མ་ཎི་ཡིག་དྲུག་འོད་ཀྱི་འཁོར་ལོའི་ཕན་ཡོན།
2012-05-25 10:19:00 | རྩོམ་པ་པོ།: ལྗོན་སྨྱུག་ནས་བསྒྲིགས། | ཡོང་ཁུངས།: དྲ་རྒྱ་ལས།

                                 ཡིག་དྲུག་གི་འོད་ཀྱི་འཁོར་ལོའི་ཁུངས་དང་བསྐོར་ཚུལ་གྱི་གནད་དམིགས་པ་བྱ་ཚུལ། 


                

                    

         

༄༅།   །ན་མོ་གུ་རུ་ཨཱརྱ་ལོ་ཀེ་ཤྭ་རཱ་ཡ། གྲངས་མེད་དུས་ནས་ཚོགས་གཉིས་གོམས་པའི་མཐུས། །རྨད་བྱུང་ཐུགས་རྗེའི་གཏེར་གྱིས་ཡོངས་གང་བས། །འགྲོ་ལ་བརྩེ་ཆེན་འོད་ཞགས་ཀྱིས་འཁྱུད་པ། །འཕགས་པ་སྤྱན་རས་གཟིགས་ཀྱིས་རྟག་ཏུ་སྐྱོངས། །ཅི་འདོད་རེ་བ་སྐོང་བའི་ཡིད་བཞིན་ནོར། །ཡིག་དྲུག་ལས་ཚོགས་མཆོག་ལ་ཡིད་ཆེས་ནས། །རྣམ་དཀར་ཆུ་གཏེར་རྒྱུན་བཟང་གཡས་སྐོར་གྱིས། །ཚོགས་གཉིས་རིན་ཆེན་འབྱུང་ལྡན་ཅིས་མི་གསོག།མཆོག་དམན་བར་གྱི་སྐྱེ་བོ་མ་ལུས་པ། །འགོག་ལམ་མཐོན་པོ་བཀྲི་བའི་ཐབས་མཁས་ཕྱིར། །ཚེགས་ཆུང་དོན་ཆེའི་ཡིག་དྲུག་འཁོར་ལོའི་ཚུལ།།ཉམས་ལེན་རིམ་པ་འདིར་ནི་འདྲི་བར་བྱ།།དེ་ལ་འདིར་དྲང་བ་དང་ཞེས་པའི་དོན་གྱི་གསུང་རབ་ཐམས་ཅད་ཀྱི་སྙིང་པོའི་དོན་གཅིག་ཏུ་སྦྲིལ་བའི་ཉམས་ལེན་ནི་ཡིག་དྲུག་གི་འཁོར་ལོ་ལས་ཚོགས་དང་བཅས་པ་མཆོག་ཡིན་ལ་ཚུལ་དེ་ལྟ་བུ་ཕན་ཡོན་དང་བཅས་པ་གོ་སླ་བའི་ཚུལ་དུ་ཡིག་རྙིང་གི་དགོངས་པ་དང་བསྟུན་ནས་འགོད་པ་ནི།སངས་རྒྱས་སྣང་བ་མཐའ་ཡས་ཀྱིས།།སྙིགས་མའི་སེམས་ཅན་དོན་ཕྱིར་དུ།།ཡི་གེ་དྲུག་པའི་ཕན་ཡོན་བཤད།།ཡིག་དྲུག་འདྲེན་དང་ཆོས་འཁོར་བསྐོར།།དུས་གཅིག་ཉམས་སུ་ལེན་བྱེད་པ།།སངས་རྒྱས་སྟོང་དང་སྐལ་པ་མཉམ།།ཞེས་གསུངས་སོ།།ཤཱཀྱའི་རྒྱལ་པོས།སྒྲིབ་པ་རྣམས་སེལ་ལེགས་པར་ཉོན།།སྙིང་པོ་དོན་གྱི་རྣམ་སེལ་མཆོག།སྒྲུབ་པ་ལོ་གཅིག་བྱས་པ་བས།།དབྱུག་རྡོ་ལན་གཅིག་བསྐོར་བ་མཆོག།སྙིང་པོ་དོན་བསྒོམ་འབྲིང་གིས་ཀྱང༌།།སྒྲུབ་པ་ལོ་བདུན་བྱས་པ་བས།།ཆོས་འཁོར་ལན་གཅིག་བསྐོར་བ་མཆོག།སྙིང་པོ་དོན་བསྒོམ་ཐ་མས་ཀྱང༌།།སྒྲུབ་པ་ལོ་དགུ་བྱས་པ་བས།།ཆོས་འཁོར་ལན་གཅིག་བསྐོར་བ་མཆོག།ཐོས་བསམ་སྒོམ་གསུམ་བསྐལ་པ་བས།།ཆོས་འཁོར་ལན་གཅིག་བསྐོར་བ་མཆོག།ཅེས་གསུངས་པ་དང༌།།སངས་རྒྱས་སྒྲིབ་པ་རྣམ་སེལ་གྱིས།།ཕ་རོལ་ཕྱིན་པ་བཅུ་པོ་ལ།།བསྐལ་པ་སྟོང་དུ་འབད་པ་བས།།ཆོས་འཁོར་ལན་གཅིག་བསྐོར་བ་མཆོག།སྡེ་སྣོད་གསུམ་དང་རྒྱུད་སྡེ་བཞི།།བསྐལ་པའི་བར་དུ་འཆད་ཉན་ཡང༌།།ཆོས་འཁོར་ལན་གཅིག་བསྐོར་བ་མཆོག།ཞེས་དང༌།མགོན་པོ་བྱམས་པས།ཆོས་ཀྱི་འཁོར་ལོ་ཟབ་མོ་ལ།།ན་བཟའ་ལེགས་པར་ཕུལ་བ་ན།།སྐྱེ་བ་ལྔ་བརྒྱར་གོས་བཟང་འགྱུར།།ལྕགས་ཀྱུ་ཕུལ་བའི་བསོད་ནམས་ནི།།ཐར་པའི་ལམ་ཀུན་བགྲོད་པར་འགྱུར།།དབྱུག་རྡོ་ཕུལ་བའི་བསོད་ནམས་ནི།།གསང་སྔགས་བྱེ་བ་འབུམ་བཟླས་ལས།།འགྲོ་བ་ཡོངས་ཀྱི་མགོན་དུ་འགྱུར།།ལྷ་ཡི་གནོད་སྦྱིན་ཕྱག་བྱར་འགྱུར།།མི་ནོར་ཟས་གསུམ་དབང་དུ་བསྡུས།།འབྲེལ་ཚད་དོན་དང་ལྡན་པར་འགྱུར།།གྲིབ་མ་ཕོག་པའི་སེམས་ཅན་རྣམས།།ངན་སོང་གནས་ལས་ཐར་བར་འགྱུར།།གནས་སྐབས་བསྐོར་བའི་ཕན་ཡོན་ནི།།འགོ་ནད་རིམ་ནད་ཐམས་ཅད་ཐུབ།།ཕྱོགས་ངན་བདུད་གཅོད་མི་མཐུན་ཕྱོགས།།གྲིབ་དང་མི་གཙང་འཁོན་གྲིབ་འཇོམས།།བདུད་དང་བགེགས་གྱི་དཔུང་རྣམས་འཇོམས།།ཞེས་གསུངས་ཤིང་།འཇམ་དཔལ་གྱིས།རྒྱལ་ཆེན་བཞི་དང་ཕྱོགས་སྐྱོང་བཅུས།།ཕྱོགས་དང་ཕྱོགས་མཚམས་ཐམས་ཅད་ཀྱི།།བར་ཆད་ཐམས་ཅད་སྲུང་བར་བྱེད།།མཚམས་མེད་ལྔ་དང་མི་དགེ་བཅུ།།ངན་སོང་ལས་རྣམས་འདི་ཡིས་སྦྱོངས།།སངས་རྒྱས་ཞིང་ནས་ཞིང་དུ་འགྲོ།།བདེ་བ་ཅན་གྱི་ཞིང་ཁམས་སུ།།པདྨའི་སྙིང་པོ་སེང་ཁྲི་ལ།།བརྫུས་ཏེ་སྐྱེ་བ་ལེན་པར་འགྱུར།།ཕྱོགས་བཅུའི་སངས་རྒྱས་ཐམས་ཅད་ཀྱི།།འཕྲིན་ལས་ཕྱོགས་བཅུ་རྒྱས་པར་འགྱུར།།ཞེས་གསུངས་པ་དང༌།ཕྱག་ནིརྡོ་རྗེས།།ཆོས་ཀྱི་འཁོར་ལོ་ཆེན་པོ་འདིས།།སྟེང་གདོན་གཟའ་དང་འོག་གདོན་ཀླུ།།བར་གྱི་བཙན་དང་འབྱུང་པོའི་ཚོགས།།གནོད་བྱེད་ཐམས་ཅད་འདི་ཡིས་ཐུབ།།དེ་ལྟར་ཐུབ་པ་ཅིའི་ཕྱིར་ན།།རྒྱལ་བ་རིགས་ལྔ་སྟེང་ཕྱོགས་ཀྱི།།སངས་རྒྱས་མཐུ་སྟོབས་རྒྱལ་པོ་སོགས།།སྙིང་པོ་རེ་རེབསྡུས་པ་ཡི།།གཟུངས་སྔགས་འཁོར་ལོ་ཡིན་པའི་ཕྱིར།།ཞེས་དང༌།འཕགས་པ་སྤྱན་རས་གཟིགས་ཀྱིས།གཟུངས་སྔགས་འཁོར་ལོ་ཆེན་པོ་འདི།།འཁོར་ལོ་གཞེན་བས་ཁྱད་པར་འཕགས།།སྐལ་བ་ལྡན་པའི་འགྲོ་བ་རྣམས།།ཆོས་འཁོར་འདི་ལ་བློ་གཏད་ནས།།བསྐོར་ཞིང་གསོལ་བ་བཏབ་པ་ནི།།འདི་ཕྱིའི་སྐྱབས་མགོན་མཆོག་ཡིན་ནོ།།ཞེས་གསུངས་སོ།།ཨོཾ་མ་ཎི་པདྨེ་ཧཱུྃ།ཞེས་པའི་འཁོར་ལོའི་བསླབ་བྱ་ནི།ཆོས་འཁོར་རྒྱུན་མི་ཆད་བའི་རྒྱུད་ལས།ཆོས་ཀྱི་འཁོར་ལོ་ཆེན་པོ་འདི།།ས་ཆུ་མེ་རླུང་འཁོར་ལོ་དང༌།།འདུ་བྱེད་ལག་པའི་འཁོར་ལོ་སོགས།།མཐོང་བ་བརྒྱུད་པའི་ཕྱག་ལེན་ལྟར།།ས་བལྟ་གནམ་བལྟ་མ་ནོར་བར།།སྐྱོན་མེད་ཤིན་ཏུ་དག་པར་བྱ།།ཞེས་གསུངས་པ་ལྟར།མ་ཎིའི་འཁོར་ལོ་འདི་ལ།དབུ་ཏུབ་ཞབས་ཏུབ་གཉིས་ཡོད་པ་ལས།དབུ་ཏུབ་ནི་གནམ་ལ་བསྟན་པར་བྱ།།ཞབས་ཏུབ་ནི་ས་ལ་བསྟན་པརབྱའོ།།འཁོར་ལོ་དེ་གཉིས་ཁ་སྦྱར་ལ།།མང་དུ་བརྩེགས་པ་སོགས་གཞུགས་ཆེ་ཆུང་ཡོ་བྱད་དང་བསྟུན་པར་བྱ།དེ་གཉིས་ཀ་མ་འཛོམ་ན།འཁོར་ལོ་གནམ་བལྟ་རང་མང་དུ་བརྩེགས་ནས་བྱེད།འཁོར་ལོ་ས་བལྟ་རང་མང་དུ་བརྩེགས་ནས་བྱེད་དེ་གཉིས་ཀ་གཞུགས་ཆེ་ཆུང་ཆོད་དང་བསྟུན་པར་བྱ།།འདུ་བྱེད་ལགཔའི་འཁོར་ལོ་བློས་མ་བླངས་མ་ཡངས་བྱ།འཁོར་ལོ་ཕོ་མོ་དཀྲིས་མ་ཞེས་ཀྱང་བྱ་བ་ནི།གཟུངས་སྔགས་ཀྱི་ཡི་གེ་ཕྱི་ལ་བསྟན་ནས་ཨོཾ་སྲོག་ཤིང་དམ་སྨྱུག་མ་ལ་འཇུས་ནས་དཀྲིས་བར་བྱ་བ་ནི།མཁས་པ་རྣམས་ཀྱི་ཕྱག་ལེན་ཡིན་ནོ།དེ་ཅིའི་ཕྱིར་ཞེ་ན།ཆོས་ཀྱི་འཁོར་ལོ་རྒྱུན་མི་ཆད་པའི་རྒྱུད་ལས་ཀྱང༌།རྩ་སྔགས་སྤྲུལ་ནི་འཁྱིལ་བ་ལྟར།།ཨོཾ་ནི་སྲོག་ཤིང་སྨྱུག་མར་འཇུས།ཧཱུྃ་ནི་འཇུག་ནས་ཡོད་པ་བྱ།།ཞེས་གསུངས་པའི་ཕྱིར་རོ།།རྟེན་གྱི་གཟུངས་བཞུགས་ཀྱི་རིགས་ཡིན་ན།ཡི་གེ་ནང་ལ་བསྟན་ནས་འཇུག་ནས་སྒྲིལ་བར་བྱའོ།།དེ་ལྟར་བྱས་ནས་འཁོར་ལོ་བཞེངས་པའི་དུས་སུ།འཁོར་ལོ་བརྩེགས་པ་དང་དཀྲི་བའི་དམ་ལྷོད་ཀྱི་ཚད་ནི།དམ་པ་ཡང་མ་ཡིན།ལྷོད་པོ་ཡང་མ་ཡིན།དམ་ལྷོད་རན་པར་བྱའོ།།དམ་དྲག་ན་གཟུངས་སྔགས་བྲག་གི་བར་དུ་བཙིར་བ་ལྟ་བུའི་ཉེས་པ་ཡོད།ལྷོད་དྲགས་ན་རྒྱ་མ་ལུགས་པ་ལྟ་བུའི་ཉེས་པ་ཡོད།དམ་ལྷོད་རན་པོ་བྱེད་པ་ཕྱག་ལེན་ཡིན་པས་ཤེས་པར་བྱའོ།།འཁོར་ལོ་བཞུགས་ཆེ་ཆུང་གང་ཕྱེད་ཀྱང༌།བརྩེགས་པ་དཀྲི་བའི་དཀྱིལ་སུ་འཁོར་ལོ་གཅིག་མགོ་མཇུག་ལོག་ན།གཞན་ཐམས་ཅད་མགོ་མཇུག་ལོག་པ་དང་འདྲ་བས་བརྩེགས་དཀྲིས་གང་བྱེད་ཀྱང་རྟོག་པ་ཞིབ་པ་གལ་ཆེའོ།།འཕགས་པསྤྱན་རས་གཟིགས་ལ་ཕྱག་འཚལ་ལོ།།མ་ཎིའི་སྲོག་ཤིང་གི་ལག་ལེན་བྱ་ཐབས་ནི།སྲོག་ཤིང་ནི་རྒྱུ་རབ་ཙན་དན་དཀར་དམར།འབྲིང༌།སེང་ལྡིང༌།ཐ་མ་ཤུག་པ་དང་སྟག་པ་གང་རིགས་ཤིན་ཏུ་འདྲོངས་ཤིང་འཇམ་པར་བརྡར་ལ།རྩ་རྩེ་མ་ནོར་བར་བྱས་པའི་རྩེ་མོའི་ཕྱོགས་སུ་ཡི་གེའི་མགོ་བསྟན་ལ།ཨོཾ་ཨཱཿཧཱུྃ།།འབྲི་བ་ནི།ཤིང་ཚན་པ་གསུམ་དུ་བཏང་བའི་ཨོཾ་གྱི་འོག་ནས།ཨོཾ་སརྦ་བིད་སྭཧཱ།ཞེས་པ་གང་ཤོང་དང༌།དེའི་གཤམ་བུར།།ན་མཿས་མནཏ་བུདྷྱ་ནན།ཨོཾ་བཛ་ཨཱ་ཡུ་ཤེ་སཱཧཱ།ཞེས་པ་གང་ཤོང་བྲིས།ཨཱའི་འོག་ནས་བརྩམས་ཏེ།ཨོཾ་དྷརྨཱ་དྷ་ཏུ་གརྦེཧ་སྭཧཱ།ཨོཾ་སརྦག་ཏཱ་མ་ཎི་ཤ་ཏཱ་དིཔིཏ་ཛཱ་ལ་ཛཱ་ལ་དྷརྨ་དྷ་ཏུ་གརྦེཧ་སྭ་ཧཱ༌།གང་ཤོང་བྲིས།ཧཱུྃ་གི་འོག་ནས་ཡེ་དྷརྨ་སོགས་དང༌།ཨོཾ་སུ་པྲ་ཏིཥཋ་བཛཱ་ཡེ་སྭ་ཧཱ།ཞེས་ཅི་ཤོང་འབྲིའོ།།གནམ་འཁོར་མུ་ཁྱུད་གཉིས་རིམ་དུ་བསྐོར་བའི་དབུས་སུ་སྲོག་ཤིང་གཟུགས་པའི་བུ་ཁ་བྱས།དེའི་ཕྱི་མུ་ཁྱུད་ལ་པདྨ་འདབ་དྲུག་ལ་ཤར་ནས་བརྩམས་ཏེ་དབུ་ཕྱིར་བསྟན་དུ་མ་ཎིའི་འབྲུ་རེ་རེ་འགོད།དེའི་རྒྱབ་ཏུ་མུ་ཁྱུད་འདབ་མ་དྲུག་ལ༑ཤར་ནས་རྩིབས་གཉིས་ཀྱི་དང་པོ་ལ་མ་ཎི་གཉིས་པ་ལ་ཨོཾ་ཧཱུྃ་ཏྲམཱ་ཧྲིཿཨཱཿའཁོད།ས་འཁོར་ཡང་གོང་མཚུངས་ལ།དབུ་ནང་ལ་བསྟན་ཏེ་མུ་ཁྱུད་དང་པོ་ལ་སྔར་བཞིན་ལ།གཉིས་པར་ཁམ་རེ་རེ་འགོད་དེ།རྩིབས་མཆན་ལ་རྟེན་འབྲེལ་སྙིང་པོ་དང༌།ཨོཾ་སུ་པྲ་ཏི་ཥཋ་སོགས་བྲིས།དེའི་རྒྱབ་ཏུ་མུ་ཁྱུད་གཉིས་ཀྱི་དང་པོ་ལ་མ་ཎི།གཉིས་པ་ལ་འདོད་གསོལ་གྱི་འཇུག་ཏུ།ཨོཾ་ཤུདྷི་ཤུདྷི་སྭ་ཧཱ།རྣམས་འབྲིའོ།།འདོད་གསོལ་ནི།གསུང་མཆོག་ཡི་གེ་དྲུག་མའི་འཁོར་ལོ་འདི་ཉིད་བཞེངས་པའི་དགེ་བའི་རྩ་བ་ལ་བརྟེན་ནས་བདག་གི་སོགས་འབྲེལ་ཐོགས་དང་བཅས་པ་ཐམས་ཅད་ཀྱི་ཚེ་འཁོར་བ་ཐོག་མེད་ནས་བསགས་པའི་ལས་ངན་སྡིག་སྒྲིབ་བག་ཆགས་ངན་པ་ཐམས་ཅད་བྱང་ཞིང་དག་ནས་མཐར་ཐུག་དག་པ་གཉིས་ལྡན་ཆོས་ཀྱི་སྐུ་ཐོབ་སྟེ།སེམས་ཅན་ཐམས་ཅད་ལ་ཕན་པའི་དོན་རྒྱ་ཆེན་པོ་འགྲུབ་པར་གྱུར་ཅིགཨོཾ་ཤུདྷི་ཤུདྷི་སྭ་ཧཱ།ཞེས་པའི་འབྲིའོ།དེ་ལྟར་བྱས་ནས་འཁོར་ལོ་བསྐོར་བའི་ཕན་ཡོན་གོང་དུ་བཤད་ནའང༌།འདིར་རྒྱས་པར་བཤད་པ་ནི།སངས་རྒྱས་ཀྱིས་ཀྱང༌།དེ་དང་དེ་ཡི་ཕན་ཡོན་ནི།ཐོགས་མེད་ནས་བསགས་པ་ཡིས།།ལས་དང་ཉོན་མོངས་སྡིག་སྒྲིབ་རྣམས།།འབད་པ་མེད་པར་བྱང་བར་འགྱུར།།སྔགས་དང་རིགས་སྔགས་གཟུངས་སྔགས་དག།རྫོགས་པར་འགྱུར་བ་ཐེ་ཚོམ་མེད།།ཅེས་གསུངས་པ་དང༌།བླ་མེད་ཡིད་བཞིན་ནོར་བུའི་རྒྱུད་ལས།ཨོཾ་མ་ཎི་པདྨེ་ཧཱུྃ།ཞེས་པའི་འཁོར་ལོ་འདི་གང་གིས་བསྐོར་བ་འདི་ཉིད་ལ།བླ་མ་རྣམས་ཀྱིས་བྱིན་གྱིས་རློབས༑༑ཡི་དམ་རྣམས་ཀྱིས་དངོས་གྲུབ་སྩོལ།།བདེ་གཤེགས་རྣམས་ཀྱིས་དགོངས་པར་འགྱུར།།ཆོས་སྐྱོང་རྣམས་ཀྱིས་བར་ཆས་སེལ།།ཞེས་གསུངས་པ་དང༌།འཕགས་པ་སྤྱན་རས་གཟིགས་ཀྱི་ཞལ་ཆེམས་ལས་ཀྱང༌།ཨོཾ་མ་ཎི་པདྨེ་ཧཱུྃ།།ཞེས་པའི་འཁོར་ལོ་འདི།ཙཀྲ་བསྐོར་བ་རེ་རེ་ཀྱང༌།།བསྙེན་པ་གྲངས་ཚད་ཉིད་དུ་འགྱུར།།གཅིག་ལ་གཅིག་འགྱུར་བཅུ་ལ་བཅུ།།བརྒྱ་བྲིས་པས་ནི་བརྒྱ་རུ་འགྱུར།།འཁོར་ལོ་བཅུ་ཡོས་སྟོང་དུ་འགྱུར།།འབུམ་སོགས་དག་ལ་དེ་འགྱུར་ཕྱིར།།དེ་ཕྱིར་འཁོར་ལོའི་མན་ངག་གཅེས།།འཁོར་ལོའི་མན་ངག་མི་ཤེས་པར།།མན་ངག་གཞན་ལ་བློ་གཏོད་པ།།ལོང་བ་བྱ་ར་བྱེད་པ་འདྲ།།དོན་དེ་འགྲུབ་པར་ག་ལ་འགྱུར།།ཤེས་རབ་ཆུང་བ་ལས་ཆེ་བ།།བོད་རྒན་འདམ་ལ་བྱིང་བ་འདྲ།།དེ་ཕྱིར་འཁོར་ལོའི་མན་ངག་གཅེས།།ཞེས་གསུངས་པ་དང༌།སྤྱན་རས་གཟིགས་གསང་བ་འདུས་པའི་རྒྱུད་ལས།ཨོཾ་མ་ཎི་པདྨེ་ཧཱུྃ།ཞེས་པའི་འཁོར་ལོའི་དམིགས་པ་ནི།ཆོས་ཀྱི་འཁོར་ལོ་ཆེན་པོ་ལས།།འོད་འཕྲོས་སེམས་ཅན་ཐམས་ཅད་ཀྱི༌།།ཉོན་མོངས་མ་ལུས་དུཿཁ་དང༌།།རིགས་དྲུག་བག་ཆགས་ས་བོན་རྣམས།།རབ་འདུས་ཡིག་དྲུག་འཁོར་ལོར་ཐིམ།།ཉོན་མོངས་ལས་དང་ས་བོན་དང༌།།རིགས་དྲུག་བག་ཆགས་ས་བོན་རྣམས།།བསྲེག་དང་བཅོམ་དང་དག་པར་བསམ།།མན་ངག་དེ་དང་ལྡན་གྱུར་ན།།འཁོར་བའི་རྒྱུ་རྐྱེན་འབྲས་བུ་དང༌།།ཉོན་མོངས་ལས་དང་སྡིག་སྒྲིབ་ཀུན།།མ་ལུས་པར་ནི་གྲོལ་བར་འགྱུར།།འཁོར་བའི་རྩ་གཅོད་འཁོར་ལོ་ཡིན།།ཤིན་ཏུ་གསང་ལ་ཉམས་ལེན་གཅེས།།ལས་སྤྱོར་འཁོར་ལོ་རིན་ཆེན་གྱི།།རྫགས་ལས་འོད་ཟེར་འཕྲོས་གྱུར་པས།།འགྲོ་བ་རྣམས་ལ་འཕོག་པ་ཡིས།།བྱམས་དང་སྙིང་རྗེ་དགའ་བ་དང༌།།བཏང་སྙོམས་དང་ནི་ཚད་མེད་བཞི།།རྒྱུད་ལ་ལྷུན་གྱིས་འགྲུབ་པར་འགྱུར།།སྦྱིན་པ་ཚུལ་ཁྲིམས་བཟོད་པ་དང༌།བརྩོན་འགྲུས་བསམ་གཏན་ཤེས་རབ་སྟེ།།ཕ་རོལ་ཕྱིན་དྲུག་རྫོགས་པར་འགྱུར།།ཞེས་གསུངས་པ་དང༌།གཞན་ཡང་སློབ་དཔོན་པདྨས་མཛད་པའི་རླུང་འཁོར་ལས།ཙཀྲ་འདི་ཡི་དགོས་པ་ནི།།མན་ངག་བརྩོན་འགྲུས་མི་ལྡན་པར།།ཅི་འདེར་གནས་པའི་གང་ཟག་གིས།།སིདྷིཐོབ་པར་བྱས་བ་དང༌།།བརྩོན་འགྲུས་ལྡན་པའི་གང་ཟག་གི།བཟླས་བརྗོད་དག་གི་གྲོགས་སུ་འགྱུར།།སྡིག་པ་དཔག་ཏུ་མེད་པ་ཡང༌།།འབད་པ་མེད་པར་བྱང་བར་འགྱུར།།ཡི་དམ་འདོད་ལྷ་མང་པོ་ཡང༌།།ཅིག་ཅར་ཉིད་དུ་འགྲུབ་པར་འགྱུར།།གང་གི་མིང་སྤེལ་བྲིས་པ་ན།།རང་ལ་འདུན་པ་མེད་པ་ཡང༌།།སྐྱོན་དག་ཡོན་ཏན་རྫོགས་པར་འགྱུར།།མི་ཁོམས་བརྒྱད་དང་འགྲོ་རྣམས་ལ།།ཙཀྲའི་གྲིབ་མ་ཕོག་པས་གྲོལ།།ཙཀྲ་ཕོག་པའི་འབྱུང་བ་བཞི།།ཕོག་པ་རྩམ་གྱིས་ངན་སོང་ལས།།གྲོལ་བར་འགྱུར་ཞེས་རྒྱལ་བས་གསུངས།།མདོར་ན་ཉེས་སྐྱོན་མང་པོ་ཡང༌།།འབད་པ་མེད་པར་ཐོབ་པར་འགྱུར།།ཞེས་གསུངས་སོ།ཨོཾ་མ་ཎི་པདྨེ་ཧཱུྃ།།ཐུགས་རྗེ་ཆེན་པོ་ལ་ཕྱག་འཚལ་ལོ།།མ་ཎི་འཁོར་ལོའི་འབྱུང་ཁུངས་ནི།།སློབ་དཔོན་ཀླུ་སྒྲུབ་སྙིང་པོ་ལ།།འཕགས་པ་སྤྱན་རས་གཟིགས་དབང་གིས།།འདི་ལྟར་ལུང་བསྟན་མཛད་པ་ནི།།ཀླུ་ཡི་ཡུལ་གྱི་ཕོ་བྲང་ན།།ཀླུ་རྒྱལ་བྱང་ཆུབ་སེམས་དཔའ་ལ།།ཆོས་ཀྱི་འཁོར་ལོ་མཐོང་ཐོས་དྲང༌།།དྲན་ཅིང་རེག་པ་ཙམ་གྱིས་ཀྱང༌།།ངན་སོང་གསུམ་གྱི་སྡུག་བསྔལ་ལས།།མྱུར་དུ་སྒྲོལ་བར་བྱེད་པ་ཡི།།ཟབ་མོའི་ཆོ་འཁོར་གཅིག་འདུག་ལ།།ཁྱོད་ཀྱི་ལོངས་དང་སེམས་ཅན་གྱི།།དོན་ནི་རྒྱ་ཆེན་འབྱུར་བར་འགྱུར།།ཞེས་གསུངས་ནས་ལུང་བསྟན་མཛད་པའོ།།དེ་ནས་སློབ་དཔོན་ཀླུ་སྒྲུབ་ཀྱིས།ཀླུ་ཡུལ་དུ་བྱོན་ནས།ཀླུའི་རྒྱལ་པོ་བྱང་ཆུབ་སེམས་དཔའ་ལ་འདི་སྐད་ཅེས་ཞུས་སོ།ཀླུའི་རྒྱལ་པོ་བྱང་ཆུབ་སེམས་དཔའ་གསན་དུ་གསོལ།འཕགས་པ་སྤྱན་རས་གཟིགས་དབང་གིས།།བདག་ལ་ལུང་བསྟན་མཛད་བྱུང་བ།།ཀླུ་ཡི་ཡུལ་དུ་ཁྱོད་སོང་ལ།།ཀླུ་རྒྱལ་བྱང་ཆུབ་སེམས་དཔའ་ལ།།ཆོས་འཁོར་མཐོང་ཐོས་དྲན་རིགས་པས།།ངན་སོང་སྡུག་བསྔལ་ཀུན་གྲོལ་བའི།།ཟབ་མོའི་ཆོས་འཁོར་གཅིག་འདུག་པ།།བདག་ལ་ཞུས་ཤོག་གསུངས་ནས་འོངས།།ཆོས་འཁོར་ཐུགས་རྗེ་གནང་དུ་གསོལ།།ཞེས་ཞུས་པས།ཀླུའི་རྒྱལ་པོ་བྱང་ཆུབ་སེམས་དཔའི་ཞལ་ནས།དེའི་ཆོས་ཀྱི་འཁོར་ལོ་ཟབ་མོ་མཐོང་ཐོས་དྲན་དང་རེག་པ་ཙམ་གྱི༑༑འགྲོ་བ་རིགས་དྲུག་གི་སེམས་ཅན་ཐམས་ཅད་ངན་སོང་གི་སྡུག་བསྔལ་ཆེན་པོ་ལས་མྱུར་དུ་གྲོལ་བར་བྱེད་པའི་འཁོར་ལོ་འདི་སྔོན་འདས་པའི་སངས་རྒྱས་མར་མེ་མཛད་ཀྱིས་ངེད་ཀླུ་རྣམས་ལ་གནང་ནས།།ཀླུ་རྣམས་བདེ་བ་དང་ལྡན་ཞིང་སངས་རྒྱས་ཀྱི་ས་ལམ་བགྲོད་པ་ཡང་མང་པོ་བྱུང་བ་ཡིན།ཆོས་འཁོར་ཟབ་མོ་འདི་འཕགས་པ་སྤྱན་རས་གཟིགས་ཀྱིས་སངས་རྒྱས་རྣམས་ལ་ཞུས་པའི་གཟུངས་སྔགས་ཀྱི་སྙིང་པོ་ཨོཾ་མ་ཎི་པདྨེ་ཧཱུྃ།།ཞེས་པ་འདི་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཡོནཏན་འཕྲིན་ལས་ཐམས་ཅད་གཅིག་ཏུ་བསྡུས་པའི་གཟུངས་སྔགས་ཀྱི་འཁོར་ལོ་ཡིན་པས་ཁྱོད་ལ་སྟེར་རོ།།ཁྱོད་ཀྱིས་ཀྱང་འཁོར་ལོ་ཟབ་མོ་འདི་ས་ཆུ་མེ་རླུང་ལའང་ཚུགས་ལ་སངས་རྒྱས་ཀྱ་བསྟན་པ་དང་སེམས་ཅན་གྱི་དོན་གྱིས་ཤིག་གསུངས་ནས་ཕྱག་ལེན་དང་བཅས་པ་གནང་ངོ།།དེ་ནས་འཕགས་པ་ཀླུ་སྒྲུབ་ཀྱིས་རྒྱ་གར་ཡུལ་དུ་གདན་དྲངས་སོ།།དེ་ནས་མཁའ་འགྲོ་མ་སེང་གེ་གདོང་ལ་གནང༌།།དེས་ཏེ་ལོ།།དེས་ནཱ་རོ།།དེས་མར་པ་ལ་གནང་ནས་བོད་དུ་གདན་དྲངས་སོ།།དེས་མི་ལ་ལ་གནང༌།དེས་དྭགས་པོ་ལྷ་རྗེ་ལ།དེས་ཁམས་པ་དབུ་སེ་ལ་གནང་ནས་རིམ་པར་བརྒྱུད་དེ་གྲུབ་ཐོབ་ཀརྨ་དཔག་ཤིའི་གསུང་འབུམ་གྱི་ནང་ན་འཁོར་ལོ་འདིའི་ཕན་ཡོན་མང་བར་འདུག་ནའང༌།འདིར་ས་ཆུ་མེ་རླུང་ལ་བཙུགས་པའི་ཕན་ཡོན་ནི།ཨོཾ་མ་ཎི་པདྨེ་ཧཱུྃ།།ཞེས་པའི་འཁོར་ལོ་ཆེན་པོ་འདི།།སྟེང་དུ་རླུང་པོར་བཙུགས་པ་ན།།རླུང་ཟེར་མ་ཕོག་པའི་སེམས་ཅན་དང༌།རླུང་ཕྱོགས་གནས་པའི་འགྲོ་བ་རྣམས།།ངན་སོང་སྡུག་བསྔལ་ལས་གྲོལ་ལོ།།ས་འོག་ཏུ་མེ་ལ་བཙུགས་པ་ན།།དུར་དྲི་ཚོར་ཚད་སེམས་ཅན་དང༌།།མེ་འོད་ཕོག་པའི་འགྲོ་བ་རྣམས།།ངན་སོང་སྡུག་བསྔལ་ལས་གྲོལ་ལོ།།ས་ལ་འཁོར་ལོ་བཙུགས་པ་ན།།ས་དེར་གནས་པའི་སེམས་ཅན་དང༌།།ས་རྡུལ་ཕོག་པའི་འགྲོ་བ་རྣམས།།ངན་སོང་སྡུག་བསྔལ་ལས་གྲོལ་ལོ།།ཆུ་ལ་འཁོར་ལོ་བཙུགས་པ་ན།།ཆུ་ལ་གནས་པའི་སེམས་ཅན་དང༌།།ཆུ་དེ་འཇུག་པའི་འགྲོ་བ་རྣམས།།ངན་སོང་སྡུག་བསྔལ་ལས་གྲོལ་ལོ།།དེ་ལྟར་འཛུགས་པའི་འཁོར་ལོའི་ལག་ལེན་རྣམས།།སློབ་དཔོན་ཕྱག་ལེན་ཤེས་དང་བསྟུན།།ཅེས་གསུངས།ཨོཾ་མ་ཎི་པདྨེ་ཧཱུྃ།།ཞེས་པའི་ཆོས་ཀྱི་འཁོར་ལོ་ནི།།འདུགས་ལྟར་བསྐོར་ན་གཟུགས་བཟང་ཞིང༌།།སྐྱེ་མཆེད་ལེགས་ཤིང་ཚང་པར་འགྱུར།།ཏབ་ཏབ་ཏུ་ནི་བསྐོར་བ་ན།།དམན་པའི་ལུས་སུ་སྐྱེ་བར་འགྱུར།།ཆོས་འཁོར་འཕྲེད་ལ་བསྐོར་བ་ན།།དུད་འགྲོ་སྒུར་པོའི་ལུས་སུ་སྐྱེ།།མགོ་འཇུག་ལོག་ནས་བསྐོར་བ་ན།།སེམས་ཅན་ཞྭ་བོའི་ལུས་སུ་སྐྱེ།།འཁོར་ལོ་གསལ་བར་མ་བཞེངས་ན།།དམུས་ལོང་ཅན་གྱི་ལུས་སུ་སྐྱེ།།འཁོར་ལོའི་སྐད་སྒྲ་ལོག་བལྟས་ན།།རྣ་བ་འོན་པའི་ལུས་སུ་སྐྱེ།།འཁོར་ལོར་སྐུར་བ་བཏབ་པ་ན།།གླེན་ཞིང་ལྐུགས་པའི་ལུས་སུ་སྐྱེ།།དེས་ན་སྐལ་ལྡན་སྐྱེས་བུ་ཡིས།།ཆོས་ཀྱི་འཁོར་ལོ་ཆེན་པོ་འདི།།ཐད་དཀར་དྲང་ཞིང་བསྐོར་བ་ན།།དབང་པོ་ཡ་རབ་སངས་རྒྱས་ཐོབ།།འགྲོ་བ་སེམས་ཅན་དོན་བྱེད་འགྱུར།།དབང་པོ་འབྲིང་རྣམས་མི་ལུས་ཐོབ།།དམ་པ་ཆོས་ལ་ལོངས་སྤྱོད་འགྱུར།།དབང་པོ་ཐ་མའང་མི་ལུས་ཐོབ།།སྡིག་སྤོང་དགེ་ལ་བརྩོན་པར་འགྱུར།།ཞེས་གསུངས་སོ།ཨོཾ་མ་ཎི་པདྨེ་ཧཱུྃ།།ཞེས་པའི་ཆོས་ཀྱི་འཁོར་ལོ་འདི།།ཁྱིམ་དུ་བཙུགས་ཤིང་བསྐོར་བ་ན།།ཁྱིམ་ནང་གནས་པའི་འགྲོ་བ་རྣམས།།ངན་སོང་སྡུག་བསྔལ་ལས་གྲོལ་བའི།།ཁྱིམ་དེ་པོ་ཏ་ལ་དང་མཚུངས།།ཨོཾ་མ་ཎི་པདྨེ་ཧཱུྃ།།ཞེས་པའི་ཆོས་ཀྱི་འཁོར་ལོ་འདི།།འཆི་ཁར་སྔས་མགོར་བཞུགས་པ་ལ།།ཡིད་གཞུང་གསོལ་བ་བཏབ་པ་ན།།འཕོ་བ་རྒྱག་ནི་མི་དགོས་པར།།རིག་པའི་སྐད་གཅིག་ཉིད་ལ་ནི།།སྤྱན་རས་གཟིགས་ཀྱི་ཐུགས་ཀར་འཕོ།།དེས་ན་ཆོས་འཁོར་ཟབ་མོ་མཆོག།ཐེ་ཚོམ་ཡིད་གཉིས་མ་བྱེད་པར།།འབད་པས་ཆོས་འཁོར་བཞེངས་པ་དང༌།།འདུན་པ་དྲག་པོས་བསྐོར་བ་དང༌།།བརྩོན་འགྲུས་ཆེན་པོས་འཛུགས་པར་གཅེས།།ཨོཾ་མ་ཎི་པདྨེ་ཧཱུྃ།།ཞེས་པའི་འཁོར་ལོ་འདི་ལ་གང་ལ་གང་མཁོའི་ཡོ་བྱད་སྣ་ཚོགས་དང་དཀར་མེ་ཞལ་ཟས་ལ་སོགས་པའི་མཆོད་པ་སྣ་ཚོགས་ཕུལ་ན།།སྟོང་འཁོར་ལོས་བསྒྱུར་བའི་རྒྱལ་པོར་འགྱུར་ཞིང༌།།གང་ལ་གང་འདོད་ཅི་ལ་ཅི་འདོད་པའི་ལངས་སྤྱོད་སྣ་ཚོགས་ལ་ལོངས་སྤྱོད་ཅིང༌།།མཐར་འཕགས་པ་སྤྱན་རས་གཟིགས་ཀྱི་གོ་འཕང་ཐོབ་པར་འགྱུར་རོ།།སྐལ་བ་དང་ལྡན་པའི་སྐྱེ་བུ་རྣམས་ཀྱིས།།ཨོཾ་མ་ཎི་པདྨེ་ཧཱུྃ།།ཞེས་པའི་འཁོར་ལོ་འདི་གཞན་ལ་ཡང་སྟོན་ཅིང༌།།ཤོད་གཅིག།འཁོར་ལོ་འདིའི་བསྟན་པ་སྤེལ་ཅིག།སངས་རྒྱས་ཀྱི་བསྟན་པ་སྤེལ་སྐྱོང་བྱས་པ་དང་འདྲ་བར་འགྱུར་རོ།།ཞེས་ཡི་གེ་དྲུག་པའི་ཕན་ཡོན་རྒྱས་པ་སྔོན་གྱི་སངས་རྒྱས་བྱང་སེམས་མཁས་གྲུབ་དམ་པ་རྣམས་ཀྱིས་གསུངས་པ་ཕྱོགས་གཅིག་ཏུ་ཉུང་ངུར་བསྡུས་པ་རེ་ཞིག་དེ་ཙམ་མོ།།འདི་ནི་མ་ཎི་ཁྲི་སྐོར་དང་ལག་སྐོར་མེ་ཆུ་རླུང་སོགས་ལ་འཛུགས་པའི་ལག་ལེན་དང་ཕན་ཡོན་འབྱུང་ཁུངས་དང་བཅས་པ་ལ་ཡིད་ཆེས་རྙེད་པའི་ཕྱིར་མདོར་བསྡུས་ཙམ་ཞིག་བཀོད་པ་ཡིན་གྱིས།།གཞན་དུ་ན་བློ་གྲོས་རྣམ་དཔྱོད་ཕུལ་དུ་བྱུང་བ་རྣམས་ཀྱིས་ཡིག་དྲུག་གི་ཕན་ཡོན་རྒྱས་པར་ཐུགས་རྗེ་ཆེན་པོའི་རྒྱུས་རྣམས་དང༌།།དེ་དག་གི་དགོངས་འགྲེལ་ཆོས་སྐོར་རྩོད་མེད་ཀྱི་བསྟན་བཅོས་མ་ཎིའི་བཀའ་འབུམ་སོགས་ལ་ཐོས་བསམ་སྒོམ་གསུམ་གྱི་འབད་བརྩོན་དྲག་པོས་ཁོངས་སུ་ཆུད་པར་བྱའོ།།སྨྲས་པ།།རྒྱལ་ཀུན་ཐུགས་རྗེའི་བདག་ཉིད་སྤྱན་རས་གཟིགས།།དམིགས་མེད་ཐུགས་རྗེ་བོད་ཀྱི་ལྷ་སྐལ་མཛོད།།ཐུགས་རྗེའི་འོད་ཟེར་འབུམ་དུ་སྤྲོ་བ་ཡིས།།ཐུགས་རྗེ་ཆེན་པོ་ཞེས་པའང་དོན་དང་ལྡན།།བདག་སོགས་དེང་ནས་བྱང་ཆུབ་སྙིང་པོའི་བར།།འབྲལ་མེད་རྗེས་བཟུང་བདེ་ཅན་པོ་ཏ་ལ།།ལ་སོགས་དག་པའི་ཞིང་ཁམས་ཡོན་ཏན་ཀུན།།རབ་རྫོགས་སྐུ་བཞིའི་དཔལ་ལ་རེག་པར་ཤོག།རང་སེམས་ཨཱ་དརཤ་ངོས་ཁྱོད་སྐུའི་གཟུགས།།རབ་གསལ་ཡིག་དྲུག་བཟླས་བརྗོད་དགེ་བ་དེས།།ཐོག་མེད་ནས་བསགས་སྡིག་སྒྲིབ་ཀུན་བྱང་ནས།།མ་གྱུར་འགྲོ་འདྲེན་དཔའ་བོར་བདག་གྱུར་ཅིག།།།ཅེས་ཡིག་དྲུག་གི་འཁོར་ལོའི་ཁུངས་དང་བསྐོར་ཚུལ་གྱི་གནད་དམིགས་པ་བྱ་ཚུལ་ཕན་ཡོན་དང་བཅས་པ་འདི་ལྟ་བུ་ཞིག་དགོས་ཚུལ་ནི་རྒན་ལགས་ཕྱོགས་ཀྱི་བཀའ་སློབ་ཡིན་པའི་ཟིན་བྲིས་ནང་འགོད་དོན་ནི་རྗེས་སོར་ལག་ལེན་འདི་ལྟར་བྱེད་རྒྱུ་དགོས་མཁོ་ཆེ་བའི་ཡིན།ལུས་ཅན་ཀུན་ལ་ཕན་བདེ་དཔག་ཏུ་མེད་པ་འབྱུང་བར་གྱུར་ཅིགདགེ་བ་འདི་ཡིས་མྱུར་དུ་བདག།སྤྱན་རས་གཟིགས་དབང་འགྲུབ་གྱུར་ནས།།འགྲོ་བ་གཅིག་ཀྱང་མ་ལུས་པ།།དེ་ཡི་ས་ལ་འགོད་པར་ཤོག

ཞོ་སྟོན་དུས་ཆེན།བྱམས་པ་གདན་འདྲེན།འོང་སྐོར་དུས་ཆེན།འཛམ་གླིང་སྤྱི་བསངས། ཆོ་འཕྲུལ་སྨོན་ལམ་ཆེན་མོ།དགའ་ལྡན་ལྔ་མཆོད།