ་རིམ་རྩིས་བྱས་ན་སྐྱེ་དངོས་རིགས་དུང་ཕྱུར་༡༢༩དང་བྱེ་བ་གསུམ་ཟིན་པ་དང་། རྩ་ཆེའི་དམིགས་བསལ་གྱི་སྐྱེ་དངོས་རིགས་༣༤༡༤ཟིན་པ་དེས་ཚད་གཞི་ངེས་ཅན་ཞིག་གི་ཐོག་ནས་བརྗོད་ན་སྐྱེ་འཕེལ་གྱི་མ་རྒྱུ་དང་སྐྱེ་དངོས་ཐོན་ཁུངས་ཁ་གསབ་ཐུབ་པ་དང་། སྟོངས་ལ་ཉེ་བའི་སྐྱེ་དངོས་ཀྱི་གྲངས་འབོར་ཉུང་དུ་འགྲོ་ཚུལ་བཀག་འགོག་ཐུབ་ཡོད་ཅེས་བསྟན་ཡོད་པ་རེད།