ནོར་བུ་དོན་གྲུབ་ཀྱིས་ལྗོངས་དམངས་སྲིད་ཐིང་དུ་བརྟག་ཞིབ་གནང་བ་དང་འབྲེལ་བརྗོད་དོན་གཙོ་བོའི་ཏང་གི་སློབ་ཚན་ཁྲིད་གནང་བ།

           ཀྲུང་དབྱང་གི་བོད་ལྗོངས་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་བདུན་པ་དང་། ལྗོངས་ཏང་ཨུད་སྐབས་དགུ་པའི་ཚང་འཛོམས་གྲོས་ཚོགས་ཐེངས་བརྒྱད་པ། རྒྱལ་ཡོངས་དམངས་སྲིད་ལས་དོན་ཚོགས་འདུ་ཐེངས་བཅུ་བཞི་པ་བཅས་ཀྱི་དགོངས་དོན་ལག་བསྟར་དོན་འཁྱོལ་བྱ་ཆེད། ཚེས་16ཉིན་ལྗོངས་ཏང་ཨུད་ཀྱི་རྒྱུན་ཨུ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ནོར་བུ་དོན་གྲུབ་འབྲེལ་གཏུག་བྱ་ཡུལ་ཡར་རྒྱས་འགྲོ་འགོར་བའི་ཏང་ཀྲི་པུའུ་རང་སྐྱོང་ལྗོངས་ཕན་བདེ་རྒྱན་ཤོག་འགྲེམས་སྤེལ་ལྟེ་གནས་སུ་བརྟག་ཞིབ་གནང་བར་ཕེབས་ནས་ལས་དོན་སྙན་སེང་གསན་པ་དང་དམངས་སྲིད་ཁོངས་གཏོགས་ཀྱི་ཏང་ཡོན་དང་བཞུགས་མོལ་སྤེལ་རེས་གནང་བ་དང་འབྲེལ་བརྗོད་དོན་གཙོ་བོའི་ཏང་གི་སློབ་ཚན་ཁྲིད་གནང་བ་རེད།

           བརྗོད་དོན་གཙོ་བོའི་ཏང་གི་སློབ་ཚན་ཐོག་ནོར་བུ་དོན་གྲུབ་ཀྱིས་ཏང་ཡོན་དང་ལས་བྱེད་པའི་སྣེ་ཁྲིད་དེ་ཏང་གི་འོད་སྟོང་འཕྲོ་བའི་ལོ་རྒྱུས་ལམ་ཚད་ལ་ཕྱིར་དྲན་གནང་བ་དང་རང་ངོས་ཀྱི་ལས་ཀའི་ཉམས་མྱོང་དང་། སློབ་སྦྱོང་བསམ་གཞིག བརྟག་དཔྱད་ཞིབ་འཇུག་སོགས་གནས་ཚུལ་དང་ཟུང་འབྲེལ་བྱས་ཏེ་མཐའ་སྐྱོང་བོད་བརྟན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྣམ་བཤད་གལ་ཆེན་བོད་དུ་གྲུབ་འབྲས་ཐོན་པའི་ངང་ལག་བསྟར་བྱས་པ་རྒྱས་བཤད་གཏིང་ཟབ་གནང་བ་རེད།

           ནོར་བུ་དོན་གྲུབ་ཀྱིས་ལྗོངས་ཡོངས་ཀྱི་དམངས་སྲིད་འཐབ་ཕྱོགས་ཀྱི་ཏང་ཡོན་དང་ལས་བྱེད་པས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དུ་བྱ་རྒྱུ་མཐའ་འཁྱོངས་ཀྱིས་དུས་རབས་གསར་པའི་ཏང་གི་བོད་སྐྱོང་མཛད་ཇུས་ཕྱོགས་ཡོངས་ནས་ལག་ལེན་བསྟར་བ་དང་ཀྲུང་དབྱང་གི་བོད་ལྗོངས་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་བདུན་པའི་དགོངས་དོན་དམངས་སྲིད་ལས་ཀའི་ཞིབ་ཕྲའི་ལག་ལེན་ཁྲོད་དོན་འཁྱོལ་བྱས་ནས་གཞི་རྩའི་དམངས་འཚོ་འགན་ལེན་དང་། གཞི་རིམ་གྱི་སྤྱི་ཚོགས་བཅོས་སྐྱོང་། གཞི་རྩའི་སྤྱི་ཚོགས་ཞབས་ཞུ་སོགས་ཀྱི་འགན་འཁྲི་དེ་བས་ལེགས་པའི་སྒོ་ནས་ལག་བསྟར་བྱས་ཐོག་མཐུན་སྒྲིལ་དང་། འབྱོར་ཕྱུག ཤེས་དཔལ། ཞི་མཐུན། མཛེས་སྡུག་ལྡན་པ་བཅས་ཀྱི་སྤྱི་ཚོགས་རིང་ལུགས་དེང་རབས་ཅན་གྱི་བོད་གསར་འཛུགས་སྐྲུན་བྱ་ཆེད་ལེགས་སྐྱེས་གསར་པ་དེ་བས་ཆེ་བ་འབུལ་དགོས་ཞེས་ནན་བཤད་གནང་བ་རེད།

 རྩོམ་སྒྲིག་པ། རིག་གྲོལ།