གནས་མཆོག་ལྷ་སར་མཐུན་སྒྲིལ་མེ་ཏོག་རབ་ཏུ་བཞད་། ཆོས་དབྱིངས་སྐྱིད་ཀྱིས་ཡང་རྒྱལ་སྤྱིའི་འགྲན་སྡུར་ལས་ཨང་དང་པོ་བླངས། ཀྲུང་གོའི་མི་རིགས་སྐད་ཡིག་ཡིག་སྒྱུར་ཅུས་ཀྱིས་བོད་ཡིག་རིག་ནུས་ཡིག་སྒྱུར་མཉེན་ཆས་ཁྱབ་སྤེལ་ཚོགས་འདུ་སྤོས་ལྡན་གྲོང་དུ་འཚོགས་པ། ཚོགས་ཆེན་བཅུ་དགུ་པའི་དགོངས་དོན་མཛུབ་ཁྲིད་དུ་བྱས་ཏེ། ཆོས་ལུགས་དང་སྤྱི་ཚོགས་རིང་ལུགས་ཀྱི་སྤྱི་ཚོགས་གཉིས་འཚམ་མཐུན་ཡོང་པ་བྱ་དགོས། ནུབ་བྱང་དགེ་འོས་སློབ་ཆེན་གྱིས་དགེ་འོས་སློབ་མ་བགྲང་ལས་འདས་པ་བསྐྱངས་པ། གཞིས་རྩེ་གྲོང་ཁྱེར་གྱི་གཞུང་ལམ་ཐོག་རླངས་འཁོར་ཤར་གཏོང་ཐུབ་ཚད་སྤྱི་ལེ་ཁྲི་1.7ཟིན་པ། ལོ་རྒྱུས་ཡུན་རིང་ལྡན་པའི་ཞོ་ལེགས་ཀྱི་བོད་ཤོག བོད་ལྗོངས་གཞིས་རྩེས་གླུ་ལེན་གར་འཁྲབ་ཀྱིས་གནམ་ལོ་གསར་པ་བསུ་བ། ལྕགས་ལམ་སྡེ་ཁག་གིས་སྦྲེལ་མཐུད་དྲ་བ་བརྒྱུད་ནས་ཟས་རིགས་མངག་ཉོའི་ཞབས་ཞུ་རིམ་སྤོར་བྱས་ཏེ། མེ་འཁོར་མ་བསྐོར་གོང་གི་ཆུ་ཚོད་གཅིག་གི་སྔོན་དུ་མངག་ཉོ་བྱས་ཆོག་པ། ལྷ་སའི་ཚོགས་འདུ་གཉིས། ལྷ་ས་གྲོང་ཁྱེར་མི་དམངས་འཐུས་ཚོགས་སྐབས་བཅུ་གཅིག་པའི་ཚོགས་འདུ་ཐེངས་གསུམ་པར་གྲོས་གཞི་106འབྱོར།
ཀྲུང་གོའི་བོད་ལྗོངས་དྲ་བ། > ཆོས་ལུགས། > དགོན་སྡེ།

མི་ལ་རས་པས་བཞེངས་པའི་སྲས་མཁར་དགུ་ཐོག

སྤེལ་དུས 2018-10-10 ཡོང་ཁུངས། མཚོ་སྔོན་པོ་དྲ་བ། རྩོམ་པ་པོ།
           སྲས་མཁར་དགུ་ཐོག་ནི་ལྷོ་ཁ་ས་ཁུལ་ལྷོ་བྲག་རྫོང་ཁོངས་ཀྱི་སྲས་བྱ་བའི་ཡུལ་ཚོར་མངའ་ཞིང་། དེ་ནི་སྤྱི་ལོ1080ཡས་མས་སུ་བཀའ་བརྒྱུད་ཀྱི་བསྟན་པའི་སྲོལ་འབྱེད་མཁན་མར་བ་ལོ་ཙཱ་བ་ཆོས་ཀྱི་བློ་གྲོས་ཀྱི་ཐུགས་སྲས་རྗེ་བཙུན་མི་ལ་རས་པས་བཞེངས་པའི་ཁྱད་དུ་འཕགས་པའི་མཁར་རྙིང་ཞིག་ཡིན་ལ། ཐོག་སོ་འོག་མིན་རྩེ་དང་དེའི་འོག་བཀའ་བརྒྱུད་ཕོ་བྲང་། དེའི་འོག་བདེ་མཆོག་ལྷ་ཁང་། དེའི་འོག་ཚེ་དཔག་ལྷ་ཁང་། དེའི་འོག་གནས་བཅུ་ལྷ་ཁང་། དེའི་འོག་མར་པའི་སྒྲུབ་ཁང་། དེའི་འོག་དུད་འགྲོ་དང་དེའི་འོག་ཡི་དྭགས། ཐོག་སོ་དང་པོ་དམྱལ་བ་བཅས་སུ་བཀོད།
           རྗེ་བཙུན་མར་པ་ལོ་ཙཱ་བས་རང་ཉིད་ཀྱི་སློབ་མ་མི་ལ་རས་པར་སྡིག་སྒྲིབ་སྦྱང་བའི་ཆེད་བཞེངས་སུ་བཅུག་པའི་སྐུ་མཁར་ཐོག་ཚད་དགུ་ཡོད་པ་ཞིག་སྟེ། གངས་ལྗོངས་སྒྲུབ་བརྒྱུད་བསྟན་པའི་གསལ་བྱེད་ཆེན་པོ་རྗེ༌བཙུན་མི་ལ་རས་པས་དགུང་ལོ་ཉི་ཤུ་རྩ་དྲུག་ལ་ཕེབས་པ་མེ་སྦྲུལ(1077)ལོར་དམ་པའི་ཆོས་གསན་པའི་ཆེད་དུ་ལྷོ་བྲག་མར་པ་ལོ་ཙཱ་བའི་དྲུང་དུ་ཕེབས། དེར་བླ་མའི་གཟིམས་གཡོག་ཞབས་ཏོག་ལེགས་པར་ཞུས་ཀྱང་ཆོས་ཚིག་གནང་བའི་ཐོག  སྐུ་ཚེ་སྟོད་ལ་ཨ་ཁུ་དང་ཨ་ནེའི་དགྲ་ཤ་བླངས་ཆེད་མཐུ་ལ་བརྟེན་ནས་མི་སུམ་ཅུ་སོ་ལྔ་ཕྱི་མའི་ལམ་དུ་བཏང་བ་དང༌། སེར་བ་ཕབ་སྟེ་ཡུལ་མིའི་ལོ་ཏོག་རྨེག་མེད་དུ་གཏོང་བར་མཛད་པ་སོགས་སྒྲིབ་སྦྱོང་ལ་དགོངས་ཏེ་མཁར་ཟླུམ་པོ་དང༌། ཟླ་གམ། གྲུ་གསུམ་བཅས་བརྩིགས་སུ་བཅུག་སྟེ་ཐོག་ཚད་ལོངས་པ་དང་ཡང་བཤིག་ཏུ་བཅུག་པ་སོགས་སྡུག་སྦྱོང་ཚད་མེད་ལ་བརྟེན་ནས་སྐུ་རྒྱབ་ཏུ་སྒལ་རྨ་གསུམ་བྱུང་བའི་བར་དུ་དཀའ་བ་ཚད་མེད་སྤྱད་པའི་མཐར་མཁར་གྲུ་བཞི་དགུ་ཐོག་ཅན་ཞིག་མི་ལ་རས་པ་རང་ཉིད་གཅིག་པུར་བརྩིགས་སུ་བཅུག་པ་དེ་ཡིན།
           མཁར་འདིའི་ཐོག་སོ་བདུན་བར་མི་ལ་རས་པ་རང་ཉིད་གཅིག་པུས་བརྩིགས་གནང་མཛད་ཅིང༌། དེའི་སྟེང་གི་ཐོག་སོ་གཉིས་ལས་མི་གཞན་དག་གླས་ནས་བརྩིགས་པ་རེད། དེ་ནས་བླ་མ་མར་པས་མི་ལ་རས་པ་ལ་དབང་ལུང་ཁྲིད་ལ་སོགས་པ་མན་ངག་ཆ་ཚང་བ་གནང་སྟེ། ཐུགས་བརྩེ་ཆེན་པོས་བསྐྱངས་གནང་མཛད། སྐུ་མཁར་འདིར་སྲས་མཁར་ཞེས་འབོད་པའི་རྒྱུ་མཚན་ནི། མར་པ་ལོ་ཙཱ་བའི་ཆོས་བརྒྱུད་འཛིན་མཁན་གྱི་ཐུགས་རེ་གནང་ཡུལ་གཙོ་བོའི་གྲས་རང་ཉིད་ཀྱི་སྲས་དར་མ་མདོ་སྡེ་ཡིན་པས། དེའི་བཞུགས་ཡུལ་དུ་མཁར་དེ་བརྩིགས་པ་ལ་བརྟེན་ནས་མིང་དེ་ལྟར་ཐོགས། 《སྲས་མཁར་དགུ་ཐོག་གཙུག་ལག་ཁང་གི་དཀར་ཆག》ནང་འཁོད་པ་ལྟར་ན། མར་པ་ལོ་ཙཱ་བ་རང་ཉིད་ཀྱི་གཟིགས་དཔེའི་གྲས་མང་པོ་དང༌། སྲས་དར་མ་མདོ་སྡེས་བཞེངས་པ་གནང་བའི《ཉི་ཁྲི》མར་པ་ལོ་ཙཱ་བ་དང་ཡུམ་བདག་མེད་མ།  སྲས་དར་མ་མདོ་སྡེ་བཅས་ཀྱི་འདྲ་སྐུ། མར་པ་རང་ཉིད་ཀྱིས་རྒྱུན་སྤྱོད་སེང་ལྡེང་གི་ཕྱག་མཁར། ཐུགས་དམ་རྟེན་ཐང་ཀ་རྩ་ཆེན་ཁ་ཤས། ལྷོ་བྲག་དཔའ་བོ་གཙུག་ལག་ཕྲེང་བས་བཞེངས་པ་གནང་བའི་མི་ལ་རས་པའི་རྣམ་ཐར་ཆ་ཚང་གི་ཐང་ཀ་སོགས་རྩ་ཆེའི་རིག་གནས་དངོས་རྫས་གྲངས་ལས་འདས་པ་ཡོད་པ་དང༌། མར་པ་ལོ་ཙཱ་བ་རྒྱུན་བཞུགས་གནང་ཡུལ་མཁར་རུ་ཟེར་བའི་གཟིམས་ཁང་ནང་དུ་ཡང་མར་པ་ལོ་ཙཱ་བ་ཞལ་བཞུགས་དུས་ཀྱི་རྩ་ཆེའི་རྟེན་གསུམ་མང་པོ་ཡོད་པ། དེ་ཡི་ཉེ་འདབས་མི་ལ་རས་པའི་སྒྲུབ་ཁང་སྟག་གཉའི་བྲག་ལ་ཡང་རིན་ཐང་ཆེ་བའི་རྟེན་གསུམ་མང་པོ་ཡོད་ཚུལ་བཅས་འཁོད་འདུག་ཀྱང༌། དེང་སྐབས་ལྷག་ལུས་ཉུང་ཤས་ཙམ་མ་གཏོགས་བསྡད་ཡོད་ཚོད་མི་འདུགཞིབ་ཕྲ་གོང་གསལ《སྲས་མཁར་དགུ་ཐོག་གཙུག  ལག་ཁང་དང༌། ལྷོ་བྲག་གྲོ་བོ་ལུང༌། ཟངས་ཕུག སྟག གཉའ་བཅས་ཀྱི་གནས་ཡིག་རྣ་བའི་བདུད་རྩི་དད་པའི་དགའ་སྟོན》དཔེ་རྙིང་དབུ་ཅན་ལྷོ་བྲག་དཔར་མ་ཤོག་གྲངས27ཡོད་པ་དཔར་སློག་བརྒྱབ་པ་ཞིག་ཁོ་བོས་མཐོང་བྱུང་ལགས།