གྲོང་ཚོར་བཅའ་སྡོད་བྱེད་པར“ཞིབ་ཕྲའི་ལས་ཀར”དམ་འཛིན་བྱེད་མཁས་པོ་བྱེད་དགོས།
སྤེལ་དུས 2018-06-06
ཡོང་ཁུངས། ཀྲུང་གོའི་བོད་ཀྱི་གསར་འགྱུར་དྲ་བ།
རྩོམ་པ་པོ། ཝང་ཧྲན་གྱིས།
གྲོང་ཚོར་བཅའ་སྡོད་བྱས་ནས་རོགས་སྐྱོར་གྱི་ལས་དོན་སྤེལ་བ་ནི་མང་ཚོགས་དང་འབྲེལ་བ་ཟབ་ཏུ་གཏོང་བའི་ཐབས་ལམ་གལ་ཆེན་ཞིག་རེད། གནད་དོན་ཐག་གཅོད་ཡག་པོ་ཐུབ་ཚེ། གཞི་རིམ་གྱི་འཛུགས་སྐྲུན་བྱ་བར་ཕན་པ་ཐོན་པ་མ་ཟད། མང་ཚོགས་ཀྱི་བློ་ཡིད་ཚིམ་ཚད་ཀྱང་ཆེ་རུ་སོང་ནས་གཤམ་སྐྱོད་དང་གྲོང་སྡོད་བྱེད་སྒོར་དོན་སྙིང་ལྡན་ངེས། དེས་ན། “ཞིབ་ཕྲའི་ལས་ཀར”དམ་འཛིན་ཡག་པོ་བྱ་རྒྱུ་ནི་དེའི་ཁྲོད་ཀྱི་འགག་རྩ་ཞིག་རེད།
“ཞིབ་ཕྲའི་ལས་ཀ”ཞེས་པ་ནི་གཞི་རིམ་གྱི་དངོས་ཡོད་གནས་ཚུལ་མཚོན་པའི་གནད་དོན་དང་མི་སེར་གྱི་བདེ་རྩར་ཐུག་པའི་གནས་ཚུལ་ལ་ཟེར་བ་ཡིན།
དེ་ཡང“ཞིབ་ཕྲའི་ལས་ཀར”དམ་འཛིན་བྱེད་པར་ངེས་པར་དུ་གཞི་རིམ་ལ་སྐྱོད་དགོས་པ་དང་། དེའང་ཐོག་མར“སེམས་གཏིང་ནས་ཞུགས་པ”ནས་འགོ་བརྩམས་དགོས་ཏེ། ཟོལ་མེད་ཀྱི་བརྩེ་སེམས་དང་ལྷག་བསམ་བཅངས་ནས་གཞི་རིམ་དུ་སྐྱོད་པ་དང་མང་ཚོགས་དང་འབྲེལ་བ་བྱེད་དགོས། གཞི་རིམ་ལ་བརྩེ་བ་འཆང་བ་དང་མང་ཚོགས་གཉེན་ཉེར་བརྩིས་ཚེ། གཞི་ནས་མི་སེར་དང་གཅིག་སེམས་གཅིག་མཐུན་བྱུང་ནས་ཁོང་ཚོའི་སེམས་གཏིང་གི་སྐད་ཆ་ཐོས་ཐུབ་ལ། ཞིབ་ཕྲའི་གནད་དོན་འཕྱུགས་མེད་ངང་འཚོལ་ཐུབ་པ་དང་ཐག་གཅོད་བྱེད་པའི་ཐབས་ཤེས་ཀྱང་རྙེད་ཐུབ། “རང་ཉིད་དངོས་སུ་ཞུགས་རྒྱུའང”ཤིན་ཏུ་གལ་ཆེ་སྟེ། ཡུལ་དངོས་སུ་བསྐྱོད་དེ་ཕྱི་ཚུལ་རིང་ལུགས་དང་སྐབས་འཕྲལ་གྱི་ལས་རྗེས་ཐོན་རྒྱུར་མི་ལྟ་བ་དང“གཤམ་སྐྱོད”དང“གྲོང་སྡོད”གྱི་དཀའ་ངལ་ཁྱད་གསོད་ཀྱིས་གཞི་རིམ་ལ་སྐབས་ཤིག་རིང་དངོས་གནས་བསྡད་དེ་ཉེ་འཁོར་ལ་མང་ཙམ་ལྟ་བ་དང་མང་ཙམ་བསྐྱོད་ནས་མང་ཚོགས་དང་མཉམ་དུ་གླེང་མོལ་དང་འགལ་ཟླའི་གནད་དོན་ལ་བསམ་བློ་མང་ཙམ་བཏང་ཚེ། “ཞིབ་ཕྲའི་ལས་ཀ”དག་རང་བཞིན་གྱིས་རྟོགས་ནས་གསལ་པོར་མཐོང་བ་དང་ཐག་གཅོད་ཡག་པོ་ཐུབ་ངེས་རེད།
“ཞིབ་ཕྲའི་ལས་ཀར”དམ་འཛིན་བྱེད་པར་ཚན་རིག་དང་མཐུན་པའི་བསམ་བློ་བཏང་སྟེ། རྩོད་སྒྲུབ་ཀྱི་ཞིབ་འཇུག་དང་དངོས་སྒྲུབ་ཀྱི་ཐབས་ཤེས་ཁོང་དུ་ཆུད་པ་བྱེད་དགོས། “ཞིབ་ཕྲའི་ལས་ཀ”ནི་རྣམ་པ་མང་ཞིང་རྙོག་འཛིང་ཆེ་བ་ཞིག་ཡིན་པས། སྐབས་རེ་དོན་ལ་མི་གནས་པའི་ཚུལ་གྱིས་མངོན་གསལ་མེད་པ་ཡིན་ཡང་། ལས་ཀའི་མགོ་མཇུག་བར་གསུམ་ཚང་མར་གནས་ཤིང་ཤུགས་རྐྱེན་ཐེབས་ཀྱི་ཡོད་པས། ང་ཚོས་བསམ་བློ་ཞིབ་ཅིང་ཕྲ་བ་བཏང་ནས་གནད་དོན་ལ་བསམ་གཞིག་ཆ་ཚང་པོ་ཞིག་བྱེད་པ་དང་གནས་ཚུལ་ལ་རྩོད་སྒྲུབ་ཀྱིས་དབྱེ་ཞིབ་བྱེད་དགོས། གནས་ཚུལ་གནད་ལ་འཕིགས་པ་ཤེས་པ་དང་། སྣང་ཚུལ་ཆ་ལག་ཚང་པོར་ཁོང་དུ་ཆུད་པ། ཕན་ཚུན་གྱི་འབྲེལ་བ་གསལ་པོར་རྟོགས་པ། ཁྱོན་ཡོངས་འཕེལ་རྒྱས་ལ་དམིགས་ནས་གསེད་བཀྲོལ་བཅས་ཐུབ་ཚེ། གཞི་ནས་ངོ་བོ་དང་སྣང་ཚུལ་གང་ཡིན་པ་དང་། གཙོ་ཕལ་གང་ཡིན་པ། འཕེལ་རྒྱས་དང་འབྲེལ་བའི་སྤྱི་ཡོངས་སམ་ཡང་ན་བྱེ་བྲག་གི་གནས་ཚུལ་གང་ཡིན་པ། འཕྲལ་མར་ཐག་གཅོད་བྱེད་དགོས་པའམ་ཡང་ན་གནས་སྐབས་འཇོག་རུང་བ་གང་ཡིན་པ་བཅས་གསལ་པོར་མཐོང་ནས་གཞི་རིམ་གྱི་མང་ཚོགས་དང་འབྲེལ་བ་ཟབ་པའི“ཞིབ་ཕྲའི་ལས་ཀ”དག་གནད་ལ་འཁེལ་བའི་སྒོ་ནས་རྟོགས་པའི་ཁར་ཐག་གཅོད་ནུས་ལྡན་ཡང་ཐུབ་རྒྱུ་རེད།
