མི་རིགས་མཐུན་སྒྲིལ་གྱི་རྣམ་པ་གསར་པ་གཏོད་དགོས།
སྤེལ་དུས 2018-06-22
ཡོང་ཁུངས། ཀྲུང་གོའི་བོད་ཀྱི་གསར་འགྱུར་དྲ་བ།
རྩོམ་པ་པོ། ཧོའུ་ཕེང་ཧྥེ།
སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས“བོད་ཀྱི་ལས་དོན་གྱི་དམིགས་ས་དང་ཤུགས་རྒྱག་ས་ནི་ངེས་པར་དུ་མེས་རྒྱལ་གཅིག་གྱུར་སྲུང་སྐྱོང་དང་མི་རིགས་མཐུན་སྒྲིལ་ལ་ཤུགས་སྣོན་རྒྱག་པའི་ཐད་འཇོག་དགོས”ཞེས་མཛུབ་སྟོན་གནང་ཡོད། བོད་ཀྱི་ངོས་ནས་བརྗོད་ན། མི་རིགས་མཐུན་སྒྲིལ་ནི་མི་རིགས་ཁག་གི་མི་དམངས་ཀྱི་སྲོག་རྩ་དང་སྤྱི་ཚོགས་བརྟན་ལྷིང་དང་ཡུན་རིང་བདེ་འཁོད་ཀྱི་རྨང་རྡོ་ལྟ་བུ་རེད། ང་ཚོས་མི་རིགས་ཁག་གི་མཐུན་སྒྲིལ་ཆེ་མོའི་དར་ཆ་མཐོན་པོར་བསྒྲེངས་ནས་མི་རིགས་ཁག་འཆམ་མཐུན་མཉམ་གནས་དང་། ཕྱར་བ་གྲུ་འདེགས། ཞི་མཐུན་འཕེལ་རྒྱས་བཅས་ལ་སྐུལ་འདེད་གཏོང་བ་དང་མི་རིགས་མཐུན་སྒྲིལ་གྱི་རྣམ་པ་གསར་པ་ཞིག་ཧུར་ཐག་བཏོད་དེ་སྤྱི་ཚོགས་བརྟན་ལྷིང་དང་ཡུན་རིང་བདེ་འཁོད་ཀྱི་རྨང་གཞི་བརྟན་དུ་གཏོང་དགོས།
སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མི་རིགས་ཁག་གི་ལས་བྱེད་མང་ཚོགས་ཚང་མས་རང་ཉིད་ཀྱི་མིག་འབྲས་ལ་གཅེས་སྤྲས་བྱེད་པ་ལྟར་མི་རིགས་མཐུན་སྒྲིལ་ལ་གཅེས་སྤྲས་བྱེད་པ་དང་། རང་ཉིད་ཀྱི་ཚེ་སྲོག་ལ་གཅེས་སྤྲས་བྱེད་པ་ལྟར་མི་རིགས་མཐུན་སྒྲིལ་ལ་གཅེས་སྤྲས་བྱེད་དགོས་ཞེས་ནན་བཤད་ཡང་ཡང་གནང་ཡོད། མིག་སྔར་བོད་འདི་ཉིད་དུས་རབས་གསར་པར་སླེབས་ནས་མི་རིགས་མཐུན་སྒྲིལ་གྱི་ལས་དོན་ལ་འགྱུར་ལྡོག་གསར་པ་དང་ཁྱད་ཆོས་གསར་པ་འཕྲད་ཡོད་པས། ང་ཚོས་མི་རིགས་མཐུན་སྒྲིལ་གྱི་ལས་དོན་ཡག་པོ་བསྒྲུབ་རྒྱུའི་ཐད་བླང་བྱ་གསར་པ་བཏོན་ཡོད། དེར་བརྟེན། སྨྱུག་འཛིན་པས་མི་རིགས་མཐུན་སྒྲིལ་གྱི་ལས་དོན་ཡག་པོ་སྒྲུབ་པར་མི་རིགས་མཐུན་སྒྲིལ་ཡར་ཐོན་གྱི་བསམ་བློའི་རྨང་གཞི་རྒྱུན་ཆད་མེད་པར་བརྟན་དུ་བཏང་སྟེ་དྲིལ་བསྒྲགས་སློབ་གསོ་གཏོང་སྟངས་གསར་གཏོད་བྱེད་དགོས་པ་དང་། རྣམ་པ་སྣ་ཚོགས་དང་། ཐབས་ལམ་མང་པོ། གཞི་རྟེན་མང་པོ་བཅས་ལ་སྣང་ཆེན་བྱས་ནས་དྲིལ་བསྒྲགས་སློབ་གསོ་སྤེལ་བ་དང་། གཞི་རིམ་དུ་མང་ཙམ་སྐྱོད་པ་དང་མང་ཚོགས་ཁྲོད་མང་ཙམ་བསྐྱོད་དེ་དྲིལ་བསྒྲགས་སློབ་གསོའི་རྒྱ་ཁྱབ་རང་བཞིན་དང་། དམིགས་སའི་རང་བཞིན། ཤུགས་རྐྱེན་ཐེབས་ནུས་བཅས་ཆེ་རུ་གཏོང་དགོས་པ། མི་རིགས་མཐུན་སྒྲིལ་ཡར་ཐོན་གྱི་སྔོན་ཐོན་དཔེ་མཚོན་སྔོག་འདོན་ལ་སྣང་ཆེན་བྱས་ཏེ་སྔོན་ཐོན་དཔེ་མཚོན་དང་དཔེ་སྟོན་སྣེ་ཁྲིད་ཀྱི་ནུས་པ་རྒྱུན་ཆད་མེད་པར་ཆེ་རུ་གཏོང་བ་དང་། ལས་བྱེད་མང་ཚོགས་ཀྱི་མི་རིགས་མཐུན་སྒྲིལ་ཡར་ཐོན་ལ་སྐུལ་འདེད་གཏོང་སེམས་ཆེ་རུ་གཏོང་བ། མི་རིགས་ཁག་དབར་ཕན་ཚུན་ཤེས་རྟོགས་དང་། ཕན་ཚུན་བརྩི་འཇོག ཕན་ཚུན་བསྟུན་མཁས། ཕན་ཚུན་སློབ་སྦྱོང་། ཕན་ཚུན་མྱོང་རོལ། ཕན་ཚུན་རོགས་རམ་བཅས་བྱས་ནས་ཕན་ཚུན་དབར་གྱི་བརྩེ་དུང་ཟབ་ཏུ་གཏོང་དགོས་པ་བཅས་ཀྱི་ངོས་འཛིན་བྱེད་ཀྱི་ཡོད།
སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་གཞི་རིམ་གྱི་མི་རིགས་མཐུན་སྒྲིལ་གྱི་ཕུལ་བྱུང་འཐུས་མི་དང་འཇལ་འཕྲད་གནང་སྐབས། “གྲུའི་ཤུགས་གྲུ་གཡོར་ལ་ཡོད་པ་དང་། མིའི་ཤུགས་སེམས་སུ་ཡོད”ཅེས་མཛུབ་སྟོན་གནང་ཡོད། མི་རིགས་མཐུན་སྒྲིལ་གྱི་ལས་དོན་སྤེལ་བར་གཙོ་བོ་བསམ་བློ་སྤེལ་རེས་ལ་ཐུག་ཡོད་པས། རང་སྡོད་སར་མི་འཇོག་པ་དང་མི་སྡོད་སར་རང་སྡོད་ཐུབ་པ་བྱེད་དགོས། མི་རིགས་ཁག་གི་སྤུན་ཟླ་ཚོས་གཉེན་ཉེ་ལྟར་འཆམ་མཐུན་དང་ལྟ་རེས་སྲུང་རེས་བྱས་ཏེ་མི་རིགས་མཐུན་སྒྲིལ་དང་རྒྱལ་ཁབ་གཅིག་གྱུར་ལ་ཐུན་མོང་ཐོག་སྲུང་སྐྱོང་བྱེད་དགོས། དེ་ནི་ཀྲུང་ཧྭ་མི་རིགས་ཁྱིམ་ཚང་གཅིག་ལྟར་བརྩེ་བའི་གསོན་ཉམས་ལྡན་པའི་མཚོན་ཚུལ་ཞིག་ཡིན་པས་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས་གྲངས་ཉུང་མི་རིགས་ཀྱི་སྤུན་ཟླར་བྱམས་བརྩེའི་ཐུགས་ཁུར་གནང་ལུགས་གང་ལེགས་མཚོན་པ་དང་དེ་ནི་ང་ཚོས་དུས་བབ་གསར་པར་མི་རིགས་མཐུན་སྒྲིལ་ལས་དོན་ཡག་པོ་སྒྲུབ་པའི་བྱ་སྤྱོད་ཀྱི་རྩ་འཛིན་དང་རྩ་བའི་གཞི་འཛིན་ས་ཞིག་དེ་བས་རེད། དེར་བརྟེན། ཏང་གི་སྲིད་ཇུས་དོན་འཁྱོལ་བྱས་ནས་ལས་དོན་ཞིབ་ཚགས་སྒྲུབ་པ་དང་། མང་ཚོགས་ཀྱི་བློ་ལ་བབས་པ་ཞིག་སྒྲུབ་པ། མང་ཚོགས་ཀྱི་གམ་དུ་བྱ་བ་ཡག་པོ་དང་བྱ་བ་དངོས་སྒྲུབ་པ། ཁ་ཞེ་གཉིས་མེད་ཀྱིས་བྱ་སྤྱོད་སྤེལ་ནས་མང་ཚོགས་ཀྱི་ཡིད་ཆེས་ཐོབ་པར་བྱས་ནས་མི་རིགས་མཐུན་སྒྲིལ་གྱི་མང་ཚོགས་ཀྱི་རྨང་གཞི་བརྟན་དུ་གཏོང་གང་ཐུབ་བྱས་ཏེ་མི་རིགས་མཐུན་སྒྲིལ་གྱི་རྣམ་པ་གསར་པ་གཏོད་དགོས།
