བོད་ལྗོངས་རྟེན་མཛོད་ཁང་དུ་ཤིང་ཏ་ལའི་ལོ་མའི་ཆོས་དཔེ་ཞིབ་འཇུག་མཁས་པ་ཚེ་དབང་འགྱུར་མེད(གཡས)དང་ལས་གྲོགས་ཚོས་ཤིང་ཏ་ལའི་ལོ་མའི་ཆོས་དཔེའི་མ་ཡིག་ལ་ཞིབ་འཇུག་གནང་བཞིན་པ།
“ཤིང་ཏ་ལའི་ལོ་མའི་ཆོས་དཔེ་འདྲི་འཚོལ་གྱི་བགྲོད་ལམ་ནི་ཤིན་ཏུ་རྒྱུན་རིང་ཞིང་། ཆོས་དཔེ་དེ་རིགས་ཀྱི་ཆག་རོ་ཙམ་ཡང་དོར་མི་རུང”ཞེས་པ་འདི་ནི་ཚེ་དབང་འགྱུར་མེད་ཀྱིས་རྒྱུན་དུ་གླེང་པའི་སྐད་ཆ་རེད།
དེ་སྔོན་ཚེ་དབང་འགྱུར་མེད་ཀྱིས་བོད་ལྗོངས་ཀྱི་ཤིང་ཏ་ལའི་ལོ་མའི་ཆོས་དཔེ་སྲུང་སྐྱོབ་འགོ་ཁྲིད་ཚོགས་ཆུང་གཞུང་སྒྲུབ་ཁང་གི་ཀྲུའུ་རེན་གྱི་འགན་བཞེས་མྱོང་། ད་ལོའི་ལོ་འགོར་ལོ་རྒན་པོའི་དབང་གིས་ཁོང་ཉིད་དགའ་ཞེན་ཆེ་བའི་ཤིང་ཏ་ལའི་ལོ་མའི་ཆོས་དཔེ་ལས་དོན་ལས་ཕྱིར་བུད་མོད། གསར་འགོད་པས་ལོ་ངོ༦རིང་གི་ཤིང་ཏ་ལའི་ལོ་མའི་ཆོས་དཔེ་འདྲི་འཚོལ་གྱི་བགྲོད་ལམ་སྐོར་གླེང་དུས། དགུང་གྲངས་བདུན་ཅུར་བཞེས་པའི་རྒན་པོ་ཁོང་ཉིད་ཀྱིས་གསལ་ཆ་ལྡན་པའི་ངང་ངོ་སྤྲོད་ལྷུག་ལྷུག་གནང་བྱུང་།
ཤིང་ཏ་ལའི་ལོ་མའི་ཆོས་དཔེ་ནི་ཤོག་བུ་མ་བྱུང་པའི་སྔོན་དུ་གནའ་བོའི་རྒྱ་གར་གྱི་དགེ་འདུན་པས་ནང་ཆོས་དར་སྤེལ་གཏོང་ཆེད་ཤིང་ཏ་ལའི་ལོ་མའི་སྟེང་ཆོས་ཡིག་འབྲི་བ་ཞིག་རེད། ནང་བའི་གསང་འབུམ་ནི་བགྲང་གིས་མི་ལང་ལ། ལེགས་སྦྱར་གྱི་ཤིང་ཏ་ལའི་ལོ་མའི་ཆོས་དཔེ་ནི་སྟོན་པ་ཤྰཀྱ་ཐུབ་པའི་གསུང་པའི་བཀའ་ཆོས་དངོས་ཏེ“ནང་བསྟན་གསུང་རབ”ཡིན་པར་ངོས་འཛིན་པས་ན། དེའི་རིན་ཐང་ནི་བློས་དཔོག་དཀའ་བ་ཞིག་རེད།
༢༠༠༦ལོར་རང་རྒྱལ་གྱི་སྲིད་གཞུང་གིས་གཞི་ཁྱོན་ཆེ་བའི་ཤིང་ཏ་ལའི་ལོ་མའི་ཆོས་དཔེ་འདྲི་འཚོལ་དང་། སྲུང་སྐྱོབ་ཀྱི་ལས་ཀ་འགོ་བརྩམས། ལོ་དེར། ཚེ་དབང་འགྱུར་མེད་མཆོག་བོད་ལྗོངས་སྤྱི་ཚོགས་ཚན་རིག་གླིང་གི་གླིང་གཙོའི་ལས་གནས་ལས་ངལ་གསོ་གནང་མ་ཐག་རེད། སྤྱིར་དུ་ཁྱིམ་གྱི་ལོངས་སྤྱོད་ལ་རོལ་ཆོག་པའི་ཁོང་ཉིད་ཀྱིས་ཆ་འཕྲིན་དེ་ཐོས་འཕྲལ་སྡོད་མ་ཚུགས་པར“ཤིང་ཏ་ལའི་ལོ་མའི་ཆོས་དཔེ་སྲུང་སྐྱོབ་ལ་རང་གི་ནུས་ཤུགས་ཙམ་ཕུལ་པ་ལས་རང་འགན་འདི་གཞན་ལ་དཀྲི་དགོས་དོན་མེད་པའི་བློ་སྐྱེས” །
ལོ་དེར། ཚེ་དབང་འགྱུར་མེད་ཀྱིས་ཤིང་ཏ་ལའི་ལོ་མའི་ཆོས་དཔེ་སྲུང་སྐྱོབ་འགོ་ཁྲིད་ཚོགས་ཆུང་གཞུང་སྒྲུབ་ཁང་གི་ཀྲུའུ་རེན་གྱི་འགན་བཞེས་འགོ་བརྩམས་ཤིང་། དེ་ནས་བཟུང་དངོས་སུ་ལོ་ངོ་༦རིང་དུ་ལམ་ཐག་སྤྱི་ལེ་ཁྲི༡.༧གྱི་ཤིང་ཏ་ལའི་ལོ་མའི་ཆོས་དཔེ་འདྲི་འཚོལ་གྱི་བགྲོད་ལམ་ལ་སྙེགས་པ་རེད། ཚེ་དབང་འགྱུར་མེད་ཀྱིས་སྣེ་ཁྲིད་པའི་ཁོངས་མི༧ཅན་གྱི་ཞིབ་འཇུག་ལས་དོན་ཚོགས་པས་ལྗོངས་ཡོངས་ཀྱི་རྫོང་ཁག་༤༡གི་དགོན་པ་དང་། གནའ་ཤུལ། དམངས་ཁྱིམ་བགྲང་གིས་མི་ལང་པར་ཞབས་ཀྱིས་བཅགས།
“འདྲི་འཚོལ་ལས་དོན་གྱི་ཆ་རྐྱེན་ཐབས་ཆག་ཡིན་ནའང་ཚང་མས་ལས་དེར་སྤྲོ་བ་སྐྱེས་པ་ལས་ངལ་སྣང་མི་འདུག ”ཅེས་ཚེ་དབང་འགྱུར་མེད་ཀྱིས“ལོ་ངོ༦རིང་། ང་ཚོས་ལོ་རྒྱུས་སྟེང་ལོ་ཙྰ་བ་དག་ཕེབས་མྱོང་པའི་ས་ཆ་རེ་རེ་ལེགས་སྒྲིག་བྱས་རྗེས་ཁུངས་སྣེ་ལྟར་རྩད་གཅོད་བྱས་པ་ཡིན་ལ། འདྲི་འཚོལ་ལ་ཚད་ངེས་ཅན་གྱི་སྟེང་ནས་ཕངས་སེམས་ཀྱི་ཆ་ཅུང་ཙམ་ཡང་བཞག་མེད”ཅེས་གསུངས་བྱུང་།
“ཤིང་ཏ་ལའི་ལོ་མའི་ཆོས་དཔེ་འདྲི་འཚོལ་གྱི་ལས་ནི་ཧ་ཅང་རྩག་རྩིག་ཅིག་ཡིན་ཏེ། ཆོས་དཔེ་མང་པོར་ཤོག་ངོས་ཀྱི་རིམ་པ་ནོར་བ་དང་། ཆག་སྐྱོན་ཤོར་པ། བསྐྱར་ཟློས་སོགས་ཀྱི་གནད་དོན་འདུག་པས། བརྟག་དཔྱད་དང་། བསྐྱར་བཤེར། ཞིབ་བཤེར་རྩིས་ལེན། ལེགས་སྒྲིག དཀར་ཆག་བཟོ་བ། པར་ལེན་པ་སོགས་ཀྱི་གོ་རིམ་གཅིག་ཀྱང་ཆད་མི་རུང་”ཞེས་ཚེ་དབང་འགྱུར་མེད་ཀྱིས་ལས་རིགས་འདི་ནི་དྲོ་མེད་ཆོ་མེད་ཅིག་ཡིན། དེ་ལས་ལེགས་སྦྱར་གྱི་ཡི་གེར་དཀའ་གནད་ཆེ་ཞིང་ཡིག་གཟུགས་མང་ཕྱིར། གཅིག་གཅིག་བྱས་ནས་ངོས་འཛིན་བྱེད་དགོས་པ་མ་ཟད། དཔྱད་གཞིའི་རྒྱུ་ཆ་མང་པོར་བརྟེན་ནས་བདེན་དཔང་ར་སྤྲོད་བྱེད་དགོས་ལ། ལེགས་སྦྱར་དང་བོད་ཡིག་གི་ལོ་ཙྰའི་ཁྲོད་དོགས་གཞི་མང་པོ་ཡོད་པའི་ཆ་དེར་ཁོ་ཚོས་བརྟག་དཔྱད་སྙན་ཞུ་བྲིས་ནས་ཕྱི་རབས་པ་དག་གིས་མཐོང་ཆེན་ཡོང་པར་བྱས་ཡོད་ཅེས་གསུངས།
བོད་ལྗོངས་རྟེན་མཛོད་ཁང་དུ་ཉར་པའི་དུས་རབས་བཅུ་གཅིག་པའི་ཤིང་ཏ་ལའི་ལོ་མའི་ཆོས་དཔེའི་མ་ཡིག
ཤིང་ཏ་ལའི་ལོ་མའི་ཆོས་དཔེ་འདྲི་འཚོལ་གྱི་བགྲོད་ལམ་ནི་རྒྱུན་རིང་ཞིང་སྤྲོ་སྣང་གིས་ཀུན་ཏུ་བརྟས་པ་ཞིག་རེད། “དཔེར་ན་བོད་ཀྱི་རྒྱལ་རབས༢༨པ་བཙན་པོའི་དུས་སྐབས་སུ། 《གསུང་རབ་རྩ་ཆེན》ཞིག་མཁའ་ལས་མར་མཆེད་འོངས་ནས་བོད་ཀྱི་ཕོ་བྲང་སྔ་བ་ཡུམ་བུ་བླ་མཁར་དུ་བཞུགས་པར་སྐད། ང་ཚོས་ཤིང་ཏ་ལའི་ལོ་མའི་ཆོས་དཔེ་ལས《གསུང་རབ་རྩ་ཆེན》དེ་དངོས་སུ་རྙེད་སོང་པ་མ་ཟད་པར་གཞི་མི་འདྲ་བ་ཁ་ཤས་མཐོང་སོང”ཞེས་གསུངས་བྱུང་།
ཐེངས་འདིའི་གྲུབ་འབྲས་གླེང་དུས། རྒན་པོ་ཚེ་དབང་འགྱུར་མེད་ནི་ཞལ་དགྱེས་ནས་བྱིས་པ་ཞིག་འདྲ། ཁོང་གིས“དུས་ཡུན་རིང་པོ་རྣ་ཐོས་ངག་རྒྱུད་བྱུང་པའི་ནང་པའི་ངག་རྒྱུན་དག་ར་སྤྲོད་བྱེད་ཐུབ་པ་བྱུང་པ་དེ་ནི་དངོས་གནས་སྤྲོ་སེམས་འཕེལ་བ་ཞིག་རེད། དེ་མི་ཚད། ཤིང་ཏ་ལའི་ལོ་མའི་ཆོས་དཔེ་ཁ་ཤས་སྟེང་དུ་ནང་པ་དང་འབྲེལ་བའི་གཏམ་རྒྱུད་དག་ཟིན་བྲིས་སུ་བཀོད་པ་ཧ་ཅང་འཐུས་ཚང་ཡིན་པ་མ་ཟད། ཞིབ་ཚགས་དོད་པའི་རི་མོའང་གསབ་བཀོད་ཡོད་པས། སུས་མཐོང་ཡང་ཧ་ལས་ངེས”ཞེས་གསུངས།
ལོ་ངོ་དྲུག་རིང་གི་འདྲི་འཚོལ་ལ་ད་ནི་འབྲས་བུ་སྨིན་པ་རེད། མིག་སྔར་བོད་ལྗོངས་ཀྱི་ཤིང་ཏ་ལའི་ལོ་མའི་ཆོས་དཔེའི་ལོ་མ་ཁྲི༦ལ་ཉེ་བ་དང་། ངོས་ཁྲི༡༢ལ་ཉེ་བ། རིགས༡༠༠༠ལ་ཉེ་བ་ལེགས་སྒྲིག་གནང་ཡོད་པ་དང་། མང་ཆེ་ཤོས་ཤིག་ལེགས་སྒྲིག་གནང་ནས་དཔེ་དེབ་ཏུ་བསྐྲུན་ཡོད་པ་རེད།
“ཤིང་ཏ་ལའི་ལོ་མའི་ཆོས་དཔེ་རྒྱུད་འཛིན་སྲུང་སྐྱོབ་བྱེད་པའི་ལས་ཀའི་རྒྱུན་ལྷོད་མི་རུང་”ཞེས་ཚེ་དབང་འགྱུར་མེད་ཀྱིས“མི་འགྱངས་པའི་མ་འོངས་པར། ང་ཚོར་མ་ལག་ཅན་གྱི་ཤིང་ཏ་ལའི་ལོ་མའི་ཆོས་དཔེ་རིག་པ་གྲུབ་ནས་ཐུན་མིན་རིག་གནས་སྲུང་སྐྱོབ་ལ་མཚར་སྡུག་གསར་པ་སྩོལ་དགོས་ཞེས་ཐུགས་རེ་བཏོན་བྱུང་།”