ནུབ་བྱང་དགེ་འོས་སློབ་ཆེན་གྱིས་དགེ་འོས་སློབ་མ་བགྲང་ལས་འདས་པ་བསྐྱངས་པ། གཞིས་རྩེ་གྲོང་ཁྱེར་གྱི་གཞུང་ལམ་ཐོག་རླངས་འཁོར་ཤར་གཏོང་ཐུབ་ཚད་སྤྱི་ལེ་ཁྲི་1.7ཟིན་པ། ལོ་རྒྱུས་ཡུན་རིང་ལྡན་པའི་ཞོ་ལེགས་ཀྱི་བོད་ཤོག བོད་ལྗོངས་གཞིས་རྩེས་གླུ་ལེན་གར་འཁྲབ་ཀྱིས་གནམ་ལོ་གསར་པ་བསུ་བ། ལྕགས་ལམ་སྡེ་ཁག་གིས་སྦྲེལ་མཐུད་དྲ་བ་བརྒྱུད་ནས་ཟས་རིགས་མངག་ཉོའི་ཞབས་ཞུ་རིམ་སྤོར་བྱས་ཏེ། མེ་འཁོར་མ་བསྐོར་གོང་གི་ཆུ་ཚོད་གཅིག་གི་སྔོན་དུ་མངག་ཉོ་བྱས་ཆོག་པ། ལྷ་སའི་ཚོགས་འདུ་གཉིས། ལྷ་ས་གྲོང་ཁྱེར་མི་དམངས་འཐུས་ཚོགས་སྐབས་བཅུ་གཅིག་པའི་ཚོགས་འདུ་ཐེངས་གསུམ་པར་གྲོས་གཞི་106འབྱོར། ལོ་གསར་གྱི་ཚོང་ར་འཁྲུག་ཆ་དོད་པོར་འགྱུར་བཞིན་ཡོད་པ། ཁྲོན་བོད་ལྕགས་ལམ་ལྷ་ས་ནས་ཉིང་ཁྲི་བར་གྱི་ལམ་བུའི་བསམ་གྲུབ་གླིང་ཕུག་ལམ་ཤར་བགྲོད་ཐུབ་པ། ཧྥ་རན་སེའི་ཙུང་ཐུང་མཱ་ཁེ་ལུང་གིས་དེ་རིང་ནས་བཟུང་རང་རྒྱལ་ལ་རྒྱལ་དོན་འཚམས་འདྲི་བྱེད་པ། ཚོགས་ཆེན་བཅུ་དགུ་པའི་དགོངས་དོན་བགྲོ་གླེང་འཛིན་གྲྭ་སློབ་འགོ་ཚུགས་པ།
ཀྲུང་གོའི་བོད་ལྗོངས་དྲ་བ། > ཆོས་ལུགས། > བླ་སྤྲུལ།

རྗེ་བཙུན་ཆོས་ཀྱི་རྒྱལ་པོ་ཐམས་ཅད་མཁྱེན་པ་ཀོའུ་བ་ཆོས་ཀྱི་རྒྱ་མཚོའི་རྣམ་ཐར་ཚིགས་བཅད་མ་བཞུགས་སོ།།

སྤེལ་དུས 2018-01-23 ཡོང་ཁུངས། ཀྲུང་གོའི་བོད་ལྗོངས་དྲ་བ། རྩོམ་པ་པོ། ཤར་སྐལ་ལྡན་རྒྱ་མཚོ།
            ཀུན་བཟང་ཀུན་གྱི་རང་བཞིན་ཆོས་ཀྱི་དབྱིངས།། གང་ཐུགས་གང་གིས་མཉམ་པར་བཞག་པའི་ཚེ།། སྟོང་སང་སྟོང་བའི་ངང་དུ་ལེགས་འཆར་བའི།། བླ་མེད་བླ་མ་རྒྱ་མཚོས་བདག་སྐྱོངས་ཤིག ། བླ་མའི་འཁྲུངས་ཡུལ་གངས་ཅན་ཤར་གྱི་ཕྱོགས།། མདོ་སྨད་ཁྲི་ཀའི་ཨར་རྐོང་ས་ཆ་རུ།། བསོད་ནམས་རིན་ཆེན་པདྨ་མཚོ་གཉིས་ཀྱི།། སྲས་སུ་བསམ་བཞིན་འཁྲུངས་ལ་གསོལ་བ་འདེབས།། མངལ་དུ་བཞུགས་ཚེ་ཡུམ་གྱི་ལུས་བདེ་ཞིང་།། སེམས་ལ་དགའ་རྒྱས་རྨི་ལམ་གནས་སྐབས་སུ།། དུང་གི་སྐ་རགས་འཆིང་བ་ལ་སོགས་པའི།།ཡ་མཚན་ལྟས་མང་བསྟན་ལ་གསོལ་བ་འདེབས།། གཞོན་ནུའི་དུས་ནའང་དཀོན་མཆོག་རྟེན་རྣམས་དང་།། རབ་བྱུང་ལ་མོས་ན་བཟའི་ཚལ་བུ་ཡང་།། སྤྱི་བོར་འཇོག་ཅིང་སེར་གཟུགས་འཛིན་ཙམ་ཡང་།། མཐོང་ནས་དད་ཕྱག་མཛད་ལ་གསོལ་བ་འདེབས།། ལོ་བདུན་བཞེས་ཚེ་ཁྱིམ་ནས་ལེགས་ཐོན་ནས།། གོང་མ་ཆོས་རྗེ་ཆོས་ཀྱི་རྒྱལ་མཚན་གྱིས།། རབ་དུ་བྱུང་ནས་ཆོས་ཀྱི་རྒྱ་མཚོ་ཞེས།། མཚན་གསོལ་གཅེས་པར་བསྐྱངས་ལ་གསོལ་བ་འདེབས།། རབ་ཏུ་བྱུང་ནས་བཅུ་དྲུག་བར་དག་དུ།། མཁན་པོ་བསྟེན་ནས་ཡི་གེ་འབྲི་ཀློག་དང་།། ཁ་ཏོན་འཛིན་གཤར་བསྙེན་སྒྲུབ་སོགས་འབད་པས།། ཀུན་གྱིས་ཆེས་ཆེར་བསྔགས་ལ་གསོལ་བ་འདེབས།།བཅུ་བཞི་བཞེས་ཚེ་ཤར་ཕྱོགས་ཙོང་ཁ་རུ།། སྤྲུལ་སྐུ་བསོད་ནམས་རྒྱ་མཚོའི་ཞབས་དྲུང་དུ།། དགེ་ཚུལ་བསྒྲུབ་ནས་ཁས་བླངས་སྡོམ་ཁྲིམས་ལ།། རྟག་ཏུ་གཅེས་སྤྲས་མཛད་ལ་གསོལ་བ་འདེབས།། བཅུ་བདུན་བཞེས་ཚེ་གངས་ཅན་དབུས་སུ་བྱོན།། ཇོ་ཤྰཀ་སོགས་མཇལ་དགེ་ལྡན་ཆོས་སྡེ་རུ།། རྔོག་ལོའི་རྣམ་འཕྲུལ་བྱམས་པ་རྒྱ་མཚོ་ཡིས།། སླར་ཡང་དགེ་ཚུལ་བསྒྲུབ་ལ་གསོལ་བ་འདེབས།། གནས་དེར་རྒྱལ་སྲས་དམ་ཆོས་དཔལ་འབར་དང་།། ཐམས་ཅད་མཁྱེན་པ་ནམ་མཁའ་རྒྱལ་མཚན་སོགས།། རྩོད་མེད་མཁས་གྲུབ་དུ་མའི་ཞབས་གཏུགས་ནས།། དམ་ཆོས་མང་དུ་གསན་ལ་གསོལ་བ་འདེབས།། ཁྱད་པར་འབྲས་སྤུངས་སྒོ་མང་ཆོས་གྲྭ་རུ།། ཆུ་བཟང་ཆོས་རྗེ་བྱམས་པ་ལྷུན་གྲུབ་ལ།། བསྡུས་པའི་ཟིན་ཐུན་ཕར་ཕྱིན་ཐལ་ཕྲེང་སོགས།། ཞིབ་ཏུ་གསན་ཅིང་བསླབ་ལ་གསོལ་བ་འདེབས།། མགོན་དེའི་དྲིན་ལས་མི་ཕམ་གསུང་གི་བཅུད།། མངོན་རྟོགས་རྒྱན་གྱི་གཞུང་དོན་གདམས་པ་རུ།། ལེགས་པར་ཤར་བས་སེང་བཟང་གཉིས་པ་ཞེས།། གཟུར་གནས་མཁས་ཀུན་བསྟོད་ལ་གསོལ་བ་འདེབས།། དེ་ནས་ཞྭ་དམར་བརྩོན་འགྲུས་རྒྱ་མཚོ་ལ།། དབུ་མ་འདུལ་མཛོད་ཐལ་སྤྱི་མང་གསན་པའི།། དཀའ་ཆེན་ཕྱི་མ་རྣམས་ཀྱི་དཀའ་གནས་ལ།།མཁྱེན་རབ་ཐོགས་མེད་རྒྱས་ལ་གསོལ་བ་འདེབས།། ཉེར་དྲུག་བཞེས་ཚེ་འབྲས་སྤུངས་དགོན་པ་རུ།། ཕར་ཚད་གཉིས་ལ་གླིང་བསྲེས་མཛད་པའི་ཚེ།། རྩོད་ཟླ་ཟིལ་མནན་དཔང་བཞུགས་མཁས་པའི་ཚོགས།།དབང་མེད་རངས་པར་མཛད་ལ་གསོལ་བ་འདེབས།། ཉེར་བདུན་བཞེས་ཚེ་གཙང་གི་ཕྱོགས་སུ་བྱོན།། ཆོས་སྡེ་མང་མཇལ་ཁྱད་པར་གངས་ཅན་དུ།། ཚད་མའི་ཕྱོགས་ལ་ཞིབ་དུ་སྦྱངས་པའི་མཐུས།། ཆོས་གྲགས་གཉིས་པར་གྲགས་ལ་གསོལ་བ་འདེབས།། དེ་རྗེས་བྱང་ཕྱོགས་ངམ་རིང་ཆོས་སྡེ་རུ།། རྣམ་འགྲེལ་ལ་སོགས་བཀའ་པོད་མང་པོ་ལ། །འཆད་དང་རྩོད་པའི་སྒོ་ནས་རབ་འབྱམས་ཀྱི།། མཚན་གསོལ་མཚན་དོན་མཐུན་ལ་གསོལ་བ་འདེབས།། ཉེར་བརྒྱད་བཞེས་ཚེ་དབེན་པའི་དགོན་པར་ཕེབས།། རྡོ་རྗེ་འཆང་དབང་པཎ་ཆེན་ཐམས་ཅད་མཁྱེན།། མཇལ་བས་སྔོན་གྱི་བླ་མར་རྗེས་དྲན་པས།། སངས་རྒྱས་འདུ་ཤེས་འཁྲུངས་ལ་གསོལ་བ་འདེབས།། མགོན་པོ་དེ་ཡིས་བདེ་གསང་འཇིགས་གསུམ་སོགས།། དབང་དང་རྗེས་གནང་ཟབ་མོས་སྨིན་བྱས་ནས།། སྙན་བརྒྱུད་གདམས་པར་ཐུགས་རྒྱུད་བཀང་བ་ལས།། གདམས་པའི་གཏེར་དུ་གྱུར་ལ་གསོལ་བ་འདེབས།། པཎ་ཆེན་ཐམས་ཅད་མཁྱེན་པས་མཁན་སློབ་དང་།། རྗེ་དབོན་ཆེན་པོས་གསང་སྟོན་ལེགས་མཛད་ནས། །བསྙེན་པར་རྫོགས་ཚེ་བློ་བཟང་དོན་གྲུབ་ཀྱི།། དྲིན་དུ་ལུང་བསྟན་བརྙེས་ལ་གསོལ་བ་འདེབས།། གནས་དེར་ཟླ་ཤས་བསྒྲུབ་ལ་ཆེར་གཞོལ་བས།། འགྲོ་བའི་སྡུག་བསྔལ་ཡིད་ལ་དྲན་ཙམ་གྱིས།། སྤྱན་ཆབ་གང་གྰའི་རྒྱུན་ལྟར་རྟག་ཕབ་ནས།།གཞན་ལ་ཇི་ཕན་མཛད་ལ་གསོལ་བ་འདེབས།། ནང་དུ་སྤྲོས་པའི་སྣང་བ་ཀུན་བཀག་ནས།།བ ཀག་པའི་མེད་དགག་འཛིན་སྟངས་ཡུལ་བསྐྱངས་པས།། ཕྱི་རུ་གང་སྣང་སྒྱུ་མའི་རོལ་བར་ཤར།། སྐྱེ་མེད་རྣལ་འབྱོར་མཆོག་ལ་གསོལ་བ་འདེབས།། དེ་ནས་སླར་ཡང་དབུས་སུ་ལེགས་ཕེབས་ནས།། ཀུན་མཁྱེན་གཉིས་པ་བློ་གྲོས་རྒྱ་མཚོ་དང་།། སྔགས་པ་ཆོས་རྗེ་ནམ་མཁའ་བཟང་པོ་ལ།། རྒྱུད་སྡེའི་ཆོས་མང་གསན་ལ་གསོལ་བ་འདེབས།། རྒྱུད་གྲྭར་ཆོས་རྗེ་རྣམ་རྒྱལ་དཔལ་བཟང་ལ།། དངོས་གྲུབ་རྒྱ་མཚོ་རིམ་ལྔ་གསལ་སྒྲོན་སོགས།། གསན་ཅིང་འདུས་པ་འཕགས་པའི་སྐོར་ཀུན་ལ།། སྦྱངས་བས་མཆོག་ཏུ་མཁས་ལ་གསོལ་བ་འདེབས།། སོ་བཞི་བཞེས་ཚེ་རང་གི་ཡུལ་དུ་བྱོན།། བརྒྱ་རྩ་བརྒྱ་ཕྱག་འཇིགས་བྱེད་བསྙེན་སྒྲུབ་དང་།། ཡིག་བརྒྱ་བརྒྱ་རྩ་རྩ་ཤེས་ཀློག་འདོན་སོགས།། ཉིན་མཚན་འཁོར་ཡུག་གཞོལ་ལ་གསོལ་བ་འདེབས།། ཞེ་བདུན་བཞེས་པའི་དམར་སེར་མེ་སྦྲུལ་ལ།།སྐུ་འབུམ་ཆོས་སྡེར་བློ་གསལ་ཚོགས་རྣམས་ལ།། བསྡུས་ཕར་ལ་སོགས་ལེགས་བཤད་ཆར་ཕབས་ནས།། བཤད་པའི་བསྟན་པ་སྤེལ་ལ་གསོལ་བ་འདེབས།། ཞེ་དགུ་བཞེས་པའི་དོན་གྲུབ་ས་ལུག་ལ།། རྒྱལ་བའི་དབང་པོ་སྡེ་བ་ཆོས་ཀྱི་རྗེ།། མཚན་གཞན་བསྟན་འཛིན་བློ་བཟང་རྒྱ་མཚོ་བའི།། ཞལ་མཇལ་གུས་པས་བསྟེན་ལ་གསོལ་བ་འདེབས།། རྒྱལ་དབང་དེ་ཡི་དྲིན་ལས་མདོ་སྔགས་ཀྱི།། ལམ་རིམ་ལ་སོགས་བཀའ་ལུང་ཡོངས་རྫོགས་པའི།། ཚིག་གསན་དོན་ཀུན་ཐུགས་སུ་ཆུད་པ་ལས།། དབང་ལུང་གདམས་པའི་མཛོད་ལ་གསོལ་བ་འདེབས།། བླ་མ་དེ་ལས་ཡི་དམ་དཔའ་ཅིག་གི ། དབང་གསན་དུས་སུ་སྟ་གོན་མནལ་ལམ་དུ།། མཉམ་རྗེས་གཉིས་ནི་ཐོ་རངས་ནམ་མཁའ་དང་།། ཁུག་སྣ་འདྲ་བར་གཟིགས་ལ་གསོལ་བ་འདེབས།། འདོད་ཡོན་སྤུ་གྲིའི་སོར་ཆགས་སྦྲང་རྩི་དང་།། འཁོར་བ་དུག་སྦྲུལ་ཚང་ལྟར་ལེགས་གཟིགས་ནས།། རྒྱལ་བས་བསྔགས་པའི་རི་ཁྲོད་དབེན་པ་ལ།། ཡིད་གཡོས་ཆེས་ཆེར་བསྔགས་ལ་གསོལ་བ་འདེབས།། དེ་མཐུས་ཨ་ཆུང་གནམ་རྫོང་རི་ཁྲོད་དང་།། རྒོད་པོ་རྫོང་དང་བྲག་དཀར་དབེན་གནས་སོགས།། ཐུགས་ལ་གང་བཞེད་གང་འགོལ་བས་མཐའ་རུ།། སྒྲུབ་པ་སྙིང་པོར་མཛད་ལ་གསོལ་བ་འདེབས།། ཁྱད་པར་རྨ་ཀླུང་ཆོས་རྫོང་རི་ཁྲོད་དུ།། མཚན་བཅས་མཚན་མེད་དགེ་སྦྱོར་རིམ་པ་རྣམས།། ཉིན་གཅིག་ཙམ་ཡང་འཆགས་མེད་མཛད་པའི་མཐུས།། ཉམས་རྟོགས་ཆེས་ཆེར་འབར་ལ་གསོལ་བ་འདེབས།། དལ་སྐབས་ཡུལ་ཕྱོགས་མང་པོར་ཕྱག་ཕེབས་ནས།། དབང་ལུང་རྗེས་གནང་གང་དང་གང་ཡིན་པ།། དེ་དང་དེ་དག་འདོད་པའི་གདུལ་བྱ་ལ།། མ་སྦས་ལྷུག་པར་འདོམས་ལ་གསོལ་བ་འདེབས།།ང་དགུ་བཞེས་པའི་ས་མོ་སྦྲུལ་ལོ་ལ།། སྤྲུལ་བའི་གནས་ཆེན་བྱམས་ཆེན་གླིང་མཆོག་ཏུ།། རྡོ་རྗེ་འཆང་དབང་བསྟན་འཛིན་བློ་བཟང་ལ།། རྡོ་རྗེ་ཕྲེང་དབང་གསན་ལ་གསོལ་བ་འདེབས།། གསུང་རབ་རྣམས་ལ་རབ་གནས་མཛད་པའི་ཚེ།། ཕྱག་ནས་སྐུ་དང་ཡིག་འབྲུ་འཛིན་པ་དང་།། རང་བསྲེལ་གཅིག་ཡང་མང་པོར་སྤྲུལ་བ་སོགས།། གྲུབ་རྟགས་དཔག་ཡས་སྟོན་ལ་གསོལ་བ་འདེབས།། སྤྱིར་ནི་བླ་མ་ཉི་ཤུ་རྩ་གཅིག་དང་།། སྒོས་སུ་ཆོས་འབྲེལ་ཟབ་པའི་བཤེས་གཉེན་དགུ།། ཡང་སྒོས་བཀའ་དྲིན་འཁོར་དཀའི་ཡོངས་འཛིན་གསུམ།། གུས་པས་ཚུལ་བཞིན་བསྟེན་ལ་གསོལ་བ་འདེབས།། རྩ་བའི་བླ་མའི་ཡོན་ཏན་བརྗོད་པའམ།། མཚན་ཙམ་ཐོས་ཚེ་ཞལ་རས་ཆེར་བསྡུས་ནས།། སྤྱན་ཆབ་བསིལ་ཞིང་ཕྱག་གཉིས་ཐལ་སྦྱར་ནས།། ཞལ་ནས་མཆོག་ཏུ་བསྟོད་ལ་གསོལ་བ་འདེབས།། དེ་ལྟར་བཤེས་གཉེན་ལེགས་བསྟེན་ཐོས་ལ་འབད།། བསྟན་པ་རྒྱས་མཛད་སྒྲུབ་ལ་ཆེར་གཞོལ་བས།། ཏིང་འཛིན་སྒོ་འཕར་བརྒྱ་ཕྲག་ལེགས་ཕྱེ་ནས།། ལྷག་མཐོང་དགའ་ཚལ་གཟིགས་ལ་གསོལ་བ་འདེབས།། རང་གི་བཞེད་པའི་དོན་ཀུན་ལེགས་གྲུབ་ནས།། རེ་ལྔ་བཞེས་པའི་ཆུ་མོ་ཕག་ལོ་ལ།། ཙོང་ཁའི་ཡུལ་ལྗོངས་ཨར་རྩེ་ཞེས་བྱ་ནས།། དག་པའི་ཞིང་དུ་གཤེགས་ལ་གསོལ་བ་འདེབས།། སྐུ་གདུང་ཞུགས་ལ་སྦྱངས་ནས་གསོལ་བཏབ་ཚེ།། དུང་དཀར་གཡས་འཁྱིལ་ལ་སོགས་ཡ་མཚན་པའི།། ལྟས་མང་བསྟན་ནས་ཐམས་ཅད་དད་བྱས་པས།། ཐར་བའི་ལམ་ཆེན་ཕྱེ་ལ་གསོལ་བ་འདེབས།། དེ་ལྟར་བླ་མ་མཆོག་གི་ཡོན་ཏན་འགའ།། འགའ་ལ་ཕན་པར་བསམ་ནས་བདག་གིས་བརྩམས།། བརྩམས་པའི་སྒྲུབ་རྒྱུད་བྱ་བ་གང་ཡིན་ཀུན།། ཀུན་མཁྱེན་བཀའ་བཞིན་གེགས་མེད་མྱུར་འགྲུབ་ཤོག ། ཅེས་རྗེ་བཙུན་ཆོས་ཀྱི་རྒྱལ་པོ་ཐམས་ཅད་མཁྱེན་པ་ཆོས་ཀྱི་རྒྱ་མཚོའི་རྣམ་པར་ཐར་བ་ཚིགས་བཅད་ཀྱི་བསྟོད་པར་བསྒྲིགས་པ་འདི་ནི། དང་པོར་བླ་མ་དེ་ཉིད་ཀྱི་བཀའ་འཁོར་ཆོས་རྫོང་དང་། དགོན་པར་བཞུགས་པའི་དགེ་ཚུལ་སློང་ཐམས་ཅད་ཀྱིས་ནན་ཆེར་བསྐུལ་ཞིང་། ཕྱིས་སུ་སྒྲུབ་པ་བསམ་གཏན་གྱི་འཁོར་ལོ་ལ་རྩེ་གཅིག་ཏུ་གཞོལ་བའི་ཆོས་ཀྱི་སྤྱན་ཅན་མཁས་བཙུན་རྒྱ་མཚོས་ཀྱང་ནན་ཆེར་ལན་འགར་བསྐུལ་བ་སོགས་ལ་བསྟེན་ནས། བླ་མ་དེ་ཉིད་ཀྱི་བཀའ་འབངས་མང་ཐོས་རི་ཁྲོད་པ་སྐལ་ལྡན་རྒྱ་མཚོས་སྦྱར་བའི་ཡི་གེ་བ་ནི་དད་ལྡན་ཐོས་བསམ་རྒྱ་མཚོའོ།། དགེ་ལེགས་ནམ་མཁའ་དང་མཉམ་པར་གྱུར་ཅིག། །