ཀླུ་ཤོད་དགོན་བཤད་སྒྲུབ་བསྟན་དར་གླིང་གི་ལོ་རྒྱུས་མདོར་བསྡུས།
སྤེལ་དུས 2018-06-29
ཡོང་ཁུངས། དགེ་ལུགས་པའི་དྲ་བ།
རྩོམ་པ་པོ། རྔ་རྒོད་ཐུབ་བསྟན
དགོན་པ་འདི་ནི་སྔོན་གྱི་དགོན་རྙིང་བཞི་གཅིག་བསྡུས་མཛད་པ་ཡིན་ཏེ།གླང་གྱའི་མུ་ཏོ་ཚང་གིས་ཕྱག་འདེབས་མཛད་པའི་མུ་ཏོ་དགོན་བཀྲ་ཤིས་བསམ་གཏན་གླིང་དང་འབྲོག་ཏིའི་བླ་མ་དགེ་འདུན་རྒྱ་མཚོས་བཏབ་ཅིང་སྒོ་མང་མཁན་སྤྲུལ་བློ་བཟང་དཀོན་མཆོག་ཆོས་དར་ཚང་ལ་ཕུལ་ནས་སྐུ་ཕྲེང་རིམ་བྱོན་གྱིས་བསྐྱངས་པའི་ཨ་མཆོག་བཀྲ་ཤིས་གཡུ་ལུང་འཁྱིལ་བ། རྔ་རྒོད་དཀའ་བཅུ་བ་ཨ་མདོ་ཤེས་རབ་རྒྱ་མཚོས་རྔ་རྒོད་བསེ་མཁར་སྒང་དུ་རི་ཁྲོད་བཏབ་ཅིང་སྐུ་ཕྲེང་གསུམ་པ་རྔ་རྒོད་ནམ་མཁའ་སེང་གེས་རབ་བྱུང་བཅུ་གཉིས་པའི་ལྕགས་བྱ་སྤྱི་ལོ་༼1741༽ལོར་བཏབ་པའི་རྒྱུད་སྟོད་གྲྭ་ཚང་བཀྲ་ཤིས་བཤད་སྒྲུབ་གླིང་དང་། སྐྱི་ཐང་མ་ཎི་བ་བློ་བཟང་བསྟན་འཛིན་གྱིས་པདྨའི་སྟེང་གི་དགོན་པ་བཏབ་པ་འདི་བཞི་རབ་བྱུང་བཅུ་དྲུག་པའི་ཆུ་ལུག་སྟེ་སྤྱི་ལོ་༼1943༽ལོར་ཀུན་མཁྱེན་འཇམ་དབྱངས་བཞད་པ་སྐུ་ཕྲེང་ལྔ་བ་བསྟན་པའི་རྒྱལ་མཚན་མཆོག་གིས་ཁྱུང་རི་ཐང་གི་གནས་འདིར་ཕྱོགས་གཅིག་ཏུ་བསྡུས་ཏེ་ཀླུ་ཤོད་ཁྱུང་རི་ཐང་བཤད་སྒྲུབ་བསྟན་དར་གླིང་ཞེས་པའི་དགོན་འདི་ཉིད་ཕྱག་འདེབས་མཛད་ཅིང་དམེ་ཤུལ་མུ་ཏོ་སྐུ་ཕྲེང་བཞི་བ་རྗེ་སྐལ་བཟང་སྦྱིན་པ་རྒྱ་མཚོ་དགོན་འདིའི་བདག་པོར་བསྐོས།
ཁོང་གིས་དགུང་གྲངས་རེ་གསུམ་པ་ཤིང་སྤྲེལ་༼1944༽ལོར་རྒྱུ་ཡོན་ཕུལ་ནས་འདུ་ཁང་ཀ་རིང་བརྒྱད་ཅན་གསར་དུ་བཞེངས་ཏེ་བླ་བྲང་བཀྲ་ཤིས་འཁྱིལ་གྱི་དཔལ་ལྡན་སྨད་རྒྱུད་གྲྭ་ཚང་གི་ཕྱག་ལེན་ཇི་བཞིན་བཙུགས་ཤིང་དགེ་འདུན་པ་ཉིས་བརྒྱ་དང་བདུན་ཅུ་ལྷག་བཞུགས། ཆོས་ཐོག་ལ་ཟླ་བ་དང་བོར་ཆོ་འཕྲུལ་སྨོན་ལམ་ཆེན་མོ་ཉིན་བཅུ་དང་། གཉིས་པར་དཔྱིད་ཆོས་ཆེན་མོ་ཉིན་བདུན། གསུམ་པར་དཔལ་འཁོར་ལོ་སྡོམ་པ་བདེ་མཆོག་གི་སྒྲུབ་མཆོད། བཞི་བར་སྨྱུང་གནས་ཆོ་ག་དང་རྒྱུད་ཐམས་ཅད་ཀྱི་རྒྱལ་བོ་དཔལ་གསང་བ་འདུས་པའི་སྒྲུབ་མཆོད། དྲུག་པར་རབ་གནས་ཆེན་མོ། བརྒྱད་པར་སྟོན་ཆོས་ཆེན་མོ། དགུ་བར་དཔལ་རྡོ་རྗེ་འཇིགས་བྱེད་ཀྱི་སྒྲུབ་མཆོད་དང་སྨྱུང་གནས་ཆོ་ག བཅུ་བར་དགའ་ལྡན་ལྔ་མཆོད་ཆེན་མོ། བཅུ་གཅིག་པར་དགུན་ཆོས་ཆེན་མོ་བཅས་ཆོས་ཐོག་བཅུ་ཡོད།
དུས་འཁོར་ངག་དབང་བཀྲ་ཤིས་དང་ཁྱ་དགེ་དཔོན་སློབ་རིན་པོ་ཆེ།བྲག་དཀར་དཀོན་མཆོག་སེང་གེ་བཅས་དགོན་འདིའི་ཁྲིར་བཞུགས་ཤིང་དགོན་བདག་རིན་པོ་ཆེ་ཁོང་གིས་བདེ་གསང་འཇིགས་གསུམ་སོགས་དབང་ལུང་བཀའ་ཆོས་མང་དུ་བསྩལ་བ་དང་།འཁོར་ཆེན་ལྷ་ཁང་།དམ་ཅན་རྡོ་རྗེ་ལེགས་པའི་བཙན་ཁང་།མ་ཎི་ཁང་།རུང་ཁང་སོགས་ལེགས་པར་བཞེངས།
སྐུ་གསུང་ཐུགས་རྟེན་ལ་གསེར་ཟངས་ལས་གྲུབ་པའི་ཇོ་བོ་ཤཀྱཱ་མུ་ནེ་དང་ཙནྡན་ཇོ་བོ་གཉིས།འཇིགས་བྱེད་བློས་བསླངས།ཅོ་ནེའི་བཀའ་འགྱུར་དང་བསྟན་འགྱུར།རྔ་རྒོད་ནམ་མཁའ་སེང་གེ་དང་རྔ་རྒོད་དཔོན་སློབ་བྱམས་པ་རབ་རྒྱས།ཨ་ཁྱུང་ངག་དབང་མཁྱེན་རབ་གསུམ་གྱི་གསུང་འབུམ་དང་དཔར་ཤིང་སོགས་ཡོད་མོད་རིགས་གསར་སྐབས་ཡོངས་སུ་འཇིག
དེ་ནས་ལོ་རབས་བརྒྱད་ཅུ་བའི་ནང་སླར་ཡང་པཎ་ཆེན་ཐམས་ཅད་མཁྱེན་པ་དང་ཀུན་མཁྱེན་རིན་པོ་ཆེ་སོགས་ཀྱི་ཐུགས་རྗེ་བཀའ་དྲིན་ལས་དགོན་པ་འདི་ཉིད་སླར་གསོ་བྱས་ཏེ་ཡུལ་ཁམས་འདིའི་བསྟན་པའི་མེ་རོ་གསོས་ཤིང་ཁྲི་ཆེན་གུང་ཐང་འཇམ་པའི་དབྱངས་སྐུ་ཕྲེང་དྲུག་པ་མཆོག་གིས་དབང་ལུང་གི་ཆོས་སྤྱིན་གྱིས་ཡུལ་ལུང་འདིའི་སེར་སྐྱ་ཐམས་ཅད་ཆོས་ཀྱིས་ཚིམ་པར་མཛད་དེ་ཐུགས་བརྩེ་བ་ཆེན་པོས་རྗེས་སུ་བཟུང་།
ད་ལྟ་སྡེ་འདིར་དགེ་འདུན་པ་བརྒྱ་དང་ལྔ་བཅུ་ལྷག་ཞལ་བཞུགས་ཤིང་དགོན་བདག་བླ་མ་དམེ་ཤུལ་མུ་ཏོ་སྐུ་ཕྲེང་ལྔ་བ་བློ་བཟང་འཇིགས་མེད་ཡེ་ཤེས་རྒྱ་མཚོས་སྐྱོང་བཞིན་པ་ལགས་སོ།།