སྤྱི་ཚོགས་ཀྱི་ལག་ལེན་ལ་བརྟེན་ནས་འཇོན་ཐང་འཕེལ་བར་བྱེད་དགོས།
སྤེལ་དུས 2018-04-23
ཡོང་ཁུངས། ཀྲུང་གོའི་བོད་ཀྱི་གསར་འགྱུར་དྲ་བ།
རྩོམ་པ་པོ། དབྱང་ཞའོ་ཅོན།
སྤྱི་ཚོགས་ཀྱི་ལག་ལེན་བྱེད་སྒོ་སྤེལ་བ་ནི་སློབ་གྲྭ་ཆེ་མོ་བའི་ཕྱོགས་བསྡུས་ལག་ལེན་འཇོན་ཐང་ཆེ་རུ་གཏོང་བའི་ཐབས་ལམ་གལ་ཆེན་ཞིག་ཡིན་ལ་སློབ་གྲྭ་ཆེ་མོ་བའི་བསམ་བློའི་སློབ་གསོའི་ལས་དོན་སྤེལ་བའི་ཐབས་ལམ་གལ་ཆེན་ཞིག་ཀྱང་རེད།
དུས་སྐབས་གསར་པར་མཐོ་སློབ་ཀྱིས་སྤྱི་ཚོགས་ཀྱི་ལག་ལེན་བྱེད་སྒོ་སྤེལ་སྐབས། ཆེད་ལས་ཀྱི་ཁྱད་ཆོས་དང་ཟུང་འབྲེལ་དམ་ཟབ་ཀྱིས་སློབ་གྲྭ་ཆེ་མོ་བར་དོ་དམ་བྱ་ཤུགས་ཆེ་རུ་གཏོང་བ་དང་། སློབ་གྲྭ་ཆེ་མོ་བས་སྤྱི་ཚོགས་ལ་ཞབས་འདེགས་དེ་བས་ལེགས་པ་ཞུ་བ། སྤྱི་ཚོགས་ལག་ལེན་ཆེད་ལས་ཅན་དང་སློབ་མའི་ལག་ལེན་གྱི་འཇོན་ཐང་ཆེ་རུ་འགྲོ་རྒྱུར་སྐུལ་འདེད་གཏོང་བ་སོགས་སྤྱི་ཚོགས་ཀྱི་ལག་ལེན་ཉིད་མཐོ་སློབ་ཀྱིས་ཤེས་ལྡན་མི་སྣ་གསོ་སྐྱོང་བྱེད་པའི་གྲུབ་ཆ་གལ་ཆེན་ཞིག་ཏུ་འགྱུར་བ་བྱེད་དགོས།
སྤྱི་ཚོགས་ཀྱི་ལག་ལེན་བྱེད་སྒོ་སྤེལ་བའི་ཁྲོད་སློབ་གྲྭ་ཆེ་མོ་བས་རིགས་པའི་གཞུང་ལུགས་ཀྱི་ཤེས་བྱ་ཁོང་དུ་ཆུད་ཚད་ལ་ཞིབ་དཔྱད་བྱེད་ཐུབ། སློབ་གྲྭའི་ནང་སྦྱང་པའི་ཤེས་བྱ་ལག་ལེན་དངོས་ནང་སྤྱད་ན་གཞི་ནས་དེའི་རིན་ཐང་འདོན་སྤེལ་ཐུབ་ནས་རིགས་པའི་གཞུང་ལུགས་ཀྱི་ཤེས་བྱ་གསར་གཏོད་དང་འཕེལ་རྒྱས་གཏོང་ཐུབ།
སྤྱི་ཚོགས་འཕེལ་རྒྱས་འགྲོ་བ་དང་བསྟུན་ནས་མི་རྣམས་ཀྱི་རིན་ཐང་ལྟ་བ་དང་འཚོ་བ་སྐྱེལ་སྟངས་ཀྱང་སྣ་མང་ཅན་དུ་འགྲོ་བཞིན་ཡོད། སློབ་གྲྭ་ཆེ་མོ་བའི་འཇིག་རྟེན་ལྟ་བ་དང་། མི་ཚེའི་ལྟ་བ། རིན་ཐང་གི་ལྟ་བ་བཅས་ད་དུང་དེ་ཙམ་ཟབ་མོ་མེད་པ་དང་ཉམས་མྱོང་དངོས་མི་འདང་བའི་དབང་གིས་ཁོང་ཚོར་རྙོག་འཛིང་ཆེ་བའི་གནས་ཚུལ་འཕྲད་སྐབས་ག་བྱེད་འདི་བྱེད་མེད་པར་གྱུར་ནས་སྤྱི་ཚོགས་ཐོག་གི་སྣང་ཚུལ་ངན་པར་དབྱེ་ཞིབ་ཡང་དག་བྱེད་ཁག་པོ་ཡོད་ལ་འཚོ་བའི་ཐད་ཀྱི་འགལ་རྐྱེན་ལ་ཡང་ཁ་གཏད་གཅོག་དཀའ། དེར་བརྟེན་མཐོ་སློབ་ཀྱིས་སྤྱི་ཚོགས་ཀྱི་ལག་ལེན་བྱེད་སྒོ་སྤེལ་ནས་སློབ་གྲྭ་ཆེ་མོ་བ་སྤྱི་ཚོགས་ནང་ཞུགས་པའི་གོ་སྐབས་བསྐྲུན་པ་དེས་སློབ་གྲྭ་ཆེ་མོ་བས་སྤྱི་ཚོགས་ལ་ངོས་འཛིན་དང་ཤེས་རྟོགས་ཐུབ་པ་དང་། བསམ་བློའི་གོ་རྟོགས་མཐོ་རུ་གཏོང་བ། བློ་སྟོབས་ལ་ཞུན་བརྡར་བཅས་ཐུབ་ནས་ཡང་དག་པའི་འཇིག་རྟེན་གྱི་ལྟ་བ་དང་། མི་ཚེའི་ལྟ་བ། རིན་ཐང་གི་ལྟ་བ་བཅས་གཏོད་རྒྱུར་ཕན་པ་ཤིན་ཏུ་ཆེ།