༄༅། ། མི་ཉག་མཆོད་རྟེན་མཐོང་གྲོལ་ཆེན་མོའམ་མཆོད་རྟེན་དཀར་པོ་ཞེས་གྲགས་པ་ནི། བྲག་དགོན་པའི་མདོ་སྨད་ཆོས་འབྱུང་ལས། མངའ་བདག་ཁྲི་རལ་ཉིད་དངོས་སུ་ཕེབས་ཤིང་རལ་བ་ནང་བཞུགས་ཀྱི་རྟེན་ཁྲི་ཀར་ཡོད། ཅེས་གསུངས་ཏེ་རབ་བྱུང་མ་ཚུགས་གོང་གི་མེ་མཁའ་རྒྱ་མཚོའི་འདས་ལོ་ལྕགས་གླང་ཕྱི་ལོ་༨༢༡ལ་ཁྲི་རལ་བ་ཅན་དང་། རྒྱ་རྗེ་མུ་ཙུང་གཉིས་ཀྱིས་དབོན་ཞང་གི་རྡོ་རིང་བསླངས། བཙན་པོ་ཞང་དང་། རྒྱ་རྒྱལ་འདུམ་པར་བྱས། ཞེས་དེབ་ཐེར་རྣམས་སུ་གསུངས། འདི་ལ་དཔག་ན་ད་ལྟའི་རབ་རྒྱན་མེ་ཡོས་ཡན་ལ་ལོ་ཆིག་སྟོང་ཆིག་བརྒྱ་རེ་དྲུག་སོང་ཟིན་པས་མཆོད་རྟེན་འདི་ཁྲི་ཀའི་ཡུལ་གྱི་རྟེན་ཐོག་མ་ཡིན། དེ་ནས་རབ་བྱུང་བཞི་བའི་ནང་ས་སྐྱ་པཎྜི་ཏ་ཀུན་དགའ་རྒྱལ་མཚན་ཧོར་རྒྱལ་པོས་གདན་དྲངས་པར་ཕེབས་ལམ་དུ་མཆོད་རྟེན་འདིར་རབ་གནས་གནང་། རབ་བྱུང་བཅུ་གཉིས་པའི་ནང་རྙེ་སྐུ་ཕྲེང་གཉིས་པ་ངག་དབང་བསྟན་འཛིན་ཉི་མས་ཞིག་གསོ་མཛད། སྒོ་རྒྱན་ནང་དུ་ཐུབ་སྐུ་དང་། བུམ་པའི་ནང་དུ་དཔལ་དུས་ཀྱི་འཁོར་ལོའི་སྨན་སྐུ་མི་ཚད་ཙམ། གཞན་ཡང་སྐུ་གསུང་ཐུགས་རྟེན་གྱི་རྟེན་སྣ་ཕྱུར་བུར་སྤུངས་ཏེ་རབ་གནས་མཛད། ཡང་རབ་བྱུང་བཞི་བའི་ནང་མི་ཉག་ཚུལ་ཁྲིམས་བསྟན་པའི་ཉི་མས་གསེར་ཟངས་ལས་གྲུབ་པའི་ཉི་ཟླ་ཕུལ་ནས་ཞིག་གསོ་མཛད།
དེ་ནས་རབ་ཚེས་མེ་ཡོས་ཕྱི་ལོ་༡༨༦༧ལོའི་ཧོས་འཁྲུགས་ཀྱིས་ཡུལ་འདིའི་དགོན་སྡེ་ཕལ་ཆེར་ལ་གནོད་སྐྱོན་དང་། མཆོད་རྟེན་འདི་ལའང་འཕྲོག་བསྲེག་བཅོམ་གསུམ་ཚབས་ཆེན་བཟོས། ལོ་དེའི་སྨད་དུ་ཐར་ཤུལ་རིན་པོ་ཆེ་སྐུ་ཕྲེང་བཞི་བ་དགེ་འདུན་ཆོས་སྐྱོང་རྒྱ་མཚོས་གྲྭ་ཚང་འདི་དང་མཆོད་རྟེན་མཐའ་སྐོར་གྱི་མ་ཎི་འཁོར་ལོ་སོགས་ལ་ཉམས་གསོ་གང་ལེགས་མཛད། དེ་མཚུངས་སུ་གོང་བ་གྲྭ་ཚང་དང་འཇམ་མོ་གྲྭ་ཚང་།
ཅོག་རོང་གྲྭ་ཚང་དང་ཧོར་ཀྱཱའི་གྲྭ་ཚང་བཅས་ཀྱི་འདུ་ཁང་ལའང་ཉམས་གསོ་བྱས། དེ་ནས་རབ་རྒྱལ་ས་ཡོས་ཕྱི་ལོ་༡༩༣༩ལོར་མི་ཉག་ངག་དབང་ལེགས་བཤད་རྒྱ་མཚོས་མཐུན་རྐྱེན་སྦྱར་ཏེ་གཞི་ཁྱོན་ཆེ་བའི་ཞིག་གསོ་ཐེངས་བཞི་བ་བྱེད་སྐབས། ཆོས་དད་མང་ཚོགས་ཀྱིས་ཧུར་བརྩོན་སྒོས་ཨར་ལས་ཀྱི་བྱ་བ་དང་། དགོན་པ་སོ་སོའི་གྲྭ་པ་རྣམས་ཀྱིས་སྐུ་འདྲ་དང་སཙྪ་སོགས་གཟུངས་གཞུག་འབུལ་བ་སོགས་ཀྱི་ལས་ལ་བསྒྲིམས་ཏེ་ཟླ་ཤས་རིང་ལེགས་གྲུབ་བྱུང་། མི་ཉག་རིན་པོ་ཆེས་གསེར་སྲང་ཞེ་བདུན་ཕུལ་ཏེ་མཆོད་རྟེན་གྱི་ཉི་ཟླ་ཆར་ཁེབས་སོགས་ལ་གསེར་ཚོས་ཕུལ་ནས།
མཆོད་རྟེན་ཆེན་མོ་འདིའི་རྣམ་པ་སྔར་ལས་ལྷག་པ་ཞིག་གྲུབ་སྟེ་ཡུལ་འདིའི་རྒྱན་མཆོག་ཏུ་གྱུར། བྱང་ཆུབ་མཆོད་རྟེན་འདིའི་བཞེངས་བཀོད་ནི།
མཐོ་ཚད་ཁྲུ་དགུ་ཅུ་ཙམ་རྒྱུ་སོ་ཕག་ལས་གྲུབ། སྨད་ཆ་ལྷ་ཁང་གི་དབྱིབས་སུ་གྲུབ་ཅིང་ས་འཛིན་ནས་དགེ་བཅུའི་བར་ཐེམ་རིམ་རེ་རེ་བཞིན་གསལ་བོ་མེད་པར་ཕལ་ཆེར་གཞི་གཅིག་བྱས། མདུན་ཕྱོགས་ནས་སྟེང་གི་བང་རིམ་གསུམ་པའི་བར་ལྷ་ཁང་ཡིན་ལ། གཡས་གཡོན་རྒྱབ་གསུམ་དུ་མ་ཎི་འཁོར་ལོ་བརྒྱ་རྩ་བརྒྱད་ཀྱིས་བསྐོར་བ། བུམ་པའི་ནང་ཁང་མིག་ཆེ་ཆུང་དགུ་དང་། སྟེང་འོག་གཉིས་བསྡོམས་པས་ཁང་མིག་ཆེ་ཆུང་བཅོ་བརྒྱད་ཙམ། དེ་དག་གི་ནང་དུ་རྟེན་གྱི་གཙོ་བོ་དུས་གསུམ་སངས་རྒྱས་མི་ཚད་ཙམ་ཁྲི་རྒྱབ་ཡོལ་བཅས། གསེར་ཟངས་ལས་གྲུབ་པའི་གྲུབ་ཆེན་བརྒྱད་ཅུ། རྒྱན་དྲུག་མཆོག་གཉིས་སོགས་ལི་སྐུ་སྣ་ཚོགས་བརྒྱ་ཕྲག་ལྷག་དང་། གཡས་གཡོན་རྣམས་སུ་གནས་རྟེན་བཅུ་དྲུག་དང་། འོད་དཔག་མེད། གདུགས་དཀར། ཕྱག་སྟོང་སྤྱན་སྟོང་། སྨན་བླ། སྒྲོལ་མ་བཅས་ཀྱི་གྱན་ཐང་སོགས་བྱིན་རླབས་ཅན་གྱི་རྟེན་སྣ་མང་པོ་བཞུགས། སྒྱུ་རྩལ་གྱི་ཆ་ནས། མཆོད་རྟེན་གྱི་ཟུར་བཞིར་རྡོ་ལས་བཟོས་པའི་སེང་གེ་གསོན་ཉམས་དང་ལྡན་པ། སྒོ་རྒྱན་གྱི་མཐའ་སྐོར་དུ་བཀྲ་ཤིས་རྟགས་བརྒྱད་དང་རྣམ་བཅུ་དབང་ལྡན་སོགས་སོ་ཕག་ལས་གྲུབ་ཅིང་ལག་རྩལ་ཡང་རྩེར་སོན། ལྷ་ཁང་གི་བརྐོས་རིས་སྣ་ཚོགས་ཤིང་ལས་གྲུབ་པའི་པད་འདབ་དང་བཀྲ་ཤིས་རྟགས་བརྒྱད། གླང་ཆེན། རྨ་བྱ། འབྲུག་རིས། སྤྲིན་རིས་སོགས་བཟོ་རྩལ་འབུར་དུ་ཐོན། མི་རིགས་དང་ཆོས་ལུགས་ཀྱི་ཁྱད་ཆོས་མཚོན་པའི་སྒྱུ་རྩལ་ཟླ་དང་བྲལ་བ་མདོ་སྨད་ཀྱི་མཆོད་རྟེན་རྣམས་ལས་ཆེ་ཤོས་ཤིག་ཡིན་ནོ། །
མཆོད་རྟེན་གྱི་དཀར་ཆག་ང་བརྒྱད་སྐབས་བརླགས་པས་འགོད་རྒྱུ་མ་རྙེད་མོད། སྔོན་ཆད་ཀྱི་མཆོད་རྟེན་རྩ་མེད་དུ་མ་གྱུར་ཟེར་བས་རྟེན་སྣ་ལ་བོར་སྟོར་མ་བྱུང་སྙམ་མོ། རབ་རྒྱལ་ས་ཁྱི་སྟེ་ང་བརྒྱད་དང་རིག་གསར་སྐབས་སུ་ཁྱད་དུ་འཕགས་པའི་མཆོད་རྟེན་འདི་ལའང་ཉམས་ཉེས་ཆེན་པོ་ཐེབས། ཡིན་ནའང་དེང་སྐབས་ཆོས་དད་རང་དབང་གི་བསིལ་རླུང་ཕྱོགས་སུ་རྒྱུ་བ་དང་ཆབས་ཅིག་རབ་རྒྱལ་མེ་སྟག་ནས་སླར་གསོ་བྱེད་རྒྱུའི་སྐལ་བ་བྱུང་། མཆོག་སྤྲུལ་རིན་པོ་ཆེ་ངག་དབང་བསྟན་འཛིན་འོད་ཟེར་རྒྱ་མཚོས་ཐིག་བཏབ་ནས་བསྐྱར་བཞེངས་ཀྱི་དབུ་བཙུགས། སྐེ་བའི་སྔགས་རམས་པའི་སྤྲུལ་སྐུས་གཟུངས་འབུལ་གྱི་འགན་ལེགས་པར་བཞེས། དད་ལྡན་མང་ཚོགས་ཀྱི་རྒྱབ་སྐྱོར་དང་ལས་འདིར་ཐུགས་འཁུར་བླ་ལྷག་གནང་བའི་མགོ་བ་རྣམས་ཀྱི་འབད་རྩོལ། ཡུལ་འདིའི་དགོན་སྡེ་ཁག་གི་དགེ་འདུན་པ་རྣམས་ཀྱི་རྒྱབ་སྐྱོར་སོགས་ཀྱིས་མཆོད་རྟེན་ཆེན་མོ་འདི་སྔོན་ཆད་ཇི་ལྟ་བ་བཞིན་ལེགས་གྲུབ་བྱུང་། ཁྱབ་བདག་འཁོར་ལོའི་མགོན་པོ་ཅོ་ནེ་མཁན་རིན་པོ་ཆེ་དབུ་བཞུགས་ཀྱི་གྲྭ་པ་བཞི་བཅུ་ལྷག་གིས་རབ་གནས་ཀྱི་ཆོ་ག་རྒྱས་པར་མཛད་དེ་རྟེན་དང་བརྟེན་པ་ཀུན་ཡེ་ཤེས་པའི་གཏེར་དུ་གྲུབ་པར་མཛད། བསྐྱར་བཞེངས་སྐབས་ཀྱི་རྟེན་སྣའང་སྲིད་གསུམ་ན་རྙེད་པར་དཀའ་བའི་རིང་བསྲེལ་གྲངས་མེད་པ་བཞུགས་པའི་དཀར་ཆག་ལོགས་སུ་དཔར་ཡོད་པས་འདིར་བསྐྱར་བའི་ངལ་བ་མ་བྱས། འདིར་བཞེངས་གྲུབ་ཀྱི་ལོ་ཚིགས་སོགས་ཞིབ་ཏུ་འགོད་འོས་ནའང་ས་བོན་དུ་ལོ་རྒན་དྲུག་ཅུའི་བོད་མིང་དང་དབང་ཐང་སྦྱར་བ་སོགས་ཀྱི་རྐྱེན་པས་མ་འོངས་པའི་ལོ་འགའ་ཞིག་ཐོན་འདུག་པ་དེའི་སྟབས་ཀྱིས་གོང་གི་དབུ་བཙུགས་པའི་ལོ་དེ་ཡང་གཙིགས་མིན་ཤེས་སོ། །
ཕྱི་ལོ་༡༩༨༧ལོའི་ཟླ་ཚེས་བཟང་བོའི་ཉིན་ནས་བཞེངས་མགོ་བརྩམས་པའི་རྟེན་འབྲེལ་དུ་མཆོད་རྟེན་གྱི་རྡུལ་སྤུངས་པའི་མདུན་སར།
མཆོད་པའི་བྱེ་བྲག་བསམ་གྱིས་མི་ཁྱབ་པ་བཀོད་པ་མཛེས་པར་བཤམས་ཏེ་དགེ་འདུན་བགྲེས་གཞོན་མང་པོ་ལྷན་འཛོམས་གནང་བའི་སྒོས་ཆོས་སྤྱོད་སྨོན་ལམ། རྒྱལ་བའི་ཡུམ་འབྲིང་བསྡུས་སོགས་གསུང་སྒྲོགས་གནང་ཞིང་། མཇུག་ཏུ་དྲུག་ཅུ་བ་དྲག་བསྔོས་དམ་ཅན་གྱི་གསོལ་ཁ་བཅས་གསུངས། བླ་མ་མཆོག་གསུམ་དང་ཆོས་སྐྱོང་ཁག་ལ་གཉེར་གཏད་དང་ཐུགས་རྗེ་སྐུལ་བའི་གསོལ་འདེབས་ཤུགས་དྲག་གནང་སྟེ། སྤྱིར་ལྷར་བཅས་འགྲོ་བ་ཀུན་གྱི་ཕན་བདེ་འབྱུང་བའི་གཞི་གཅིག་པུར་གྱུར་པ་རྒྱལ་བའི་བསྟན་པ་རིན་པོ་ཆེ་དར་ཞིང་རྒྱས་པ་དང་། སྒོས་མཆོད་རྟེན་མཐོང་གྲོལ་ཆེན་མོ་འདི་ཉིད་ཉམས་གསོ་བྱ་བ་གེགས་མེད་མྱུར་དུ་འགྲུབ་པའི་ཐུགས་སྨོན་དང་། འཕྲིན་བཅོལ་ནན་ཏན་གནང་ཞིང་སྐྱབས་རྗེ་མོ་ཡོག་སྤྲུལ་བའི་སྐུ་རིན་པོ་ཆེ་ངག་དབང་བསྟན་འཛིན་འོད་ཟེར་རྒྱ་མཚོ་དཔལ་བཟང་བོས་ཐིག་བཏབ་ནས་གསར་བཞེངས་ཀྱི་དབུ་བརྩམས།
དེ་ལ་གཏོང་བ་ཡངས་པའི་དད་ལྡན་རྣམས་ཀྱིས་དཔལ་འབྱོར་གྱི་མཐུན་རྐྱེན་སྦྱར་ནས། སོ་ཕག་དང་ཨར་འདམ་སོགས་མཁོ་དངོས་རྣམས་འདུ་ཐོག་ཧྲི་ཧྲོ་མེན་སོགས་བཟོ་བོ་བཅུ་ཕྲག་དང་། ཐིག་རྩ་འཛིན་མཁན་དབང་འབུམ་རྒྱལ་བཅས་དང་། སྤྱི་གཉེར་བ་ཨ་ཁུ་བློ་གྲོས་སོགས་འདིར་བཞུགས་འདུས་པའི་སྡེ་ཡོངས་ཀྱིས་ངལ་བ་ཁྱད་དུ་བསད་དང་། རྩོལ་བ་ཆེན་པོས་བསྒྲུབས་ཏེ་རྨང་ལེགས་པར་བཏིང་ནས་རིམ་བཞིན་བཞེངས་ཤིང་། རྔ་ཆེན་ཆུ་ཁྱིའི་ཟླ་ཚེས་དགེ་བར་སྐྱབས་རྗེ་དམ་པ་རྡོ་རྗེ་འཆང་དངོས་དགེ་འདུན་ལེགས་བཤད་བསྟན་པ་རྒྱ་མཚོ་དཔལ་བཟང་བོ་དང་རྗེ་བཙུན་ངག་དབང་བསྟན་འཛིན་འོད་ཟེར་རྒྱ་མཚོའི་ཞལ་སྔ་ནས་གསེར་གྱི་བཀའ་ལུང་དྲི་བྲལ་ནོར་བུའི་ཅོད་པན་སྤྱི་བོར་བསྩལ་བ་བཞིན་མཁྱེན་རབ་ཀྱི་དབང་ཕྱུག་སྐེ་བའི་སྔགས་རིམ་པའི་མཆོག་སྤྲུལ་རིན་པོ་ཆེ་དགོན་འདིར་དངོས་ཕེབས་སྒོས་གཟུངས་འབུམ་ཤེལ་དཀར་མེ་ལོང་ལས་ཇི་ལྟར་གསུངས་པ་ལྟར་གཟུངས་གཞུག་དཔར་སྒྲིལ་སོགས་ཕྱག་ལེན་ཚད་ལྡན་གྱིས་ལེགས་པར་བསྒྲུབས། ཧོར་ཟླ་དྲུག་པའི་ཡར་ངོའི་ཚེས་བཞི་ནས་རྒྱུད་ལྡན་དམ་པའི་ཕྱག་བཞེས་ལྟར་གཟུངས་སྒྲུབ་ཉིན་བདུན་མཛད་སྐབས་དཀར་ཕྱོགས་ལྷ་རྣམས་མངོན་པར་དགྱེས་པའམ་ལྗོངས་འདིར་བཀྲ་ཤིས་དགེ་མཚན་གྱི་ལང་ཚོ་དཔལ་དུ་དར་བའི་རྟེན་འབྲེལ་དུ་མཛེས་སྡུག་ཡིད་དུ་འོངས་པའི་ཆུ་འཛིན་གྱི་ལྡིང་ཁང་ནས་ཆར་ཟིམ་འཇོ་བ་དང་། དབང་གཞུའི་གུར་ཁང་ཕྱོགས་སུ་བཀྲ་བ་སོགས་རྟགས་དང་རྟེན་འབྲེལ་ཕུན་སུམ་ཚོགས་པ་མངོན་དུ་གྱུར་པ་དང་། མཆོད་རྟེན་མཐོང་གྲོལ་ཆེན་མོ་བཞུགས་ཁྲི་བུམ་པ་ཆོས་འཁོར་ཉི་ཟླ་དང་མཆོད་རྟེན་མདུན་གྱི་ལྷ་ཁང་མཐའི་མ་ཎི་འཁོར་ཁང་དང་བཅས་པ་གེགས་མེད་ལྷུན་གྱིས་གྲུབ། གཟུངས་འབུལ་སོགས་བགྱི་འོས་མཐའ་དག་སླ་ཆོས་སུ་མ་སོང་བར་བསྒྲུབས་ཟིན་པ་ན། ལོ་དེའི་མཉམ་མེད་ཤཱཀྱའི་རྒྱལ་བོ་ལྷ་ལས་བབས་པའི་དུས་ཆེན་དང་བསྟུན་ཁྱབ་བདག་འཁོར་ལོའི་མགོན་པོ་ཅོ་ནེ་མཁན་རིན་པོ་ཆེ་རྡོ་རྗེ་སློབ་དཔོན་དང་། གཞན་གྲྭ་པ་བཅུ་ཕྲག་བཞིས་དཀྱིལ་འཁོར་ཞལ་ཕྱེས་ནས་རབ་གནས་ཀྱི་ཆོ་ག་རྒྱས་པར་མཛད་དེ་རྟེན་དང་བརྟེན་པ་ཡེ་ཤེས་པའི་གཏེར་དུ་གྲུབ་པར་མཛད། །
དད་ལྡན་རྣམས་ཀྱི་དད་པའི་མེ་ཏོག་རྣམ་པར་བཞད་ཆེད་རིང་བསྲེལ་རྣམ་བཞི་ལེགས་པར་ཕུལ་བའི་ཚུལ་ཅུང་ཟད་འགོད་པ་ལ། མཆོད་རྟེན་རིན་པོ་ཆེའི་སྙིང་བོར་བཞུགས་པའི་ནང་རྟེན་གྱི་དཀར་ཆག་ནི། སྟོན་པ་བཅོམ་ལྡན་འདས་ཀྱི་མཛད་པ་བཅུ་གཉིས་ཀྱི་ཐང་ག་ཚོན་བཀྲ་ཅན་བཅུ་གཉིས། རྒྱལ་བ་གཉིས་པ་བློ་བཟང་གྲགས་པའི་དབུ་ཞྭ། པད་དཀར་འཆང་བ་༧གོང་ས་སྐྱབས་མགོན་ལྔ་བ་མཆོག་གི་ཚོགས་ཞྭའི་ཚལ་བུ། རྒྱལ་བ་སྐལ་བཟང་རྒྱ་མཚོ་མཆོག་གི་གདུང་ཚ། སྣང་བ་མཐའ་ཡས་པཎ་ཆེན་སྐུ་ཕྲེང་བཅུ་བའི་གདུང་ཚྭ། དཔལ་རྡོ་རྗེ་འཇིགས་བྱེད་ལྷ་བཅུ་གསུམ་པའི་འདྲ་སྐུ་གཅིག རྗེ་གསེར་ཁང་བའི་དབུ་སྐྲ། དགའ་ལྡན་ཕྱོགས་ལས་རྣམ་རྒྱལ་གྱི་རྟེན་འདུས་རིལ་བུ་བདུན། གུ་རུ་པདྨ་ཡབ་ཡུམ་གྱི་སྐུ་བལ་ཀུན་འདུས། སིདྷི་ཆོས་གྱི་རྒྱལ་མཚན་གྱི་ཐུགས་རིལ། ཐུབ་བསྟན་ཆོས་ཀྱི་རྡོ་རྗེའི་དབུ་ཞྭའི་ཚལ་བུ། འབྲུག་པ་ཀུན་ལེགས་ཀྱི་གདུང་རུས།
པཎ་ཆེན་དཔལ་ལྡན་ཡེ་ཤེས་ཀྱི་ཚོགས་ཞྭའི་ཚལ་བུ། པཎ་ཆེན་ཆོས་ཀྱི་ཉི་མའི་ན་བཟའི་ཚལ་བུ། མདོ་མཁྱེན་བརྩེ་དབང་བོའི་དབུ་སྐྲ་དང་ན་བཟའི་ཚལ་བུ། བཀའ་བརྒྱུད་རྟེན་འདུས། རྒྱལ་བ་འབྲི་གུང་བའི་ན་བཟའ། སྟག་ལུང་སངས་རྒྱས་ཤེས་རབ་བླ་མའི་རིང་བསྲེལ། ༧གོང་ས་སྐྱབས་མགོན་ཆེན་པོའི་ཕུར་བ་ཡང་སྙིང་སྤུ་གྲིའི་སྒོ་ནས་སྨིན་སྒྲུབ་བསྐྱངས་པའི་བདུད་རྩི་ཆོས་སྨན། ཐེག་ཆེན་ཆོས་འཁོར་གླིང་གི་གཙུག་ལག་ཁང་ནས་༧གོང་ས་སྐྱབས་མགོན་མཆོག་དབུ་བཞུགས་ཀྱི་མ་ཎི་དུང་སྒྲུབ་རིལ་བུ་འབུམ་གཅིག ༧རྒྱལ་བ་ཚངས་དབྱངས་རྒྱ་མཚོའི་གདུང་རུས། ༧སྐྱབས་མགོན་སྐུ་ཕྲེང་བཅུ་བའི་གདུང་ཚྭ་བླ་སྐུ་གཅིག ཡང་གདུང་ཚྭ་དུམ་གཅིག ༧སྐྱབས་མགོན་སྐུ་ཕྲེང་བཅུ་བའི་བྱང་སེམས་རིལ་བུ། དེའི་ན་བཟའ་བྱིན་ཅན། རྡོ་རྗེ་འཇིགས་བྱེད་ཀྱི་འདྲ་སྐུ་གཅིག ཇོ་བོ་རྗེའི་ན་བཟའ་འཁྲུལ་མེད། རྡོ་རྗེ་འཆང་རྗེ་འཇིགས་མེད་འཕྲིན་ལས་རྒྱ་མཚོས་དུས་འཁོར་དབང་ཆེན་གནང་སྐབས་ཀྱི་རྡུལ་ཚོན་ཕྱེ་མ། བྱ་ཁྱུང་གསེར་གདུང་བདུད་རྩི་རིལ་བུ། པཎ་ཆེན་སྐུ་ཕྲེང་གི་གདུང་ཚྭ། ལྷ་ལྡན་གཙུག་ལག་ཁང་གི་ཇོ་བོ་རིན་པོ་ཆེའི་ན་བཟའ། པོ་ཏ་ལའི་གཟིམས་ཁང་ནས་གནང་བའི་རྟེན་འདུས་རིལ་བུ། ཆུ་བཟང་རིན་པོ་ཆེའི་ན་བཟའ། རྗེ་གསེར་ཁང་བའི་རྟེན་འདུས་རིལ་བུ། ས་པཎ་ཀུན་དགའ་རྒྱལ་མཚན་གྱི་ན་བཟའ། བཟང་སྤྱོད་སྨོན་ལམ། མདོ་སྡུད་པ། བྱང་ཆུབ་ལམ་རིམ་ཆེན་མོ། སྔགས་རིམ་ཆེན་མོ། དུས་འཁོར་བསྡུས་རྒྱུད་འདོད་གསོལ་དང་བཅས་པ། འཇམ་དཔལ་མཚན་བརྗོད། ལྷ་སྡེ་སྡེ་བས་བཞག་པའི་རྗེ་ཡབ་སྲས་གསུམ་གྱི་གསུང་འབུམ། ལྷ་སྡེ་ཨ་ཚོགས་ཀྱི་ཨ་ཁུ་ཀུན་བཟང་གིས་ཕུལ་བའི་ཡུམ་དུམ་པ་བཅུ་གཉིས་དང་ལམ་རིམ་དང་སྔགས་རིམ་གཉིས་བཅས་དང་། རྒྱ་གར་རྡོ་རྗེ་གདན་གྱི་བྱང་ཆུབ་ཤིང་སྣ། བྱང་ཆུབ་ཤིང་གི་ལོ་མ་སྐུ་གཟུགས་ཅན་གསུམ། རིན་ཆེན་བྱུར་དམར་ཉེར་ལྔ་རིལ་བུ་གསུམ། བདུད་རྩི་ཆོས་སྨན། རིན་ཆེན་མང་སྦྱོར། བདུད་རྩི་རིལ་བུ། རིན་ཆེན་ཕྱེ་མ། གཙོད་རྭ་དཀར་པོ། བསེ་རུའི་རྭ། རཏྣ་བསམ་འཕེལ། དགའ་ལྡན་ཁམ་པ། དུར་ཁྲོད་བསིལ་བ་ཚལ་གྱི་མགོན་པོའི་བླ་ཤིང་། སྒྲོལ་མའི་བླ་རྡོ། བྱང་ཆུབ་ཤིང་གི་ཤུན་པ་སྨན་ཕྱེ་འགངས་ཆེན་ལས་བྱུང་བ་དུམ་གཅིག ཨ་ར་པ་ཙའི་མདུན་གྱི་ཙན་དན། བྱང་ཆུབ་ཤིང་གི་ལོ་མ། རྟེན་འདུས་རིལ་བུ། སྐུ་འབུམ་དུས་འཁོར་གྲྭ་ཚང་གི་རྡུལ་ཚོན་ཕྱེ་མ། སྐུ་འབུམ་གསེར་སྡོང་གི་ལོ་མ་དང་སྐུ་ཕྱིས། དམ་ཅན་བླ་རྡོ། གཙང་བཀྲ་ཤིས་ལྷུན་པོ་ནས་གནང་བའི་རྟེན་འདུས་རིལ་བུ། སྣང་བ་མཐའ་ཡས་པཎ་ཆེན་སྐུ་ཕྲེང་དྲུག་པ་ནས་བཅུ་བའི་བར་གྱི་ན་བཟའ། འཕགས་པ་བརྒྱད་སྟོང་བ། གསེར་འོད་དམ་པ་མདོ་སྡེ་དབང་བོའི་རྒྱལ་བོ། ཏིང་འཛིན་བཀའ་ཐང་ཤེལ་བྲག་མ།
བསྐལ་བཟང་རྟོགས་བདུན་དང་རྟོགས་གསུམ། ཞྭ་དམར་ལམ་རིམ། གཟུངས་གཞུག་རྒྱས་པ་ཚར་ཉེར་ལྔ་དང་བསྡུས་པ་ཚར་ལྔ་བཅུ། མི་འཁྲུགས་པའི་སྐུ་འབུམ་ཕྲག་སོ་ལྔ། རྗེ་བཙུན་འཕགས་མ་སྒྲོལ་མའི་སྐུ་འབུམ་ཕྲག་ང་དགུ། འཕགས་པ་སྤྱན་རས་གཟིགས་དབང་ཕྱུག་ཞལ་གཅིག་ཕྱག་བཞི་བའི་སྐུ་འབུམ་ཕྲག་སུམ་ཅུ། འཕགས་པ་འཇམ་དཔལ་གཞོན་ནུར་གྱུར་པའི་སྐུ་འབུམ་ཕྲག་སུམ་ཅུ། དཔལ་ཕྱག་ན་རྡོ་རྗེའི་སྐུ་འབུམ་ཕྲག་སུམ་ཅུ།
འཕགས་པ་ཚེ་དཔག་མེད་ཀྱི་སྐུ་འབུམ་ཕྲག་བཞི་བཅུ། འཕགས་མ་ཡིད་བཞིན་འཁོར་ལོའི་སྐུ་འབུམ་ཕྲག་བཞི་བཅུ། བཅོམ་ལྡན་རྣམ་རྒྱལ་མའི་སྐུ་འབུམ་ཕྲག་བཞི་བཅུ། རྗེ་རྒྱལ་བ་གཉིས་པ་བློ་བཟང་གྲགས་པའི་སྐུ་འབུམ་ཕྲག་གསུམ། སྣང་སྲིད་ཟིལ་གནོན་གྱི་སྐུ་འབུམ་ཕྲག་སོ་གཅིག དཔལ་དུས་ཀྱི་འཁོར་ལོའི་སྐུ་འབུམ་ཕྲག་གཅིག བཅོམ་ལྡན་འདས་དཔལ་རྡོ་རྗེ་འཇིགས་བྱེད་ཡབ་ཡུམ་གྱི་སྐུ་འབུམ་ཕྲག་གཅིག དཔལ་རྟ་མཆོག་རོལ་བ་ཡང་གསང་གི་སྐུ་འབུམ་ཕྲག་གཅིག ནོར་བདག་ཛམ་ལྷ་རིགས་ལྔའི་སྐུ་འབུམ་ཕྲག་དགུ། དམ་ཅན་གཤིན་རྗེ་ཆོས་ཀྱི་རྒྱལ་བོའི་སྐུ་འབུམ་ཕྲག་གཅིག མཆོད་རྟེན་རྣམ་བརྒྱད་འབུམ། བུམ་ཁང་དུ་སྨན་འདམ་ལས་བཞེངས་པའི་དཔལ་དུས་ཀྱི་འཁོར་ལོ་ཁྲི་དྲུག་འགྱོགས་ཅན་དང་ཁྲི་རལ་བ་ཅན་གྱི་སྐུ་སྨན་དམ་ལས་གྲུབ་པ་མི་ཚད་གཅིག རིགས་ལྡན་དྲག་པོའི་སྐུ་སྨན་འདམ་ལས་བཞེངས་པ་གཅིག་དང་། གསང་བདག་ཕྱག་ན་རྡོ་རྗེའི་འབག་སྐུ་གཅིག འཇམ་དཔལ་གཞོན་ནུའི་འབག་སྐུ་གཅིག་བཅས་བཞུགས། སྒོ་རྒྱན་གྱི་གཡས་གཡོན་དུ་ཚོན་བཀྲ་ཅན་གྱི་རྗེ་ཡབ་སྲས་གསུམ་དང་དུས་འཁོར་བླ་བརྒྱུད། རིགས་ལྡན་ཉེར་ལྔ་བཅས་ཀྱི་ལོགས་བྲིས་ཡོད། འདིའི་གཟུངས་གཞུག་རྒྱས་པ་ཚར་གསུམ་དང་བསྡུས་པ་ཚར་བཞི། དུས་འཁོར་རྩ་རྒྱུད། པཎ་ཆེན་སྐུ་ཕྲེང་བཅུ་བའི་གདུང་ཚྭ། བླ་སྐུ་གཅིག་དང་རྡོ་རྗེ་འཇིགས་བྱེད་ཀྱི་སྐུ་གཅིག་བཅས་མ་གཏོགས་གཞན་དང་འདྲ། དེ་ཡང་དུས་འཁོར་དང་། མངའ་བདག རིགས་ལྡན། འཇམ་དབྱངས། གསང་བདག་བཅས་ཀྱི་གཟུངས་གཞུག་ཏུ་སྨོན་ལམ་རྣམ་ལྔ་དང་མདོ། བྱང་ཆུབ་ཤིང་གི་ལོ་མ། པཎ་ཆེན་སྐུ་ཕྲེང་བཅུ་བའི་གདུང་ཚྭ་བླ་སྐུ་གཅིག པཎ་ཆེན་སྐུ་ཕྲེང་དྲུག་པ་ནས་བཅུ་པའི་ན་བཟའ། དུས་འཁོར་ལས་གཞན་རྣམས་ལ་གཟུངས་གཞུག་རྒྱས་པ་ཚར་གཉིས་རེ་དང་། བསྡུས་པ་ཚར་གསུམ་རེ། འཇམ་དཔལ་མཚན་བརྗོད་ཚར་གསུམ་རེ། ལམ་རིམ་དང་སྔགས་རིམ་རེ་རེ། ༧རྒྱལ་བ་ཚངས་དབྱངས་རྒྱ་མཚོའི་གདུང་རུས། རིན་ཆེན་རིལ་བུ། རི་བོ་རྩེ་ལྔའི་མེ་ཏོག བྱ་ཁྱུང་ཨ་ར་པ་ཙའི་རིལ་བུ། རིན་ཆེན་ཕྱེ་མ། སྨན་སྣ་ཨ་ར་པ་ཙ་བདུན་གྱི་ཙན་དན་ཇོ་བོའི་ན་བཟའ། བྱང་ཆུང་ཤིང་གི་ལོ་མ། དུས་འཁོར་དབང་ཆེན་གྱི་རྡུལ་ཚོན། སྐུ་འབུམ་དུས་འཁོར་གྲྭ་ཚང་གི་རྡུལ་ཚོན། བྱ་ཁྱུང་གསེར་གདུང་རིལ་བུ། སྐུ་འབུམ་གསེར་སྡོང་གི་ལོ་མ། སྒྲོལ་མའི་བླ་རྡོ། དམ་ཅན་བླ་རྡོ། ཙ་རི་དང་། མངའ་རིས། ཧི་མ་ལ་ཡའི་ས་སྣ་ཆུ་སྣ། པཎ་ཆེན་སྐུ་ཕྲེང་བཅུ་བའི་བྱང་སེམས་རིལ་བུ། རྒྱ་གར་དང་རྒྱ་ནག་སོགས་གནས་ཆེན་དག་གི་ས་སྣ་ཆུ་སྣ་བཅས་བཞུགས་སོ། །
