| ལན་ཀྲིག་ལྟེ་གནས་གནམ་གཤིས་རྟོག་དཔྱོད་ཁང་གིས་གསར་དུ་བསྒྲགས་པའི་གནམ་གཤིས་སྔོན་བརྡ་ལྟར་ན། རྗེས་ཕྱོགས་ཀྱི་ཉིན་ལྔའི་རིང་ལ་ཀན་སུའུ་འབྲུག་དཀར་གཙང་བོའི་སྟོད་རྒྱུད་དུ་བསྟུད་མར་ཆར་འབབ་རྒྱུ་ཡིན་པ་དང་། ས་ཆ་ཁ་ཤས་ལ་ཆར་ཆེན་པོ་དང་དྲག་ཆར་འབབ་རྒྱུ་རེད་ཟེར། ལན་ཀྲིག་ལྟེ་གནས་གནམ་གཤིས་རྟོག་དཔྱོད་ཁང་གིས་སྔོན་བརྡ་བཏང་བ་ལྟར་ན། ཚེས་བརྒྱད་ཉིན་གྱི་ནམ་གུང་ནས་ཚེས་དགུ་ཉིན་གྱི་ཉིན་དཀར་བར། འབྲུག་དཀར་གཙང་བོའི་སྟོད་རྒྱུད་དུ་སྤྲིན་མང་བ་ནས་གནམ་རུབ་རྒྱུ་ཡིན་པ་དང་ཆར་འབབ་རྒྱུ་ཡིན་ལ། ས་ཆ་ཁ་ཤས་ལ་ཆར་འབྲིང་ཙམ་ནས་ཆར་ཆེན་པོ་འབབ་རྒྱུ་ཡིན་པར་མ་ཟད། གློག་འཁྱུག་པ་དང་མཚམས་ལ་ལར་རླུང་ཆེན་གཡུག་རྒྱུ་རེད། ཚེས་བཅུ་ཉིན་གྱི་ནམ་གུང་ནས་ཚེས་བཅུ་གཉིས་ཉིན་བར། འབྲུག་དཀར་གཙང་བོའི་སྟོད་རྒྱུད་དུ་གནམ་རུབ་པ་ནས་ཆར་འབྲིང་ཙམ་དང་ཆར་ཆེན་པོ་འབབ་རྒྱུ་ཡིན་ལ། ས་ཆ་ཁ་ཤས་ལ་དྲག་ཆར་འབབ་རྒྱུ་ཡིན་པ་དང་། ཆར་འབབ་ཚད་ཧའོ་མུས་བཞི་བཅུ་ནས་བརྒྱད་ཅུ་ལ་འབུད་རྒྱུ་རེད། ཚེས་བཅུ་གསུམ་ཉིན། འབྲུག་དཀར་གཙང་བོའི་སྟོད་རྒྱུད་ལ་གནམ་རུབ་པ་ནས་ཆར་འབྲིང་ཙམ་འབབ་རྒྱུ་ཡིན་པ་དང་། ས་ཆ་ཁ་ཤས་ལ་ཆར་ཆེན་པོ་ནས་དྲག་ཆར་འབབ་རྒྱུ་ཡིན་ལ། ཆར་འབབ་ཚད་ཧའོ་མུས་སུམ་ཅུ་དང་ལྔ་བཅུ་ལ་འབུད་རྒྱུ་རེད། ལན་ཀྲིག་ལྟེ་གནས་གནམ་གཤིས་རྟོག་དཔྱོད་ཁང་གིས་གསལ་འདེབས་བྱེད་རྒྱུར། རྗེས་ཕྱོགས་ཀྱི་ཉིན་ལྔར་བསྟུད་མར་ཆར་བབས་ཚེ་གནོད་འཚེའི་གནས་ཚུལ་སྔར་ལས་རྙོག་འཛིང་དུ་འགྱུར་བ་དང་། རྒུད་སྐྱོབ་བྱ་བ་དཀའ་ངལ་སྔར་ལས་ཆེན་པོར་འཕྲད་རྒྱུ་ཡིན་པས། བྱེད་ཐབས་སྤྱད་དེ་སྔ་མོ་ནས་ཁ་གཏད་འཇལ་དགོས་ཟེར། |
