“སློབ་སྦྱོང”དང“ཚད་ལོན”ཟུང་འབྲེལ་བྱས་ནས“སློབ་སྦྱོང་གཉིས་དང་ཚད་ལོན་གཅིག”གི་རྒྱུན་རྣམ་ཅན་དང་ལམ་ལུགས་ཅན་ལ་སྐུལ་འདེད་གཏོང་དགོས།
སྤེལ་དུས 2018-03-01
ཡོང་ཁུངས། ཀྲུང་གོའི་བོད་ཀྱི་གསར་འགྱུར་དྲ་བ།
རྩོམ་པ་པོ། ཏོན་མའེ།
“སློབ་སྦྱོང་གཉིས་དང་ཚད་ལོན་གཅིག”གི་སློབ་སྦྱོང་སློབ་གསོའི་ལས་དོན་སྤེལ་ཚུན། ལྷོ་ཁ་གྲོང་ཁྱེར་གྱིས་དེ་ལས་དོན་གྱི་གནས་བབ་གལ་ཆེན་ལ་བཞག་པ་དང་ལས་དོན་གལ་ཆེན་ཞིག་ལ་བརྩིས་ནས་དམ་འཛིན་བྱས་ཏེ། བྱེད་སྟངས་རྒྱུན་ཆད་མེད་པར་གསར་གཏོད་བྱེད་པ་དང་རྣམ་པ་ཕུན་སུམ་ཚོགས་སུ་བཏང་ནས“སློབ་སྦྱོང་གཉིས་དང་ཚད་ལོན་གཅིག”གི་རྒྱུན་རྣམ་ཅན་དང་ལམ་ལུགས་ཅན་ལ་སྐུལ་འདེད་བཏང་བ་རེད། དུས་རབས་གསར་པས་ཏང་འཛུགས་སྐྱོང་ལས་དོན་ལ་བླང་བྱ་དེ་བས་མཐོ་བ་བཏོན་ཡོད། ང་ཚོས་ཐོག་མའི་བསམ་འདུན་མ་བརྗེད་པར་འགན་འཁྲི་བློ་ལ་བརྟན་པོར་ངེས་ནས“སློབ་སྦྱོང་གཉིས་དང་ཚད་ལོན་གཅིག”གི་སློབ་སྦྱོང་སློབ་གསོའི་ལས་དོན་ཏན་ཏིག་ངང་ཡག་པོ་སྤེལ་ཚེ། དུས་རབས་ཀྱི་འབོད་སྐུལ་དེ་བས་ལེགས་པར་དང་ལེན་དང་མི་དམངས་ཀྱི་རེ་འདུན་དེ་བས་ལེགས་པར་སྒྲུབ་ཐུབ།
འགན་འཁྲི་འཁུར་ཕོད་པ་བྱས་ནས“སློབ་སྦྱོང་གཉིས་དང་ཚད་ལོན་གཅིག”གི་སློབ་སྦྱོང་སློབ་གསོ་ལས་དོན་གལ་ཆེན་ཞིག་ལ་བརྩིས་ནས་དམ་འཛིན་བྱེད་དགོས་ཤིང་། ཏང་ཡོན་ལ་སློབ་གསོ་གཏོང་བ་དང་དོ་དམ་བྱེད་པ་ནི་ཏང་རྩ་འཛུགས་ཀྱི་རྨང་གཞིའི་རང་བཞིན་དང་རྒྱུན་གཏན་རང་བཞིན་གྱི་ལས་དོན་ཞིག་རེད། “སློབ་སྦྱོང་གཉིས་དང་ཚད་ལོན་གཅིག”གི་སློབ་སྦྱོང་སློབ་གསོ་སྤེལ་རྒྱུ་ནི་ཏང་གིས་བཏོན་པའི་བླང་བྱ་ཁ་གསལ་ཞིག་རེད་ལ། ཏང་རྩ་འཛུགས་ཀྱི་སློབ་གསོ་དོ་དམ་གྱི་འཇོན་ཐང་ཞིབ་བཤེར་བྱེད་པ་ཞིག་ཀྱང་རེད། རིམ་ཁག་ཏང་རྩ་འཛུགས་ཀྱིས་ངོས་འཛིན་གང་ལེགས་དང་། ཚད་མཐོའི་མཐོང་ཆེན། འགན་འཁྲི་འཁུར་ཕོད་པ། དོན་འཁྱོལ་ཤུགས་ཆེན་བཅས་བྱས་ནས“སློབ་སྦྱོང་གཉིས་དང་ཚད་ལོན་གཅིག”གི་སློབ་སྦྱོང་སློབ་གསོ་ལས་དོན་གྱི་གནས་བབ་གལ་ཆེན་དུ་འཇོག་པ་དང་རྨང་གཞིའི་རང་བཞིན་དང་རྒྱུན་གཏན་རང་བཞིན་གྱི་ལས་དོན་ལ་བརྩིས་ནས་བྱེད་སྒོར་ཏན་ཏན་ཏིག་ཏིག་གི་ཕན་འབྲས་ཐོན་པའི་འགན་ལེན་གྱིས“སློབ་སྦྱོང་གཉིས་དང་ཚད་ལོན་གཅིག”གི་སློབ་སྦྱོང་སློབ་གསོའི་ལས་དོན་རྒྱུན་རྣམ་ཅན་དང་ལམ་ལུགས་ཅན་ལ་སྐུལ་འདེད་གཏོང་དགོས།
“སློབ་སྦྱོང”བྱེད་ཤུགས་ཆེ་རུ་བཏང་ནས་ཏང་ཡོན་གྱི་བསམ་བློའི་འཚོ་བཅུད“ཀལ”གསབ་པ་དང་ཕུགས་བསམ་དང་དད་སེམས་ཀྱི“བླ་སྲོག”བརྟན་དུ་གཏོང་དགོས་ཤིང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་སློབ་སྦྱོང་ལ་ཚད་མཐོའི་མཐོང་ཆེན་བྱས་ནས་དཔེ་ཀློག་སློབ་སྦྱོང་བྱེད་མཁས་པོ་ནི་རང་རེའི་ཏང་གི་སྲོལ་རྒྱུན་བཟང་པོ་དང་ཆབ་སྲིད་ཀྱི་ལེགས་ཆ་ཞིག་ཡིན་ཞིང་། རང་རེའི་ཏང་གི་སྔོན་ཐོན་རང་བཞིན་མཐའ་འཁྱོངས་དང་འཕེལ་རྒྱས་གཏོང་བ། ཐོག་མཐའ་བར་གསུམ་དུ་དུས་རབས་ཀྱི་མདུན་གྲལ་དུ་སྐྱོད་པའི་འགན་ལེན་གལ་ཆེན་ཞིག་རེད་ལ། འགོ་ཁྲིད་ལས་བྱེད་པ་བདེ་ཐང་ངང་འཚར་ལོངས་དང་། བྱང་ཚད་ལེགས་སུ་གཏོང་བ། འཇོན་ཐང་ཆེ་རུ་གཏོང་བ། རྒྱུན་ཆད་མེད་པར་ཡར་རྒྱས་འགྲོ་བ་བཅས་ཀྱི་ཐབས་ལམ་གལ་ཆེན་ཞིག་ཀྱང་རེད་ཅེས་མཛུབ་སྟོན་གནང་ཡོད། དེ་དང་ཆབས་ཅིག་ཕུགས་བསམ་དང་དད་སེམས་ནི་གུང་ཁྲན་ཏང་མིའི་བསམ་བློའི་འཚོ་བཅུད“ཀལ”ལྟ་བུ་ཞིག་རེད། གལ་སྲིད་ཕུགས་བསམ་དང་དད་སེམས་མེད་པ་དང་ཕུགས་བསམ་དང་དད་སེམས་བརྟན་པོ་མེད་ཚེ། བསམ་བློའི་འཚོ་བཅུད“ཀལ”ཉམས་ནས“རུས་སྙིའི་ནད”ཕོག་སྲིད་ཅེས་ནན་བཤད་གནང་ཡོད། དུས་རབས་གསར་པར་ཏང་གི་དགོངས་པ་གསར་པ་དང་རིགས་པའི་གཞུང་ལུགས་གསར་པ་སློབ་སྦྱོང་ལ་གཙོ་བོར་ཤུགས་སྣོན་བརྒྱབ་སྟེ་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པས་བསམ་བློར་དྲག་ཆས་སྤྲོས་དགོས།
“ཚད་ལོན”ལ་སྣང་ཆེན་བྱས་ནས་ཏང་ཡོན་གྱི་གདོང་ལེན་དཔེ་བཟང་གི་ནུས་པ་འདོན་སྤེལ་གང་ལེགས་བྱས་ཏེ་ཏང་དང་མང་ཚོགས་དང་ལས་བྱེད་པ་དང་མང་ཚོགས་དབར་གྱི་འབྲེལ་བ་སྔར་བས་ཟབ་ཏུ་གཏོང་དགོས། ཀྲུང་གོ་གུང་ཁྲན་ཏང་ལ་ཞུགས་ན། དུས་དང་རྣམ་པ་ཀུན་ཏུ་ཏང་ཡོན་གྱི་ཚད་གཞི་གཞིར་བཟུང་རང་ཉིད་ལ་རེ་བ་བཏོན་ཏེ་ཐོག་མའི་བསམ་འདུན་མ་བརྗེད་པ་དང་འགན་འཁྲི་བློ་ལ་བརྟན་པོར་ངེས་ནས་ཏང་ཡོན་གྱི་གདོང་ལེན་དཔེ་བཟང་གི་ནུས་པ་འདོན་སྤེལ་ཡག་པོ་བྱས་ཏེ་ལས་ཀ་དོན་ཐོག་ཏུ་འཁྱོལ་བ་དང་མདུན་གྲལ་དུ་སྐྱོད་དགོས། འགན་འཁྲི་འཁུར་ཕོད་པ་དང་ལས་དོན་ཏན་ཏིག་བྱས་ནས་སྤྱིར་བཏང་གི་ལས་གནས་སུ་སྤྱིར་བཏང་མིན་པའི་གྲུབ་འབྲས་བཏོད་དེ་ཕྱོགས་ཡོངས་ནས་འབྱོར་འབྲིང་སྤྱི་ཚོགས་སྐྲུན་པའི་རྒྱལ་ཁ་ཕུ་ཐག་གཅོད་པ་དང་། དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་རླབས་ཆེན་རྒྱལ་ཁ་ལེན་པ། ཀྲུང་ཧྭ་མི་རིགས་རླབས་ཆེན་བསྐྱར་དར་གྱི་ཀྲུང་གོའི་ཕུགས་འདུན་མངོན་འགྱུར་ཡོང་བར་བྱེད་པ། མཛེས་སྡུག་ལྡན་པའི་འཚོ་བར་བཅངས་པའི་མི་དམངས་ཀྱི་རེ་འདོད་མངོན་འགྱུར་ཡོང་བ་བཅས་ཀྱི་ཆེད་དུ་མུ་མཐུད་འབད་བརྩོན་བྱེད་དགོས།
