ཟླ་བརྒྱད་པའི་ཚེས་བཅུ་ཉིན། ཞིང་ཆེན་དམངས་སྲིད་ཐིན་གྱིས་ཞིང་ཆེན་རྒུད་སྐྱོབ་དངོས་རྫས་གསོག་འཇོག་ལྟེ་གནས་ནས་མཛད་སྒོ་བསྡུས་ཏེ། ཀན་སུའུ་ཞིང་ཆེན་ཀན་ལྷོ་བོད་རིགས་རང་སྐྱོང་ཁུལ་འབྲུག་ཆུ་རྫོང་གི་ཆུ་ལོག་ཆེན་པོའི་གནོད་འཚེ་ཐེབས་སར་སྐོམ་ཆུ་ཏུན་དྲུག་ཅུ་དང་སྟབས་བདེའི་ཐུག་པ་ཏུན་ཉི་ཤུ་ཞལ་འདེབས་སུ་ཕུལ།  ཟླ་བརྒྱད་པའི་ཚེས་བདུན་ཉིན་གྱི་དགོང་མོར། འབྲུག་ཆུ་རྫོང་ལ་ཆུ་ལོག་ཆེན་པོའི་གནོད་འཚེ་ཐེབས་ནས། ས་དེའི་མི་དམངས་མང་ཚོགས་ཀྱི་ཚེ་སྲོག་དང་རྒྱུ་ནོར་ལ་གྱོང་གུད་ཚབས་ཆེན་ཐེབས། གནོད་འཚེ་བྱུང་རྗེས། ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གི་མགོ་ཁྲིད་ཀྱིས་དེར་ཧ་ཅང་མཐོང་ཆེན་བྱས། ཞིང་ཆེན་དམངས་སྲིད་ཐིན་གྱིས་ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གི་མགོ་ཁྲིད་ཀྱིས་ཆོག་མཆན་བཀོད་པའི་མཛུབ་སྟོན་གྱི་དགོངས་དོན་ལྟར། རྒུད་སྐྱོབ་དངོས་རྫས་མྱུར་དུ་རྩ་འཛུགས་བྱས། རྒུད་སྐྱོབ་དངོས་རྫས་དེ་དག་ཚེས་བཅུ་གཅིག་ཉིན་གནོད་ཐེབས་ས་ཁུལ་དུ་ཐོན་ངེས་ཡིན།