ཀྲུང་གོའི་བོད་ལྗོངས་དྲ་བ། > བོད་ལྗོངས་ཞི་བས་བཅིངས་འགྲོལ་བཏང་ནས་ལོ་ངོ་70འཁོར་བར་རྟེན་འབྲེལ་ཞུ། > དཔྱད་གཏམ།

འགྱུར་ལྡོག་འདི་དག་ལས་དམངས་འཚོའི་བྱ་གཞག་ལ་འཕེལ་རྒྱས་ཕྱིན་པ་མངོན།

སྤེལ་དུས 2021-08-18 ཡོང་ཁུངས། ཀྲུང་གོའི་བོད་ལྗོངས་དྲ་བ། རྩོམ་པ་པོ།
གངས་ལྗོངས་ས་མཐོའི་མཆོང་སྐྱོད་གསར་པ།
—— བོད་ལྗོངས་ཞི་བས་བཅིངས་འགྲོལ་བཏང་ནས་ལོ་ངོ་70འཁོར་བའི་སྐབས་སུ་བྲིས།
            སྤྱི་ཁྱབ་ཧྲུའུ་ཅིས་བོད་ལྗོངས་ཞི་བས་བཅིངས་འགྲོལ་བཏང་ནས་ལོ་ངོ་70སོང་རིང་། ཏང་ཀྲུང་དབྱང་གི་འགྱུར་མེད་སྟོབས་ལྡན་གྱི་འགོ་ཁྲིད་དང་རྒྱལ་ཡོངས་མི་དམངས་ཀྱི་རྒྱབ་སྐྱོར་ཤུགས་ཆེན་འོག བོད་ལྗོངས་ཀྱི་མི་རིགས་ཁག་གི་ལས་བྱེད་པ་དང་མང་ཚོགས་ཚོས་དཀའ་སྤྱད་འབད་འཐབ་དང་སྙིང་རུས་ཆེན་པོས་འབད་བརྩོན་བྱས་པས། སྤྱི་ཚོགས་ལམ་ལུགས་ལ་ལོ་རྒྱུས་རང་བཞིན་གྱི་མཆོང་སྐྱོད་བྱུང་བ་དང་། དཔལ་འབྱོར་དང་སྤྱི་ཚོགས་ཕྱོགས་ཡོངས་ནས་འཕེལ་རྒྱས་ཕྱིན་པ། མི་དམངས་ཀྱི་འཚོ་བ་ཧ་ཅང་ལེགས་སུ་ཕྱིན་པ། གྲོང་ཁྱེར་དང་གྲོང་གསེབ་ཀྱི་རྣམ་པར་སྔོན་ཆད་དང་བསྡུར་ཐབས་མེད་པའི་འགྱུར་ལྡོག་བྱུང་ཡོད་ཅེས་གསུངས་པ་རེད།
           སྔོན་ཆད་ཀྱི་རྣམ་པ་དང་ད་ཆའི་རྣམ་པ་གསར་པའི་ཐོག་ནས་བོད་ལྗོངས་ཀྱི་ལོ་ངོ་70ཡི་འཕོ་འགྱུར་ཆེན་པོ་དང་ལོ་ངོ་སྟོང་གི་མཆོང་སྐྱོད་མཚོན་གྱི་ཡོད།
རྣམ་པ་གསར་པ།
           “དཀའ་ཉེན་ཧ་ཅང་ཆེ་བ་དང་གང་ཅིའི་ཐད་ལྟ་ས་གང་ཡང་མེད་པ”ནས་ལམ་བུ་ཤར་གཏོང་དང་། གློག་བརྟན་པོ། ཆ་འཕྲིན་ཤར་གཏོང་བཅས་བར་གྱི་འགྱུར་ལྡོག
           ཐང་མའོ་ལེང་གིས་བོད་ལྗོངས་མེ་ཏོག་རྫོང་གྲོང་དུ་ཐེངས་དང་པོ་བསྐྱོད་པའི་སྔར་སོང་གི་བྱ་བ་རྡོ་ལ་རི་མོ་བརྐོས་པ་བཞིན་གསལ་ལེར་དྲན་པ་སྟེ། ལོ་ངོ་20ལྷག་ཙམ་གྱི་གོང་ཁོང་ནི་མེ་ཏོག་རྫོང་གི“ཀུ་ལི་དཔུང་ཆེན”གྱི་གྲས་ཤིག་ཡིན། ཁོང་གིས་རྡོག་ཁྲེས་ཁུར་ནས་སྨན་གླིང་རྫོང་ཕད་གྲོང་རྡལ་ནས་མེ་ཏོག་རྫོང་གྲོང་དུ་བསྐྱོད་པར་ཉིན་བཅུ་གྲངས་ཁ་ཤས་འགོར་གྱི་ཡོད། སྐབས་དེ་དུས་ཀྱི་མེ་ཏོག་ནི་རང་རྒྱལ་གྱི་གཞུང་ལམ་ཤར་གཏོང་མི་ཐུབ་པའི་རྫོང་མཇུག་ཤོས་དེ་རེད།
           ད་ཆ་ཁྲབ་རྨོག་གྲོང་རྡལ་ནས་མེ་ཏོག་རྫོང་གྲོང་བར་གྱི་གཞུང་ལམ་བརྒྱུད་དགའ་ལུང་ལའི་གངས་རི་བརྒལ་བར་ཕུག་ལམ་དུ་སྐར་མ་6ཙམ་ལས་འགོར་གྱི་མེད། མེ་ཏོག་རྫོང་གྲོང་དུ་སྐྱོད་སའི་འགྲིམ་འགྲུལ་གྱི་གནད་ཆེའི་ལམ་བུ་གཞན་ཞིག་ཡིན་པའི་ཕད་གྲོང་རྡལ་ནས་མེ་ཏོག་རྫོང་གྲོང་བར་གྱི་གཞུང་ལམ་དུའང་ད་ལོའི་ཟླ་5པར་རླངས་འཁོར་ཤར་གཏོང་ཐུབ་ཡོད། སྔོན་ཆད་ཀྱི“ས་མཐོའི་ཁེར་ཆགས་གླིང་ཕྲན”ད་ཆ་སྐོར་ལམ་སྦྲེལ་མཐུད་ཐུབ་ཡོད།
           འགྲིམ་འགྲུལ་བྱ་གཞག་འཕེལ་རྒྱས་ཆེན་པོ་ཕྱིན་པ་མེ་ཏོག་རྫོང་གྲོང་གཅིག་པུ་ག་ལ་ཡིན། ད་ཆ་བོད་ལྗོངས་ཀྱི་གཞུང་ལམ་གྱི་དྲ་བ་འཕྲེད་གཞུང་གང་སར་ཁྱབ་པ་སྟེ། གཞུང་ལམ་ཤར་གཏོང་ཐུབ་པའི་ལམ་ཐག་སྤྱི་ལེ་ཁྲི་11.88ཟིན་པ་དང་། སྒྲིག་གཞི་ཚང་བའི་གྲོང་ཚོ་ཚང་མར་གཞུང་ལམ་ཤར་གཏོང་ཐུབ་པ།
           ཟླ་6པར་ཁྲོན་བོད་ལྕགས་ལམ་ལྷ་ཉིང་དུམ་བུར་མེ་འཁོར་ཤར་གཏོང་ཐུབ་ཡོད། སྔོན་ཆད་ལྷ་ས་ནས་ཉིང་ཁྲི་བར་སྐྱོད་པར་གཞུང་ལམ་གཅིག་པུ་ལས་མེད། ད་ཆ“མེ་འཁོར་ལ་བསྡད་ནས་ལྷ་སར་འགྲོ་བ”དེ་དར་སྲོལ་གསར་པ་ཞིག་ཏུ་གྱུར་ཡོད།
           ལོ་ངོ་10ཡི་གོང་བོད་ལྗོངས་ད་དུང་གློག་དྲ་ཁེར་རྐྱང་འཁོར་རྒྱུག་བྱེད་ཅིང་། སྐབས་དེར་གློག་ཤུགས་བརྟན་པོ་མེད་པས་གློག་ཡང་སེ་ཆད་ཀྱི་ཡོད། ལོ་ངོ་10སོང་རྗེས་མཚོ་བོད་གློག་ཤུགས་དྲ་སྦྲེལ་དང་། ཁྲོན་བོད་གློག་ཤུགས་དྲ་སྦྲེལ། བོད་དབུས་ཀྱི་གློག་ཤུགས་དྲ་སྦྲེལ། མངའ་རིས་དྲ་སྦྲེལ་ལས་གྲྭ་བཅས“གློག་ཤུགས་མཁའ་ལམ”4ཡིས་གངས་ལྗོངས་ས་མཐོར་འོད་སྣང་སྦྱིན་པ་དང་། གློག་དྲ་གཙོ་བོ་བོད་ལྗོངས་ཡོངས་ཀྱི་ས་ཁུལ་དང་གྲོང་ཁྱེར་7དང་རྫོང(ཆུས)74ལ་ཁྱབ་ཡོད།
           འབྲི་ཆུའི་ངོགས་ནས་ཇོ་མོ་གླང་མའི་རྩེ་མོ་བར་དང་། བྱང་རྩྭ་ཐང་ནས་མཐའ་མཚམས་གྲོང་ཚོ་དང་གྲོང་རྡལ་བར་དེང་རབས་འཕྲིན་གཏོང་མི་སེར་དཀྱུས་མའི་ཁྱིམ་དུ་ཤར་གཏོང་ཐུབ་ནས་ཆ་འཕྲིན་མྱུར་བགྲོད་ལམ་བུ་མེས་རྒྱལ་གྱི་ས་ཕྱོགས་གང་སར་ཤར་གཏོང་ཐུབ་ཡོད། ད་ཆ་བོད་རང་སྐྱོང་ལྗོངས་ཀྱི་སྒྲིག་གཞི་ཚང་བའི་གྲོང་ཚོ(གྲོང་ལྷན)ཚང་མར་འོད་སྐུད་ཤར་གཏོང་ཐུབ་པའི་བསྡུར་ཚད་དང་4Gདྲ་རྒྱ་ཤར་གཏོང་ཐུབ་ཚད་99%ཟིན་པ་དང་། བོད་ལྗོངས་ཀྱི་མི་དམངས་ཀྱིས་སྒུལ་བདེའི་གཏོང་སྤྲོད་སྔ་ས་ནས་རྒྱུན་གཏན་དུ་གྱུར་པ་དང“ཐད་གཏོང་བྲིན་ཚོང”དར་སྲོལ་གསར་པ་ཞིག་ཏུ་གྱུར་ཡོད།
འཚོ་བ་གསར་པ།
           ཤིན་ཏུ་དབུལ་བ་ནས་ཕྱོགས་ཡོངས་ནས་འབྱོར་འབྲིང་དུ་སླེབས་པ།
           གསར་འགོད་པ་མངའ་རིས་ས་ཁུལ་གྱི་སྒེར་རྩེ་རྫོང་གྲོང་ཉེ་འདབས་སུ་གནས་པའི“སྨོན་སྒྲུབ་སྡེ་ཁུལ”དུ་བསྐྱོད་དེ་འབད་འཐབ་བྱས་ནས་ཕུགས་འདུན་མངོན་འགྱུར་བྱུང་བའི་གཏམ་རྒྱུད་ཉན་པ་ཡིན།
           རྡོ་ཆུང་ནི་གཏམ་རྒྱུད་ནང་གི་མི་སྣ་གཙོ་བོའི་གྲས་ཤིག་ཡིན་པ་དང་རྫོང་དེའི་ཐག་རིང་འབྲོག་ཁུལ་ནས་སྤོས་པ་ཞིག་རེད། དེ་སྔའི་ཁང་པ་ནི་ས་ཕག་གི་ཁང་པ་ཡིན་པ་དང་ནང་མི་ཚང་མས་ཕྱུགས་རིགས་ལ་བརྟེན་ནས་འཚོ་ཐབས་བྱེད་ཀྱི་ཡོད། ལོར་ཡོང་འབབ་སྒོར་2000ཙམ་ཡང་ཟིན་གྱི་མེད། ལོ་ཤས་གོང་ཡུལ་གཞན་དུ་གནས་སྤོས་དབུལ་སྐྱོར་གྱི་སྲིད་ཇུས་ལ་བརྟེན་ནས་རྡོ་ཆུང་གི་ནང་མི་ཚང་མ་རྫོང་གྲོང་གི་ཁང་པ་གསར་པར་སྤོས་པའི་ཁར་ཁོང་ལ་ཡོང་འབབ་བརྟན་པོ་ཡོད་པའི་ལས་ཀ་ཞིག་ཀྱང་རག་ཡོད།   
           དབུལ་སྒྲོལ་འགག་སྒྲོལ་གྱི་ཐོག་མའི་དུས་སུ་བོད་ལྗོངས་ནི་རང་རྒྱལ་གྱི་ཞིང་ཆེན་རིམ་པའི་གཅིག་སྡུད་ཡུག་སྦྲེལ་གྱི་དམིགས་བསལ་དཀའ་ངལ་ཡོད་པའི་ས་ཁུལ་འབའ་ཞིག་དེ་ཡིན་པ་དང་། རྒྱལ་ཡོངས་ཀྱི་དབུལ་པོ་ཐོན་ཚད་མང་ཤོས་དང་། དབུལ་པོའི་ཚད་གཞི་མཐོ་ཤོས། དབུལ་སྐྱོར་མ་གནས་མཐོ་ཤོས། དབུལ་སྒྲོལ་དཀའ་ཚེགས་ཆེ་ཤོས་བཅས་ཀྱི་ཤིན་ཏུ་དབུལ་བའི་ས་ཁུལ་ཞིག་རེད། 2019ལོའི་ལོ་མཇུག་ཏུ་སླེབས་སྐབས་བོད་ལྗོངས་ཀྱི་རྫོང་དང་ཆུས་དབུལ་པོ་74ཚང་མའི་དབུལ་ཞྭ་ཕུད་པ་དང་ཡིག་ཚགས་དང་གཱ་བཟོས་པའི་མི་འབོར་དབུལ་པོ་ཁྲི་62.8ཚང་མ་དབུལ་སྒྲོལ་ཐུབ་ནས་བོད་ལྗོངས་འདི་ཉིད་ལོ་ངོ་སྟོང་གི་དབུལ་པོ་དབུལ་རྐྱང་གི་འཆིང་རྒྱ་ལས་ཐར་ཡོད།
           ཆབ་མདོར་བཅར་འདྲི་བྱེད་སྐབས་ས་ཆ་འདིར་དམིགས་བསལ་གྱི་ཁྱད་ཆོས་ལྡན་ཡོད།    
           ཆབ་མདོ་གྲོང་ཁྱེར་མི་དམངས་སྨན་ཁང་དེ་བོད་ལྗོངས་ཀྱི་དེང་རབས་སྨན་ཁང་དང་པོ་ཡིན་པའི་ངོས་ནས་སྐབས་དེ་དུས་མང་ཚོགས་ཀྱི་སྡོད་ཁང་ཞིག་ཏུ་སྒོ་བྱང་བཀལ་ནས་བཙུགས་པ་དང་། ཉིན་རེར་སྨན་ཁང་དུ་སྨན་བཅོས་བྱེད་མཁན་ནད་པ་མི་ཐེངས་20ཙམ་ལས་ཟིན་གྱི་མེད། ད་ཆ་ཀ་པ་རིམ་པ་གསུམ་པའི་སྨན་ཁང་དེར་ནད་ཐོག་སྨན་བཅོས་དང་། བདེ་སྲུང་། ཚན་ཞིབ། སློབ་ཁྲིད། མྱུར་སྐྱོབ་བཅས་གཞི་གཅིག་ཏུ་འདུས་ནས་ལོ་ལྟར་གཤགས་བཅོས་ཐེངས་6000ལྷག་ཙམ་བྱེད་ཀྱི་ཡོད།
           འགྱུར་ལྡོག་འདི་དག་ལས་བོད་ལྗོངས་ཀྱི་དམངས་འཚོའི་བྱ་གཞག་ཉིན་བཞིན་འཕེལ་རྒྱས་ཕྱིན་པ་མངོན་ཐུབ།
           གསོན་ཤུགས་གསར་པ།
           དབུལ་ཞིང་ཕོངས་པ་ནས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་བཏང་བ།
           ཞི་བས་བཅིངས་འགྲོལ་མ་བཏང་གོང་བོད་འདི་ཉིད་དབུལ་ཞིང་ཕོངས་པ་ཞིག་ཡོད་ཅིང་། འཕེལ་རྒྱས་ཀྱི་འགོ་འཛུགས་ཕྱི་བ་དང་རྨང་གཞི་ཞན་པས་བོད་ལྗོངས་ཀྱི་དོན་དངོས་དང་མཐུན་པའི་སྤུས་ཚད་མཐོ་བའི་འཕེལ་རྒྱས་ཀྱི་ལམ་བུའི་ཐོག་ཇི་ལྟར་སྐྱོད་དགོས་སམ།
           ལྷོ་ཁ་གྲོང་ཁྱེར་སྣེ་གདོང་ཆུས་ཁྲ་འབྲུག་གྲོང་རྡལ་ཁེ་གསུམ་སྡེ་ཁུལ་ནི་བོད་ལྗོངས་ཀྱི་དམངས་གཙོའི་བཅོས་སྒྱུར་གྱི་གྲོང་ཚོ་དང་པོ་དེ་ཡིན་ཞིང་། ལོ་དེར་ཡར་ལངས་ཞིང་བྲན་གྱི་གླུ་སྒྲ་ཡང་གནས་དེ་ནས་གངས་ལྗོངས་ས་མཐོའི་ས་ཕྱོགས་གང་སར་གྲགས།
           སྡེ་ཁུལ་གྱི་ཧྲུའུ་ཅི་དང་པོ་སྤེན་པ་ཚེ་རིང་གིས་གསར་འགོད་པར་འབབ་འཕར་སྐོར་གླེང་སྐབས། ཁེ་གསུམ་གྲོང་ཚོ་ནི་ལྷོ་ཁ་གྲོང་ཁུལ་དང་ཐག་ཉེ་བ་མ་ཟད། གསར་བརྗེའི་ཐོན་ཁུངས་དང་། གྲོང་འདབས་དཔལ་འབྱོར། ངལ་ནུས་དཔལ་འབྱོར། གསར་བརྗེའི་ཡུལ་སྐོར་བཅས་ཡོད་པས། དེ་དག་ཚང་མ་འབབ་འཕར་གྱི་ཐབས་ལམ་བཟང་ཤོས་ཤ་སྟག་རེད་ཅེས་བརྗོད་བྱུང་།   
           བསྡོམས་རྩིས་གྲངས་གཞི་ལས་མངོན་པར། བོད་ལྗོངས་ཀྱི་ཞིང་འབྲོག་པའི་ཡོང་འབབ་ལོ་18བསྟུད་མར་གྲངས་གནས་གཉིས་འཕར་བ་དང་ལོ་6བསྟུད་མར་རྒྱལ་ཡོངས་ཀྱི་འཕར་ཚད་ཀྱི་ཨང་དང་པོ་རྒྱུན་འཁྱོངས་ཐུབ་ཡོད། 2020ལོར་བོད་ལྗོངས་ཀྱི་གྲོང་གསེབ་ཀྱི་གྲོང་མི་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་སྒོར་14598ཟིན་ནས་ལོ་རྒྱུས་ཀྱི་དཔྱད་གཞིའི་ཡིག་རིགས་ནང་འཁོད་པའི་1965ལོའི་ལྡབ་135ཟིན་ཡོད།    
           སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་རྒྱུའི་ཐད་བོད་ལྗོངས་ཀྱིས་དགེ་སྤེལ་སྐྱོན་སྤང་དང་ཡུལ་བབ་དང་བསྟུན་ནས“ཁྱད་ལྡན་ལམ་བུར”བསྐྱོད་རྒྱུ་མཐའ་འཁྱོངས་བྱས་ཤིང་། “ལོ་ལྔ་ཚན་བཅུ་གསུམ་པའི”རིང་། བོད་ལྗོངས་ཀྱིས་ཡུལ་སྐོར་བ་མི་ཐེངས་དུང་ཕྱུར་1.6ཙམ་ལ་སྣེ་ལེན་ཞུས་པར་ཡུལ་སྐོར་ཡོང་འབབ་ཁྱོན་སྒོར་དུང་ཕྱུར་2100ལྷག་ཙམ་བྱུང་ཡོད། མིག་སྔར་བོད་ལྗོངས་ཀྱིས་ཀྲུང་དབྱང་གི་རྒྱབ་སྐྱོར་འོག་འཛམ་གླིང་གི་ཡུལ་སྐོར་དམིགས་སའི་ཁུལ་གལ་ཆེན་བསྐྲུན་རྒྱུར་ནུས་ཤུགས་ཡོད་རྒུས་སྐུལ་འདེད་གཏོང་བཞིན་ཡོད་པས་ཕུགས་ཀྱི་ལེགས་ཆ་དང་མདུན་ལྗོངས་ཡངས་པོ་ཡོད། 
རྩོམ་སྒྲིག་པ། རིག་གྲོལ།